نكمل التاجات بقى ..

جه فى بالى دلوقتى أكملهم بالتاج الخامس ..

منها يبقوا خمسه مقفولين .. ومنها ألاقى حاجه أمررها

التاج ده ماقابلنيش قبل كده بس احتمال كبير يكون اتوجد فى وسط أى هوجه من هوجات التاجات دى ..

 

احكى عن أكتر خمس حاجات بتخاف منهم .. أشياء ماديه أو خيالات ..خواطر بترعبك ..أو حتى مواقف معينه حسيت فيها بالرعب الحقيقى.. حاجات من دى يعنى

 

هوّه اللى بيجيب التاج بيجاوبه الأول وللا بيمرر على طول ؟

...

عموما أنا هامرره دلوقتى وأبقى أجاوب بعدين

وطبعا أولنا مين ؟ :)

خدى ياساسو ..ربنا يقدرنى وأردهم لك تاج تاج ياماما

ول شغف

و لو عدّيتى يا كاميرا جيرل ابقى خدى التاج ده معاكى ياماما

Expression

 

 

و مما ينسب الى الحكم المستنصر

عجبت، و قد ودعتها كيف لم أمت *** و كيف انثنت بعد الوداع يدى معى

فيامقلتى العبرى عليها اسكبى دما *** و يا كبدى الحرى عليها تقطعى

تسلسل

باكره الإحساس بالوحشه ..

طالما فيه الإحساس ده يبقى أكيد فيه إحساس بالعجز إنك تشوف اللى واحشك أو تلغى سبب وحشتك ..

رغبه حاده فى شىء ما مع عدم توافر الإمكانيه لتحقيقها ..

الكلمه نفسها كريهه

وحشه ..

نفس المصدر اللى جه منه وحش بكسرالواو و الحاء أى قبيح

وبالطبع وحش بتسكين الحاء  .. خيال الرعب الكامن بين ثنايا الحروف

قبيح ومرعب .. تلك هى الوحشه

يتوحش ..

يستوحش ..

حتى فى انسحاب الواو نجد الحشى .. وترتبط فى ذهنى بالأحشاء الممزقه نتيجة وحشية أحد الوحوش

...

يحب الإنسان

يبتعد الحبيب

تنقطع خيوط القرب

يعز اللقاء

تأتى الوحده وسط الناس

العقل مشغول بلقيا الحبيب المستحيله

تنعزل شيئا فشيئا وتتضاءل الموجودات

لايعود لأى شىء أهمية

تتوحد وسط حنينك الجارف

شيئا فشيئا تندمج ..

لايكون اللقيا إلا فى الخيال وبهذا يتم الانعزال

تغدو وحشا..

 

لماذا فى اعتقادك يبحث الوحش أو العملاق أو العفريت دوما عن الأميره الجميله ويحتفظ بها رغم أنه ليس بإمكانه -أبدا- أن يتزوجها؟

لمجرد أن تستكمل القصه أركانها ؟

أما عن الخمسه

 

عن خمسة اشياء لا يعرفها عنك احد

 

أول حاجه إنى من الإعدادى تقريبا وأنا بانام على كنبه خشب بدون أى حاجه عليها

لامرتبه ولا أى نوع من الفرش

فى الشتا والسقعه دى باتغطى ببطانيه كبيره بيبقى جزء منها بينى وبين الخشب والتانى مغطينى ..

مع إن فى البيت هنا مراتب وسراير بس أنا اتعودت وارتحت فى النومه دى .. مابقيتش أرتاح لما أروح عند خالى أو عند حد صاحبى وأضطر أنام على مرتبه .. أسهل لى أنام على الأرض ..

 

التانيه إنى مره وأنا صغير كدبت على أمى وقلت لها إنى رايح المحله أشترى الجرنال

كان موقف العربيات جنب بتاع الجرايد فماقلقتش على ومارفضتش .. بس أنا بقى مشيت جوه المحله ورحت العباسى علشان أشترى مجله من مجلات باسم اللى كنت باحب أقراها وأنا صغير

كان أيامها الجرنال بربع جنيه والمجله بربع جنيه والأجره كانت ربع

يعنى مغامرتى الخفيه دى اتكلفت جنيه بالتمام والكمال

طبعا لما رجعت , خبيت المجله فى وسط الجرنال علشان لو أمى عرفت ماكانتش هترضى تخلينى أسافر تانى

 

تالت حاجه إن شخصيتى مابتبقاش دايما خيره أو مثاليه بالصوره اللى باظهر بيها للى حوالى أغلب الوقت

كتير جدا بتيجى فى ذهنى أفكار مش حلوه وأحيانا شريره

بس ماباحاولش أستسلم لها

دايما بافصل بين الفكره اللى ممكن تيجى فى دماغى والاحتمالات اللى ممكن تدور فى ذهنى

والفعل اللى لازم أنفذه ..

دايما مؤمن بإن ربنا بيحاسبك لو عملت معصيه مش لو فكرت فى معصيه

على هذا الأساس ماباعذبش نفسى قوى لو فكرت فى حاجه مش كويسه .. المهم ماأعملهاش

 

والرابعه إنى -بجد- باعتبر العالم ده شىء مدهش .. من أول المخلوقات اللى حوالينا للناس نفسهم

لو حاولت تتفرج على حيوانات أو طيور وهى صغيره .. قطط وللا بط وللا كتاكيت

لازم تندهش من كم الطفوله وحب اللعب الغريزى اللى فيهم

لو طلعت فى أى أرض زراعيه وشفت كم التنوع الغريب فى الطيور والحشرات وطبعا النباتات

لو اتفرجت على الناس من مكان بعيد شويه أو من ركن مختفى وراقبت سلوكياتهم

العمارات الكبيره فى المدن

الآثار

النيل

مجرد السحاب فى أيام الشتا الغريبه .. يتهيألك إن جبال ماشيه فوق دماغك .. جلاميد من الصخر الأبيض المشرب بالزرقه تكاد تنهال فتدك الأرض بما عليها من ناس وسيارات .. ومن تحتها إنت طبعا

 

بجد أنا لو سبت نفسى هتلاقونى ماشى فى الشارع بنظره بلهاء وأنا فاتح بقى ودقنى مدلدله على صدرى من الانبهار ..

لكن أنا غالبا باتعامل مع كل حاجه بملل نسبى .. كإن مافيش حاجه بتدهشنى أو بتأثر فى

تقريبا ده أسلوب دفاعى أو حاجه نتيجه لاندهاشى الشديد من العالم  علشان أقدر أعيش وأتعامل مع الحاجات اللى حوالى بصوره سليمه ..

 

الخامسه بقى إيه ياترى ..

إنى شاكك إنى فى مره من المرات كدت أقابل عفريت أو جنى  بس هربت

اترعبت من مجرد الاحتمال

شجاعتى دايما من النقط اللى بافخر بيها نوعا سواء عن حماقه أو جهل أو إن قلبى ميت , بس المهم إنى ماباخافش  عادة من الحاجات اللى ممكن يخاف منها معظم الناس .. بالذات فى الحاجات المجهوله

بيبقى عندى القابليه إنى أضغط على مفتاح ضغير كده بيوقف مشاعر الخوف تماما ولاكأنها موجوده

إلا فى المره دى..

