Friday, September 18, 2026

دخول مفاجئ لخبر سعيد

في وسط جولاتي وأنا باتمشي كده بين المدونات اليومين دول، فتحت بالصدفة بروفايل الصديقة العزيزة شغف بدلا من فتح مدونتها مباشرة كما اعتدت أن أفعل مع مدونات الأصدقاء عشان أطمن عليهم من بعيد لبعيد -like a shadow by your side بقى !!-..

 اتفاجئت إن عندها مدونة تانية عملتها باسمها من أكتر من سنة..

واتفاجئت تاني إنها فازت بالجائزة الأولى في مسابقة ساويرس للكتابة المسرحية عن نص "الباحث عن البهجة" ..

للأسف أنا بعيد شويتين عن مجال المسرح، فماعرفتش بالخبر وقتها.. ويمكن عدى عليا الخبر من غير ما آخد بالي من الاسم!

المهم إني عرفت دلوقتي وفرحان فعلا كأن أنا اللي فزت.. ولما قرأت الحوار على المدونة اكتشفت إنها بقت مسرحجية مخضرمة بسم الله ماشاء الله ^_^

يعني.. خبر مفاجئ تشوفه بعد أكتر من سنة عشان ينولك جرعة سعادة من الهوا :)

وإن شاء الله نجيب الكتاب في أقرب فرصة وندور سوا !



Thursday, September 17, 2026

مقدرش أكون جنبكم

 باحب الأغنية من أول ما سمعتها من كاظم، بس امبارح كنت باكتب في بوست هنا وباقاوم النوم، لقيتها جت في بالي بمعاني مش فاكرها ولهدف مش فاكره.. لأني ساعتها قلت هاكتب اسمها على درافت بس عشان ما أنساش.. وبعدين أحاول أشوفها بعدين.. ومقدرتش لا أكمل اللي كنت باكتبه ولا أفكر في حاجة، واتقلبت ونمت على طول..

النهارده بقى شفت العنوان، فقلت أبص كده أشوف الكلمات وأحاول أفتكر كنت عايز أتكلم عن إيه.. وفعلا شفت الكلمات، ولقيتني بانتبه لأول مرة للأغنية على بعضها.. القصة اللي بيحكيها هنا -بعذوبة وحسرة- عبدالوهاب محمد مش حاجة جديدة ولا صورة فريدة من نوعها -مش قوي يعني!- بس صياغة الكلمات ونقل المشاعر في كلمات بسيطة وسلسة زي "خطوتين من حنان" وللا " عيني مترغرغة" ..

المهم احنا مانعرفش إيه اللي حصل بعد خطوتين الحنان؟ 

سابته واتجوزت واحد تاني؟ عشان كده مابيطلبش القرب ولا بيسأل إزيكم؟

وللا هو اللي استندل معاها عشان كده مالوش عين يروح يسأل عليها بعد اللي عمله والدموع والحسرة مش سايباه؟

وليه مهتم برأي الجيران طيب؟ مايقولوا اللي يقولوه يا حاج عبد الوهاب!

الحقيقة مش مهم التفاصيل، لأن أيا كان السبب، فالحالة نفسها بتمر علينا كتير بعد فراق أي حبيب أظن..

حبيت الأغنية أكتر، وقلت هاكتبها برضه..


مقدرش أكون جنبكم ..
ولا أفوتش من حيكم ..
ما جيش طالب قربكم .. ولا بسال أزيكم
مقدرشي مقدرشي

بمرّ جنب الحيطان .. اللي شافتنا زمان
ماشيين بإيد شابكة إيد .. وبخطوتين من حنان
بمر شارد وحيد .. وأخاف تشوفني الجيران
يقولوا ماله اللي كان .. يمر دايما سعيد

أمشي هناك غصب عني .. وأفوت عليكم لأني..

