Monday, May 14, 2018

لايضير الشاه

النهارده ومن كام ساعة كان احتفال اسرائيل وأمريكا بنقل السفارة الأمريكية إلى القدس.

والأخبار دلوقتي بتتكلم عن حوالي 50 شهيد وأكثر من 2000 مصاب فلسطيني تم ضربهم بالرصاص الحي وكمان فيه كلام عن اقتحام المسجد الأقصى عن طريق المستوطنين الصهاينة.

من كام يوم برضه احتفل الصهاينة في فندق بيطل على ميدان التحرير هنا في مصر بيوم إنشاء اسرائيل. اللي هو يوم بداية نكبتنا رسميا كعرب في فلسطين.

احتفلوا به هنا في مصر بصورة علنية وبشبه مباركة رسمية. والله أعلم مين كمان شاركوا الصهاينة فرحتهم هناك يومها.

ومابين اليومين كان فيه قرار مفاجئ يوم الخميس اللي فات برفع أسعار تذاكر المترو في القاهرة من 2 جنيه ل 3 و 5 و 7 جنيه وتم نشر قوات أمن مركزي وشرطة بداخل محطات وعربات المترو من يوم الجمعة للقضاء على أي مظاهر احتجاجية من الناس وكذلك القبض على المشاغبين والمعترضين وبالفعل تم القبض على العديد من المواطنين واتحبسوا 4 أيام على ذمة التحقيق منهم شابة رفعت لافتة ورقية صغيرة للاعتراض على زيادة الأسعار.

في أخبار الكام يوم اللي فاتوا دول برضه كان فيه حكم قضائي على طبيب شاب بالسجن سنة والفصل من عمله عشان رفض يروح كشاهد للنيابة قبل توفير بديل له لأنه كان الطبيب الوحيد في الطوارئ وقتها ولما الكلام ده ماعجبش وكيل النيابة راح عامل له قضية لتعطيل القانون والتعدي عليه.

وفيه برضه حكم نهائي ببراءة المتهمين بقتل محامي في قسم المطرية رغم إن تقرير الطبيب الشرعي بيثبت آثار التعذيب في جثمانه الله يرحمه.

فيه أخبار كتير الحقيقة في كل المجالات وكلها بتمثل كوارث كنا بننتفض لها قبل كده سواء في الإعلام أو على السوشيال ميديا, لكن يبدو إن التكرار والتسارع في البلاوي دي طول الكام سنة اللي فاتوا عمل نوع من التبلد والاعتياد.

ما عادش فيه غضب ولا ثورة ولا حتى رغبة – مش هاقول أمل والله – في الإصلاح.

كل اللي فاضل هو إحساس بالمرارة واليأس.


Sunday, April 08, 2018

د. أحمد خالد توفيق


akt

الله يرحمه ..

مش هاضيف جديد لو قلت إني باحبه جدا جدا جدا وباعتبره صديق مقرب .. فيه زيي ملايين عندهم نفس المشاعر.

منهم اللي زيي كانوا عارفينه من كتاباته ومنهم سعداء الحظ اللي صداقتهم معاه كانت متبادلة, لكن كلنا متفقين على حبه وافتقاده.

أنا مش عارف إيه اللي ممكن يتكتب بصراحة بس حاسس إن مينفعش ما أكتبش حتى لو كنت هاكتب أقول إني ما باحبش لقب العراب ده وباعتبره تنميط أو فيه جزء من الافتعال كده زيه زي لقب الديفا بتاع سميره سعيد !

أنا باحب سميره من أول ما بدأت أسمع أغاني – في الإعدادي- و من قبل ماندخل عصر الإنترنت كنت باجمع ألبوماتها القديمة وأسمع كل أعمالها وأنقلها على الكمبيوتر .. وكنت متعود على إن مش كل الناس بتحبها, ده كمان مش كل الناس لازم تكون عارفاها!

لكن فجأة لقيت كل الناس بتحبها وبتسمعها ولقيت لقب الديفا ولقيت أكتر جماهيرها من الشباب الصغير اللى بيحب “طرقعتها” وتجديدها وحيويتها !!

كأنها كانت نوع من الجواهر المدفونة اللي الناس مش مدياها حقها وأنا لوحدي اللي كنت عارف قيمتها وباحبها, لكن المثير إن اكتشاف الناس لقيمتها وحبهم ليها خلاني مش مبسوط.

