Saturday, December 30, 2006

قلبك !

loving_the_sin___wrath_by_suzi9mm

قلبك ماعادش ملكك ..مادام عشقتك

قلبك ماعادش ملكك .. مادام سكنتك

مادام باحبك , خلاص بقى قلبى أنا

قلبك ماعادش عندك .. مابقاش يخصّك

قلبك ماعادش عندك .. مادام باحسّك

خدته وأخدتك عندى أنا

 

ومستحيل إنك .. تبعد حبيب عنّك

حبيب لقى منّك .. كل اللى يتمناه

ومستحيل تهرب .. ارتاح بقى وقرّب

أصل اللى بيحبّك .. ماعرفش كلمة لا

 

قلبك .. بقى حتّه منى.. ارضى وطاوعنى

جوّاك سامعنى .. وليه مانعنا نعيش حياتنا وحبّنا؟

وحدك .. وأنا لوحدى .. عمّال يعدّى وقتك ووقتى

عايزاك , عايزنى .. طب ليه نضيّع عمرنا؟

 

أنغام طبعا

أهلا بالعيد

 

كل سنه واحنا طيبين

وربنا يجعل العيد ده آخر عيد ييجى علينا وفينا آل مبارك

و طبعا مافيش مناسبة تنفع للأغنيه دى غير العيد

كل سنة واحنا طيبين كمان مرّه

ولا عزاء للخرفان !

Friday, December 29, 2006

يابخت من كان صاحبه عنده مكتبة !

بالظبط ياجماعه

مجموعة كتب تانيه من عند صاحبى اللى فاتح مكتبة :)

والمرّة دى السعر أكتر من لُقطة , حاجه برُخص التراب كده

حاولت أحوش نفسى بصراحة من إنى أكتبهم هنا إشفاقا على الغلابة اللى ياإما مابيلاقوش الحاجات دى أو بيلاقوها غالية قوى , بس أعمل إيه؟ . لازم أكتب كلّ يوم !!

وجت فى دماغى فكرة إنى أفتح صفحة 13 من كل كتاب فيهم وأنقل من الصفحة دى جمله هنا. ليه؟

علشان باحب رقم 13 , واحتمال يطلع فيها حاجه حلوه عن موضوع الكتاب

 

1- حديث الأربعاء ج2 الصادر عن دار المعارف. مجلد قطع كبير

طبعا للدكتور طه حسين . وص13 فيه فيها إيه؟

"

ويطول القول إذ أردنا أن نذكر أثر الاختلاط بين الأمم الأوربيه نفسها فى الآداب الأوربية الحديثة, وقد حُرم العرب هذا الاختلاط, فحُرم الأدب العربى نتيجته, وهى التجدد المنتج, ولهذا لم يعرف العرب من الشعر إلا ماورثوا من أهل البادية, فجهلوا الشعر القصصى, والشعر التمثيلى, وجهلوا من الشعر الغنائى نفسه فنونا كثيرة و ضروبا مختلفة , ومع هذا كلّه فقد تطوّر الشعر العربى, وتجدّد تجددا ما, فيجب علينا أن نعرف ماحقيقة هذا التجدد وماقيمته

"

 

2- كتاب الأخبار السّنيه فى الحروب الصليبية ل سيد على الحريرى

قطع كبير وصادر عام 1985 عن الزهراء للإعلام العربى وهو من منشورات بنك فيصل الإسلامى !

ص13 هنا يقع فيها إهداء الكتاب

" وها أنا الآن أعدت طبعه للمرّة الثانية غير آلٍ جهدا فى إخراجه على أحسن مايكون , وكأوثق ماأرّخ المؤرخون, ولكى تكون وقائعه أوقع فى النفس وراسخة فى الذهن, قد أضفت إليه شيئا كثيرا من صور الوقائع ورسوم الملوك والمحاربين ممن ورد ذكرهم به من المسلمين والصليبيين"

 

3- الحائط والدموع لأنيس منصور . ط2 فى يناير 73 عن دار الشروق

"

إن كنا قد نسينا, فاليهود قد كذبوا على العالم كلّه ...بأنفسهم, أى بأقلامهم وبأقلام غيرهم من الكتاب..

فإذا تحدثت عن الديانة اليهودية قالوا: بل اليهود ليسوا متعصّبين بل ولا متدينين.. فرئيس اسرائيل زلمان شازار, عندما دخل اليهود القدس فى حرب يونيو, ذهب إلى حائط المبكى وبكى وهويقبل أحجاره ومن حوله الجنود .. وكذلك فعل بن جوريون وموشى ديان وثلاثتهم ملحدون

"

 

4- موسم الهجرة إلى الشمال للطيب صالح

طبعة غريبة صادرة عن مكتبة الأسرة عام 1996

لماذا غريبة؟

لأنه قد كتب على الغلاف " الرواية التى منعتها السلطات السودانية" . نعم هكذا بالضبط !

وكأننا فى مصر المحروسة لم نصادر أبدا اى كتاب , لذا يحلّ لنا "معايرة" السودان الشقيق بأنه مازال غير ديمقراطى بما يكفى أو غير حضارى بما يسمح له بنشر مثل هذه الرواية التى ننشرها هنا فى مصر بهذه السهولة !!

