مقال مهم

ردّ عجبنى للدكتور عبدالمعطى بيومى فى المصرى اليوم النهارده

 بخصوص الفتوى الهزلية بتاع شرب البول

الطبيعة البشرية للرسول

Schizophrenic

 

 

دفتر أحوال

الخبر ده قابلنى النهارده فى المصرى اليوم

إصابة ١٨ في مشاجرة بين قريتين بسبب اغتصاب فتاة

اللى لفت نظرى فى الخبر هو عدم وجود أى ذكر للأمن أو الشرطه غير بعد الخناقة

يعنى فتاة تم اغتصابها وبعدين أهل قريتها خطفوا واحد من قرية اللى اغتصبوها وبعدين راحوا أهل قرية الشاب علشان ينتقموا أو يرجعوه أو أى حاجه فقامت الخناقة الضخمة دى

وساعتها بس ظهر الأمن

!!!!

كنت لسه باتكلم امبارح مع ناس أصحابى عن ظهور حوادث غريبة فى قريتنا ماكانتش بتحصل قبل كده

يعنى ظهور قطاع طرق بيسرقوا الناس على الطريق وبيرموا شجر أو مواسير علشان يجبروا العربيات الملاكى أو التاكسيات إنها تقف

وشوية شباب يخطفوا بنت علشان يغتصبوها -فى قريتنا !!!- وغيرهم طلعوا على واحد وأمه وكانوا عايزين يخطفوا أمه لولا ستر ربنا كانوا قتلوه وخطفوها

ومحاولات سرقة بالإكراه حوالى الساعة 10 بالليل أو 11 فى طريق رئيسى فى البلد

دى حاجات ماكانتش بتحصل فى بلدنا الأول

يادوب كانت السرقة ودى نادر أما كانت تحصل وكانوا بيبقوا ناس من برّه البلد عادة

لكن سرقة بالإكراه ؟

خطف واغتصاب ؟؟؟

وقطاع طريق ؟

 

معظم الناس بتتهم البانجو على اعتبار إن الشباب الصايع بيشربه على القهاوى

وبما إنهم مدمنين وصيع فمابيهمهمش حاجه وممكن يضربوك مطواه أو يغتصبوا واحده أو أى حاجه من البلاوى دى لأنهم مش مقدرين عواقب الفعل ده

ماعندهمش تمييز

ماشيين بالغريزة بس

 

بس إيه اللى خلاهم يصيعوا أصلا ؟

شباب كتير من بلدنا بيدخلوا صنايع علشان مجموهم مابيجيبش ثانوى عام

ودول لما يخلصوا المدرسة غالبا مافيش غير إنهم يدوروا على سفر برّه أو يشتغلوا فى أى مصنع

أجرة المصنع بتبقى أى كلام , لو خد 250 جنيه بيبقى كده لقى فرصة نادرة وأمه داعيه له

العالب بيبقى فى حدود 150 أو 180 جنيه

لو كان صنايعى بقى فى سباكة أو كهرباء أو أى حاجه من دى بيبقى وضع تانى طبعا

لكن الصنايعيه قليلين , الأغلبية مابيبقاش قدامهم غير شغله مالهاش لازمة أو صياعه لحد ماتيجى فرصة سفر , والفرصة دى دلوقتى بقت أسعارها مهووووووولة

وكمان مش مضمونة لأنهم مش طالبين عبيد فى الخليج, جوارى بس

ناس من بلدنا كتير سافروا واتمسكوا ورجعوا قبل حتى مايدخلوا البلد اللى مسافرينها

 

المختصر إن الأحوال هباب والناس بتزيد يوم بعد يوم

والجواز طبعا بقى حلم شبه مستحيل

وكل ده معروف

 

يبقى إيه المبرر إن مايبقاش فى بلدنا غير شوية غفر لابيهشوا ولا بينشوا

طول الليل قاعدين يشربوا شاى ويتسامروا

وإيه الحل ؟

 

بيتهيألى إن الحل ممكن يكون بطريقة واحده بس

إننا نعمل مظاهرة ضد الرئيس وضد التوريث

ساعتها قوات الأمن المركزى هتملا البلد وكل شوية هتنزل حملة تفتش بقى وشغل

وبكده -ومن غير مايقصدوا طبعا- هيبعدوا الحرامية وقطاع الطرق

 أعتقد إن ده بقى الاهتمام الوحيد للداخلية دلوقتى أما سلامة المواطن فمش مشكلة دلوقتى

المصريين دول ناس كده ويقدروا يتصرفوا لوحدهم

.... 