كأنها كانت (بتاعتي) ودلوقتى بقت ملك الناس كلها !!

أو يمكن الأقرب لأني كنت باحب حاجات معينة فيها ومش هي اللي مشهورة بيها دلوقتي .. حاسس إن فيه فرق بين اللى بيحب سميرة بتاع “حالة ملل” أو “باشتاقلك ساعات” وبين اللى بيحب سميرة بتاع “هوا ..هوا” أو "يوم ورا يوم” .

وطبعا مش هاتكلم على سميرة بتاع “إيش جاب لجاب” وللا  “واحشني بصحيح” أو “أسمر ملك روحي”  ..

حاجه زي كده حاسسها مع لقب العراب ده ..فيه أحمد خالد توفيق اللى احنا – بتوع منتدى روايات – عارفينه واتربينا عليه وبنتناقش معاه وبنختلف معاه وبنحبه ..

وفيه أحمد خالد توفيق “ الموضه”  اللى هو نفسه قال الله يرحمه فى حلقة “وصفوا لى الصبر” مع عمر طاهر قال إنه ساعات يكتب حاجه تافهه أو هايفه ويلاقي شباب من الجماهير دي بتشيرها على إنها قطوف الحكمة اللي ماحصلتش !

الشيئ اللطيف بقى في د. أحمد إنه فضل زي ماهو وكان واعي لفئات الجماهير والمريدين دي وكان دايما حريص إنه مايقعش تحت سيطرتها ولا سيطرة إعجابها بيه.

………………………………

مش عارف الواحد ممكن يتعامل إزاي مع خسارة بالحجم ده .. د. أحمد ماكانش مجرد مؤلف عبقري وموهوب ومثقف موسوعي. د. أحمد كان صديق ذكي بيشاركك نفس الأفكار والقناعات ويمكن الأهداف. وحتى لما تختلف معاه بيبقى كانك بتتناقش مع نفسك ومع أفكارك إنت ..

كان ساعات بيطبطب على كتفك ويواسيك ويقول لك إنك مش لوحدك اللي عايش الخسارة أو حاسس بيها, وساعات يشدك من إيدك ويوقفك عشان ماتنساش الثوابت اللي ماينفعش نخسرها ..

……………………………..

أنا اتكلمت مع د. أحمد مباشرة 3 مرات تقريبا .. منهم مره رحت وطلبت مساعدته في الكلية مكان شغله وهو حاول يساعدني قدر إمكانه.

ومنهم مره قابلته صدفه ولقيته فاكرني وبيطمن عليا .

والثالثة كانت فى دردشة لايف على منتدى روايات وساعتها سألته سؤال استفزه واتعصب عليا :)) فكان رده مقتضب .

وفي ال 3 مرات كان نفسي أطلب منه ييجي نقعد على أي قهوة كام ساعة أتكلم معاه براحتي بس كنت مقدر مشاغله وإن الظرف مايسمحش وكنت باتكسف أطلب منه كده عشان عارف إنه كان هيوافق رغم كل مشاغله وإن قعدته معايا هتبقى تضييع وقت بالنسبة له :))

……………………………

الله يرحمه مش عارف إتعامل برضه مع فكرة إني مش هاقرأ له روايات جديدة غير يمكن واحده أو اتنين من أعماله اللى لسه ما اتنشروش . مش هاقابل رفعت اسماعيل في حاجه جديدة ولا عبير هتوصل لنهاية مرضية .. علاء خلاص معاه برنادت ومش قلقان عليه في حاجه فمش مضايقني إني مش هاقابله تاني :))

يمكن اللي مريحني شوية إنه ارتاح الله يرحمه قبل مايشوف اليوتوبيا مكتملة

ارتاح من الزمن الأسود اللى كان دايما بيستشهد بيه

الله يرحمه .. الله يرحمه ويكتب له بكل حرف كتبه حسنة

Saturday, March 03, 2018

Help God !

Chris.Rock.Tamborine.2018.720p.WEBRip.x264-[YTS.AM].mp4_snapshot_00.28.02

فى الحفلة بتاع Chris Rock Tamborine قال كام نكتة لطيفة فعلا منهم نكتتين لفتوا انتباهي شوية..