ماعلينا, ص13 فيها إيه بقى ؟

فيها المقدّمة بتاع رجاء النقاش

" وأول مايلفت النظر بعد ذلك فى هذه الرواية, هو مايمكن أن نسميه بالموقف الحضارى للكاتب الفنان

ولايستطيع أن يصل إلى هذا الموقف إلا فنان ذو عقل واسع وقلب كبير وثقافة عالية, لأن صغار الفنانين ليس لهم موقف حضارى على الإطلاق"

 

5- هذه الدنيا . لأحمد بهاء الدين , عن سلسلة كتاب اليوم عام 1997

وفى ص13 جزء من مقال بعنوان  هل هناك مكان للحب؟

" إن التخلف الاقتصادى, وعدم مجاراة المجتمع لمطالب الناس المتزايدة ولوعيهم الذى ينمو, والفروق الهائلة بين الطبقات.. كل هذا يؤدى فى النهاية إلى ضيق الأرزاق , وضيق الصدور, وارتفاع موج العداوة على موج المحبة.. فى هذا الجو ستجد الابن ساخطا على أبيه. لأنه لايفهمه ولايعطيه مايريد. وستجد الأستاذ ساخطا مهملا لتلاميذه لأن المجتمع لايكافئه على جهده ولايوفّر له حياة معقولة مقابل هذا الجهد .. وستجد الشاب الناشىء ممزقا بين أحلام حياة رغدة وبين واقع حياة ضيقة مغبونة. إنه على الأقل ييأس من أن يتزوج ويؤسس لنفسه بيتا.. فييأس بالتالى من العلاقات المشروعة. ويلجأ إلى الانحراف.. وهكذا "

 

6- الزوج الأبدى ل دوستويفسكى . عن روايات الهلال فى سبتمبر 1977

" مامن رحلة يمكن أن تشفينى من هذه الأفكار المؤلمة بعد أن انبجست , إذا كنت إنسانا على شىء من الشرف. يجب ألا أهرب من هذه الأفكار ... وفيم أهرب منها؟ "

 

7- فى النفس والمجتمع ل محمد قطب . عن دار الشروق عام 1983

" لأى معنى نعيش ؟

هل كل همنا أن نبدد طاقتنا الحيوية فى متاع الجسد , أو نتصارع كالوحوش على الغلبة والسلطان؟

أو لشىء أعلى من ذلك نعيش؟

نستمتع بمتعة الجسد, ونتطلع مع ذلك إلى آفاق أخرى, آفاق تربط بين البشر برباط الأخوة وتهدف إلى الجمال؟ الجمال فى كل شىء. جمال التعبير, وجمال الشعور. لافى عالم الفن المحدود وحده ولكن فى نطاق الحياة كله ...

وهل أجمل شعورا فى النفس من الحب؟ وأجمل تعبيرا من الخير فى الحياة؟

والوسيلة هى العقيدة .."

 

8- د. طه حسين .. قاهر الظلام  , لكمال الملاخ عن دار الكتاب الجديد فى 7 ديسمبر 1973

"

ومنذ أيام كان الحوار يجمعنى ذات صباح مع توفيق الحكيم

سألنى عما أفكر فيه بعد أن رآنى ساهما بعض الشىء؟

- غريبة .. أغلب الذين نادوا بالثقافة الأوربية. خاصة الذين بشروا بباريس وبالفكر الفرنسى هم من صعيد مصر. عندك رفاعة الطهطاوى من طهطا وهو الذى قدم تلخيص الإبريز إلى تخليص باريس , وهو الذى ترجم دستور فرنسا قبيل منتصف القرن الماضى.

وعندك المنفلوطى من منفلوط . وهو الذى قدم الرومانسية الأوربية وترجم كثيرا من أمهات أدب فرنسا وفكرها ورواياتها مثل النظرات و ماجدولين والعبرات ..

وعندك عباس محمود العقاد الذى بحث وحلل فى الفكر الأوربى خاصة الإنجليزى والألمانى وأحمد الصاوى محمد .. الذى وصف لنا مدينة النور والجمال: باريس

كلاهما من أسوان. وعندك مصطفى عبدالرازق ثم طه حسين من المنيا.. وأثرها واضح كل الوضوح فى حركة التطور واللاتوقف للبحث عن آفاق عالمية جديدة للفكر يمكن أن نطل عليها ونفيد منها..من عالم يتحرك إلى بعيد ..

إن عالمنا يتحرك حاليا حتى خارج آفاقنا المرئية.

ويرد الحكيم مبتسما: .. إلا أنا .. فأنا من مواليد الاسكندرية

"

بس !!

وبكام بقى كل الكتب دى ؟

أربعون جنيها مصريا فقط لاغير :)

آه والله 40 جنيه

احسدوا بقى براحتكم :)

Thursday, December 28, 2006

ذكريات

تدوينة النهارده هى التسجيل ده

الأخ المطرب اللى فيها اتجوّز خلاص وماعدناش بنسمع له صوت

والتانى فى السعودية وهييجى يتجوّز !