قطر الندى

مشهد جميل قوى لشادية وأنور وجدى من فيلم قطر الندى

وأداء مختلف جدا عن اللى اتعودناه فى الأفلام الكوميدى

 

بوست حلو

هىّ بلطجية صحيح بس معاها حق 

تيجى دى إزاى فعلا ؟

قديمة شوية

 

نكتة بإمضاء رئيس الوزراء منشورة بالجريدة الرسمية

العدد 49- 7 ديسمبر 2000 وتقول : قرار رئيس الوزراء

رقم 2237 لستة 2000 بمنح معاش شهرى مقداره ستة جنيهات

للسيدتين فوزية حسن أحمد وزينب إبراهيم سليمان أرملتى

نبيل إبراهيم محمد أحمد الذى توفى أثناء أداء عمله

يقسم مناصفة بينهما من تاريخ الوفاة فى 12/4/2000

انتهت النكتة

 

أحمد رجب

 

 

مجنونٌ ياولدى

عملت الأول ب 9 أسئلة طلعت هتلر

عملت التانى ب 18 سؤال طلعت صدام حسين

عملت التالت ب 27 سؤال طلعت الأستاذ

 

What Famous Leader Are You?
personality tests by similarminds.com

 

 بصراحة قلت كفاية كده ;)

بكره الحادثة

 

غدا الخميس على قناة الحكايات الساعه 9 مساء بتوقيت جرينتش

يعنى منتصف الليل بتوقيت القاهرة

لكل الجماعه اللى عندهم الوصلة أو مشتركين فى الإى أر تى بارشح المسرحية دى بعنف

واللى ماعندوش بس عنده واحد صاحبه عنده قناة الحكايات يبقى يروح يتفرج عنده

صحيح المسرحية الساعه 12 بالليل وده مش وقت زيارة بس المسرحية تستاهل والله ياجماعه

أداء عبله كامل وأشرف عبدالباقى فوق الممتاز

ولينين الرملى كاتب المسرحيه حلو قوى

اللى ماشافش المسرحية يشوفها على ضمانتى ومش هيندم

 

يوفو

كان فيه مسلسل زماااااااااااااااان اتفرجت عليه وأنا صغير وكان عاجبنى قوى

كان بطولة حسن عابدين وتوفيق الدقن

مش فاكر كان معاهم أبطال مين كمان ومش فاكر اسم المسلسل أصلا

يمكن كان فى اسمه كلمة عمارة.. يمكن

كل اللى أنا فاكره إن توفيق الدقن كان دايما بيتكلم عن ناس من الفضاء الخارجى جم وزاروه قبل كده

كانوا نزلوا على سطوح العمارة واتكلموا معاه بقى وكلام من ده

تقريبا كانوا قالوله إن نهاية العالم قربت كمان وإنهم هيبقوا ييجوا تانى أو حاجه زى كده وفضل هو بقى طول المسلسل يقول الكلام ده ويستناهم

طبعا أبطال المسلسل وأولهم حسن عابدين كانوا بيتعاملوا معاه على إنه مجنون

بس ده كان فى أول المسلسل بس ..

مع مرور الوقت بنتعرف على حسن عابدين الموظف المحترم اللى مش عارف لايعيش ولا يأمن حياة أولاده ويساعدهم على التمسك بالشرف والمبادىء

حكاية كل يوم يعنى

مش فاكر تفاصيل خالص بكل أسف بس على آخر المسلسل بيبدأ حسن عابدين يقتنع بكلام توفيق الدقن

وإن نهاية العالم قربت وإن الزوار اللى من الفضاء دول جايين تانى

فاكر إنى احترت قوى ساعتها

ياترى هوّه بدأ يتجنن نتيجة الضغوط اللى عليه واليأس وللا العكس تماما هوّه اللى حصل

المشكله إنه حتى فى آخر المسلسل وبعد ما شاف حسن عابدين زوار الفضاء دول بعينه وأيقن تماما إن توفيق الدقن كان معاه حق من الأول , مافيش حاجه بتظهر لنا احنا كمشاهدين

ماتقدرش تحدد لحد مالمسلسل انتهى إذا كان اتجنن خلاص زى توفيق الدقن وعلشان كده تخيل إنه شافهم

وللا إن توفيق الدقن كان معاه حق من الأول وباقى الناس كانوا جهلة مش أكتر ؟

 

طبعا أنا مدرك بعقلى دلوقتى إن المسلسل أكيد كان فيه إسقاطات كتيره ومعانى تانيه أكبر من مجرد القصة دى , وعلشان كده نفسى أقدر أشوف المسلسل تانى قبل ما أموت :)

ولو أى حد عدّى من هنا وكان فاكر اسم المسلسل فالله يخلى سيادتك ويرزقك بحاجات كتير حلوه تقولى اسم المسلسل ده كان إيه .. على الأقل علشان أبقى عارف أنا بادور على إيه !