الأولى كان بيتتريأ على المتطرفين والإرهابيين اللي هم المفترض (متطرفين) في حب الإله والإيمان به لدرجة القيام ببعض التفجيرات أحيانا!!

المفارقة بقى اللي بيقولها إنهم فعليا غير مؤمنين فعلا بالإله وإلا ماكانوش فكروا (يساعدوه)..

فمنين إنت مؤمن بإله عظيم وكليّ القدرة ومنين شايف إن الإله ده محتاج مساعدتك إنت يا مخلوق يا ضعيف عشان تدافع عنه وتقتل له بعض الكائنات اللي إنت متصور إنهم أعداؤه؟

مش منطقي يعني برضه..

النكتة التانية كان بيقول إنه بيودع بناته كل يوم وهم رايحين المدرسة على الباب ويقول لهم:

“كل الناس اللي بره البيت ده مش عارفينكم. ولا يهمهم شكلكم ولا إنتوا مين ولا بتعملوا إيه, ولا إنتوا فارقين مع أي حد بأي حاجه أصلا”

و رغم السياق الكوميدي اللي بيقولها بيه, بس الحقيقة عجبتني فكرة إننا ننبه أولادنا لأحقيقة إنهم مش مميزين فعلا غير بالنسبة لنا  احنا لأنهم أولادنا.

بالنسبة للناس فهم مجرد أطفال وفيه منهم كتيييييييييير.

ممكن يكون مفيد فعلا إننا نزرع جواهم الواقعية دي من طفولتهم. هتوفر عليهم بهدلة وتعب واكتئاب كتير بعدين.

Tuesday, February 27, 2018

وكأن ثورة لم تقم

في الكام يوم اللي فاتوا – ترارارام ! -  كنت بانقل ملفاتي من اللابتوب القديم للابتوب جديد. الهارد بتاع اللابتوب الجديد أصغر في الحجم شوية – SSD – وعشان كده عمّال أقلّب في الملفات بقى وأمسح الحاجات اللي مالهاش لازمة, وطبعا قابلت صور وكتابات وذكريات كان الواحد تقريبا نسيها..

في الملفات دي كان ملف مضغوط بتاع برنامج إيميلات كنت باستخدمه سنة 2003 و 2004 كنت محتفظ فيه بشوية إيميلات مهمة – وقتها – وقافله بكلمة سر, ومن حسن الحظ إني – بعد محاولات كتيييييييير – وصلت لكلمة السر اللي كنت قافله بيها, وبرضه من حسن الحظ إني لقيت البرنامج نفسه لسه موجود وقدرت أفتح الإيميلات دي تاني عشان أشوف نفسي من حوالي 13 أو 14 سنة..

كنت لسه طالب في الكلية وكنت لسه باسقط – بدأب ومثابرة أحسد عليهم الحقيقة! –. كنت عضو نشيط في منتدى روايات نت. نت وكنت بامارس هواية المراسلة عن طريق الإيميلات !

الحقيقة إني لقيت حاجات كنت نسيتها عني خالص .. خاااااااااااالص…

ومش عارف.. حسيت إن السنين اللي فاتوا دول كأنهم مش موجودين. كإن عدم تسجيل أي ذكريات أو مذكرات بأي وسيلة معناه ضياع السنين دي.

وعلى الأساس ده قلت أرجع هنا المدونة تاني وكإني باكتب في مذكراتي بالظبط.. أهي حاجه ممكن أبقى أباصيها لبنتي لما تكبر وتسألني عني أو – بما إنها غالبا مش هتهتم قوي – ممكن أبقى أدخل أنا وأفتكرني بعد كام سنة اللي أعلم هنعيشها لسه وللا لأ.

من الحاجات اللي شجعتني كمان إن بالتزامن مع الكلام ده من كام يوم لقيت بنتي بتلعب ب Mp3 بلاير قديم كنت جبته هدية لأمها في قبل مانتجوز. كان واحد جيجا وبيشتغل بحجر AAA ولازم تركب سماعات هيدفون لأن مالوش سماعة, بس كان بيسجل الصوت. ولما أخدته من بنتي ووصلته بالكمبيوتر لقيته شغال ولقيت عليه لستة الأغاني اللي كنت عاملها لها عليه – قاعد اسمعها دلوقتي بالمناسبة ولقيت فيهم موسيقي بتاع فيلم متاهة بان اللي كنت حاططها هنا فى البلوج- وكمان لقيت كام ملف صوت كانوا متسجلين عليه. لسه ماسمعتهمش ..