والأخ نبيل شعيل اللى فى الآخر ده لسّه عايز يسافر علشان برضه يبقى يتجوّز !!

.....

نلاحظ إن كل أصحابى عندهم نزعة انتحارية غير مفهومة !

 

وباهدى الأغنيه دى لدراز فى فرنسا وإبراهيم فى السعوديه وعلاء عند المشروع وياسر فى الدار اللى جنبى ولأسرة البرنامج وموقع بلوجرز والسادة المستمعين

Wednesday, December 27, 2006

Somebody Says... I Made You !

Spoken like a souvenir

Touch all of your childhood fears

Keep them at a gentle pace

Closer now to feel their heat

 

Somebody says,

Somebody says,

Somebody says

I love you

 

All those years you never knew

All the things that I could do

I keep them in a hidden place

So I can rub them in your face

 

Somebody says,

Somebody Says,

Somebody says

I made you

I made you,

I made you,

I made you.

 

Breed!

Breed on your own!

You're always alone

You suffering clone.

 

Maybe you're not good enough

Good enough to make me blush

So many reasons I can find

To kill this little clone of mine

I hold your grace

Like a broken vase

You've been replaced

Cuz I made you

 

Somebody says,

Somebody says

 

Breed!

Breed on your own!

You're always alone

You suffering clone

 

I made you

 

Breed, breed on your own

You're always alone

You suffering clone

 

Somebody says

Somebody says

Somebody says

I love you

 

Somebody says

Somebody says

Somebody says

I love you

 

 

Snake_River_Conspiracy_-_Breed

Tuesday, December 26, 2006

مقتطفات من محمد عفيفى

الزوجان العاقلان هما اللذان يأويان إلى الفراش فى المساء ويغادرانه فى الصباح, أما الجاهلان فهما اللذان يأويان إليه فى المساء وفى الصباح يغادرونه.

********

قصة قصيرة: يحكى أن آنسة ركبت الأتوبيس ولم تنزل منه كذلك.

********

وفقا لنوع من المنطق يمكننا القول بأن الفلاح أسعد حظا من ساكن العاصمة. فلست أذكر أننى رأيت عشرين فلاحا وقد تكدّسوا جميعا فوق ظهر حمار واحد

********

لماذا طلبت الطلاق من زوجها؟ لأنها رأته نازلا- بالرغم من أن عنده سيارة- من أتوبيس مزدحم.

********

الحب هو تلك العاطفة السامية التى تجعلنا نتزوج وننجب الأطفال وننشىء الأسرة, وفى ليالى الشتاء الباردة نجتمع حول المدفأة لاعنين فى سرنا آباء الذى كان السبب!

********

حاول بطريقة ما أن تحصل على صورة لخطيبتك ساعة صحوها فى الصباح, فذلك هو المنظر الذى سوف تصطبح به مدى الحياة.

********

افترض فى زوجتك المقبلة كافة عيوب الدنيا, وكل عيب تفتقده هو كسب أكيد لك.

********

كثيرا مايصاب العريس بصدمة شديدة بعد الزواج إذا تزوج عروسة متخيلا إياها فى حجرة واحدة من حجرات المنزل فإذا بها موجودة فى كافة الحجرات.

********

أحيانا ينتابنى شعور صبيانى أننى ناجح فى حياتى, ثم يحدث مايستدعى أن أفتح المحفظة.

********

دائما أقول لنفسى أننى فى ذات يوم سوف أنجز كذا وكيت, وهى عادة سخيفة لابد أن أتخلّص منها ذات يوم.

********

يبدو أننى لم أستمتع بحياتى كما ينبغى, فهل تصدّق أننى لم أتلق حتى اليوم صفعة واحدة من أية أنثى؟

********

هناك مؤلفات كثيرة يجب أن تترجم إلى اللغة العربية, ومن بينها مجلة المجمع اللغوى.

********

قد يكون صوت الحمار قبيحا, لكنه هو الآخر محتاج إلى أن يعبر عن نفسه.

********

لست فى حاجة إلى بحث يحدثنى عن الأسباب التى من أجلها ينتحر الناس, وإنما عن الأسباب التى من أجلها لايفعلون.

********

بعض الناس يحبون أن يتساءلوا هل هناك حياة بعد الموت؟ وأحب من جانبى أن أضيف هذا السؤال. وهل هناك حياة قبله؟

 

من كتاب للكبار فقط

Monday, December 25, 2006

إذا كنت وزيرا .. فكن ذكورا

فى جريدة الأهرام بتاريخ أمس جاء الآتى

"

الرئيس مبارك بدأ حديثه بالتطرق إلى هذه النقطة والأنشطة الطلابيه وتم التطرق إلى ماحدث بجامعة الأزهر والمحاولات التى سبقتها فى بعض الجامعات الأخرى مثل جامعة عين شمس. وأضاف هلال: إننا قد تصدّينا لمثل هذه المحاولات بقوة وحزم ولن نسمح بالخروج عن الشرعية , وإننا أكدنا على ذلك كم أكده الرئيس مبارك عدة مرات من أنه لاخروج عن  الشرعية سواء داخل الجامعات أو خارجها. وأكد وزير التعليم العالى أن الأمن لايتدخل داخل الجامعات مشيرا إلى أن الأمن لم يتدخّل فيما حدث فى جامعة عين شمس لدرجة أن الرأى العام وجّه لوما لعدم تدخل الأمن وأوضح أن الأمن لايتدخل داخل الجامعات إلا بطلب من رئيس الجامعة إذا دعت الحاجة لذلك.