صفع صفعا فهو رئيس

فتحت روز اليوسف وعلى مالصفحه تحمّل كنت باشوف موقع تانى ولما حمّلت لقيت المنظر ده

مالقيتش غير تعليق واحد :

صدقت

حقوق الإنسان ولامؤاخذه

 

طبعا استغربت جدا من حكاية انتخاب مصر عضوا فى منظمة حقوق الإنسان وللا مش عارف إيه لأ وكمان بأغلبية ساحقة !

والحمد لله فسرها لى الأستاذ كرم -ولامؤاخذه- جبر فى مقاله السمين , ولأنه إذا عرف السبب بطل العجب فقد كان السبب كالآتى :

 

ورشحت أفريقيا أربع دول فقط هى النصاب المحدد لها فى المجلس، بمعنى أن الدول الأفريقية الأربع حازت العضوية بالتزكية

 

وحتة تانية فى المقال لازم أكتبها برضه , ففى معرض ردّه على المغرضين الذين يهاجمون إحالة المدنيين إلى المحاكم العسكرية مما يشكل انتهاكا صارخا- حسب رأيهم القاصر طبعا !!- لحقوق الإنسان كان رد الأستاذ كرم -ولامؤاخذه تانى- جبر مفحما لهؤلاء المغرضين حيث قال :

 

محاكمة المدنيين أمام محاكم عسكرية وحرمانهم من قاضيهم الطبيعى. والرد على هذا الافتراء هو أن تلك الإحالة تتم بمقتضى القانون والدستور،

 

ولاأجد ردا أبلغ من رد سنية على عرفه الشواف

عشان كده كنت بتعدّلها

بلوجات

 

كنت مخنوق جدا جدا من الحوار الظريف اللى حصل هنا

لما الواحد بيقابل واحد متعصب أو ضيق الأفق أو سطحى أو .. أو .. ممكن يقدر يتعامل معاه

لكن لما يبقى متعصب وبيقول عن نفسه إنه مش متعصب وكل شوية يتهمك إنت بالتعصب بيبقى شىء مستفز شوية

ولما الموضوع يوصل لأسلوب همجى فى المناقشه وتوجيه سباب مباشر ورغم كده أبقى متهم إنى أنا برضه اللى غير متحضر و غير حيادى بيبقى برضه مستفز شوية

 

الحاجه الوحيده اللى خلصتنى النهارده هى البلوج الجميل إياكش تولع

بجد استمتعت جدا بقراءته وأزال تماما حالة الضيق دى

أعتقد إنه مشهور جدا وإن حظى السيىء ماخلانيش أشوفه قبل كده

أو يمكن يكون حظى الكويس إنى ماأشوفوش قبل كده علشان ينفعنى فى يوم زى النهارده

نصيحة لأى حد مادخلش ياكش تولع قبل كده إنه يدخله فورا

ولأى حد مش عايز يحرق دمه مايدخلش المناقشه الأولى دى أو على الأقل مايحاولشى يتناقش هناك فى حاجه , مش هينوبه غير حرق الدم

بلدى مش حمل العزّ

ياعينى ياعينى ياعينى ياعين

  ! ياعينى ع العز  

مشكلة جديدة

 

اليومين اللى فاتوا دول باقعد على النت كتييييييييير وبافتح بقى منتديات وبلوجات وحاجات من دى

ورغم إن من عادتى دايما المشاهده الصامته جدا وعدم كتابة ردود -بدافع الكسل غالبا- ساعات بيبقى فيه موضوعات بتدفعنى إنى أكتب رد وأتفاعل معاها

ولما بيقابلنى موضوع من دول وتصادف إنى ماأكونش مكسّل قوى باقوم كاتب رد

غالبا بامسح الرد برضه فى نصه كده وأكسل !