التفاصيل ممكن أحكيها بعدين ..

بس المهم إنى جبنت وخفت فى لحظه أنا اللى سعيتلها

غلبنى الضعف وحب الحياة

احتمال إن اللى جاى على ده مايكونش عفريت ولاحاجه وارد

أو يكون عفريت ومايجيش ناحيتى وارد برضه

بس أنا ماقدرتش أعتمد على الاحتمالين دول وأصمد

 

 

التاج ده صعب .. وأصعب حاجه فيه إنه بيطالبك بالتخلى عن خمسه من أسرارك دفعة واحدة

ماهو طالما ماحدش يعرفها .. تبقى سر

وطالما سر يبقى مش من السهل أبدا إنك تحكيه بسهوله كده

لأ .. ودول خمس أسرار كمان

أنا عموما حاولت أمسك العصايه من النص نسبيا

أقول حاجات مهمه فعلا بالنسبه لى وماحدش يعرفها عنى غالبا

وفى نفس الوقت ماأندمش إنى فرطت فيها كده ..

 

كان نفسى أمرر التاجات دى والله , بس كل اللى أعرفهم وممكن يكونوا بيترددوا هنا باستمرار 2 أو تلاته

واحده منهم وهى ساسو مررت لى التاجات دى أصلا

والباقى جاوبوه قبل كده

فمافيش بقى تمرير

أشكر بس الست ساسو على إنها وفرت على 4 أيام تدوير ..

ونردّها لك فى الأفراح ياماما :)

ثالثا

نشوف بقى التاج البسيط ده علشان جاى من السفر لسه ومافياش دماغ للتاج الأخير

 

Write down the three lines after the first five lines on page 123 from any book u're reading now

 

فيه ثلاثين مليون دولار ديون عليكم للبنوك..احنا نسددهم ليه؟!

لامؤاخذه  واضح إنى تخنت .. عن إذنك ..

(تعتدل جالسة وتفك جزء من سوستة الجونلة, تخرج منها البلوزة ..)

!!

 

ودى كانت من مؤلفات على سالم الكاملة ج4 من مسرحية واحد مسجون زيادة ..

 

 

قلتَها وأنت تبذل أقصى الطاقة لستر ارتعاشك, فقد كنت خائفا, تشعر بانفراد أليم فى قلب العاصمة الهائلة التى كانت صديقة, وتشعر بالعطف على نفسك لدرجة الاستوحاش ..

 

دول بقى من لحظات غرق جزيرة الحوت لمحمد المخزنجى

أهلى ..

لسه فاتح التليفزيون دلوقتى لقيت قدامى مبارك وهو بيكرم النادى الأهلى فى برنامج الكوره مع دريم

سلوك مكرر لمبارك وحاشيته .. إنهم يلتفوا حول أى نجاح ويطلعوا فى الصوره علشان يحاولوا يغسلوا صورتهم شويه

بيتهيألى ممكن بعد سنه أو اتنين نلاقى إن من إنجازات الحكومه اللى بتناقشها فى البيان فى مجلس الشعب فوز الأهلى ببطولة أفريقيا أو حتى بالدورى العام !

بعيد عنى

مش هاكمل التاجات النهارده لأن فيه موقف حصل وعايز أدردش فيه شويه

كان فيه واحد أعرفه مات من فتره قريبه

كان متجوز ومخلف بنتين صغيرين .. يادوب

لسه شاب ومات فى حادثه الله يرحمه

امبارح بس عرفت إن مراته اتجوزت

أول ماسمعت الخبر كنت مصدوم نوعا .. الشخص ده كان شخصيه فوق الممتازه

ممكن أقول كمان إنه كان من ضمن مثلى العليا نوعا وإن كنت -لانعزالى الاجتماعى- ماتكلمتش معاه كتير وماتعرفتش عليه بصوره كافيه .. ودى من الحاجات اللى ندمت عليها حيث لاينفع الندم

فاستغربت إن مراته تكون قدرت تتخطاه بالسرعه دى

لحد ماعرفت إنها اتجوزت أخوه ..

ماكانش سبق له الجواز وكان لسه ناوى يرتبط بس جت الحادثه وغيرت المسائل فيما يبدو

أنا ماعرفش تفاصيل كتير عن الموضوع لأنى لسه عارفه امبارح

بس المسأله كده بالنسبه لى مش مستغربه قوى

ورغم إن اللى حكى لى كان مش موافق على إنها تتجوز بالسرعه دى بس أنا ماكنتش شايف فى الموضوع مشكله كبيره

الأخ أولى بإنه يحافظ على أولاد أخوه بدل مايتبهدلوا مع حد غريب

والمعاناة النفسيه للزوجه على ماتنسى الزوج الأول وتحاول تعيش مع أخوه أقل بكتييييييييير فى رأيى من معاناتها لو قررت تعيش لوحدها على ماتربى ولادها وتكبرهم وتحافظ عليهم , خصوصا فى مجتمع غبى زى مجتمعنا بيحسب على المرأه المطلقه أو الأرمله كل همسه وبيبقى سوء الظن هو القاعده الوحيده

أنا شايف إن فيه مشكله طبعا بالنسبه للأخ وبالنسبه للزوجه

بس شايف كمان إنهم بإذن الله هيقدروا يعدوها

الحياه مختلفه نوعا عن الأفلام العربى ... ولأن الاتنين شخصياتهم كويسه فأكيد ربنا هيوفقهم ويهديهم لبعض وهيقدروا يحبوا الحياة مع بعض

طبعا الموضوع هياخد وقت كبير ..وهيحتاج مجهود بس أنا أتمنى لهم إنه مايبقاش بالصعوبه اللى أنا متخيلها

أنا عن نفسى ماأقدرش أتخيل نفسى فى موقف مماثل

إنى أتجوز أرملة أخويا علشان أحافظ على بيته وأولاده

مع شخصيه معقده زيى هتبقى الحياة غير ممكنه وأكيد هاظلمها معايا

علشان كده بأتمنى إن ربنا يقدرهم ومايكونوش الاتنين بيفكروا زيى أو بطريقتى فى أى حاجه

نفسى بجد الجوازه دى تستمر والاتنين يبقوا سعداء

كمان تاج

وتاج النهارده هيبقى بتاع الدراسه

 

هل كنت طالبـا شاطرا في المدرسة والكلية؟

كنت طالبا شاطرا فى المدرسه

فى الابتدائى كنت من المتفوقين بس دايما فى المراكز التالته أو الرابعه

مش فاكر كتير عن المرحله دى بس كنت من الشطار وفى سنه خامسه كنت التانى على المدرسه لأن الناس اللى كانوا بيطلعوا أول وتانى كانوا نقلوا مدارس تانيه :)

الإعدادى بقى كانت نقله غريبه بالنسبه لى ومواد ماكنتش باستوعبها قوى بس فضلت فى أولى وتانيه محافظ على المركز الرابع .. جيت فى تالته إعدادى بقى وكانت أول سنه أهمل فيها المذاكره طول السنه وأذاكر بس ليلة الامتحان .. تقريبا بدأت أفكر وأنضج فى السنه دى

كانت النتيجه مبهره .. طلعت الأول على المدرسه !!

