Saturday, June 24, 2006

والليله عيد !!

بصراحه مش لاقى حاجه أكتبها فى عيد ميلادى
عندى اكتئاب تقريبا أو حاجه
ملل واكتئاب .. مع شويّة يأس يمكن

ماعلينا

أنا باسمع دلوقتى البتاعه دى بتاع حنان ماضى


صدّقنى ..
أيام الدنيا أحلى من أحلام الأغانى
فيها الشارع وبيتنا
والحب الأولانى
وفيها اتربّى قلبى
فى حضن الناس حبايبى

اسمعنى ..
حلوه الأحلام حقيقى
معلش ياحبيبى
لكن مابين طريقى وبينها بر تانى
وبحور هايجه وغريقه
وأنا مانيش جريئه
والسكّه مخوّفانى

افهمنى ..
امبارح كنت جنبى فى الغنوايه الجميله
قلبك بستان وقلبى عصفور ساكن خميله
وصحيت على الحقيقه
بعد الغنوه الرقيقه
لقيتنى بعيده عنّك والغربه مسهّرانى

كلّمنى ..
إيه رأيك ياحبيبى؟ وللا إنت مش معايا ؟
الحلم بدايته رحله .. لكن إيه النهايه؟
صدّقنى الدنيا أجمل
من حلم يموت ويدبل
وحتّى يوم مايصدق ..
يصدُق مع حدّ تانى

!!






الدنيا أجمل ؟

ماأعتقدش
 .. 



Friday, June 16, 2006

دى يعنى إيه ولامؤاخذه ؟

كعادتى فى ليلة الامتحان دايما باقعد أقرأ فى أى حاجه غير الماده اللى هامتحن فيها
وبما إن بكره امتحان وماذاكرتش فيه حاجه لقيتنى عمّال أقرأ ملحق بورصة السيارات
بتاع جريدة صوت الأمه وكان فيه مقال إعلانى عن معرض لسيارات هيونداى
كان فيه مؤتمر طبعا اتكلم فيه دكتور رؤوف غبور رئيس مجلس إدارة مجموعة غبور
طبعا مقال ممل كالعاده وكلام مالوش أى لازمه بس زى ماشرحت أنا فى ليلة الامتحان
ماباقدرش أشوف أى حاجه غير الكتاب وماأقراهاش
المهم لقيت الجزء ده :

"
وتابع غبور:
وأى سياره تأتى إلى مصر تخلق معها فرصة عمل جديده للمجتمع المصرى
ولهذا فنحن حريصون دائما على خلق فرص عمل جديدة للشباب ومثل هذه المنظومة
وفريق العاملين يعلمون جيداحقيقه مهمه وهى أن المستهلك المصرى وصل
إلى مستوى من الحنكة والخبرة تؤهله للحكم على البضاعة دائما
وأصبح لاينخدع بأى كلام معسول وأصبح يعرف من الذى يعمل بجديه
ومن الذى يبيع الكلام فقط
ونحن لدينا الآن فريق فى الحكومه يعمل على أعلى مستوى من الخبرة وهذا مايساعدنا على
المنافسه , لأن المنافسه شىء جيد وصحى ونحن نستعد لها دائما
"
نُشر فى ملحق بورصة السيارات لجريدة صوت الأمه بتاريخ 5 يونيو 2006

إيه العباره بقى ؟
ده خطأ مطبعى ؟ وللا غبور دى تبع الحكومه وأنا ماعنديش فكره ؟
وللا دى حاجه أنا مش فاهمها لأنى ماليش فى العربيات قوى ومابافهمش فيها


!!
يعنى إيه لنا فريق فى الحكومه يساعدنا على المنافسه ؟
ياترى ممكن يكون التفسير الخبيث هو السليم وإن الكلام يبقى بالمفتشر كده عادى ؟
بصراحه أنا ماأعتقدش


أو بمعنى أصح أتمنى أكون غلطان فى التفسير المباشر ده
أكيد فيه حاجه أنا ماأعرفهاش أو مش فاهمها
والنبى اللى عارف تفسير تانى للكلام ده يقول لى ويشرح لى
لأنى فى ظروف امتحانات ومش قادر أفكّر كويّس لوحدى :(

..