المهم -ماأطوّلش عليكم- ساعات بارد وأنشر الرد

وهنا بقى تبدأ مشكلتى

غالبا بتبقى ردودى بتعبر عن رأى مخالف لصاحب الموضوع ويمكن علشان السبب ده كلامى مابيتقريش كويس

بالاقى إن كلامى اتفهم منه حاجات أنا ماقصدتهاش خالص وباضطر أراجع الرد اللى أنا كتبته علشان أشوف الكلمه اللى أنا قلتها علشان يتفهم منها الكلام الغريب ده

وبرضه بالاقى الرد بتاعى سليم ومالوش علاقه باللى فهمه صاحب الموضوع

بيتهيألى إن الواحد مننا فى أى قضية بيتعامل بمبدأ احنا والناس التانيين

طالما إنت مش معايا ومش موافق على رأيى تبقى من الناس التانيين

مش مهم بقى لو كلامك مختلف أو بيتكلم عن حاجه تانيه أو .. أو .. مش مهم

فالمهم بقى إنى بالاقى صاحب الموضوع غالبا بيرد على الناس التانيين مش على اللى أنا كتيته

فأضطر تانى أرد وأوضح إنى ماقصدتش حاجه من اللى فهمها وإنى كنت باتكلم عن كذا وكذا

فإما أن ينتبه وإما أن يستمر الحوار الغريب

 

المهم إنى زهقت بقى من الحكاية دى وقررت من أول انهارده إن شاء الله ماأدخلش فى سلسلة من دول تانى

لو كتبت رد ما وصاحب الموضوع أو البلوج ماقرأش ردى كويس ورد على الناس التانيين كالعاده هاراجع ردى كويس

لو كان فعلا مش واضح أبقى أوضحه

لكن لو واضح يبقى خلاص, مش هاكتب رد تانى وأدخل السلسلة المملة دى

مرارة الواحد مش ناقصة بصراحة

هم يضحك ..

 

ماقدرتش أمسك نفسى من الضحك لما قرأت المقال ده لسحر الجعارة فى المصرى اليوم النهارده

فقلت أكتبه هنا للى ماأسعدوش الحظ وقرأه علشان يضحك معايا على المسخرة اللى احنا فيها !

 

الفتوي أشد من القتل!!

بقلم سحر الجعارة //٢٠٠٧

نحن شعوب تستحق ما يجري عليها، إن كانت هناك مؤامرة علي الإسلام فنحن شركاء في رسمها، نحن من يشعل نار السخرية في جرائد الغرب (الذي نكفره) برسومات الكاريكاتير التي تصورنا إرهابيين، أو شهوانيين متربعين علي عرش الجنس، بين نساء (أو جوار) مما ملكت أيمان الرجال!

نحن نسيء للإسلام دون قصد (أو عن وعي)، ونبرر بالفكر التآمري أطروحات فكرية متخلفة، تتسرب من بين قنوات الحلال والحرام، لنسكن جميعا خانة «الأمور المتشابهات».

فحين قرر الدكتور «عزت عطية» رئيس قسم الحديث بكلية أصول الدين جامعة الأزهر مناقشة مساحة المتشابهات التي تبلبل عقول المسلمين، فرض علينا رؤية تخالف إجماع الفقهاء، وتمادي في تقنين ما فرضه لدرجة تدريس كتاب «دفع الشبهات عن السنة النبوية» للدكتور «عبدالمهدي عبدالهادي» في الجامعة.

فهذا الكتاب هو حجته ومرجعه الرئيسي في فتوي إرضاع الكبير.. نعم «إرضاع الكبير»، بزعم أن الخلوة غير الشرعية بين زميلين في العمل يغلق عليهما باب سوياً، لا يحللها إلا أن تقوم المرأة بإرضاع زميلها، خمس رضعات!! ويتجلي الدكتور «عطية» ليطالب بتوثيق هذا الإرضاع كتابة ورسمياً ويكتب في العقد أن فلانة أرضعت فلانًا.

لقد قام الدكتور «عطية» بالقياس الشرعي علي الحديث الصحيح عن عائشة رضي الله عنها أن النبي صلي الله عليه وسلم أمر سهلة بنت سهيل أن ترضع سالماً مولي زوجها أبي حذيفة وكان كبيراً، فلما كبر (وأبطل الإسلام التبني) طلبت من النبي صلي الله عليه وسلم الحل لهذا الأمر، فأمرها أن ترضعه خمس رضعات.

ويقول «ابن باز» رحمه الله في تفسير هذه الواقعة: «الصحيح من قول العلماء أن هذا الحكم خاص بسالم وبسهلة وليس عاماً للأمة، كما قاله غالب أزواج النبي صلي الله عليه وسلم، وقاله جمع غفير من أهل العلم، وهذا هو الصواب، لقوله صلي الله عليه وسلم: (لا رضاع إلا في الحولين)، فهذا حديث يدل علي أن الرضاع يختص بالحولين، ولا يؤثر الرضاع بعد ذلك، وهذا هو الصواب».

لكن الدكتور عطية (لا فض فوه) يحذرنا من النفور من أمر يسره الرسول صلي الله عليه وسلم علي الأمة، بدعوي المدنية أو بدعوي الحرص علي الحرمات أكثر من الإسلام.