وكالعادة فات أسبوع تقريبا مادخلتش وماكتبتش برضه, بس النهارده كنت قاعد طول اليوم باتفرج على الموسم الأول بتاع The Big Bang Theory وبعد ماخلصته – حلو بالمناسبة – قلت أبدأ دلوقتي.

أنا عارف إن مفيش رابط منطقي, بس مش مشكلة .. كده كده غالبا مفيش حد لسه بيدخل على البلوجز. أنا نفسي مابادخلش لا على البلوج بتاعي ولا على البلوجات اللي كنت باتابعها لأن كله اتنقل خلاص للوسائط الجديدة .. وده يمكن اللي هيشجعني أدردش مع نفسي هنا تاني ..

ونحط الصورة دي بقى بمناسبة المسلسل اللي لسه مخلص أوله ده

27972431_394637204281060_4150047360313664125_n




Sunday, April 10, 2011

ويمكرون ويمكر الله


بما إن النهارده دعوه لمقاطعة الفيسبوك قلت مابدهاش بقى , نسيب الفيسبوك ونرجع للمدونة شوية .. خصوصا إن النهارده والأيام الجايه زى حرب ظريفه كده على النت والفضائيات..
من ناحيه ناس بتتهم المجلس العسكرى بمنتهى الصراحة إنهم خونة وإن الهدف من توليهم الحكم هو إفراغ الثورة من مضمونها
ومن ناحية تانيه فى ناس بتقول لأ دول ناس كويسين وبيشتغلوا لمصلحة البلد كلها
هم بس مشكلتهم إنهم عايزين كل حاجه تمشى قانونى علشان مايبانش إن الموضوع انقلاب عسكرى
وناس تالته تايهه فى النص مش قادرة تقرر ..
عايزه البلد تمشى وتبقى كويسه وبتتأثر بالإعلام واللى بيسمعوه فيه
وناس تانيه ولا الهوا .. عمالين لسه يشتموا فى البرادعى وشويه يتكلموا عن الكوره وشوية عن الجماعه بتوع المظاهرات اللى عايزين يخربوا البلد
وناس رابعه وناس خامسه و...و...و..
المهم أقول أنا رأيى بقى وللا أنا فاتح المدونة دى تهريج يعنى ؟
رأيى إنى من يوم الجمعه اللى فاتت وأنا مرتاح شوية
والنهارده بعد ماحصلت المهازل دى امبارح ارتحت أكتر
إزاى ؟
علشان بيتهيألى إن زى ماربنا عمى مبارك والعادلى وسليمان وخلاهم يخرفوا ويواجهونا غلط
وكل قرار كانوا بياخدوه كانوا بيساهموا فى نجاح الثورة أكتر وأكتر
بدأت أشوف ده من المجلس العسكرى
رغم إن لسه فيه واحده زى نواره نجم مش عايزه تصدق عليهم الكلام ده
بتشوف بعينها وعقلها لكن قلبها مش مطاوعها وعماله تجيب الغلط على الناس الهبله والليبراليين اللى مش عارف إيه وشويه تقول إن الجيش متفق معاهم وعارف وترجع تدافع عنهم تانى !!
لكن بكره كل الناس تشوف الحقيقه بوضوح
الحقيقه إن المجلس العسكرى تولى السلطه من مبارك لأن دى كانت الوسيله الوحيده قدامهم علشان مايطيروش كلهم مع مبارك
صحيح إن دى برضه كانت الوسيله الوحيده إن مصر كلها ماتطيرش برضه وتدخل فى متاهه -مؤقته- الفتره اللى جايه
لكن عموما ماحدش يقدر يحدد نية أى بنى آدم تانى أو إيه اللى فى ضميره
اللى بيحدد هو الفعل
يعنى هدف المجلس العسكرى من تولى السلطه نقدر نكشفه من خلال أفعاله وأوامره منذ توليه السلطه خصوصا إنه أعلن بصراحة إنه متبنى لكافة مطالب الثورة المشروعه وبيتعهد بتنفيذها
والأفعال أنا شايفها نوعين
نوع بيحقق مطالب الثورة زى حل مجلسى الشعب والشورى وإلغاء الدستور القديم وإقالة حكومة شفيق .. ودول للأسف الجيش مابيعملهمش غير بعد ضغط شدييييييييييييد جدا وقوى فى الشارع
ونوع تانى زى الاستفتاء وقانون منع التظاهر والاعتصامات ولجنة الحوار الوطنى والإعلان الدستورى
ودول الجيش بيعملهم ن نفسه وعليهم ألف مليون علامة استفهام
وبالنسبه لى أنا شخصيا مفيش أى علامات استفهام
لما يكون فى إيدى سلطه مطلقه فى البلد
وبعد الثورة ولحد أسبوعين تلاته فاتوا كان معايا دعم شعبى كامل لكل قراراتى
وأخدت وقت كافى جدا وقعدت مع الناس كلها
وبعدين آخد قرارات عبثية زى بتاع الاستفتاء وأقف بكل قوتى وإعلامى الرسمى فى اتجاه معين ولما يتفضح الاتجاه ده ألحس كل كلامى وأعمل إعلان دستورى من غير حتى ماأوضح للناس أنا ليه استخفيت بيهم وعملت إعلان طويل عريض من غير ماآخد رأيهم وأقول لهم أنا كنت غلطان
لأ وكمان أماطل فى محاكمة مبارك وأولاده وأعوانه بحجج فارغة زى إن المحاكمات لازم تاخد وقتها علشان نقدر نرجع فلوسنا وعلشان التاريخ مايجيش ويقول عن مبارك إنه شهيد ؟؟؟؟ماأقدرش أرد غير ب " أحه " هوه احنا شعب عبيط قوى كده علشان يصدق الكلام الفارغ ده ؟