مقدرش أكون جنبكم ..
ولا أفوتش من حيكم ..
ما جيش طالب قربكم .. ولا بسال أزيكم
مقدرشي مقدرشي

بمشي وأنا في سكتي .. بمد في خطوتي
أخاف إذا سبتها .. أقف تطول وقفتي
بالي في كلامي اتلغى .. وعيني مترغرغه
بدموعي وبحسرتي

أمشي هناك غصب عني .. وأفوت عليكم لأني..

مقدرش أكون جنبكم ..
ولا أفوتش من حيكم ..
ما جيش طالب قربكم .. ولا بسال أزيكم
مقدرشي مقدرشي



صحوة الموت ما أرى؟

أعز أصدقائي..

في أول سنين الكلية أحب إحدى زميلاتنا اللي كانت معانا في ثانوي/ بس راحت كلية تانية غيره.. 

كانت هي المبادرة بالإفصاح وكانت أكثر منه صراحة وجرأة على اتخاذ القرار.. وهو حبها فعلا وكتبها في شعره وكتب اسمها صراحة في قصيدة كتبهالها -كانت فاطمة أيضا مثل انكسار الروح-..  

كان الموضوع بعلم أهله بشكل ما.. وبادرت هي عشان عايزة الارتباط الرسمي حتى لو الظروف ماكانتش مناسبة ساعتها، لكن ظروفه وظروف أهله المادية وكونه لسه في أولى أو تانية مش فاكر ماكانتش تسمح إنه يعلقها وهو حتى مش عارف هيخليها تستنى كام سنة.. انتهت القصة باضطراره للسفر والعمل بالخارج وتزوجت هي قبل أن يسافر..

استمر في كتابة الشعر حتى عاد من السفر وتزوج، ثم بدأ بالعمل في وظيفة لإعالة أسرته وكف عن كتابة الشعر..
شذرات بين حين وآخر لا أكثر عشان ماكانش فيه وقت ولا بال ولا مزاج.. حياته من بعد ما اتجوز، مذاكرة وشغل..

الموضوع مامشيش في مصر قوي برضه فاضطر يسافر تاني ومعاه أسرته المرة دي.. والحمد لله حياته أصبحت مستقرة بما يكفي، اشترى بيت بعد الإيجار واشترى بيت تاني كنوع من الاستثمار، وعنده زوجة وأبناء بيحبهم وبيحبوه..
وفي حياته مفيش غير الشغل والمذاكرة.. مابيقرأش كتب زي الأول.. لاتاريخ ولا أدب ولا فلسفة ولا.. ولا.. مش عايز تشتيت بدون داعي.. مفيش وقت للدلع.. حياته كلها بهدف تأمين مستقبل أسرته وأولاده والنجاح في شغله..

لو لم يوفر لأسرته مايكفي ويفيض، فلن يفعل ذلك أحد آخر...

........................

قد يبدو إني باكتب الكلام ده مستنكرا أو حاجة..

إطلاقا!

أنا مقتنع إن الحياة العادية البسيطة هي حياة بطولية بما يكفي، خصوصا في الزمن العجوة اللي هارسنا ده..

بالعكس كمان، أنا كتير بالاحظ إني بقيت واخد نفس الاتجاه أغلب الوقت.. بقى لي تقريبا سنتين أو تلاتة ما أخدتش أجازة لنفسي من الشغل بره الأجازات الرسمية.. وباشتغل أصلا من البيت أغلب الأيام فوقتي كله تقريبا فيه تاسكات ورايا، عشان فيه حرية في اختيار الوقت اللي باشتغل فيه لو مفيش اجتماعات يعني.. 

مارحتش أجازة طويلة مع أسرتي لأي مكان - مصيف أو غيره- من أكتر من 4 سنين تقريبا - رحنا الملك لير السنة اللي فاتت، واتبسطنا كلنا، بس ده كان يوم واحد وأنا باتكلم على أجازة كام يوم-.. بيروحوا هم طبعا أحيانا مع صاحباتهم أو قرايبنا، لكن أنا باقعد إما أشوف باقي شغل ورايا محتاج له وقت .. أو أقعد أسترخي في اللاشيء وأنتهز فرصة للقراءة أو المشاهدة لحاجة من اللي راكنهم لنفسي واللي مابتعجبش مراتي وبنتي عادة..