ويبشرنا أن إرضاع الكبير سيتيح للمرأة أن تخلع الحجاب أو تكشف شعرها أمام من أرضعته!! كما أنه لا يحرم الزواج بين الاثنين !! الدكتور «عطية» يبرر النظرة الجنسية لعملية الإرضاع قائلا: «أن من ينفذ رخصة شرعية يقوم بعمل ديني في اتباع الشرع، وفي الأعمال الدينية يستشعر المؤمن عبوديته وخشوعه لله فتنمحي النواحي الشيطانية».

لكنه لا يفترض وجود أي رادع ديني بين الزميل وزميلته خلال ما يسميه «خلوة غير شرعية».

هل علمتم - الآن - ما الذي يشغل علماء المسلمين عن الفتنة المشتعلة بين السنة والشيعة في العراق، هل أدركتم لماذا يسقط الشباب المصري في بئر الإرهاب، أو يطلب حق اللجوء إلي صناع الفتنة الطائفية. هناك من أساتذة الجامعات، وشيوخ المنابر الفضائية من يعطل العقل ويطلق الشهوات من أطر التحضر والمدنية.

هناك من يعتبر الكفر بعينه أن يغلق الباب علي رجل وامرأة، بحجة أن الشيطان يملك المفتاح، لكنه لا يري شبهة في مشهد رجل يلقم ثدي زميلته، بل يراه موقفا تعبديا!

ما الذي يحدث لو ثار رجل لدينه وقرر أن يرضع من زميلته عنوة ليحلل الخلوة بينهما؟ هل ساعتها سيخرج علينا دكتور «عطية» بفتوي جديدة!

أتصور أن المجتمع المصري مرتبك ومضلل بما يكفي ، وأن من يطلق مثل هذه السخافات عبر وسائل الإعلام لابد أن يحاسب بتهمة زعزعة السلام الاجتماعي، إن كان مازال لدينا سلام اجتماعي.

دولة الظلم

 

واحد حكيم زمان قال: دولة الظلم ساعة ودولة الحق إلى قيام الساعة 

وبعد أميرة وأميرة وأميرة 

وغالى والكادر والأخ وحتى الصباحى 

.. عندى سؤال واحد للحكيم اللى قالها

هى ساعتك كام بالظبط؟

برنامج مفيد

 

 

البرنامج ده علشان تقدر تحمل أى فيلم أو كليب إنت عايزه من مواقع الفيديو المشهورة زى مثلا

Youtube,ifilm,metacafe,... etc

ممكن تحمل الفيلم اللى إنت عايزه لو معاك عنوان الملف أو حتى ممكن تبحث عنه لو مش فاكر غير اسمه بس

برنامج ممتاز جدا -بالنسبة لى أنا على الأقل :)- علشان يبقى الملف عندك على الهارد وتتفرج عليه أى وقت من غير مشاكل الاتصال فى النت أو التقطيع اللى فى الصورة ... إلخ

Ashampoo ClipFinder البرنامج اسمه

 وده رابط التحميل

أو لو الرابط مش شغال ادخل الصفحه دى وهات رابط تانى

البرنامج مجانى بس لو مش عايز توجع دماغك وتشترك علشان يبعتولك السيريال يبقى اتفضل السيريال أهوه

Acfia0-770076-000140

 

مش حكاية شتا أو صيف

 

 

من انكسار الروح فى دوح الوطن

ييجى احتضار الشوق فى سجن البدن

 

سيد حجاب

لى .. ماليس لى

 

 

لي في الخوارط أحجيات من شقاق
لي ذاكرات لم تعد
لي حاضر لما يعد بحضوره
لي ألف كان
ولا مكان

ولا يكون

 ولن يكون
   !ولي حروف لا يصح بيانها إلا معبدة بكسر
لي ما ليس لي
وبي ما ليس بي
وليس فيا غير في

 
لي سماء ليس لي فيها سوي ما خلفها
لي دم ليس لي من لونه إلا الحريق
لي طريق ليس لي فيه .. طريق
لي زمان لا يعود وليس يأتي
لي زمان لا زمان به
لي مكان لا مكان له
لي قصيد ليس يعني

! لي كلام لا يقول
ولي حروف ليس يجمعها سوي ..  نزاعات الحدود
ولي تلقٍ مجدب يأبي علي الذات الصعود
ولي فراغ الأحجيه
..وبطرفها الأقصي

...لي قبة... وصخرة
.. ووجبة.. سريعة.. وهدنة
علي دم.......... لي

وبي ما ليس بي

 
بي غضب النهر إذا ينسكب بملح البحر
بي حسرة السفح ..
وبراح المضيق
هم يعبرون من المحيط إلي المحيط
فمن هناك إلي هناك
ومن همو إلي همو
ومن همو إلي هنا
ومن هنا؟
إلا هناك أتي ليخبرني حدود اسمي وفلسفة السياج