فى الثانوى استمريت على نفس منهج إنى ماأذاكرشى غير ليلة الامتحان

أولى ثانوى ماكانش ليها لازمة وطلعت فيها التانى على المدرسه

تانيه وثالثه ثانوى كانوا فى منتهى البساطه بالنسبه لى

كان عندنا نظام التحسين اللذيذ ده فماكانش فيه قلق من إنك تدخل أو ماتدخلش أو تجاوب أو ماتجاوبش

فأجلت الكيمياء للدور التانى فى تانيه وماكنتش ذاكرت الأحياء فى الدور الأول كويس فدخلتها معاها وحسنت العربى كمان

فى تالته برضه أجلت الفيزياء للدور التانى وحسنت معاها العربى

كنت مرتب مع نفسى أصلا إنى أجيب مجموع 100% بإضافة المستوى

يعنى أنقص فى كل المواد حوالى 20 درجه وأجيبهم فى مادتين المستوى

نجحت فى الحكايه دى وجبت فعلا 9.5 فى مستوى الجغرافيا و10 فى مستوى الرياضيات

ومانقصتش فى المواد العاديه غير 18 درجه فبقى مجموعى كده أكتر من ال100% كمان

 

دخلت الطب :(

تقريبا حصلت لى صدمه حضاريه زى اللى حصلت للمماليك لما شافوا الفرنسيس أول مره

تداركت الموضوع نسبيا فى أولى وقدرت أعدى بمادتين , وبكده بقى عندى 6 مواد فى تانيه مش 4 كما هو مفترض ...

مش عارف بقى الانهيار جه منين

قعدت فى تانيه لوحدها 4 سنين كاملين

ماكنتش باقدر أذاكر أو ماكنتش باعوز أذاكر أو اكتأبت أو اتصدمت لما لقيت نفسى بارسب لأول مره فى حياتى أو لقيت الفشل والرسوب أسهل من النجاح فاستمرأته أو ماكانش لى هدف أذاكر علشانه لأنى مش حابب الطب ومش حابب أشتغل دكتور وماعنديش دافع يخلينى أخلص ..

المواد كانت سهله جدا بالنسبه لى وكنت بانجح -فعلا- بأقل مجهود بس كانت الفكره إنى أعقد العزم على المذاكره ولو ليلة الامتحان وأبعد عن التوتر اللى كان بيجيلى

فى تالته برضه اتكرر الرسوب بس المره دى 3 سنين بس .. تقريبا لنفس الأسباب اللى أنا مش عارفها لحد دلوقتى .. لأن المواد سهله جدا وأنا خلاص اتعودت على الكليه .. وزى ماكنت كتبت فى المدونه دى من فتره إنى نجحت فى الفارما والباثولوجى أتقل مادتين فى تالته بمذاكره أقل من تلات أيام للمادتين مجتمعتين رغم إن كان امتحان المادتين فى الدور التانى فى 6 أيام متتاليه النظرى والعملى والشفوى

السنه دى أنا فى رابعه ..

نظام مختلف بس سنه أسهل من السهوله وعندى الدافع إنى أخلص بقى حتى لو مش هاشتغل دكتور

فإن شاء الله النتيجه السنه دى هتكون أحسن من أى سنه

على فكره رغم رسوبى المتكرر فى تانيه وخروجى بمادتين من أولى كنت جايب فيهم جيد تالته بس اللى كانت مقبول .. يعنى ممكن أخرج من الكليه لو اختلف الأمر فى السنتين الجايين والسنه دى بتقدير محترم رغم كل شىء

إيه كانت أحب مادة وأكره مادة ليك في المدرسة والكلية؟

فى المدرسه كنت باحب العلوم فى الإعدادى .. وكنت باكره الرياضه والدراسات الاجتماعيه جدا

فى الثانوى بقى انقلبت الآيه وحبيت الرياضه بس بعد فوات الأوان وبعد مااخترت أدخل المجموعه العلميه برياضه1 وماخترتش رياضه 2 .. يمكن علشان كده اخترت مستوى رياضه

كنت باحب الأحياء برضه

وحبيت الكيمياء لما ذاكرتاه .. بالذات الكيمياء العضويه .. وكنت باقدر أحول أى مركب لأى مركب مهما كان بالمعادلات

العربى كان من المواد الخنيقة رغم إن المدرس اللى كان بيديهولنا فى تانيه كان شخصيه متميزه جدا ومختلفه بس الماده نفسها كانت مستفزه بمناهج الوزاره العقيمة دى

ماكنتش باحب الاقتصاد .. كان ماده سفسطائيه كده بالنسبه لى

حاجه كده مالهاش راس من رجلين

حاجات وموارد ودراسات مش فاهم لازمتها إيه بالظبط وللا ممكن تفيد فعلا بإيه

 

فى الكليه بقى كنت باحب الفسيولوجى خصوصا فسيولوجى الجهاز العصبى المركزى والمخ

عندى ولع أساسا بدراسة المخ البشرى وكم الإعجاز الغريب اللى فيه

ماكنتش باحب التشريح ويمكن علشان كده هو الماده الوحيده اللى استمرت معايا لحد آخر سنه فى تانيه

كان معايا فيها التشريحين بس .. تشريح أولى وتشريح تانيه وكان ممكن أسيب الكليه خالص بسببهم

رغم إن التشريح سهل وممكن تقول شيق كمان بس ماكنتش باستظرفه خالص ..

فى تالته كنت باحب الميكروبيولوجى جدا خصوصا الجزء الخاص بدراسة الفيروسات

وطبعا ماحبتش الفارما !

و كنت عايز تطلع إيه وانت صغير؟

فى الثانوى كنت عايز أطلع مهندس كمبيوتر أو مبرمج

حبيت المجال ده بطريقه غير معقوله

بس بعد صدمة إن مافيش كمبيوتر من غير رياضه 2 ماكانش فى نفسى حاجه معينه فدخلت تبع مجموعى .. طب

بس وأنا صغير مش فاكر إن كان فى نفسى أطلع حاجه معينه

كنت باحب اللعب بالمسدسات آه بس ماكانتش فارقه معايا ظابط دى قوى

وطول عمرى ماكنتش باحب إنى أبقى دكتور

يمكن بعد ماتعلمت الشطرنج كنت حابب إنى أبقى بطل فيه

بس عموما نقدر نقول إنى بدون هدف كده من صغرى :)

 

وبكده خلصنا من تاج كمان ..

يعنى إيه تاج أصلا ؟

رغم إنى ماأعرفش معنى الكلمه إيه لحد دلوقتى بس مش مشكله

الست ساسو 4 فى 1 بعتولى - أو بعثن لى- ب4 تاجات حته واحده 

طبعا فرصه جميله جدا بالنسبه لى للهروب من هم البحث عن تدوينه جديده

رغم إن هم البحث ده قد يكون أسهل من البحث عن إجابات صادقه عن أسئلة التاجات دى !

بدون مزيد من الرغى خارج الموضوع نبدأ ....