كما أوضح هانى هلال أنه لم تكن هناك ضرورة لتدخل الأمن فى حرم الجامعات ولن يستعان به مستقبلا لأن أعضاء هيئة التدريس والطلاب على وعى كامل بضرورة الحفاظ على الشرعية

"

 

يعنى الأمن لم يتدخّل فى عين شمس مع أنهم تصدّوا بقوّة وحزم كيلا يسمحوا بالخروج عن الشرعية. أمال تصدّوا إزاى بقوّة وحزم ؟

وليه التأكيد على أنه لن يستعان به مستقبلا إذا لم يكن قد تم ويتم الاستعانة به سابقا وحاليا ؟

Sunday, December 24, 2006

سؤالين وحته ...

اشتريت من فترة كتاب ظريف اسمه " هؤلاء حاورهم مفيد فوزى" فيه حوارات لمفيد مع شوية شخصيات فيه منها المحترم ومنها الرئيس بس كلهم مشهورين

مفيد فوزى رغم إنه فى رأيى أوفر شويتين و"عايش الدور" 3 شويات بس ساعات له حتت حلوه وده اللى خلانى أشترى الكتاب , خصوصا إن أول حوار كان مع مبارك باشا كعب الغزال

الحوار قديم لأن الكتاب صدر سنة 1990 بس برضه حبّيت أنقل سؤالين هنا إجابات مبارك فيهم محتاجه شويّة تأنى ..

قلت للرئيس: فى ساحة العمل العام , هل تستطيع أن تكشف وتفطن للمتحذلقين والمنافقين والكلامنجية والمزايدين؟

 

قال مبارك: لاتقلق, إنهم واضحون أمامى وضوح الشمس . نعم, أكشفهم بسهولة وأفطن لهم بلا أى عناء. أعرف (اللى ييجى يتنطط ويقول كلمتين يريّحنى, أسأله فى نهاية كلامه : إنت قصدك إيه؟) وربما أضحك, لكنى أفهم مغزى هذه الألعاب , وهذه النوعيات تكشف نفسها من كلامها ومن سلوكها !

 

قلت للرئيس : عفوا, دار نقاش فى الصحف عن فيلم تسجيلى للمخرج الفنان يوسف شاهين عرضه فى مهرجان دولى.. أى خارج مصر. الفيلم بعنوان (القاهرة منوّرة بأهلها) وقد أظهر سلبيات مصر بالكاميرا , وكان محل نقد بعض الأقلام وهللت أقلام أخرى لحريّة الفنان فى التعبير . أنا أسأل السيد رئيس الجمهورية, هل أنت مع حريّة تعبير الفنان وإلى أى مدى؟

 

قال مبارك: فنان مصر, هو مواطن مصرى بالدرجة الأولى . وأنا لاأشكّ فى وطنيته , ولابد أن يراعى الفنان مصلحة بلده وسمعتها. هذا هو المدى الذى تتوقف عنده حريّة التعبير. مصلحة مصر واسم مصر. وإذا كان الفيلم قد عُرض فى مصر وعليه بعض النقد فلامانع مادام لايضر بالصالح الوطنى. أما إذا كان الفيلم (طلع برّه محدّش يعرف عنّه حاجه واتعرّض للإساءه للبلد, فأظن إن الرأى العام يدين مثل هذا التصرّف) حريّة التعبير لها حدود وليست لآخر مدى كما يتصوّر البعض .كل شىء له حدود. حياة الإنسان لها حدود. الحريّة لها حدود وهى ألا تضر بالآخرين. لو أن فنانا أمريكيا خرج وعمل فيلما بدون علم السلطات الأمريكيه , الصحافة (تبهدله). أنا لاأوافق على فن يسىء للبلد, وأيضا لاأصادر حريّة التعبير. من حق الفنان أن يفكر كما يشاء, ولكن تظل مصلحة مصر العليا فى وجدانه. فلا يشوهها باسم الفن

 

دول كانوا السؤالين أما الحتّة فهى اللى ختم بيها الأستاذ مفيد حواره

 

ولم أشأ أن أصف مبارك أنه (الأوحد)و (الملهم) و(الفلاح الأول والعامل الأول) ولكنى سأقول فى إيجاز شديد "مبارك مصر" .. نعم, مبارك لمصر بهذا الرجل لأسباب واعية يعرفها المصريون جيدا . فلا(أحلام امبراطورية واسعة) تسكن رأس مبارك , ولا(أحلام رفاهية) تعشش فى صدره . إنه مسكون بمصر, مهموم بها . إنه الطيار الكفء الذى يقود طائرة وطن ليهبط بها فى مطار الأمان. وبعد , لقد كنت أجرى حوارا مع "مواطن مصرى" مخلص بدرجة رئيس جمهورية .