طبعا الحمد لله في نعمة من ربنا.. عندي شغل كويس براتب كويس وعندي أسرة مثالية الحمد لله ..

بس حاسس إني باتسحب لدوامة مافيهاش مكان لإني أقعد مع نفسي وأفكر.. أو أعمل مشاريع نفسي أنفذها بس محتاجة وقت وتفرغ ومجهود.. 

فكرت كتير أسيب الشغل الخاص ده وأرجع للحكومي أو أشتغل فريلانس لحاجات باحب أعملها، بس فرق الدخل مش قليل وأنا أعقل من إني أعمل ده بإرادتي في الوقت اللي عايشينه ده.. بس احتمال أعملها لو ربنا مد في عمري 5 سنين كمان.. 

حاليا أنا دخلت في مشروع مع زملاء -كنت موجه له الجزء الأكبر من دخلي ال4 سنين اللي فاتوا- ومكمل بصورة معقولة.. هاحاول السنين الجاية أوفر اللي محتاجه تعليم بنتي وسفرها -لو احتاجت- بره مصر..

وبعدها مش هاستنى لحظة في الوظيفة إن شاء الله.. لو وصلت -بمعجزة- ل 50 سنة، فمعنى كده إن الوقت اللي فاضل لي -غالبا يعني.. الأعمار بيد الله- لقراءة اللي ناوي أقراه ومشاهدة اللي نفسي أتفرج عليه وكتابة اللي نفسي أكتبه، أقل من ربع الوقت اللي محتاجه.. فنحاول نلحق أي حاجة بقى!

بس المشكلة الحقيقية إن مع الوقت، الاهتمامات دي بتنسحب واحدة واحدة.. عند كل اختيار بيكون فيه الشغل -عشان أكل العيش والأسرة- قصاد القراءة أو المشاهدة أو الكتابة أو غيرهم، باختار الالتزام بالشغل بقرار واعي.. ساعات بيبقى فيه مجال -خصوصا في نهاية الأسبوع- لبعض التنفيس لو ماوراييش شغل متراكم أو مستعجل، بس ده مابيحصلش كتير غالبا لأن كمان فيه وقت لازم يكون لبنتي ومراتي وقرايبي من بعدهم..

النتيجة إن واحدة واحدة الواحد بيتحول لنسخة من صاحبي اللي حكيت عنه في الأول، وأنا مش حابب ده ليا..

ما أظنش هاكون سعيد.. ممكن ما أبقاش محتاج آه ومش حزين ومش متضايق كمان يمكن.. وده مش وحش، بس مش حابه

أظن ده اللي خلاني مضغوط وكان ممكن أنهار وقت ما كنت فاكر إن الصديقة اللي اتكلمت عنها من كام بوست ماتت أو جرى لها حاجة، وكمان اللي خلاني بعدها في الحالة اللي مريت بيها الكام يوم اللي فاتوا.. بغض النظر عن أثر الحلم اللي حكيته من سنتين..

وأنا مش عايز ده يتكرر

الكتابة هنا في الكام يوم اللي فاتوا، رغم إن التجربة لسه  في أولها، ساعدتني كثير .. وإن شاء الله ناوي أكمل فيها إلى أن يقضي الله أمرا..

توقعي الشخصي إنها مجرد تغريدة بجعة، بس إن شاء الله ظني ده يخيب وتغريدة البجعة دي تبقى الرواية اللي نفسي أكتبها ^_^

هاسيبك بقى -عزيزي القارئ التائه اللي مش عارف وصل لهنا إزاي- مع الصورة دي اللي مش فاهم بالظبط علاقتها بالموضوع، بس حاسس إنها لايقة على اللي مكتوب في البوست بشكل ما! 