 

ايه اللي هيحصل لايميلك لما تموت؟

بما إن الإيميل لحد دلوقتى مجانى فيبقى الياهوو والهوت ميل هيستنوا شهر ويمسحوا اللى فيه وبعدين كام شهر ويمسحوه أصلا

عموما أنا إيميلى مافيهوش حاجه مهمه أصلا

علاقاتى البريديه قليله جدا ومن الصعب جدا إنى أستمر فى مراسلة أى بنى آدم .. رغم إنى حاولت كتييييير فى موضوع المراسله ده قبل كده سواء بالخطابات العاديه أو بالإلكترونيه , لكن كنت دايما أبعت جواب والتانى والتالت لأ ..

أحيانا طبعا كان التالت بينقطع من الناحيه التانيه مش من ناحيتى وغالبا من بعد ماأبعت صورتى ! .. مش فاهم ليه  

احتمال فى المستقبل بعد مالواحد يكبر   - أكتر من كده يعنى- ويشتغل أستخدم إيميلى أكتر من كده ويبقى فيه حاجات مهمه وساعتها -برضه- هتتمسح الرسايل بعد شهر ويتقفل خالص بعد كام شهر

اديت الباس وورد لحد قبل كده؟

ماحصلش ,بس احتمال بعد الجواز أبقى أديه للمدام من باب تكبير الدماغ بدل ماتتسحب كل شويه من ورايا وأنا فاتح الإيميل وهى بتعمل إنها بتنضّف الشيش علشان تشوف مين اللى باعتينلى إيميلات بالظبط وإذا كان فيهم حد أول حرف من اسمه سوسن أو ست أبوها ..

لو اه كانت طبيعة علاقتك بيه اية؟

علاقتى بيه إنه هيبقى مراتى سعادتك .. المودام على رأى واحد

اسمك؟

محمد

اسم الدلع المشهور في وسط اصحابك؟

اممم ... غالبا ماحدش بيدلعنى قوى يعنى بس الست الوالده غالبا كانت بتدلعنى ب حمام - بفتح الميم فقط وليس تشديدها - !

طبعا فيه حماده  و حمّو  وكافة الأشكال المرتبطه باسم محمد

كان فيه واحده صاحبى واحنا فى الإعدادى بينادينى عبقرينو لأنى كنت لابس نضاره ودايما باقرأ 

عمرك؟

25

برجك؟

الديك ..

ده فى الأبراج الصينيه لأنى من مواليد 81 .. السنه اللى كانت ميمونه نوعا على حرامية البلد وأئمة الفساد واسرائيل وأمريكا وكل من يهمهم أننا كمصريين نبقى فى سابع أرض ..

السرطان فى الأبراج العاديه بقى

رغم إنه اسم مرعب نوعا فى دراستنا ومجال شغلنا كأطباء بس باحبه جدا

حتى بالإنجليزى Cancer

باحسه اسم مختلف كده وحاسم نوعا ... بس ماأعرفش كتير من صفاته يمكن لأن صفاتى أنا متوزعه فى كل الأبراج فماهتميتش أعرف صفات البرج ده بالذات

مجالك او مجال دراستك ؟

الطب -بكل أسف وندم- البشرى

فى الفرقه الرابعه ومستجد السنه دى

بس لو رجع بى الزمن تانى لتانيه ثانوى كنت هاختار إنى أدرس رياضه 2 علشان أقدر أدخل حاسبات ومعلومات

ولو رجع بى الزمن لبعد الثانويه العامه كنت هاختار تربية أو آداب علم نفس وطظ فى المجموع الكبير

 

شخصيتك نوعها اية؟

مافيش اختيارات ؟

ده سؤال عجيب قوى بصراحه

فكرت أجاوبه بإنى أقول إنها خضراء وبأستك من فوق بس لقيتها هتبقى إجابه مبتذله قوى وإفيه محروق

فكرنى بمحمد صبحى فى وجهة نظر لما كانت بتسأله عن النوع فجاوبها .. سته سلندر !

عموما هاجاوب على حسب فهمى للمقصود من ورا السؤال

شخصيتى كارهه للناس وللتجمعات عموما ولضوء النهار لأنه مرتبط بكثرة الناس

ماباخرجش من البيت بالنهار إلا للضروره القصوى .. وحتى بالليل ماحبش أخرج غير متأخر جدا وبامشى فى الطرق الغير مطروقة علشان أقابل أقل عدد ممكن من الناس

مش مكتئب أغلب الوقت , بالعكس باهزر غالبا

باحاول أكون صريح على قد ماأقدر مع كل الناس  وده طبعا شىء مش سهل فمش دايما باقدر

مغرور شويه بس لسه قادر أشوف نفسى بدون تزويق أو خداع  ..

هى متناقضه شويه بس أنا كده

باحاول دايما لما أعمل حاجه غلط إنى أثبت حقيقة إنها غلط مش أسيب نفسى للتبريرات والأعذار

... مش عارف أكتب إيه تانى لن السؤال مش مدينى مفاتيح كتيره للإجابه

السفر بالنسبة لك؟

هم كبير فى الفتره اللى قبله ومتعه كبيره خلاله بالذات لو السفر ده بالليل أو فى الشتا

رغم إنى ماسافرتش كتير بكل أسف

القاهره ..الاسكندريه .. المنوفيه.. المنصوره  ..

وبس

معظمها زيارات لأصحابى أو لقرايبى

ومره واحده -بخلاف الرحلات المدرسيه- رحت المتحف المصرى والقلعه وكنت مبسوط جدا جدا يومها

دايما قبل السفر بابقى قلقان شويه أو مش مرتاح وباقعد أرتب للتفاصيل فى ذهنى أكتر من مره

بس أول ماباركب الميكروباص أو السوبرجيت أو عربية خالى وأقعد جنب الشباك باحس بالمتعه

بالذات لو السفر -وده غالبا اللى باعمله- بالليل

وياسلام لما أوصل رمسيس الساعه اتنين بالليل فى الشتا أو قبل الفجر والميدان وااااااااسع وفااااااااضى

وللا لما أركب الترام فى اسكندريه بعد الفجر والنهار لسه بيشقشق ومافيش حد فى الترام غيرى ومافيش حد فى الشوارع

دى لحظات باحب السفر فيها

نفسى أسافر أكتر من كده بس طبيعتى الكسوله والمجافيه للناس مانعانى شويه

رغم كده فأنا ناوى بإذن الله -وحاسس إنى فعلا هاعملها- أسافر الأقصر وأسوان فى رحله بالعجله  اللى هى الدراجه يعنى

ده حلم من أحلام حياتى اللى بإذن الله هاحققها فى يوم من الأيام

المود بتاعك؟

دلوقتى جميل جدا لأسباب شخصيه

غالبا بابقى هادى وبافكر دايما فى كل حاجه

ورغم إن كتاباتى فى البلوج ده أغلبها اكتئابى ممل نوعا بس أنا ماباحسش بالاكتئاب غير كل فين وفين

بس اللى باحس به كتير هو الحيره !!