 

الحقيقة الحتّة الأخيرة دى فكّرتنى بمقال جوّى للكاتب اللوذعى إكسلنت كات عن رحلة الرئيس الأخيرة اللى كانت مش فاكر فين إن الناس -الأشرار- الوحشين بيلسّنوا على سفريات السيد الرئيس وطيّارة السيد الرئيس فى حين إن الرئيس -ولامؤاخذه- غلبان ياعينى وطيارته قديمه كُهنة ماتفرقش عن أى طيارة تويوتا أو بيجو بتاع واحد من عامة الشعب وإن الفرق بينها وبين أى طيارة ركاب عادية غن ترتيب الكراسى فيها مختلف !!

ويادوب فيها حتّة سرير -من غير مُلّة حتى- يمدّد عليه السيد الرئيس ويفرد ضهره ساعتين بين كل دولة والتانية , ماإنتوا عارفين إنه صاحب مرض ولسّه عامل عمليه فى ألمانيا مابقالوش سنتين وكُتر السفر مش كويّس عشان صحّة سيادته . بس كلّه عشان الشعب

وأنا لست مذيعا , أنا محاورا !!

Saturday, December 23, 2006

ونواصل التنفيذ

 

أنا كنت نسيت أصلا حكاية التدوين كل يوم دى , بس افتكرت فجأة وأنا جاى أقعد على الكمبيوتر دلوقتى

المهم آدى كليب بتاع عايز أروّح علشان خاطر sha3'af  :)

Friday, December 22, 2006

ياعينى ع العزّ ..

ودى باقى أغانى فيلم المليونير

 

ع الملوخيّه !! , وفى مقال آخر ياعينى ع العزّ !

 

ودى الأغنيه اللى كانت بتغنّيها الزبونه بتاع الكورال فى فيلم بنات وسط البلد بتاع

هتروح فين وتسيبنى لوحدى , أغسل حلل البيت بدموعى !.. وفى مقال آخر عايز أروّح

 

والتالته هى الاستعراض الجميل بتاع محشى كرنب عليكى اللعنه ! يعنى غلطنا فى البخارى ؟ .. أو شارم بارم

Thursday, December 21, 2006

وسّع .. العقلاااااااااااااء

والبداية مع العقلاء لاسماعيل يس

وبإذن الله هاجيب باقى أغانى فيلم المليونير عن قريب

عسى أن تكون بداية

فى إطار المعركة المستمرة بينى وبين عوارض الاكتئاب قررت اليوم أن أواظب على الكتابة هنا بشكل يومى مهما حدث -فيما عدا انقطاع الكهرباء أو النت بالطبع- حتى وإن لم يكن هناك ماأكتبه ..

من الطبيعى أن هذا الإجراء لن يضفى على المدونة الكثير من االثراء نظرا لأن عدد البوستات سيكون فى الليمون على حساب المضمون , لكن هذه ليست مشكلة فلاأعتقد أن هناك مضمونا لهذه المدوّنة أصلا :)

دى بس بتاعه كده بافضفض فيها لأن الكسل بيمنعنى إنى أفضفض بالورقة والقلم زى زمان , وظروف الدنيا منعتنى من الفضفضة باللسان ... ده من الآخر دور البتاعه دى

صحيح إن فيه ناس بتيجى وبتطل على اللى أنا باكتبه وصحيح إن أغلب الناس دول بييجوا المدوّنة علشان أغنية أميرة بتاع ياشمس غيبى :) بس فيه ناس -ماأعرفش ليه الحقيقة- بتيجى هنا علشان تقرأ

لما لفيت النهاردة كده فى شوية مدونات من اللى ساسو حاطّاهم فى المدونة بتاعتها زى مدونات قلم جاف أو مدونة عايزة تتجوز اتبسطت فعلا وكنت فى منتهى النشوة

قلم جاف فى مدوناته الثلاثة بيناقش قضايا مهمة جدا جدا وبأسلوب ممتاز وروح الدعابة عنده بتخفف من قسوة القضايا اللى بيناقشها , وبرايد دمها شربات .. ماتقدرش تمسك نفسك من الضحك من خفة دمها

الاتنين دول بالذات كنت معاهم فى ساعة الاكتئاب التى تسبق الفجر

تخيّلت نفسى وأنا باتصفّح مدونتى دى بقى لو كان بيكتبها حد تانى غيرى , كنت هادخلها ؟

أيوه , هادخل أنزل الأغنيتين وممكن قصيدة تشدنى , أما الفضفضة دى فكلام مالوش لازمة ومايهمش غير صاحبه !

انبسطت من النتيجة دى جدا ^_^

عز الطلب , صحيح أنا نفسى أكتب زى الناس دى ويبقى دمى خفيف وأسلوبى متماسك زيّهم بس فى المرحلة الحالية أنا راضى بإن المدونة دى تبقى سمك لبن تمر هندى كده

أنا كده دلوقتى

اكتئاب على سياسه على تفاهة على سخط على كتب على أفلام وأغانى على طب على حالة من معاناة الزحام والخنقة اللى فى كل حاجه دلوقتى وطبعا على شوية صور !