بي غريب أذبح الأبناء من جدب له
بي غريب يذبح الجيران لي
ويذبحني لهم
وبي ذهب لهم
نهر لهم
وطن لهم
.......................وأنا لهم

وبي ما ليس بي
وليس فيا غير في

لأقول أن الريح تأتي من شمال الأحجيه
لأقول نعبرنا لهم
لأقول أن ملامحا صدأت سننزعها لهم
لأقول أن الأرض إذ جفت سننقلها لهم
لأقول أن بسوسهم تبغي الجليلة للملك
فلنقتسم
لكم الجليلات ..ولي أنا لبن السباع
وأغرس الرمح الأخير بوجه مصر
وأدعي وأقول لي ملك
وأقول أن قبيلتين ستملكان مضيقنا
وستحفظان حدودهم
وتوزعان الرمل فيما بينهم
وأقول أن الريييييييييييييح تأتي من شمال الأحجيه

 

من روائع محمد دراز

تفاؤل

 

 

تسألنى إيه اللى ممكن يخرجك من الاكتئاب أو الملل أو اليأس ؟

أقولك جو شتاء وهواء وغيوم

ومعاهم إذاعة الأغانى فى السماعات اللى فى ودانى

  

طعم الحق :)

 

العدالة وإن الدنيا لسه بخير مهما حصل

إحساس بالغبطة والأمل بعدما قرأت هذا الخبر الآن

يادوب لسه باعت البوست اللى فات لقيته فقلت لازم يتسجل عندى علشان ماأنساش أبدا إن مهما ضاقت, لسه  برضه فيه أمل

 

  

حكم بإيقاف تنفيذ قرار رئيس الجمهورية بإحالة «الإخوان» إلي المحكمة العسكرية

كتب شيماء القرنشاوي ٩/٥/٢٠٠٧

أوقفت محكمة القضاء الإداري أمس تنفيذ القرار الصادر من رئيس الجمهورية بإحالة ٣٤ من قيادات الإخوان المسلمين إلي المحكمة العسكرية في قضية غسل الأموال. هتفت أسر قيادات الإخوان عقب صدور الحكم بأن حكم المحكمة لم يخش سوي الله ووصفته بأنه «حكم عادل أنصف ذويهم».

قالت المحكمة في أسباب حكمها: إنها استندت إلي أن قواعد المحاكم المنصفة طبقا لأحكام الدستور المصري والمعايير الدولية تقتضي محاكمة الإنسان أمام قاضيه الطبيعي، وهو ما أكده الدستور بإعلانه شأن وجوب المحاكمة أمام القضاء الطبيعي، لإدراجه هذا الحق في باب تنظيم القضاء ذاته، ليكون مبدأ من مبادئ سيادة القانون وحرية من الحريات التي تتصل بشخص الإنسان ولا تقوم حقوقه إلا بها.

ورفضت المحكمة ما ورد بدفاع الحكومة من أن قرار الإحالة للمحاكمة العسكرية قد صدر مستندا إلي سلطة مطلقة، وأكدت أن نظام القانون المصري لا يعرف السلطة المطلقة، وأن مصدر القرار قد استند إلي ما ورد في أحكام الدستور والقانون، وهو ما يؤكد مباشرته سلطة تقديرية تخضع لرقابة القانون.

كما استندت المحكمة في حيثيات حكمها إلي أن هناك نزاعا دستوريا مازال معروضا علي المحكمة الدستورية العليا منذ أكثر من ١٠ سنوات يتعلق بمدي دستورية الفقرة الثانية من المادة السادسة من قانون الأحكام العسكرية، ولم يتم الفصل فيه حتي تاريخه وهو ما لا يرفع عن هذا النص شبهة عدم الدستورية.

وأكدت المحكمة في حيثياتها أنها في ضوء ما سبق وفي ظل تحديد قانون الطوارئ بقواعد الإحالة للمحاكم المختصة، فإن قرار الإحالة المطعون فيه يكون قد صدر مخالفا للواقع والقانون ولن يهدف لتحقيق المصلحة العامة وذلك لأمرين أولهما: أن محاكمة المدعين أمام قاضيهم الطبيعي تحقق الردع العام للعقوبة حال ثبوت ارتكاب الاتهام الموجه لهم، وثانيهما: أن بعض الحالات ارتكبت فيها جرائم إرهابية أو ماسة بالأمن القومي ولم يتم إحالتها للقضاء العسكري فأنزل عليها القضاء الطبيعي العقاب الرادع.