وقت فراغك بتعمل فيه اية؟

أقرأ .. أقعد قصاد الكمبيوتر.. أتفرج على التليفزيون .. ألعب فيفا .. أطبخ أو آكل.. أشتغل فى نسخة ويندوز جديده .. أشوف البرامج الجديده اللى نزلت

الاكلة المفضلة؟

المخبوزات عموما ..

أى حاجه بتتكون من دقيق وسائل سواء لبن أو مياه .. سواء عليها سمن بلدى وللا لأ

طالما عجين وطالع من الفرن .. باحبه

خصوصا إذا كان بالجبنه بقى

قرص .. رقاق .. فطير .. إنشالله حتى عيش فينو

أمنية حياتى أصلا إنى أسكن فى الدور الأخير من عماره طويييييييله ويبقى الدور الأول مناه فيه مخبز أو معرض مخبوزات

باحب المشويات جدا .. سواء طيور أو خضار .. أو طبعا الاتنين :)

الصفات اللي خدتها من بابا؟

أهوه ده مش عارف إجابته بالظبط لأن والدى مات وأنا عندى سنتين فماعرفتوش قوى

بس بيقولولى إنى هادى زيّه

فتبقى الهدوء

احتمال كمان أكون أخدت منه حب القراءة

لأن ماحدش خالص من اللى حوالى كان بيقرأ أو عنده كتب .. رغم كده طلعت باحب القراءه بجنون  فغالبا أكون ورثتها عنه فى جيناتى :)

الصفات اللي خدتها من ماما؟

التجريب فى المطبخ  :)

القدره على عمل أكثر من شىء فى نفس الوقت

امممم

القدره على الأعمال اليدويه فى أى مجال سواء كان تنظيف أو تصليح و طبيخ

بتاع كله يعنى

اكتر 6 حاجات بتكرهها؟

اللون الأحمر .. وكل الألوان اللى شبهه أو قريبه منه زى البنى أو الأصفر الغامق أو البرتقانى الغامق

الكذب .. والنفاق .. بالذات فى العلاقات الاجتماعيه

الحرّ .. شمس الصيف دى بالنسبة لى بتبقى كابوس

إذلال الناس أو معاملتهم بتعالى .. وبالذات من الدكاتره تجاه المرضى .. مجرد تجاهل كون المريض إنسان زيه زيك مش مجرد حاله بيبقى شىء قمىء

المعامله بمكيالين .. أفترى على الأضعف أو اللى مايلزمنيش وأتلطف مع الأقوى وصاحب المصلحه

الإحساس بالعجز ..

اكتر 6 حاجات بتحبها؟

القراءة .. بالذات الروايات الحلوه زى أولاد حارتنا وقمر على سمرقند وكذلك الكتابات الساخرة من نوعية كتابات محمد عفيفى

اللون الأزرق .. والألوان الفاتحه

لما أقعد فى بلكونه والجو نسيم وفى إيدى كتاب باحبه وكوباية عصير

 ميدان رمسيس والقاهره عموما قبل الفجر والشوارع فاضيه والنور أصفر غريب

الكوره .. ولو إنى بطلت ألعب من زمان بس كنت باحب ألعبها .. دلوقتى يادوب بالعب فيفا

أغانى سميره سعيد وساندرا

الشغل بالنسبة لك؟

شبح مرعب هيخلينى أتعامل مع الناس وأخرج بمواعيد ثابته

بس لازم علشان أقدر أعيش وأصرف على نفسى وبيتى

ماباحولشى أفكر فيه من دلوقتى باعتبار إنه شر لابد منه ومش طالبه أحمل همه من دلوقتى

كفايه على المذاكره

اية الكومبيوتر والانترنت بالنسبة لك؟

جزء أساسى من حياتى

من وأنا فى الثانوى وأنا باشترى مجلات الكمبيوتر رغم إن ماكانش عندى ولاعند أى حد أعرفه ساعتها كمبيوتر

وكنت باروح المدرسه فى الأيام اللى ماكانش فيها دراسه علشان أدخل معمل الكمبيوتر وأشتغل عليهم رغم إنها كانت أجهزة عتيقة مافيهاش هارد ديسك أساسا وكل اللى كنت باشتغله عليها شوية بيزيك ولوجو وبرنامج معالجة الكلمات راحيمكو !

كان نوع من المعجزه إنى أجيب كمبيوتر وأنا فى تانيه كليه

ومعجزه تانيه إنى أدخل دى إس إل من حوالى سنه ونص

....

مهما اتكلمت مش هاقدر أعبر عن حبى المجرد غير المفهوم للكمبيوتر

كفايه بس أقول إنى باحس إنى جزء من العالم ده

عالم تخيلى آه بس قريب جدا منى

 

 

 

 

وكده خلص التاج الأول بعد حوالى ساعتين من الكتابه والتفكير

والساعه داخله على 12 آهى ولازم أجرى بقى قبل الميعاد

أيوه .. زى سندريللا كده :)

Made Me Laugh...

 

 

 

 

Never trust an Alien

 

وحش

 

الوَحْشُ: الوُحوشُ، وهي حيوان البَرِّ، الواحدُ وَحْشِيٌّ. يقال حمارُ وَحْشٍ بالإضافة،وحمارٌ وَحْشِيٌّ. وأرضٌ مَوْحوشَةٌ: ذاتُ وُحوشٍ. والوَحْشِيُّ: الجانبُ الأيمنُ من كلِّ شيء.

ووَحْشِيُّ القوسِ: ظهرُها. وإنْسِيُّها: ما أقبلَ عليك منها. وكذلك وَحْشِيُّ اليدِ والرِجلِ وإنْسِيُّهما.

والوَحْشَةُ: الخلوةُ والهمُّ. وقد أوْحَشْتُ الرجلَ فاسْتَوْحَشَ. وأرضٌ

وَحْشَةٌ وبلدٌ وَحْشٌ بالتسكين، أي قفرٌ. وتَوَحَّشَتِ الأرضُ: صارت وَحْشَةً.

وأوْحَشْتُ الأرضَ: وجدتها وَحْشَةً. وأوْحَشَ المنزل أيضاً:صار كذلك وذهب عنه الناس.

و أوْحَشَ الرجلُ: جاعَ. وتَوَحَّشَ الرجلُ، أي خلا بطنُه من الجوع. يقال: تَوَحَّشْ للدواء، أي أخْل جوفَك من الطعام. وبات فلانٌ وَحْشاً، أي جائعاً. وبتنا أوْحاشاً. وقد أوْحَشْنا منذ ليلتانِ، أي نَفِذَ زادُنا.