Tuesday, June 13, 2006

أميره



 من المطربات اللى مرّوا بسرعه زى الشهاب فى الساحه الغنائيه واختفت
رغم تميّز صوتها وأسلوبها
كل اللى أصدرته ألبوم واحد اسمه أوّل كلامى
واشتركت فى أكتر من ألبوم مع مطربين تانيين
وعملت أكتر من دويتو كان من أشهرهم دويتو وسط الدايره مع محمد منير
وكمان باحبك باستمرار مع علاء عبدالخالق
وعملت تتر ألف ليله وليله فى السنه اللى كان أبطالها آثار الحكيم وفاروق الفيشاوى
النهارده لقيت لها فى منتدى افتكاسات ألبومها بصوت ممتاز رفعه مونتى
فقلت أكتب عنها وأفكّر الناس بيها خصوصا اللى من سنّى !
كان ليها أغنيه واحده بس عملتها كليب وهى

ياشمس غيبى


ياشمس غيبى فى بحور الغروب
روحى لحبيبى فى سحاب الدروب
قوليله ليلاتى باستنى الرجوع
وأتنهّد آهاتى تطفّى الشموع
وأتصبّر ياعينى بدموعى وحنينى
لو قلبه ناسينى , أنا عنّه ماأتوه

وسهرت بالأمانى أستنى اللى رمانى
صحيت لى الشمس تانى م البحر الغريق
وقالت لى روحى نامى ماخلاص ضاعت أسامى
من شجر الطريق
ردّت منى عينى بدموعى وحنينى
لو قلبه ناسينى , أنا عنّه ماأتوه

ومشيت ويّا الشوارع فى الليل أبو المواجع
أسأل عنّه اللى راجع من نفس المكان
والناس قابلونى ياما سألونى بالملامه
فين راح اللى كان؟
ردّت منى عينى بدموعى وحنينى
لو قلبه ناسينى أنا عنّه ماأتوه


الكلمات كعادة الفتره دى كانت مش عاليه قوى !!
بس الذكريات بقى ^_^

عموما آدى رابط ياشمس غيبى

وكمان أغنيه جميله فعلا فى الألبوم اسمها طب ليه

وللى مش مشتركين فى منتدى افتكاسات آدى باقى الأغانى مع الشكر للأخ
MoonTy

أول كلامى

غلّبنى الشوق

حلوين

الهوى دوّار

زى الطيور ودى ممتازه فعلا

قوى !!






بدون تعليق

 

ونُهدى مصر حباً..بالأغانى
                    فتملؤنا أغانينا اغترابا

                                            سيد حجاب

زييييييييت ؟!!


 سميره سعيد عملت إعلان

مش واحد بس

ده فيه كمان واحد

الإعلانين عن زيت وطنى مغربى

ومتنفّذين بصوره مش بطّاله تقنيا

بس ضايقنى قوى اختيار أغنية آل جانى بعد يومين فى الإعلان الأول

الأغنيه دى ليها عندى مكانه مميّزه تقوم تيجى فى إعلان عن زيت !!
وبنفس الكلمات واللحن مش مثلا كلمات موازيه كعادة الإعلانات

والإعلان التانى كانت الأغنيه اللى فيه هى  قوّينى بيك

بغض النظر عن تجربة الإعلان نفسها اللى مش عاجبانى
ومش شايف إنها هتضيف حاجه لسميره
بس كمان اختيار الأغنيتين كان غير موفّق تماما

فى الإعلان الأول مثلا نفهم إيه من أغنية آل جانى بعد يومين؟
إن سميره بتحب الزيت بس الزيت مش واخد باله وبيحب سمنه تانيه !!
وللا بس إنه اتأخّر فى السكّه يومين على ماجه ؟