صدر الحكم برئاسة المستشار محمد الحسيني نائب رئيس المجلس وعضوية المستشارين أحمد الشاذلي وهشام الغزالي ومجدي العجرودي وإبراهيم الطحان والدكتور حمدي الحلفاوي بأمانة سر سامي عبدالله.

وأكدت هيئة الدفاع أن الحكم يبطل قرار الإحالة، وبالتالي فإن مثول قيادات الإخوان أمام المحكمة العسكرية باطل، وقالت هيئة الدفاع إنها تعتزم تقديم الحكم للمحكمة لوقف محاكمة موكليها.

 

 

حاسس إن الحكم ده صفعه على قفا رئيسنا العزيز وزبانيته التشريعيين فتحى سرور ومفيد شهاب

والإحساس ده مخلينى حاسس بسعادة مضاعفة :)

 

Beautiful Creature

 

كان ياسر اتكلم عن لعنة المنا منا قبل كده

فمابالك بقى لو كان الموضوع فيه ساندرا بولك كمان ؟

:D

 

Caricature

جبت سكانر تانى-كنت بعت الأولانى- من يومين ..
ونفذت بقى حاجه كنت عايز أعملها من زمان , وهى إنى أدخّل مجموعه من الكاريكاتيرات والنكت و .. و.. على الكمبيوتر وأحفظها لأن الورق مسيره هيضيع
ولما كنت باحب الرسومات دى حتى لو كانت مش ظريفه قوى دلوقتى زى ماكانت ساعة ماقطعتها من المجلات فقلت أنشرها هنا جايز تعجب حد غيرى ويحبها زيى ..
وعلشان أقدر أرفعها كلها وتبقى سهلة فى التحميل لأى حد , خليت جودة الصور قليلة شوية زى الصور الجاية دى ...

وبعد العينة دى بقى فأنا جمعت كل الكاريكاتيرات فى ملف واحد بصيغة pdf

والملف موجود هنا للى عايز يحمله وبمساحه صغيرة جدا زى ماقلت

Lost Again

أنا ماوصلتش لحاجه من اللى حلمت بيه

سوء اختيار ده وللا سذاجه وللا إيه ؟

 

 

 

 

كلمات: أيمن بهجت قمر * 

كلنا بنحب دينا !

 

 

امبارح قرأت الرساله دى فى شريط قناة فضائية

 

نفسى زى ماكل واحد بيتعصب ويتحمس للفريق اللى بيشجعه إننا كلنا نحب دينا !

!!

أنا اتلخبطت والله وافتكرته بيتكلم عن دينا الرقاصه وقعدت أفكر فى الحكمه من إننا كلنا نسيب تشجيع الكورة ونشجع دينا , والأخ ده يقصد إيه بالظبط من حكاية إن كلنا نحب دينا دى ؟

لحد مافهمت بثقافتى المحدودة إن الأخ ده يقصد إننا نحب ديننا مش دينا

!

الله يجازى شيطانك يامضروب  :D

الأول ..

 

عدّى على أول بوست فى المدونة دى 365 يوم بالتمام والكمال

كان أول بوست لى فى 1 مايو وكانت قصيدة لبيرم التونسى

 فالمفروض النهارده أقول حاجه يعنى , سنه مش شويه برضه

مش هاحلل وأقارن وأرغى كتير

بس .. هاقول إن المدونة دى لحد دلوقتى حاجه إيجابيه فى حياتى

وعلى سبيل الاحتفال كان فيه تاج عجبنى فى مدونة مش فاكرها دلوقتى فأخدت الأسئله علشان أبقى أتكلم عنها , لأن الأسئله كانت عن حاجات أنا ناوى أتكلم عنها من زمان وكل الأسئله تقريبا عن المدونة نفسها

ولنبدأ ..

اسم مدونتك...؟

Being Here ..

 

لماذا اخترته ...ماهى نيتك من اختيار هذا الاسم؟

Being There اخترته على غرار فيلم

تأثرت جدا بهذا الفيلم وبأداء بيتر سيلرز المتفرد ونفسى قوى أتكلم عنه بس بصراحه خايف لأن أى حاجه أكتبها هتبقى سخيفه جدا جنب روعة الفيلم ده وهتبقى نوع من الشخبطه على بوستر الفيلم ! 