ويهمنى إن المدونة دى تبقى صورة طبق الأصل منى , ده هدفى

أحاول أندمج بيها مع ناس تانية , أعالج بيها أمراضى النفسيه ,أسجل بيها حياتى أو فترة منها وطبعا حاجه أفضفض فيها كل ماأبقى زهقان

..........

مش عارف بصراحه إيه كل اللى أنا كتبته فوق ده وإذا كان الكلام متماسك وللا لأ ,لأنى مانمتش بقى لى يومين بس المهم إنى قلت أهم نقطة وهى قرارى بالتدوين يوميا لأى حاجه فى أى حاجه بدافع العلاج ومقاومة الاكتئاب مع شويّة طراطيش كلام مالهمش لازمه كالعادة

غالبا هابقى أتكلم فى كل اللى اتكلّمت فيه ده تانى , بس هاسيب اللخبطة اللى فوق دى برضه ومش هاحذفها - غالبا برضه كنوع من العلاج والمواجهة-

ولنبدأ ...

Monday, December 18, 2006

Isn't That What Love Supposed To Do ?!

  

Make it go away or make it better

Isn't that what love supposed to do?

Make it go away or make it better

Cause I would do either one for you

 

This is not the way you should see me

This is not the face I recognize

Could I lay my head down here for a moment?

Would you sing to me like I'm your child?

 

Cause I'm not angry I'm not crying

I'm just in over my head

You could be the angel that stayed on my shoulder

When all of the other angels left

 

Make it go away

Cause I am weak and

This is more than one should have to take

If you do this for me then I will promise

I'll make it go away for you someday

 

There are reasons with silver linings

There are lessons but I don't care

Cause I just need a hand that I can hold onto

When it's darker than death out there

 

Oh, and I'm so cold

And so far away from my home

But tonight you're

You're where I belong

You're everything right

When I'm everything wrong

 

So make it go away or make it better

Isn't that what loves supposed to do?

Just make it go away or make it better

Cause I would do either one for you

 

مش محتاج أتكلم عن الأغنيه

هاقول بس إنها بصوت Holly Cole

وإن رابط تحميلها من هنا

Saturday, December 16, 2006

NightMares

هل للمعتّق خوفه أن يقلعا؟
قد أثقلته رؤاه لمّا استجمعا
طيراً على قمم التذكّر وزّعا
ناداه فارتجف المفجع أدمعا
وأطلّ وجهُ الرعب..
جدباً ..مُفزعـا

محمد دراز

بصراحه

لأ , مش أنا اللى هاتكلّم ..

دى مجموعة مقالات لمحمد حسنين هيكل

كانت مجلّة أونلاين نزّلتها من زمااااااان كهديّة مع عدد من أعدادها

صحيح المجلّه كانت زىّ قلّتها وغير مفيده على الإطلاق ,بس الاسطوانات اللى كانت معاها كانت فعلا كويّسه ..

المهم -بما إنى باحب هيكل- قلت أرفع الاسطوانه دى للى يحب يقرأمقالات هيكل متجمّعه ومتصنّفه بصوره ممتازه حسب الحقبة الزمنية

يمكن تحميل الاسطوانة من هذا الرابط

Monday, December 11, 2006

النهارده

الصبح وأنا رايح الكليّه كان سوّاق الميكروباص مشغّل خطبه لمحمد حسين يعقوب

كانت الخطبه فى نهايتها تقريبا بخصوص نُصرةّ رسولنا تجاه الرسوم الدانمركيه والهجوم الغربى

كان بيوصى بالمقاطعه , قلت ماشى

وبعدين قال مش كفايه المقاطعه الاقتصاديه , لازم كمان المقاطعة الفكريه  !

الفار لعب فى عبّى .. وقلت إن اللى بعد الكلمة دى أكيد كلام مالوش لازمه

وصدق ظنّى بكل أسف

المثال الأول اللى ضربه إن الشاب يبقى مطلق لحيته ولابس تى شيرت على بنطلون ديرتى .. وده فى رأيه منظر مش سليم ...

بصراحه عدّيتها وقلت مش مشكله

المثال التانى بقى كان نكته

إن تكون واحده منقّبه , أكرّر منقـّبه ومكياجها تقيل !!!

قلت إزاى ؟ دى منقـّبه ياعم الشيخ ..

ماسكتش الصراحه وراح ضاربنى مثال تانى كان كارثه

إن بيوت المسلمين اليومين دول بقوا يقلّدوا فيها الفكر الغربى اللى المفروض نقاطعه

إزاى يامولانا؟

مطابخهم مفتوحه والصاله بتبقى واسعه !!!!!!!!!!!!!!!!!!!!!

نعم !

وهىّ مطابخ المسلمين لازم تبقى مقفوله وصالاتهم ضيّقه علشان يبقوا ملتزمين ياسيدنا الشيخ؟

إيه العبط والغباء ده؟

أنا ماكنتش قادر أمسك أعصابى بصراحه فى العربيه ...

