اخترنا لك 9

 

ملء فراغ تدوينة أخرى

 فيه حاجات كتير ممكن أكتبها في تدوينة النهارده، لكني فاقد للشغف!

ممكن أتكلم عن كتاب بلال فضل الأخير اللي باقرؤه على أبجد "ساعات معهم" وبالذات حواره مع نجيب محفوظ ومحمود عوض وأتكلم عن بلال فضل نفسه شوية كمان..

ممكن أتكلم عن الأحلام الغريبة اللي فاكرها وأحكي واحد أو اتنين فيهم مغامرات وفانتازيا مسلية..

ممكن أتكلم عن الأكلات اللي باحبها وعلاقتي مع الأكل عموما وذكريات فترة الاغتراب الثانية وأول سكن منفرد والوجبة اليومية أم خمسة جنيه.. أو الطبخات اللي باحب أعملها لنفسي..

ممكن أتكلم عن يوسف السباعي وإنه كتب رواية خيال علمي ناس كتير أظن ماتعرفش حاجة عنها.. أصلا أظن إن أغلب الناس يعرفوه أكتر كأديب رومانسي مع إن روحه الحقيقية وقدراته ظهرت أكتر في كتاباته الساخرة، بالذات اللي من ذكرياته الشخصية..

ممكن أتكلم عن الشطرنج وإزاي مستوايا فيه بيمر بدورات غير مفهومة ففي يوم ألعب وأكسب -تقريبا- كل المباريات مهما كان مستوى اللي بيلاعبني أعلى مني بمراحل، وأيام تانية أخسر مهما كان اللي بيلاعبني أقل مني بكتير.. وممكن أتكلم عن التوتر في ماتش الشطرنج والمرة اللي لاعبت واحد كانت هزيمته سعيدة جدا بالنسبة له لأن كده الماتش خلص وقدر ياخد نفسه ويضحك بعد ما كان هيجيله سكتة قلبية تقريبا من التوتر أثناء الماتش..

ممكن أتكلم عن أغنية "كن صديقي" لماجدة الرومي .. كده من غير مناسبة.. أو بمناسبة! وساعتها هاتكلم عن عيون ماجدة الرومي الدامعة أبدا وأد إيه ده بيسحرني في وشها.. بتفكرني بعيون مديحة سالم شوية.. كانت بتديني نفس الإحساس إنها ممكن تبكي حالا.

ممكن أتكلم عن بيتر سيلرز والأفلام اللي باحبها له.. اتكلمت قبل كده زمان عن فيلم "أن تكون هناك" اللي اقتبست منه عنوان المدونة بتحريف بسيط، لكن ما اتكلمتش عن أفلام تانية كتير زي عودة الفهد الوردي اللي كان أول فيلم شفتهوله تقريبا في نادي السينما زمان.. 

ممكن أتكلم عن فتحي غانم وقراءتي الأولي للرجل الذي فقد ظله كمراهق، وبعدين بعدها بشوية لما قرأت له زينب والعرش وأد إيه حبيتها لدرجة إني اشتريت منها 4 أو 5 نسخ تقريبا..

ممكن أجيب صور من اللي صورتها وباحبها وأنشرها هنا.. أو الفيديو اللي صورته وأنا راكب القطر السريع من بره بين العربيات بالليل!

ممكن أتكلم عن المحادثة الغريبة اللي كانت بيني وبين راجل عجوز غريب في جنينة وسط الطريق وأنا قاعد آكل آيس كريم وهو عمال يكلمني عن خبراته في الحياة ونصايحه المتعلقة بالعلاقة بين الرجالة والستات وكنت أنا لسه في إعدادي أو أولى ثانوي!

ممكن أجيب أغنية أو اتنين من اللي باحبهم لساندرا وأتكلم عن ليه حبيتها وإمتى وإيه أكتر ألبوم سمعته وإيه الأغاني اللي كتير مايعرفوهاش بس أنا باحبها زي لورين!

ممكن أتكلم عن وزارة الصحة وتجربتي أيام كورونا لما قربت شوية من مراكز إدارة الأزمة..

ممكن أتكلم عن تجربتي في محاولة الامتناع عن السكر والحلويات والمنتجات اللي فيها سكر مضاف..

ممكن أتكلم عن تجربتي في الثانوية العامة ضمن آخر دفعة كان عندها تحسين وإزاي جبت الدرجة النهائية في المستوى الرفيع رياضيات رغم إني كنت علمي علوم وما أخدتش رياضة 2 !

وبعدها أتكلم عن سنين سقوطي في كلية الطب رغم نجاحي في سنة أولى.. وتجربتي واحتكاكي مع المدبلرين والمتربلين وأد إيه طلبة عباقرة ممكن ينسحقوا تحت ضغوط الأهل والقلق والتوتر ونظام دراسي عقيم..

ممكن أتكلم عن علي الحجار وأحاول أختار له أحلى 50 أغنية تتر من ضمن أغاني التترات اللي عملها..