وبما إنى نوعا ما حاسس إنى باتفرج على الدنيا أكتر ما بأشارك فيها لأنى سلبى وماإلى ذلك فلقيت إن عنوان العنوان ده مناسب وبالذات بعد إضافة الوصف البسيط

Like a shadow by your side

والوصف ده كان من أغنية قديمة لساندرا برضه كنت باحبها قوى

فالفكره كانت إن المدونة دى تبقى آرائى وأفكارى كواحد بيتفرج على الدنيا وأحوالنا الغريبة دى من غير مايشارك فى حاجه بالظبط زى الظل .. موجود ومش موجود

حاجات غريبة كده يعنى

 

هل فكرت فى إغلاق المدونه ..والسبب؟

لا, رغم أنه تنتابنى أحيانا حلات من اللى مالاهش لازمه دى وأبقى حاسس إنى مكشوف قوى فى الحاجه اللى كتبتها ومش لازم حد يقرأ الكلام ده عنى بس برضه مايجيش فى بالى إنى أقفل المدونة

طب كنت بانشرها ليه؟ ماكنت أكتب فى مذكراتى زى ماأنا وخلاص ومش لازم نشر على النت

 

صورتك فى المدونه ..رمزيتها؟

صورة واحد مكتئب والدنيا ضلمه كده ومش باين حاجه من ملامحه لكن مكتوب فى أعلاها بوضوح إنه سايكو !!

طبعا مافيش رمزية ولا حاجه .. الصوره بتقول بوضوح إنى راجل معقد نفسيا ومحبط وكئيب :D

 

طبيعة كتابتك فى المدونه بشكل عام...سياسه ...قصه...عبث...كلام فاضى؟

سكلانس ياإكسلانس ..

سمك .. لبن .. تمر هندى

لما الواحد تيجى مرارته تنفقع من حدث سياسى أو مقال متحبش باضطر أكتب هنا بدل مالمراره تروح فطيس

لو طالبه تهييس باقعد أقول أى حاجه حتى لو كانت إزاى تعمل ساندوتش بيض !

بس أغلب كتابتى نقدر نقول عليها إنها ملل وكآبة

حوارات مع نفسى كده عن أفكارى المكرره وملاحظاتى الممله

 

لماذا دخلت عالم التدوين من الاساس؟

علشان منتدى روايات نت قفل فتره كبيره زمان وماكانش فيه مخرج للملل اللى جوايا غير سكة المدونات اللى كانت ساعتها زى الموضه الجديده

كل الناس بقى لهم مدونات وبيكتبوا .. منهم اللى بيكتبوا كلام ممتع بجد ومنهم اللى بيكتبوا كلام فارغ بجد

إشمعنى أنا ؟

 ما أكتب كده زى مالناس دى بتكتب ونشوف كده

وخصوصا إن هنا أقدر أتكلم عن أى حاجه عايز أتكلم عنها بدون رقابة من أى حد مش زى المنتديات

سيبك من الداخلية والحوارات دى

طول ماأنا مامعيش أى وثائق أو أسرار مهمة يبقى مافيش خوف علياّ من أى حاجه أكتبها

اشتم براحتك يامواطن .. الكلاب تعوى والقافلة تسير !

 

التعليقات بالنسبه لك ..اهميتها؟

اممم .. التعليقات دى بالنسبه لى دايما زى الفزورة

عايزهم ومش عايزهم

عايزهم علشان أحيانا بيبقوا دليل متابعة و-نادرا- دليل اهتمام بما يكتب

رغم إن فيه تعليقات بتثبتنى كده وباتمنى لو ماكنتش اتكتبت خالص زى التعليق اللى كتبته شغف هنا

أو تعليق حمزه هنا

بس برضه عايزهم لأنى عارف إن فى يوم من الأيام هارد عليهم دول كمان

 

ومش عايزهم لأنهم دايما بيحطونى تحت ضغط إنى ممكن أكون باكتب علشان اللى هييجى يعلق أو علشان حد ييجى يعلق ..

أنا عايز أكتب لنفسى أولا

لسه مش قد مسئولية إنى أكتب للناس دى

ومش عايز يبقى رأى الناس هو المحرك الأساسى لكتابتى

أفكار غريبة شويه بس أنا سايكو بقى فده الطبيعى بتاعى

 

احلى بوست كتبته ...ضع اللينك ..ثم اذكر لماذا؟

بما إنى ماباكتبش هنا بالمعنى المفهوم وإنما بافضفض وأرغى فهتكون الإجابة مختلفة شويه وهاجيب أحب بوست كتبته وليس أحلى ..

أنا باحب البوست ده جدا

وباستلطف توابعه ده  و ده

باحبه ليه ؟

يمكن علشان الصوره !!

 

 

فيه كلام تانى عايز أقوله بس مكسّل كالعادة

أبقى أقوله فى عيد ميلاد المدونة التانى بقى إن شاء الله :)