فكر ؟؟؟؟ جديد ؟؟؟

 

للأسف النهارده من ساعتين كده كنت قاعد قصاد التليفزيون ولقيت مؤتمر الحزن الوثنى ع المحور

كانت القعده عشان الفلاح والزراعه والكلام ده

لقيت واحد من الأعضاء بيتكلم كأنه فى مجلس الشعب فقلت يبقى توحه قاعد ع المنصه بس لما جت المنصه لقيت جيمى هو البيج بوص … قلت ماشى أهوه ده برضه اسمه مؤتمر الحزب وممسكينه فيه أمين السياسات  فمايضرش يعنى

اللى خلانى أفضل قاعد أتفرج إن حضرة النائب اللى كان بيتكلم كان بيقول كلام منطقى عن السماد وبيطلب عدم تحرير أسعار الأسمده وضرورة دعم الفلاح وكلام من ده .. كلام محترم يعنى وأهوه من الحزب الوطنى أهوه مش من المعارضه

وآدى وزير الزراعه قاعد المنصه أهوه سامع بودانه ومطنش بس مكشّر كده شويه

وبعدين اتكلم كام عضو تانيين كده قبل ما جيمى يبتدى يتكلم .. مش فاكر بصراحه قال إيه بالنص .. بس كان عمال يقول نزرع محاصيل من اللى بتجيب فلوس كتير ونقدر نصدرها والكلام ده ..

على طول جه فى بالى يوسف والى وسياسة الفراوله والكانتالوب .. ساعة ماكانت فلسفته إننا نزرع فواكه وبعدين نصدّرها بفلوس كتيره بقى وبعدين نشترى من الفلوس دى قمح ناكل منه !!!!

وده طبعا بدل مانزرع قمح ناكل منه على طول .. تطبيقا لسياسة ودنك منين يا جحا ..

طيب يعنى لافكر جديد ولا حاجه .. ده نفس الفكر العقيم اللى كان هيودينا فى داهية لما أسعار القمح العالميه زادت ..

شوية كلام فارغ كده من جيمى كمان وإدى المايك لرشيد وزير مش عارف إيه كده ..

فى بداية كلامه ذكر الكارثة اللى كنا داخلين عليها فى 2007 بخصوص القمح .. استبشرت خير وقلت هيصحح لجيمى معلوماته وإننا لازم نكون اتعلمنا الدرس ونزرع قمحنا بإيدنا بدل مانتحوج للى يسوى واللى مايسواش ..بس تقول لمين ..

لقيت رشيد بيحوّر فى الكلام وبيقول إن الدول الكبرى زى أمريكا وأوربا بيدعموا الفلاحين هناك علشان يزرعوا القمح وبكده أسعار القمح العالميه بتبقى رخيصة علشان كده احنا مش هنقدر ننافسهم فى محصول القمح فنشوف لنا محاصيل تانيه زى الخضار والفاكهه نقدر ننافس فيها !!!!!!!!!!!!!

أنا ازبهليت قادم التليفزيون .. كأننا ياعينى مش بنزرع علشان ناكل لاسمح الله وعشان نلاقى رغيف العيش لاقدر الله ..

ده احنا فاتحين مشروع استثمارى وعايزين نشغل فلوسنا ياعم الحاج ونكسب لنا قرشين ..

لأ وإيه سيادته وباقى الحكومة عملوا مؤتمرات مع الحكومات فى أوربا وأمريكا علشان يكلموهم فى الموضوع ده ومافيش فايدة.. يعنى راحوا يقولولهم بلاش والنبى تدعموا الفلاحين بتوعكوا وخليكوا زينا كده سايبين الفلاحين بتوعنا منهم للهوا .. بلاش يعنى تحطوا مصلحة بلادكوا ومصلحة المواطنين اللى عندكوا فى اعتباركوا قوى كده ..

بدل سيادته مايقول إن حتى الدول الكبرى اللى بتطبق سياسات رأسماليه متعفنه واللى إنتوا بتقولوا إنكوا عايزين تبقوا زيها بيدعموا الفلاحين بتوعهم علشان المحاصيل الاستراتيجيه زى القمح فاحنا المفروض أولى منهم بالحكاية دى فندعم فلاحينا ونخليهم يزرعوا القمح بدل مانستورده من بره وبدل مالفلاحين يزرعوا لب وفراوله علشان يقدروا يعيشوا .. لأ سيادته بيطلب إننا نسيبنا خالص من القمح ومن دعم الفلاح .. والفلاح يزرع خضار وفاكهه عشان نصدرهم ونستورد بفلوسهم القمح !!

بعد كده اتكلم أمين أباظه .. وكان عامل زى اللى بينخانق .. كشرى وبيزعق .. ماركزتش معاه قال إيهبالظبط .. بس كان كلام فارغ عموما من نفس العينة ..

ماحدش طبعا جاب سيرة الأسمدة ولادعم الفلاحين ولاكلام من الفارغ ده كله !

آه صحيح .. مصور الكاميرا نزل كده للى قاعدين فى الصف الأول .. كان زكريا عزمى قاعد وجنبه الوليه دى اللى بتقعد فى مجلس الشعب لما توحه يغيب وجنبهم كان يوسف بطرس غالى عمال يلعب فى الموبايل !!

المصور راح طالع للمنصه فورا !

ولاعزاء لأى حد .. !