يعنى كل الدول الأجنبيه اللى عرضت تجميد أموال مبارك واللى معاه وإنهم يرجعوهالنا هيسحبوا كلامهم تانى وهيناموا ع الفلوس لو حاكمنا مبارك ؟
ده لحد دلوقتى ماسمعناش عن طلب رسمى اتوجه لاسترداد الفلوس دى , ولا حتى حصرها ويطلع فى الإعلام بيان واضح بثروة مبارك وأتباعه بره
وحكاية التاريخ دى أظرف حاجه والله العظيم
وكأنى لما أحط مبارك تحت الإقامة الجبرية فى القاهره هيتحول لبطل
لما أحاكمه بتهمة القتل العمد للمتظاهرين لأنه إدى أوامر للعادلى باستعمال الرصاص الحى هابقى باطلعه بطل
العادلى لحد دلوقتى بيتحاكم بتهم مالية مش جنائية
ومحاكمات الوزراء السابقين كلهم بتتأجل كل جلسه
ولسه عاملين لجنه بعد مظاهرة الجمعه فى أول إبريل علشان تفحص ثروة مبارك فى مصر ؟
ولسه فاكرين إنهم يحققوا مع الشريف وعزمى ؟
ليه كل ده ماتمش من شهر فبراير ؟
مفيش سبب غير حاجه من اتنين
ياإما المجلس العسكرى متواطىء معاهم
ياإما هم ماسكين حاجه غلط على المجلس العسكرى
وفى الحالتين ماينفعش المجلس العسكرى هو اللى ينفذ مطالب الثورة
فى الحاله الأولى هيشتغل ضدها وفى الحاله التانيه مش هيقدر ينفذها
كل الكلام ده فيه جدال حواليه وكنت أنا باحاول أسمع أكتر علشان أكون رأى صح لكن الفيصل بالنسبة لى فى تحديد مدى وطنية المجلس العسكرى وائتمانه على الثورة كان الإعلام
لو كان فيه رغبة حقيقية فى الحفاظ على الثورة وتحقيق أهدافها
أو حتى لو كان فيه رغبة حقيقية فى إدارة الفترة الانتقاليه بحياد وبعد كده الشعب يعمل اللى هو عايزه علشان مايتقالش إن الجيش عمل انقلاب عسكرى
الحاجتين دول كانوا هيبدأوا بإعلام حر وصادق
لكن اللى شفناه إن المجلس العسكرى حافظ على المناوى فى التليفزيون
ولآخر لحظة بتوع الجرائد القومية زى ماهم
والقنوات الإعلاميه الخاصة اللى ثبت لينا جميعا إنها موجهه فى أيام الثورة
يتم استخدامهم من المجلس العسكرى للتوجيه الإعلامى كما كان يحدث قبل الثورة
وطريقة كل الوسائل الإعلاميه دى هى بالظبط اللى كانت بتحصل قبل الثورة مع مبارك
ونفس الغموض المتعمد اللى كان مبارك بيمشى البلد بيه لسه موجود فى طريقة إدارة المجلس العسكرى
غموض وتضارب مقصودين لخلق حالة من التشويش المقصود علشان المواطن بعد ماكان هدفه محدد فى محاكمة مبارك ونظامه وإسقاط كل أعوانه يبقى كل يوم ملخوم فى حاجه جديده ومش عارف ياخد قرار فى حاجه
حاجات كتييييييير ممكن تتحسم فى أسبوع واحد وحلولها موجوده لكن بتتساب عايمه زى ماكان مبارك بيعمل بالظبط
ودايما رافعين شعار مبتذل هو استقرار البلد
..
بيتهيألى الأمور أوضح من اللازم لكن الناس مش عايزه تصدق اللى شايفاه بعينيها
يمكن لأن لما مبارك كان ماسك كان الموضوع أسهل
لما مبارك وكل اللى معاه يتقبض عليهم ويمشوا الجيش يمسك البلد فترة انتقالية
طيب دلوقتى بقى لما المجلس العسكرى يمشى , مين اللى هيمسك البلد فترة انتقالية ؟
حتى فكرة المجلس الرئاسى لازم تتم عن طريق المجلس العسكرى فلو شلنا المجلس العسكرى دلوقتى هنقعد فى حالة فوضى كام شهر كده على مانستقر على نظام
وده اللى الناس خايفه منه ..
علشان كده مش قادرين يصارحوا نفسهم باللى شايفينه من المجلس العسكرى
لكن زى ماقلت فى الأول
ربنا هوه اللى هيفضحهم بأعمالهم
طبعا كنت أتمنى أكون غلطان ويكون المجلس العسكرى أمين فعلا على الثورة وعلى تطهير البلد علشان ترجع تقف تانى على رجليها , لكن أنا مش هاخبى رأسى وأغمى عينى فى الوقت ده
ده مش وقت الرمادى خااااااالص
احنا عملنا ثورة علشان تبقى البلد بتاعتنا ونراقب اللى يحكمنا ونحاسبه
والمجلس العسكرى لو ماكانش هيمشى زى ماحنا عايزين يبقى مايحكمشى
!!
طبعا فيه كلام أكتر من كده عن المجلس واسرائيل والغاز والإخوان والفتنه الطائفيه والأمن الوطنى لكن مش طالبه تشتيت أكتر من كده علشان ماأزهقش وأكنسل التدوينه كالعاده
هاسيب بس رابطين مهمين للمتابعه
الأول لنوارة نجم من رافضى الاعتراف بتواطؤ المجلس العسكرى