والحمد لله إن الخطبه كانت فى نهايتها وإلا كان ممكن أتخانق مع أى حدّ

المصيبه إن الشيخ محمد حسين يعقوب له جماهيريه كبيره خصوصا بين الشباب دلوقتى

ومش السلفيين بس

وكل دول ماأعتقدش إن حدّ فيهم بيناقش الكلام اللى الراجل ده بيقوله فى خطبه أو حتى بيفكّر فيه

وده غالبا بشسبب أسلوب الشيخ نفسه اللى بيعتمدفى أغلبه على الخلط بين الأمور ووضع المستمع دائما فى موقف الخاطىء المدافع عن نفسه وعن عصيانه , فهيتكلم إزاى وللا بأى منطق

ده مذنب جاهز !

حسبى الله ونعم الوكيل

Saturday, December 09, 2006

رأى مهم

"

يا صديقي العزيز علينا أن نرجع لماذا نزل الاسلام ما يحدث الان هو انك تبتعد عن رساله الاسلام الحقيقية شيئا فشيئا و كأن الاسلام قد نزل حتي- أنا اسف يعني- نرتدي جلاليب ونطلق لحانا و نغطي كافة زوجاتنا,, الاسلام لم ينزل من أجل هذا الاسلام أصلا كان ثورة اجتماعية و انسانية تخيل ان احنا- طبعا احنا نقدم في المسلسلات المتخلفة التي نقدمها نقدم قريش علي انهم كلهم من الأشرار و حثالة البشر دا غير صحيح قريش كانت تقدم أرستقراطية عربية حقيقية,, هذه الأرستقراطية أنت طلبت منها ان العبد- مش ليس الفقير كلن فيه نظام عبودى فالعبد دا لا يذكر اطلاقا- له ما لك و عليه ما عليك هذا العبد يقف بجوارك في الصلاة رجلا برجل و قد يكون أفضل منك عند الله سبحانه و تعالي هذه هى الثورة الحقيقية التي قدمها الاسلام ,, ظلت المفاهيم الثورية الاجتماعية و الانسانية التي قدمها الاسلام تضمحل شيئا فشيئا في هذه القراءة علي يد فقهاء السلاطين حتي تحول الامر الي شكل . انظر ماذا يحدث الان من لا يقف مع جزب الله الان هتجد شئ مدهش جدا .. النظام السعودى لا يقف مع حزب الله بالعكس هو هاجمه واوعز للاسف الى بعض الفقهاء انهم قالو ا هذه الفتوى الخائبه ان دول شيعه . هذا النظام السعودى فى علاقات المال والاقتصاد هو تابع كامل للولايات المتحده وهذه الولايات المتحده التى تقتلنا وتقتل ابنائنا واطفالنا وتعادى الاسلام وتعادى المسلمين فى نفس الوقت هذا النظام السعودى لا يطيق ان تكشف المراه شعرها ولكن الامراء يفعلون ما يشاءون اى واحد راح السعوديه يعرف الكلام ده .. الامريكى يفعل ما يشاء فى السعوديه انما المصرى لأ - النظام السعودى بيتبنى نظام لا يوجد ولا فى القرون الوسطى اللى هو نظام الكفيل اللى هو سيادتك تروح تشتغل كطبيب فيه واحد افندى قاعد بيشرب شيشه بياخد نص فلوسك .. ليه ؟ علشان هو سعودى وانت مش سعودى . هذا هو التطبيق الحقيقى لفهم متخلف للاسلام ابعده عن الفهم الحقيقى .

"

ماسبق هو جزء من حوار للدكتور علاء الأسوانى الموجود كاملا على هذا الرابط

نشيد مصر ..

صحيح الأغنيه دى أغنيه وطنيه

وصحيح إنها اتغنّت فى عهد مبارك

وصحيح برضه إن ناس كتير -أنا كنت منهم زمان- بيتخنقوا من محمود ياسين !!

وناس تانيين مابيحبوش ورده -مش فاهم إزاى !!- بس الأغنيه دى رغم اجتماع كل الحاجات دى فيها مختلفه

على الأقل بالنسبه لى

من ساعة ماسمعت "نشيد مصر" ده فى التليفزيون وأنا صغيّر عجبنى جدا جدا جدا

بالذات الاختلاف بين صوت محمود ياسين العميق فى إلقاء الأبيات الشعريه والتروّى فى اللحن -الكلمات ماكانتش تفرق معايا كتير فى السن ده - وبعدين النقله المفاجئه لصوت وردة العذب مع انطلاقه هادئه للّحن

فصحى محمود ياسين وبعدين عاميّة ورده

والاتنين واقفين على المسرح ووراهم أوركسترا كامل

فُتنت بهذا المشهد حقا !

فضلت طبعا مش طايل الأغنيه دى فى أى مكان لحدّ ماجت إذاعة الأغانى فى احتفالاتنا بأكتوبر السنه اللى فاتت -أو اللى قبلها مش فاكر كالعاده - وكان اليوم كلّه مخصّص للأغانى الوطنيه

طبعا كانت فرصه , رُحت مسجّل أغانى اليوم دهكلّه على الكمبيوتر وقعدت أفرّ فيهم لحدّ مالقيت كنزى الصغيّر ده :)

نشيـــــد مصــــــر

Sunday, December 03, 2006

ماكنتش باحب نيللى وأنا صغيّر ..