Wednesday, September 16, 2026

زيارات شبحية

 

فيه حاجة عجيبة اكتشفتها بعد ما رجعت للكتابة في المدونة تاني.. لقيت إن عدد زوار المدونة يوميا مابيقلش عن 100 زائر مثلا!!

وأغلبهم على مواضيع قديمة متفرقة جدا، ومن دول مختلفة أغلبها مش عربي أصلا..

والشيء اللافت للانتباه، إني لقيت إن فيه زيارات كتير مصدرها روابط من مدونات تانية صديقة، رغم إن المدونات دي مش نشطة تماما من عشر سنين على الأقل وبعضها من أكتر من 15 سنة مانزلش بوست واحد حتى..

فمش عارف بقى ده أخونا الذكاء الصناعي بيتدرب وللا إيه بالظبط؟

عموما قررت أمنع محركات البحث من إنها تشوف مدونتي أو تظهرها كنتائج للبحث.. يمكن ده يقلل عدد الزوار الزائف ده.. كده كده مش هننزل إعلانات عليها يعني!

وكمان عشان فكرت أكتب شوية عن اللي مضايقني في البلد كام مرة كده زي زمان، بس قلقت شوية وقلت مش مستاهلة نتسجن في شوية بلح!

دلوقتي إن شاء الله ممكن أتشجع تاني شوية وأكتب كام تدوينة نويت عليهم.. غالبا أولهم هتكون عن فتحي والدريني إن شاء الله..


- طيب باكتب ده هنا دلوقتي ليه؟

- Because I can :)




ملحوظة: لاحظ المباشرة وفقر الخيال في العنوان! 



بالأمس .. كنت أنا الوحش

 تحذير:

هذه التدوينة كي أحاول أن أبدو بمظهر النادم النبيل .. أو النبيل، النادم على عثرة في طريق نبله الشفيف، سأتحدث عن إنسانيتي المرهفة ومظلوميتي الدائمة في هذا البلد الطارد أهله، وكيف حولتني البيئة المتوحشة إلى وحش لايرق لحال المستضعفين،عن كيف يؤرقني ضميري الحي حينما لاحظت مظاهر هذا التحول مما يدل على أن أصلي الطيب مازال طيبا وأن الحال لن ينتهي بي وحشا في النهاية بالطبع.. بل وكيف يمكن أن تراني مستقبلا في مكان الوحش بمظهر الوحش لكن لاتظن أبدا أن بداخلي وحشا، بل سيكون بداخلي عندئذ " ملاك طيب بجناحين"!

الموقف:

حاجز لزميلي كرسي في القطر .. بتيجي بنت صغيرة أبوها بيزقها عشان تقعد على الكرسي الفاضي جنبي وبيقول لي إنها معوقة.. أنا بامنعها تقعد وباقول لأبوها إن زميلي على الباب وجاي وده كرسيه .. البنت - بعد مامنعتها من إنها تقعد- بتبص لأبوها بحيرة ومش فاهمة تعمل إيه.. أنا باقول لأبوها إن القطر لسه فيه كراسي فاضية، وإنه يروح يشوف كرسي ولو مالقاش، يرجع لي تاني وأنا هاخليها تقعد.. الأب بيبص للكراسي ورا في إحباط وحيرة، وبياخد البنت وبيرجع ورا.. ومارجعليش تاني.


.....................................................................................

سجلت يوم 30 نوفمبر 2022 ونشرت اليوم كي أذكر نفسي بأنني لم أعد -وربما لم أكن يوما- طيبا إلى هذا الحد.

كتابتي على هذه المدونة -حينما أراجع بعض تدويناتي القديمة- يحوي أغلبها مايرسم لي صورة بريئة نوعا ما - يمكن ماعدا موضوع الفار لو حد فاكره- وأحيانا شجاعة أو بطولية، حتى لو كنت أعاني أو أراجع نفسي في بعض التدوينات فأنا الحالم المعذب في عالم لايفهمه ولايستطيع التعامل معه.