والتانى طبعا قوّينى بيك ^_^
صحيح الكلمات ماشيه مع الزيت وخصوصا لو غيّرنا وبقت
غذّينى بيك
بس اللحن هادى زى آل جانى بعد يومين بالظبط

طالما المبدأ كان استخدام أغانى لسميره فعندها أغانى كتير رتمها أسرع
وتنفع فى الإعلانات أكتر

مثلا أغنية ماخلاص , وتيجى وهىّ بتكلّم الزيت وتقوله ابعد بقى عنّى
حاول تفهمنى ,الماضى خلاص إنساه !!
وبعدين تدوق طعم الأكل فماتقدرش تكمّل الأغنيه وترجع فى كلامها
وترجع تانى للزيت !!

ماعلينا
على رأى سميره نفسها

يعنى هىّ جت علىّ

^_^


Monday, June 12, 2006

العقل زينه ..

 
قالت أحبك ..

فاندهشت

قالت أحبك ..

تردّدت

قالت أحبّك ..

ولذت بالفرار

!!

Saturday, June 10, 2006

كلام لذيذ ..

كان فيه مسلسل تليفزيونى من فتره اسمه "ساكن قصادى" من تأليف يوسف عوف
الكاتب الساخر الكبير الله يرحمه
وفى حلقه من المسلسل كان فى بيت محمد رضا شغّاله شاطرة جدا وذكيّه ولسّه بتدرس
فابنه كان بيقترح إن الشغّاله لازم تكمّل تعليمها
ودار الحوار ده :

الابن : مش هىّ فى الكليّه؟ يبقى لازم الأول تكمّل تعليمها وتاخد شهاده

الأب: والشهاده هتنفعها بإيه؟ هتعمل المحشى أطعم من كده؟ بدل ماتعمله
        من ورق العنب هتعمله من ورق الكراريس؟

الابن: ثقافه يابابا

الأب: بقى الثقافه وللا المحشى ياجاهل ؟
!!
 

Monday, June 05, 2006

كناريا

 عمل تانى للرهيب فعلا سيّد حجاب
أنا أوّل ماسمعت التتر ده اتجنّنت من قدرته الغريبه على اللعب بالكلمات
قعدت أسمع فى التتر كتير جدا علشان أهرب من متاهة الكلمات الغريبه دى
وأقدر أوصل للمعنى الجميل اللى هوّه كاتبه
ورغم إن الأغنيه مرتبطه بأحداث المسلسل نوعا "كناريا وشركاه" بس بيتهيألى
إنها عمل قوى برضه لوحدها


دى دمعه من قلبى ع الخد جاريه
وللا دى بسمه نسمه فى مسامّى ساريه
لا لا دى أرواح طاهره طايره فى براح
وذكرى عمر فى توهه و ف توبه راح
ياقلبى عيش مع زقزقات الكناريا

بين دنيا دايره جروحها فى روحنا غايره
وأمانى فايره فى دنيا تانيه مغايره
فيه قلّه جايره وقلّه غايره ومعايره
والناس مسايره وحايره أو فاهمه قاريه
وياقلبى عيش مع زقزقات الكناريا

بين رهبه م التوهه وتوبه برغبه
سدّدنا ديننا وغيرنا أغنى وأغبى
وقلوب مصاحبه الحق صاحيه ومشاغبه
وقلوب تدوب فى قلوب ولا هيّ داريه
وياقلبى عيش مع زقزقات الكناريا

الأداء كان للفنان على الحجار بس مش فاكر للأسف الملحّن
عموما للى عايز يستمتع آدى تتر البدايه
وكمان النهايه

Sunday, June 04, 2006

للوارث من مأدبة الإرث

 
القصيده من هنا للشاعر محمد دراز


أنا العابر من أطباق أبيك إليك. فكل
وأنا المقلو بزيت العباد وأنت الشمس. فكل
وأنا المحشو بما شئت من الخوف
نضجت علي نار الفزع وذاكرة الإذعان
وطأطأت لإبزارك* رأسي
واستعذبت الملح لأجلك .كل
كم ملعقة من تصفيق ؟
أي حساء دم تختار؟
أعلم أنك لن تختار الحار. إذن بالحامض
أنت تحب الحامض مثل أبيك
والماء؟
هل يكفي النهر شرابا ؟
أم نعصر لشرابك ما أنجبت الأرض نديا وطريا ورقيق؟
واللبن إذن ؟
كم طفلا تبغي أن نحرم كي تحمر خدودك _تتورد_وتليق
أن يأكلك الشعب غدا
ويفيق
ويثور علي مائدة القصر
حريق



الإبزار هو الفلفل الأسود !