ممكن أتكلم عن هواية المراسلة وتجربتي الفاشلة في صداقة بنات من خارج مصر .. وكمان المرة اللي بعتت فيها نسخة من مجلة كاريكاتير لصديقة سويسرية عشان كان فيها رسوم بتسخر من وحشية إسرائيل.. ودي كانت آخر مرة ومابعتتليش بعدها جوابات تاني!

ممكن

وممكن 

وممكن

بس زهقان ومش عايز أتكلم عن حاجة..

ومش عارف الزهق ده هيروح إمتى..

I hope إن تدوينة بكره أكون في مزاج أفضل وأقدر أكتب عن أي حاجة بصدق وحماس شوية

رواية لطيفة ماسمعتوش -غالبا- عنها

من ضمن المشروعات اللي كنا محظوظين إننا عاصرناها، كانت إصدارات وزارة الثقافة في سلاسل "إبداعات" و "أصوات أدبية" وسلاسل تانية العدد كان بيتباع فيها بجنيه واتنين جنيه.. وكانت السلاسل بتصدر شهريا أو نصف شهريا كمان..ونشروا وقتها مجموعة روايات وكتب حلوة قوي لأن اللي كانوا مسؤولين في وزارة الثقافة وقتها كانوا تقريبا على أبو شادي ومحمد البساطي وقيادات تانية موهوبة ومبدعة فكانت اختياراتهم منحازة للأعمال الحلوة فعلا..

طبعا جت أزمة الروايات الثلاثة اللي انتهزها الزفت فاروق حسني عشان يزايد على الإخوان والإسلاميين في مجلس الشعب ويقيل القيادات المبدعة دي وينهي -عمليا- المشروع الناجح ده عشان يكسب بنط سياسة.. ودي الحاجة اللي تعرفنا إن حكاية الوزير الفنان دي مجرد دعاية رخيصة كالعادة وإنه شخص وصولي عادي جدا بس واخد شكل المثقف وبيحب يلعب بيه.. زي ما سوزان مبارك عملت مكتبة الأسرة عشان حابه تاخد قناع الثقافة والقراءة برضه وتظهر ب look حلو في المؤسسات والمنظمات بتاع بره -عن نفسي شايف دي حاجة كويسة عموما لأن المهم في الآخر إن بيتعمل حاجة مفيدة للناس بجزء من فلوسهم، بدل ما هي كده كده بتتنهب ع الفاضي كلها- لكن وقت الجد، بلا ثقافة بلا إبداع بلا وجع قلب.. ده أنا أقفلها بالضبة والمفتاح عشان أفضل في الكرسي!

وقتها قرأت ،من ضمن الإصدارات دي، ثنائية الكشر للروائي النوبي حجاج حسن أدول

الرواية كانت من أجمل الروايات اللي قرأتها عموما.. مش بس لأن أسلوب حجاج حسن أدول ولغته جذابين وخلوني أستمتع بقراءة الرواية وما أسيبهاش غير لما أوصل للنهاية، لكن -ودي كانت مفاجأة سعيدة- لأن الرواية كان فيها جزء فانتازيا مكنتش متوقعه ولا كان قابلني قبل كده في الأدب العربي بره سلاسل روايات مصرية للجيب وألف ليلة وليلة.. 

الرواية بتتكلم عن السد العالي واللي حصل للنوبيين اللي اتهجروا من المناطق اللي غرقت مكان بحيرة السد واتنقلوا لمناطق تانية، بس واخده من زمن قبل السد نفسه في قرية مع نبوءة الطوفان القادم والغرق ومحاولات تفادي المصير المؤلم ده ومحاولات البطل اليائسة ومنها رحلة مستحيلة لأعماق النهر اللي فيها كائنات بتسكن طبقات مختلفة تحت المياة حاجة كده زي السبع سماوات والسبع أراضي بس تحت المياة بقى..

مش ناوي أحرقها.. على الأقل لحد ما أتأكد إن مفيش طريقة نلاقيها بيها أونلاين وأشيرها هنا، لأن الرحلة والنهاية ومصير البطل مشوقين والرواية حلوة فعلا تستاهل يتدور عليها وتقرأ..

للأسف ما قرأتش حاجة تانية لسه ل حجاج حسن أدول لكن إن شاء الله أعيد قراءة ثنائية الكشر تاني قريب وأحاول أقرأ له حاجات تانية.. على الأقل العملين التانيين اللي فاز عنهم بجائزة الدولة وجايزة ساويرس..

وعموما هاحاول أتصرف في حل مناسب أرفع عليه ملفات للي هييجي هنا المدونة وحابب يلاقي الملفات اللي باتكلم عنها ومش موجودة أونلاين.. وهارفع فيها رواياته اللي عندي بإذن الله

مزيد من الاختيارات نقدمها لكم سعيا لنشر بعض البهجة ونظرا لضيق الوقت.. الثامنة

 

بين الأمل والخوف

 

الصورة بالأعلى لعروسة بنتي ودبدوبها اللي بتحبهم ومحتفظة بيهم من وهي صغيرة

الصورتين بالأسفل ل زحليقة ملاهي أطفال من الزاوية الخلفية..

وسابع مرة نعملها.. اخترنا لك