صحيح اللي بانشره الفترة دي قد يكشف بعضا من الخسة والنذالة -متزوج ويتحدث عن صديقة ومايحمله لها من مشاعر بريئة!.. هي والله بريئة فعلا..وعشان بريئة فعلا فأنا قلت "بعضا" من الخسة!!- وربما صفات أخرى تليق بي حسب مايتراءى لمن سيتصادف مروره هنا لو انتظر ليقرأ..

لكن برضه أنا باقدر أزرع ألفاظ أو تعبيرات في وسط كلامي مهما كان، تخلي فيه تعاطف - أو تفهم- لوجهة نظري أو رؤيتي أو حتى معايا أنا نفسي ككائن بشري بيحاول وبيفكر على الأقل..

التدوينة دي كتبتها عشان أفضل فاكر الموقف ده ما أنساهوش، لأني لو ماسجلتوش مكنتش هافتكره تاني أبدا.. عقلي الباطن هيدفنه زي ما دفن حاجات كتير سيئة عملتها وبعضها يمكن أكون تعمدتها - الاحتمال موجود لأني مش فاكر فعلا! - وأنا مكنتش عايز الموقف ده يتدفن..

وحتى لو هاكتب إني واعي إني كده باحاول أجمل نفسي بإن عندي ضمير بيراجعني فعلى الأقل أنا أحسن من غيري عشان ما أنساقش -ولا أدي للقاريء فرصة يقع هو كمان في نفس الفخ- لصياغة تحاول تخفف من تصرفي ده وقتها وأد إيه كان قاسي فعلا والمفروض مايحصلش من حد بيبص لنفسه -بفخر خفي- إنه بني آدم!

مش هازود دلوقتي بعد 4 سنين عشان أخفف من حدة الموقف أو ألتمس لنفسي أعذار، لأنها مهما كانت، فمفيش أي عذر قهري يمنعني من إني كنت أقوم وقتها أنا نفسي أو أناديه بعد ما اتحرك عشان يرجع ويقعد..

يمكن لو هاكتب ملحوظة جانبية فهتكون عن إني في قرارة نفسي توقعت -أو اتمنيت- إن يكون حد تاني أقل قسوة مني قام وخلاه يقعد أو البنت نفسها تكون قعدت. وإن التمني والتوقع ده حصل لأني باحاول أخفف عن نفسي حدة الشعور بالذنب وأقلل من قسوتي بإن مش مشكلة لو بقيت وحش أحيانا، لأن فيه دايما "بني آدمين" تانيين. لكن عقلي عارف كويس إن غالبا ده محصلش وإنهم اتبهدلوا في الزحمة شوية حلوين على ما القطر وصل.

 

Tuesday, September 15, 2026

مبروك جالك قلق

المرهق في موضوع التدوين اليومي ده - كان أول مرة ولقيته لسه مازال بعد عشرين سنة :( - هو إن أحيانا الوقت والمزاج مابيسمحش إنك لا تفكر في حاجة متماسكة ولا حتى يكون عندك وقت تصيغ كلامك بشكل ترتاح له أكتر..

تقريبا كأنك صحفي وعندك عمود يومي.. لازم بقى تقعد دايما تحضر في ماتريال عشان يبقى عندك مخزون كافي، لو ماكانش من المقالات فيبقى على الأقل من الأفكار، ولو حضرت الفكرة، فالباقي صنعة بقى زي ما وراني أبو الغيط الله يرحمه وكل واحد وشطارته في الصنعة..

من ناحية الأفكار فأصلا اليومين دول أنا في حالة مش طبيعية - حد فاكر إم تي إم ؟ - وعندي غزارة وتضارب بشع في الأفكار لدرجة إني محتاج أدور وأروح أقرأ الرواية وللا أشوف الفيلم بتاع Brain on fire  عشان حاسس العنوان بزيادة اليومين ولو الرواية بتتكلم عن حالة زي اللي الواحد فيها فأكيد هيكون مفيد أو ممتع أو الاتنين!