Saturday, June 03, 2006

أعمل لكو إيه ما أنتوا كتيييييييييييييييير

 

إسرائيل تقتل ضابطين مصريين على الحدود


مصادر مصرية: الجنديان قتلا داخل مصر ثم سحبا لإسرائيل

موقف مش جديد
قبل كده اسرائيل ضربت جنود مصريين على الحدود بس كانت المرّه اللى فاتت
بدبّابه تقريبا أو مدرّعه
وماحصلش أى ردّ فعل من الحكومه المصريه غير برضه استنكار وطلب تحقيق دولى

بس المرّه دى فيه حاجه زياده وهى إن الريّس بتاعنا هيقابل إيهود أولمرت فى شرم الشيخ
عادى يعنى ...
الواحد منّنا بقى رخيص قوى ياأولاد
طب الشباب كانوا معارضين وبيقلقوا راحة الريّس وبتاع
طب بتوع الأمن المركزى اللى إنت ماسك البلد بيهم
طب حتى ذرّا للرماد فى العيون على اعتبار إنّك رئيس مصر
مصر مش اسرائيل أو دوله محايده بينهم
حتى مش هنتكلّم عن حقوق أسرانا وجنودنا اللى اتدبحوا فى سيناء بعد النكسه
وحصلت مجازر بيعاقب عليها القانون الدولى واتسجّلت
وحكومتنا الرشيده مارفعتش قضيّه ولا طلبت تعويضات
ماشى ياعم اللى فات مات ومش هنتكلّم فى حاجه بقى لها ييجى 40 سنه
إنت راجل بقت صحّتك على قدّك وهتفتكر إيه وللا إيه

طيب بتوع النهارده دول
هتسيب حقّهم ليه؟ وعلشان مين؟
حتّى من باب إنك تكسب نقطه قدّام شعبك وقدّام الناس اللى ممكن يكونوا بيناصروك
حتّى قدام بتوع الأمن المركزى نفسهم ياأخى يعرفوا إنهم مش رخاص قوى كده ياأخى
بس مشكلتنا فعلا إننا كتير
زى مالريّس بيقول دايما
احنا كتيييييييييييييييييييييييييييييييييير
لمّا يروح مننا عشره وللا ميّه وللا ألف مش مستاهله إن سيادته مزاجه يتعكّر
لمّا مواطن مصرى يتهان فى أى دوله تانيه أو يتسجن
عادى , عندى منّه كتيييييييييير
لما اسرائيل تضرب كل شويّه  عسكرى وللا اتنين وللا حتى ظابط زى المرّه دى
برضه مش مشكله ..
أنا بينى وبين اسرائيل علاقات استراتيجيه ومحوريه فى بدنجان السلام
وأنا راعى عملية السلام فى الزفت الأوسط

حسبى الله ونعم الوكيل 


خمسه وخميسه

High Fidelity
فى الفيلم ده كان البطل كل شويه يعمل لسته أو "قائمه" ب خمس حاجات
مرّه خمس أغانى رومانسيه
مرّه خمس نساء حبّهم وسابوه
ومرّه خمس أغانى فى فترة الصبح
حاجات زىّ كده
أنا قلت أعمل لنفسى شويّة خمسات كده , من باب الملل يعنى
وبما إنى زهقان دلوقتى فعلا فعلا فعلا فده ميعاد مناسب لفكره زى دى

