ده الفيديو بتاع البطلة سندس سنبل اللي فازت بالميدالية الذهبية في أوليمبياد الشباب.. لم شفته وشفت صورها فكرتني بزميلة في الكلية..
كنت في سنة ثالثة بعد مانجحت أخيرا في تانية بعد 3 محاولات واتعرفت على مجموعة جديدة من الزملاء كان منهم واحد غاوي تمثيل وحابب يجرب، فاشترك في فرقة مسرح الكلية وإدوله دور صغير كده لحارس مملوكي، وطبعا عزمنا نحضر المسرحية عشان نشجعه ونصقف له ونهيص بقى.. هو الصاحب له عند صاحبه إيه؟!
وفعلا رحنا وصقفنا له وهيصنا -كان منظره مسخرة في لبس المماليك :)- واتفرجنا بقى على المسرحية.. المسرحية كانت عادية لفرقة مسرح الكلية يعني.. لا هي رائعة بقى وجبارة والكلام ده، ولا برضه كانت حاجة أي كلام أو تافهة أو مسخرة -رغم إن فيه زملاء لينا قعدوا في وسط الجمهور يتريأوا ويقولوا إفيهات مزعجة! بس العرض نفسه كان معقول وفضلوا الممثلين ماسكين الشخصيات- وبطل المسرحية كان ممثل كويس مش وحش.. المفروض إنه كان ملك أو أمير -مش فاكر بالظبط- بيحاول يحكم بالعدل ويرد المظالم، لكن الشيطان بيحاول يغويه ويستحوذ عليه عشان يبقى ظالم ومفتري وما إلى ذلك..
القصة ساذجة ومباشرة ورغم إن البطل أداؤه كان كويس لكن مش لدرجة إنه يكون ممتع يعني، وأغلب الممثلين كانوا هواة مالهمش قوي في التمثيل، ولكن...
لحظة ظهور الشيطان على المسرح كانت حاجة تانية خالص!
كل المسرحية بممثلينها والإخراج البائس والقصة الساذجة وجمهور الكباريهات ده كوم، ولحظة دخول الممثلة اللي عملت دور الشيطان دي على المسرح كوم تاني!!
كانت عاملة مكياج وحواجب تقيلة ولابسة عباية حمراء وقرون صغيرة.. وكان جسمها مفرود وعملاق على المسرح.. ضحكتها والكاريزما اللي بتشع منها كانت أول تجربة حقيقية أحضرها لأداء مسرحي مبهر..
بتتحرك على المسرح بثقة، وأداءها على المسرح له هيبة وحواليها هالة كده من الثقة والكاريزما، كأني شايف الشيطان فعلا.. أداء مبهر جدا بالنسبة لي ساعتها وتجربة مش هانساها.. كان نفسي تتصور عشان أقدر أشوفها تاني، وإن كنت أشك في إن التصوير ممكن ينقل الحضور والكاريزما اللي الواحد كان حاسس بيها على المسرح..
طبعا أنا مكنتش شفت البنت دي خالص قبل كده ولا أعرف هي في دفعة إيه في الكلية ولا حاجة، أصلا كان بقى لي 3 سنين باروح الكلية ضيف يعني أيام الامتحانات، ودي كانت أول سنة مع الدفعة دي -للأسف سقطت في تالتة سنتها وكانت آخر سنة مع الدفعة دي برضه D: - بس بعد المسرحية بكام يوم كنا واقفين قصاد الكلية مع زميلنا ده، وبنتكلم عن المسرحية وقعدت أنا أمدح في البنت اللي عملت دور الشيطان وأمدخ أداءها وكاريزمتها على المسرح، فراح مشاور لي على مجموعة بنات جنبنا وقال لي هي اللي هناك دي!
اتفاجئت لما شفتها إنها بنت عادية.. جسمها طويل سنة أكتر من المعتاد، عريضة شوية، وشكلها عادي جدا.. مش جميلة جمال لافت -رغم إن عيونها على المسرح كانت أخاذة تحت الحواجب التقيلة- ولا قبيحة .. متوسطة الجمال بملامح عادية نوعا.. ماتلفتش نظرك أبدا لو شفتها في أي مكان..
كان نفسي أروح لها وأشيد بأداءها على المسرح وأقول لها أد إيه كان مبهر بالنسبة لي، بس مكنش ينفع للأسف.. طبيعتي الخجولة غير الاجتماعية بتخليني دايما متخوف إن حاجة زي كده ممكن تتفهم غلط - أو صح! لأننا كنا شباب برضه ومكنتش مرتبط أيامها- وعموما ماقابلتهاش تاني ولا كانت في السكشن بتاعي وحتى زميلنا نفسه بعد نهاية المسرحية مابقاش يروح لفريق المسرح قوي عشان كله اتزنق بقى في المذاكرة والفارما والباثولوجي.. الرعب المقيم في سنة ثالثة طب!
بس هي نفس الفكرة اللي لفتت انتباهي برضه في سندس..
بنت عادية جدا ممكن تقابلها في الشارع أو المدرج أو المترو.. ملامحها عادية.. تكوينها الخارجي برضه عادي مفيهوش حاجة مميزة قوي، لكن "تحت العباية حكاية" على رأي الإفيه قليل الأدب بس معناه هنا حقيقي جدا..
زميلتنا الطالبة العادية اللي مفيهاش أي حاجة مميزة غير إنها أطول سنة عن باقي البنات، طلعت غول على المسرح، وأتمنى تكون قدرت تواصل موهبتها دي وتنجح فيها ومايكونش مصيرها رسي في الآخر إنها تكون أخصائية باطنة وللا أطفال في مستشفى حكومي بائس بمرتب مايكملش 10 آلاف جنيه بعد ما خدت استشاري كمان!
وسندس اللي لو قابلتها صدفة في المترو مش تلفت انتباهي وسط باقي البنات اللي رايحين أو جايين من المدرسة، قادرة تلعب الكونج فو بالمهارة والإبداع والجدية اللي في الفيديو ده.. وبتجيب كمان دهب!
كنت من فترة مع بنتي في بطولة الجمهورية على مستوى المدارسة وشفت هناك أولاد وبنات بيتنافسوا في السباحة والكاراتية.. المنظر كان مفرح لما بتشوف الطلبة العاديين خالص وهم داخلين المجمع الأوليمبي اللي في المعادي ده، وفجأة بيتحولوا لما يلبسوا بدل الكاراتيه -أو يقلعوا الترنجات بالنسبة للشباب عشان السباحة!- أو ينزلوا حمام السباحة.. شخصيات تانية بتتولد قصاد عينك وكأنهم بيتحولوا كده زي الأبطال الخارقين!!
الموعبة والإبداع دول معجزات من ربنا والله
ويارب كل حد موهوب أو مبدع في أي مجال يلاقي فرصته ويبعد عنهم اللواءات رؤساء الاتحادات الرياضية وأشباههم من رؤساء مجالس النقابات اللي لابيرحموا ولا بيسيبوا رحمة ربنا تنزل!