كمان الواحد - زي العادة دي الحقيقة- بيستغرب من تقلبات المشاعر والمزاج دي جدا.. يعني النهارده وأنا بافكر - ونفس الأفكار موجودة والله ونفس الهواجس ونفس زوايا الرؤية كمان- أنا في مزاج كويس وهادي وبابص لنفسي بنوع من الشفقة الحنونة على نفسي كإنسان بائس بيفكر في حاجات مش هيوصل منها لحاجة ومش مادية يقدر يمسكها ومفيش فيها حل ولا وضع هيرضيه في الآخر..ماهي الدنيا كده.. دار اختبار ومعاناة..

امبارح بقى - ويمكن أول امبارح كمان- كانت نفس الأفكار أيوة، لكن مع موجة وحشة وحنين كبيرة لحاجة مش مفهومة.. حالة وجدانية كده أشبه بعنوان الكتاب بتاع "شخصيات قلقة في الإسلام" ، يعني لو الواحد بمزاج معتدل، هيقدر يتأمل ويحلل طبيعة أفكاره ومشاعره بشكل أهدأ وحتى لو وصل لوضع صعب أو مؤلم، هيكون عنده من القدرة والسعة إنه يحاول يتقبله واحتمال كبير ينجح وحياته تكمل في مسار يكون فيه أقرب للراحة..

لكن القلق والتوتر وضيق الصدر والجوع الوحشي للمناقشة والحوار و-ساعات كمان- القرب أو الائتناس بحد.. ده مابيديش الواحد فرصة غير للتوجع والمعاناة..

بس للحق برضه، ساعات كتير من رحم المعاناة دي بيتولد - لو شخص موهوب بقى- إبداع وفن وإنجاز.. فممكن نقول إن المعاناة دي أشبه بمخاض مؤلم لكن نهايته سعيدة؟!

طيب لو المولود مات؟ أو الأم جالها عدوى أثناء المخاض؟ ماهي ممكن تموت نتيجة المعاناة دي حتى لو نتج عنها إبداع وقيمة حقيقية..

.......

هو عموما احنا عادة مابنختارش.. احنا كبشر بيتحكم في مزاجنا وحالتنا النفسية عوامل كتير أغلبها مش تحت سيطرتنا المباشرة - لأ، البروزاك والأدوية النفسية مش هتخليها تحت سيطرتنا- وغالبا مفيش حل غير إننا نسبح مع التيار ونحاول بس نقلل ال collateral damages اللي بتحصل نتيجة أفعالنا، ولما نكون بنعاني، مش لازم نخلي اللي حوالينا يعانوا معانا.. ولما الدنيا تصفى شوية، نحاول نساعد ونبسط اللي حوالينا شوية معانا ^_^




ملحوظة: العنوان - حقكوا عليا بس الإفيه ساعات بيحكم- بمناسبة إني قلت إن القلق والمعاناة ممكن يبقوا بمثابة مخاض ينتج عنه إبداع يعني وكده، وطبعا مقتبس من مسلسل شهير..

Monday, September 14, 2026

للتوثيق

 


أول قراءة لبنتي لرواية انكسار الروح كانت في سبتمبر 2026.. الشهر اللي هتكمل فيه 17 سنة!

من أول ما بدأت تقرأ روايات وأنا حاولت أخليها تقرأ ل محمد المنسي قنديل آه، لكن كنت بابعدها عن الرواية دي بالذات.. كنت مشفق عليها من الألم رغم عذوبته!

لكن في يوم لقيت الرواية في إيدها وخلصت بالفعل حوالي 50 صفحة أو حاجة..

مهما كبرت، هافضل شايفها "صغيرة ع الهم يا لوزة"، بس ماهو الحياة فيها أكتر بكتير من الروايات ومش هتقدر تحميها من كل -بالذات اللي إنت كنت، وكمان اللي هتكون، السبب فيه بصورة مباشرة!- اللي هيزعلها، فسيبها تعيش تجربتها وتكون ذكرياتها..

يمككن ده يحميها لما مش هتكون معاها..