وهابدأ ب 5 أفلام ماأقدرش أتفرّج عليهم أبدا مهما كنت زهقان أومتنّح

1- الإرهاب   بتاع ناديه الجندى

2- سلام ياصاحبى بتاع عادل إمام وسعيد صالح

3- امرأه هزّت عرش مصر تانى بتاع ناديه الجندى

4- الجحيم تانى عادل إمام بس المرّه دى كان مع مديحه كامل وشيرين

5- فى الصيف لازم نحب المره دى نور الشريف وماجده الخطيب وشويّة نجوم تانيين فى أسخف أدوارهم

امم فيه أفلام تانيه كتيره بدأت تيجى على دماغى بس نلتزم قاعدة الخمسه ونخلّيهم لأى بتاعه تانيه


خمس كتّاب لو لقيت لهم مقالأو أى حاجه لازم أقراه

1- أحمد رجب

2- أحمد خالد توفيق

3- سلامه أحمد سلامه

4- محمد حسنين هيكل

5- ناهد فريد


خمس روايات ممكن أقراها بدون ملل فى أى وقت

1- ملحمة الحرافيش لنجيب محفوظ

2- الزينى بركات لجمال الغيطانى

3- ثلاثية "إيجور" لأحمد خالد توفيق

4- أرض النفاق ليوسف السباعى

5- زينب والعرش لفتحى غانم


خمس أفلام بقى ممكن أتفرّج عليهم أى وقت

1- الإرهاب والكباب

2- الحب فوق هضبة الهرم

3- هنا القاهرة

4- السادة الرجال

5- الأفوكاتو


وخمسه أجنبى برضه ممكن أتفرّج عليهم أى وقت بدون ملل

1- Matrix

2- American History X

3- Gulliver's Travels

4- The Big Kahuna

5- ForrestGump


خمس مطربات بقى لازم أجيب أى شريط جديد ينزل لهن

1- سميره سعيد

2- حنان ماضى

3- ماجده الرومى

4- أمل وهبى - أيوه أمل وهبى !!-بتاع الخيّاله والشيكولاته

5- أصاله


وخمس كليبات عربى باحبّهم جدا جدا

1- لابأحلامك ل جوليا بطرس

2- حالة ملل ل سميره سعيد

3- برّه الشبابيك ل محمد منير

4- صدفه ل عايده الأيوبى

5- ليلة عشق ل حنان ماضى


وكفايه كده المرّه دى , أكمّل بعدين فى أى وقت أكون زهقان فيه برضه

Invisible Shelter




 من المطربات اللى بدأت أسمع أغانى مخصوص بسببهم الألمانيه ساندرا
يمكن اللى من جيلى عارفينها كويّس خصوصا إن القناة التانيه
-ومن بعدها الخامسه- كانت بتذيع أغانيها بكثرة من حوالى 10 سنين
عموما أنا قلت أحطّ الأغنيه اللى خدت منها جزء من عنوان البلوج ده

Invisible Shelter


(My invisible shelter)
(My invisible shelter)

Feel me
I'm by your side
Can you feel me
Tonight

Can you hear me
I am cryin for you one more time
Can you feel me
Inside

I couldn't make it right
And now you're out of sight
But there is something you should know

Your love is like a knife
It's driven deep inside
I'd rather die than let it go

I never thought
This world was runnin out of love
I always thought
For me there's more than just enough

Can you feel me
Like a shadow I'm by your side
Can you feel me
Tonight
(My invisible shelter)

Can you hear me
I am cryin for you one more time
Can you feel me
Inside
(My invisible shelter)

A world in black and white
I learn to live my life
I gotta find a way without you

I never thought
That I could ever hate myself
I never thought
That all I'd do was cry for help

Can you feel me
Like a shadow I'm by your side
Can you feel me
Tonight
(My invisible shelter)

Can you hear me
Hear me
Feel me
Hear me
Can you feel me
Tonight
(My invisible shelter)


وكمان رفعتها لكم هنا على الرابط ده
علشان عارف إن مش كلّه بيستخدم إيميول وهايعرف يجيب الأغنيه


مش براءه بالظبط !!