 

 

نقلا عن مختار الصحاح

ِ

رمد وتشيرنوبل

النهارده كان أول يوم فى راوند الرمد بالنسبه لى

امبارح كان أول يوم بس صحيت متأخر فماروحتش

صحيت النهارده الساعه 6 , خرجت من البيت حوالى 7 إلا ربع علشان ألحق قبل زحمة المواصلات

المفروض أخرج 8 مثلا لأن الراوند بيبدأ 9,5 لكن أعمل إيه فى المواصلات ؟

وصلت المستشفى الساعه 8 تقريبا .. طبعا ماكانش فيه غير عامل أو اتنين ولسه بدرى قوى على ماحد ييجى , بس أنا كنت عامل حسابى وواخد كتاب " لحظات غرق جزيرة الحوت" للمخزنجى

بيتكلم عن ذكرياته وملاحظاته عن الاتحاد السوفييتى فى موقفين

أثناء كارثة تشيرنوبل وكان هو موجود فى بعثه هناك أيامها

ومره تانيه فى سنة 90 فى زيارته الأخيره للاتحاد السوفييتى

قريت نصف الكتاب تقريبا قبل ماييجى أحد الزملاء وأقوم معاه

من اللى قريته فاكر موقفين حكى عنهم المخزنجى وأثروا فى ..

لما كان بحس بوحشة الغربة ووطأة الوحده -وله تفسير ممتع عن الإحساس ده- ركب أتوبيس مايعرفش وجهته ولا طريقه .. وفى نهاية الخط وجد مبنى كبير له بوابه

ورا البوابة دى أطفال كتير بيبصوا على الأتوبيس

افتكر إنهم مستنيين ضيف مهم أو فى احتفال معين , لكن اتضح إنهم فى مستشفى سل بعيد عن أهاليهم وبعيد عن أى منطقه سكنيه ..

ومافيش حد بيزورهم .. ومافيش غير الأتوبيس اللى بيعدى عليهم من بعيد

المره دى نزل هوّه

ونزل تانى وتالت

مجرد وجوده -بس- كان فرحه وحدث للأطفال دول

مجرد وجوده ..

 

التانى كان كلب ضال

فجأة ظهر فى وسط الطريق فى المدينة

كان أعمى تقريبا وغالبا ملوث بإشعاع الانفجار

حكى عن نهايته المأساويه -والمتوقعه- تحت عجلات السيارات

فزع الكل من المقتحم الغريب

فزع الكلب نفسه من الفزع المحيط

 

كلب أعمى وسط الناس والسيارات

كلب ملوث بالإشعاع

كلب وراح !!

..

لبيروت ..

لبيروت

من قلبى سلام

لبيروت

وقبلٌ للبحر والبيوت

لصخرة كأنها.. وجه بحار قديم

هى من..روح الشعب خمر

هى من..عرقه خبز وياسمين

فكيف صار طعمها.. طعم نار ودخان؟

لبيروت

مجدٌ من رماد

لبيروت

من دم لولد حُمل فوق يدها

أطفأت مدينتى قنديلها

أغلقت بابها

أصبحت فى المساء وحدها

وحدها.. وليلٌ

لبيروت

من قلبى سلام

لبيروت

وقبلٌ للبحر والبيوت

لصخرة كأنها.. وجه بحار قديم

أنت لى ..أنت لى

آه عانقينى

أنت لى

رايتى وحجر الغد وموج سفرى

أزهرت جراح شعبى أثرا

دمعة الأمهات

أنت بيروت لى

أنت لى

آه عانقينى

 

موجوده هنا

المسبحة الوردية

أغنية لإيمان الطوخى من سهرة تليفزيونيه مترجمة بنفس الاسم

الأغنيه مش كامله

جودة الصوت مش ممتازه

بس باحيها جدا جدا

موجوده هنا

سؤال صغنطوط

 

ياترى الاكتئاب يدفع إلى التفكير وللا التفكير هو اللى بيدفع للإكتئاب؟

من كلمات مستجاب ذات المعنى

كل أنواع الكلام - فى اللغات واللهجات - يكاد يستغرقها وقوع الحزن أو تفسيره

*****

النقود تنظم ضربات القلب وتعيد صياغة ابتسام الشفتين

*****

أخيرا أفصحت عن أجمل ماأتمنى: موزة من لحم الضأن وسلاطة خضراء وبيضاء, ثم هواء طلق على حافة النهر مع حبيبتى, لكنها اعترضت فى مرارة على حافة النهر والهواء الطلق.

*****

الفخ: أن يصمم صديقك الذى تعاطف معكعلى ألا يسمح لك بالخروج من حفرة هذا التعاطف

*****

نامت السيارات فى الشوارع, وظللنا نحن وراء الجدران, ولذا فنادرا ماتصاب السيارات بالأمراض النفسيه.

كراهية

حاسس بكراهية كده ناحية البلوج ده دلوقتى !

مش مسألة اكتئاب أو حاجه من حاجاتى الممله دى , بس مش عارف ... مش حابب لاالبلوج ولاالتدوين عموما دلوقتى ..

رغم إن المفروض إن كل شىء عادى نسبيا

أول امبارح حمّلت ويندوز فيستا من على النت وامبارح صطّبته على جهازى واشتغل بصوره مش بطاله أبدا مع مشكلة بسيطه بس فى التسجيل من كارت التليفزيون

خدت دور برد يوم السبت اللى فات وخفيت منه امبارح .. دورة التلات أيام المعتاده

يوم عطس ويوم رشح ويوم انسداد فى الأنف بدون رشح

قريت كمّ كتب معقوله من الشيله بتاع معرض السنه دى

جبت كتابين ممتازين من المعرض لمحمد عفيفى

واحد  اسمه سكة سفر عن رحلاته الداخليه فى مصر والخارجيه إلى لندن

والتانى عن رحلة الموت نفسها , كتاب فى منتهى العذوبة اسمه ترانيم فى ظل تمارا

كان عندى منه طبعة دار الشروق برسوم حلمى التونى وورق لونه أخضر , بس لقيت طبعه تانيه فى الهلال مرفق معاها عدد من قصصه القصيرة فجبتها ولو إنها مش بروعة الطبعه الأولى المصحوبة بالرسوم دى بس آهى تنفع فى القراءة والاستهلاك ونحافظ على بتاع الشروق دى

جبت كمان حوالى 4 كتب لمحمد مستجاب الله يرحمه منهم نعمان عبدالحافظ وديروط الشريف أشهر مجموعاته تقريبا مع كتابه الأخير -فيما أعتقد- الحزن يميل للممازحة

وكنت جبت أعمال خيرى شلبى الكامله من الهيئة

ونسخة من انكسار الروح لمحمد المنسى قنديل بعد ماكنت قريتها من عند تامر وكنت باتقطع والله وأنا بارجّعهاله :)

الحمد لله لقيتها فى المعرض برضه .. فاشتريت نسختين !!

و ... و... و...

إن شاء الله هاكتب بالتفصيل عن كل الحاجات دى علشان اللى مايعرفهاش

بس ده لما أرجع عن كراهيتى غير المفهومه للتدوين حاليا

قالوا

 

" ماتعلمهاش قراءة الكتب لأن القراءة بتجيب الاكتئاب "

قالها لويس عوض ل لويس جريس بعد زواجه من سناء جميل

 

 

Qoute

لاتحاول أبدا أن تحكى كل ماتعرفه.. فقد يستغرق حديثك وقتا أقل مما توقعته بكثير

وسوف يصدمك ذلك

 

نورمان فورد

جزء من ورقه مقطوعه عندى

كان يحلم دوما بأنه يعدو فوق سطح مبنى مرتفع - ربما ناطحة سحاب - ثم يقفز بكل قوته فاردا ذراعيه بأقصى امتدادهما كسباح ماهر تاركا نفسه كمثال إيضاحى على قانون الجاذبيه ..