 

يمكن لأنها كانت دايما وجه العمله الآخر مع شيريهان ومعنى إن واحده فيهم تمثّل الفوازير إن التانيه مش هنشوفها فى رمضان ده

وبما إنى كنت باحب سيريهان من أيام ألف ليله وليله وهاندو وماندو وشاندو لحدّ حاجات ومحتاجات فكرهت نيللى !!

رغم إن نيللى عملت حاجات كتيره جميله للأطفال -ماعرفتش إنها جميله غير بعد ماكبرت- زى أوبريت اللعبه بتاع العبوامع بعض ماتتخانقوش !

بجدّ الأوبريت ده عبقرى ولما بافتكره دلوقتى باتمنى أشوفه تانى بأى طريقه وأنا كبير كده

والشغل اللى فيه كانمُحترم جدا جدا من أول العرايس والتحريك لحدّ الإخراج وكلمات الأوبريت وألحانه

 

حاجه تانيه ل نيللى عملتها فى فيلم من أفلامها كانت أغنية الفراشه من ألحان الشريعى تقريبا -مش متأكد - وكالعاده ماأعرفش من كلمات مين

المهم إنى -وإن كنت لسّه مابحبّش نيللى قوى يعنى - باحب الأغنيه دى جدا جدا وباحب تصويرها

رفعتها هنا للى عايز يسمعها وكتبتها للى مش فاكرها :)

 

كان فيه فراشه صغنططه .. مفرفشه ومزأططه

لابسه بلوزه منقطّه .. على جونله مخططه

منقطّه ومخطّطه

وسط الجنينه لمحتها وهىّ طايره فى الهوا

ناديتها ,بصّت تحتها .. قلتلها تيجى نلعب سوا؟

قالتلى طيب يااسمك إيه ..أنا هاستخبى وأختفى..

 فى أى مطرح ألتقيه .. وإن كنتى شاطره تعرفى

قلتلها طب يللا العبى ياأم جناحات ملوّنه

يللا ياحلوه جرّبى ,هتروحى فين منّى أنا؟

طارت وغابت فى الشجر.. وعند أشجار الليمون

غابت تمام عن النظر..  ولونها تاه بين الغصون

بصّيت بعينى ماشفتهاش .. من الشجر ماعرفتهاش

كان الورق ستر وغطا .. أنا قلت لأ, مابدّهاش!!

مدّيت إيديا للغصون وبسرعه هزّيتها قوى

لقيت جناح بألف لون بينفرد وينطوى

فضلت كتير متنطّطه وهىّ طايره مزأططه

أما فراشه زغنططه.. لابسه بلوزه منقطّه.. على جونلّه مخطّطه

 

رابط التحميل تانى

Friday, December 01, 2006

العلم لايُكيّل إنما الكتب لازم تُكيّل !!

اشتريت النهارده مجموعة كتب ممتازه دفعت فيها حوالى 50 جنيها وهو مايُعدّ مبلغا كبيرا نظرا لأنها كتب مستعمله وليست جديده , لكن مادفعنى للتضحية بهذا المبلغ أنها كتب ممتازه فعلا وحينما أتصفّحها الآن لاأندم كثيرا على شرائى لها ...

وبالطبع سأكتب أسماء الكتب من باب "التحنيس" أو إثارة الغيظ لمن لن يجد نسخة منها ^_^

- أولها كتاب "شخصيات لها تاريخ" للكاتب الكبير جلال أمين وهو الكتاب الذى أعتبره دُرّة مجموعة اليوم

- مذكرات نجيب الريحانى الصادره عن كتاب الهلال عام 1959

- أسرارالثورة المصرية..بواعثها الخفيه وأسبابها السيكولوجيه بقلم أنور السادات وتقديم الرئيس جمال عبدالناصر ...الصادره أسضا عن كتاب الهلال عام 1957

- معاويه بن أبى سفيان فى الميزان لعباس العقاد .. وصادرة -طبعا- عن كتاب الهلال عام 1956

- عن كتاب الهلال أيضا كتاب " أنــا" بقلم عباس العقاد عام 1964

- التصوير الفنى فى القرآن لسيد قطب وأعتقد أنه سيكون من أقيم الكتب التى اقتنيتها على الإطلاق

- مجرات الروح لجمال الغيطانى والتى تمثّل الجزء الخامس من يومياته المعلنه

- الناصر صلاح الدين للدكتور سعيد عبدالفتاح عاشور عن سلسلة أعلام العرب

- ثقافة وفن وحكايات ..تموت من الضحك ل محمد الرفاعى عن سلسلة مكتبة الأسره

- الولد الشقى ج2 لمحمود السعدنى

-ودُرّة أخرى هى " المقامر" لدوستويفسكى عن سلسلة روايات الهلال عام 1978

اممم ...

وبعد تسجيل هذه التفاصيل أجد أن هذا المبلغ قليل فعلا على هذه الكتب وإن كانت قديمة ..

حتى لو كانت مهترئة أيضا !!

أنا كده مبسوط :) ويابخت من بات كسبان ولاباتش مغلوب !