والثانى لفاتيما من روح قلب ماما ودى من المؤيدين لفكرة تواطؤ المجلس العسكرى


Tuesday, February 15, 2011

مصر .. حرّة





حقوق الصورة محفوظة لصاحبها الذى لاأعلم للأسف من هو
!!

Friday, January 14, 2011

عشان خاطر كارتر

 

يبدو أنه من بعد ماأضاعنا السادات فى كامب ديفيد من قبل علشان خاطر كارتر , فسوف يفعلها مبارك الآن ثانية بعد أن طمأنه كارتر !!!

حقيقة أنا لاأفهم كيف يتم نشر هذا الخبر ..

فأى فرد أعمى سوف يرى بوضوح كم الخطر الذى تقع فيه مصر بانفصال جنوب السودان والتواجد الاسرائيلى هناك .وقد بُح صوت الكثير من الكتاب فى التحذير من هذا الخطر منذ سنوات ولم يهتم مبارك ..

ثم الآن .. الآن فقط

يقلق بعض الشىء , وعندما يقلق يسأل كارتر ؟

والحمد لله فقد طمأنه كارتر , وتم زف البشرى للمصريين فى الأهرام المتخفى المسمى بالمصرى اليوم ..

لابأس ..فيبدو أننا لن نضطر إلى تحمل هذا الغباء كثيرا بعد الآن فقد أتتنا البشرى من تونس بإزاحة بن على ..

عقبالنا