للأسف لن يستطيع تحقيق -حتى- هذا الحلم , فكل مالديه هو إفريز ضيق خارج حافة النافذة ..

" مش مهم " !

فرد ذراعيه وترك نفسه - على الأقل يمكنه فعل هذا - لقوانين الفيزياء

مال إلى الأمام ساقطا فى هدوء

 

بروتوكولات حكماء ريش

 

البروتوكول الأول :

لا تقرأ شيئاً .. كن حمال حطب ..

واحمل طن كتب ..

ضعه بجانب قنينة بيره ..

أو فوق المقعد ..

واشرب .. وانتظر الفرسان .. سوف يجيئ الواحد منهم تلو الآخر ..

يحمل طن كتب ! .

 

البروتوكول الثانى :

 

لا تفهم شيئاَ مما تقرأ ..

ليس يهم اليوم الفهم ..

فالمفهوم اللامفهوم ..

أو بالعكس .

لن يسألك أحد ..

ما معنى قولك «....»!

فالمفروض .

ألا معنى للأشياء وللكلمات ..

وإذا كانت للأشياء معان ..

فالمفروض ..

أن معانيها معروفة ..

للحكماء لدايك ..

وإذا كان الأمر كذلك ..

فالكلمات «مسالك» ..

والمفروض ..

أنك تعرف ..

والمفروض أخيراً ألا تسأل ..

عن معنى قولك «...» !

.....

البروتوكول الثامن :

كروى هذا العالم ..

حتى الكلمات كرات ..

والدوران هو القانون اللاقانون ..

فالكلمات اختلطت .. دارت .. فى الأفواه وفى الآذان .. كالأشياء برأس الأبله والسكران ..

حين تعددت الأقطاب ..

أو حين محاورها تاهت ..

ماجدوى أى حوار ..

والعاقل فينا اليوم حمار ؟!

 

 

البروتوكولات كامله موجوده هنا

طبعا مش محتاج أقول إنها لنجيب سرور الله يرحمه

نكته قديمه قوى مش عارف افتكرتها ليه

واحد صعيدى قعد 15 سنه بعد كل صلاة يدعى ربنا ..

يارب ولد ..

يارب ولد ..

فى الآخر جه له ملاك فى المنام وقاله :

اتجوّز ياحمااااااااار

:)

مشكلة بسيطة

 

من ساعة مادخلت فى المنتديات من خلال منتدى روايات وبعدها فى البلوج هنا وأنا عندى مشكله أساسيه.

إنى للأسف ماباقدرشى أحتفظ بتسلسل أفكارى وترابطها لمده كبيره

لازم أتوه فى النص !

ساعات بيكون عندى قضيه مهمه أو فيلم جميل أو فكره جديده نوعا ..ساعات حتى بيبقى مجرد ردّ مستفيض , لكن أول ماأبدأ الكتابه وبعد أول سطرين ...

خلاص

مش لاقى الكلام المناسب اللى يربط أفكارى

فأزهق وأنفّض إيدى

مع إنى زمان كنت باكتب موضوعات التعبير بصوره مش بطاله أبدا وكنت باآخد درجات كويسه لدرجة إنى أخدت 10 من 10 مرتين واحده فى الإعدادى والتانيه فى الثانوى

صحيح الموضوع الأول كان عن الإسلام وحاجه كده مش عارف إيه فى المجتمع والتانى كان عن السلام :D

وصحيح كمان إنى فى الموضوع التانى كنت متأثر بأسلوب نبيل فاروق فى الكتابة

بس ولو ... العشره من عشره فى التعبير دى كانت بالنسبه لنا دايما رابع المستحيلات

إيه بقى اللى حصل؟

مش باتكلم هنا على موهبة أو قدرات خاصة للكتابة

أنا باتكلم عن بس إنى كنت باقدر أنظم أفكارى وأربطها فى موضوع متسلسل بدون مشاكل

وفجأة مابقتش قادر ..

ويمكن مابقتش عايز !!

أنا بطلت أكتب موضوعات تعبير من تانيه ثانوى

كنت دايما بافكر فى موضوعات جامده وأبدأ فيها وبعدين أفاجأ إن الموضوع مش سهل زى ماكنت متخيل ومحتاج مجهود ومثابرة , فأزهق وأسيب الكتابة

خصوصا إن ماكانش فيه أى نوع من التحفيز

لافيه جايزه للمجيد ولاعقاب للمهمل

كان فيه أكتر من مسابقة كانت بتيجى للمدرسة وأنا عارف إنى أقدر أشترك فيها بصوره كويسه وأكسب كمان

لكن ...

معقول يكون عندى اكتئاب من الوقت ده؟

وللا هو الكسل بكل بساطة مع عدم وجود الشخص اللى ممكن يثيرنى لبذل الجهد فى سبيل تحقيق إنجاز؟

حل الاكتئاب أسهل من اللازم

كل مشكلة فى حياتى ممكن يبقى سببها الاكتئاب

وأظرف حاجه فى الاكتئاب إنه -فى حالات كتيره جدا- مالوش أعراض واضحه أو أكيده , يعنى ممكن تكون مكتئب وماتعرفش ... وتخسر حياتك كلها وإنت مش فاهم إيه اللى بيحصل

ودى فرصه بالنسبة لشخص متخاذل -نوعا- زى حالاتى ودايما بيلتمس الأعذار لنفسه

إيه اللى ماخلاكش تنجح فى دراستك بسهولة ؟

الاكتئاب

إيه اللى ماخلاكش تبقى بطل شطرنج - ولو محلى حتى - ؟

الاكتئاب

إيه اللى ماخلاكش تندمج فى المجتمع اللى حواليك وتعيش حياة صحّية؟

الاكتئاب

إيه اللى مش مخليك تكتب موضوعات كويسه زى ماإنت عايز ؟

الاكتئاب

 

منتهى السهولة ..

بس أنا مش مقتنع

لازم يكون فيه حدود معينه .. وأعراض معينه

لازم أفهم أنا عايز إيه بجد , وأقدر أعمل إيه بجد ... ولو إنه شكله كلام إنشا

غالبا هاكسل كالعادة !

بس مش مهم

يمكن أطلع مكتئب بحق وحقيقى :)

Waiting

 

فى اليومين اللى فاتوا اتناقشت مع أكتر من واحد من أصحابى عن الأوضاع الحاليه فى البلد ..

اتكلمنا كالعاده كلام من اللى لابيودى ولايجيب

الناس هى المسئوله بسلبيتها وللا الحكومه هى المسئوله بفسادها ؟

واحنا إيه اللى فى إيدينا كشعب علشان نعمله ؟

طب والناس اللى بتطلع فى مظاهرات دى هيفرقوا بإيه يعنى؟ إيه فايدة المظاهرات غير إنك هتتاخد تترمى فى السجن ويضيع مستقبلك ع الفاضى ؟

رأيى كان إن المظاهرات فى المسائل الخارجية زى الحرب على العراق وإهانة الرسول عليه الصلاة والسلام والاعتداء على المسجد الأقصى وكل ماشابه من الحالات ..غير مجدى بالمرّه

يادوب شوية تنفيس عن الغضب مش أكتر .. لابيرد اعتداء ولابيجبر كسر

بس مصلحة للزفت الريس ومصلحة للحكومة لأن الغضب ده أما هيلاقى مخرج مش هيتحول ضد الحكومة ولاهيسأل عن دورها الفعلى فى رد الاعتداءات دى أو مناصرة إخواننا المظلومين

علشان كده المظاهرات دى بالذات بترحب بيها الحكومه وبتبقى بتشجيعها وموافقتها

وكمان بتشترك فيها ساعات زى المظاهره الأشهر اللى انضم فيها الحزب الوطنى للإخوان فى مظاهرة ضخمة فى استاد القاهرة

أما المظاهرات الخاصة بالشأن الداخلى زى الاعتراض على التعديل المعيب للماده 76 وبعدها المظاهرات ضد معمّر المباركى وضد قنون الطوارىء وضد التزوير ومظاهرات التضامن مع القضاه

كل المظاهرات دى فى رأيى مجديه وضرورية رغم إن المظاهرات الوحيده اللى حققت هدفها نسبيا كانت بتاع القضاة وباقى المظاهرات مافرقتش بس كانت ضرورية فى رأيى وباشجعها

كمسألة نفسيه على الأقل

تقول إننا لسه ماموتناش

وتحسس مبارك والعادلى بالرعب والقلق !!

أيوه .. طول مافيه صوت عالى وشباب مستعد يضحى بنفسه مش هيحسوا غير بالرعب

زى المثال الشهير الى كان بيضربه الشعراوى عن القطه

لما ترميلها إنت لقمه وللا حتة لحمه هتاكلها جنبك ومش هتخاف

لكن لما بتخطف هى حتة لحمة بتطلع تجرى حتى من غير ماإنت تجرى عليها أو تشخط فيها

أهى حاجه برضه زى كده

دول حرامية .. ومهما خدعوا نفسهم أو خدعهم اللى حواليهم عارفين فى قرارة نفسهم إنهم حرامية وظلمة

لما احنا كشعب بنسكت وبنطاطى بتتراجع الحقيقه دى فى عقولهم شوية

بيصدقوا نفسهم وإنهم فعلا بيعملوا لصالح البلد من باب إن لما أنا أبقى الريس وغنى ومرتاح هتبقى عينى ملانه وده فى مصلحة البلد :)

لما أشارك الاسرائيليين علشان منتجاتى تدخل أمريكا وأعمل بيزنس -حتى لو البيزنس ده لمصلحة فئة محدوده من رجال الأعمال- ده فى مصلحة البلد - ماهو رجال الأعمال دول هيشغلوا شوية شباب ويقللوا البطالة شوية برضه -

كل الأفكار المغلوطة والمبررات الساذجة ... إلخ

لكن لما يقف مننا ولو شخص واحد وصوته يبقى واضح بالرفض ويقول للغولة عينك حمرا ... يتجننوا

كل العالم الوهمى المخادع من الصفاء النفسى الكاذب بيتهد مره واحده وينهار

ماشفتوش أعداد قوات الأمن المركزى المهولة اللى كانت بتنزل علشان كام متظاهر واقفين من غير هتافات ؟

وللا الغضب اللى كان بيبان على مبارك ورجال حاشيته لما بيتكلموا عن كفاية والمدونين وغيرهم

مجرد وجود معارضه مابتخافش قلب البلد .. ودى أول خطوه

طب واللى ماعندوش مظاهرات زى حالاتى واللى فى الأقاليم عموما؟

بيتهيألى إن نشر الوعى ده دور كافى

فيه ناس كتيره جدا مابتتفرجش غير على التليفزيون المصرى ومابيشوفوش غير حالة حوار ومابيقروش غير الجمهورية والمساء !!

لازم على الأقل أعرف الناس دول حقيقة اللى بيحصل فى البلد

مش محاضرات وكلام إنشاء , لكن مجرد إنى ألفت نظره إن فيه أدلة تانية ماوصلتوش

حقايق متدارية عنه ..

أحاول أفهم كل شاب بينضم للحزب الوطنى علشان يقضى مصالحه إنه كده بيشارك مبارك فى ظلمنا

أحاول أساهم ولو بالاعتراض اللفظى على المظاهر الغلط اللى بتستفيد منها حكومتنا الرشيدة

على الأقل لحد ماأى حد يلاقى أى فكره إيجابيه فعلا وقوية نقدر نشارك فيها !

I'm Back ... I'm Back

 

من ساعة مارجعت من المعرض وأنا حاسس باكتئاب غير مفهوم

المفروض إنى جبت كتب كتيره باحبها

وقابلت ناس ماشفتهاش من شهور وأحيانا من سنين

مش عارف فيه إيه بالظبط؟

يمكن يكون فيلم the prestige ?

اتفرجت عليه ليلة ماجيت من المعرض

كنت سايبه يحمّل وأنا مسافر وجيت لقيته خلص فماقدرتش أنام قبل ماأتفرج عليه

من ساعة مانتهى لحد دلوقتى بعدها بييجى 4 أيام وأنا لسه متضايق

أو يمكن يكون كتاب وصف مصر فى نهاية القرن العشرين للدكتور جلال أمين

برضه بدأت قراءته من تانى يوم وأورثنى كآبة أخرى

يمكن يكون اضطرارى للتعامل مع الناس من يوم الأربعاء بالليل لحد السبت بالليل ؟

كان الإحساس المسيطر على من ساعة ماجيت من السفر إنى مش عايز أخرج من أوضتى أو أقابل أو أكلم حد

مع إن كل اللى كلمتهم من ساعة مسافرت كانوا بالظبط حوالى 55 شخص

شاملين كل السواقين والتباعين اللى ركبت معاهم

وشاملين بائعى الكتب اللى اتكلمت معاهم فى المعرض وسألتهم على أسعار أو كتب

وكذلك الناس اللى سألتهم على المواصله اللى عايز أركبها

وبياع الكشرى وبائع الجاتوه

وطبعا خالى ومراته وأولاد خالى

وأصحابى

وبنات عمى

وواحد كان بيسألنى عن كتب مصطفى محمود فى جناح الأخبار

وواحد بيبيع الحاجه الساقعه باتنين جنيه فى المعرض

وواحد تانى بيبيعها بجنيه ونص - ده اللى اشتريت منه طبعا- وتالت بيبيع الكانز ب3 جنيه

ومديرين فى شركة أطلس للقواميس الإلكترونيه

وموظف عادى فى نفس الشركة

ومندوبين مبيعات أو 3

 و... و... و..

بيتهيألى العدد كان أكتر من 55 ! ممكن يكون 60 واحد

فى حوالى 4 أو 5 أيام

يعنى بمعدل يقترب من 12 شخص فى اليوم , تخيلوا ؟

كان لازم أنفرد بنفسى شوية علشان أستعيد توازنى النفسى :)

وأهوه بدأت أرتاح شويه الحمد لله

ورجعنا للبلوجات تانى