فضيحة المتطاهر يوم خروجه ع المعاش !!

 

بعييييييييييييييييييييد

 المثل بيقول "بعيد عن العين , بعيد عن القلب" والمعنى واضح
إن طبيعة الإنسان هى النسيان أو تقدر تقول النداله !
تقدر تتكلّم عن الأنانيه وإشباع الحاجه الوقتيه
وإن الوفاء صفه غير آدميه
....
لكن بيتهيألى التفسير الوحيد للظاهره دى معاكس تماما
شدّة الحب فى رأيى هى الدافع الأكبر للنسيان
لأنى لمّا بابعد عن اللى باحبّه بيبقى عندى شعور دائم بالفقد
بالحرمان من وجوده جنبى
قسوة المشاعر دى بتزيد كل ماتزيد المسافه بينى وبينه
وكل مالمدّه تزيد بيزيد العذاب
بيبقى الحل الوحيد -لاإراديا- هو النسيان
نعمة ربّنا سبحانه وتعالى لينا
سواء نسيان مؤقّت فى حالات السفر
أو نسيان شبه دائم فى حالات الفراق

فى رأيى ده تفسير أكثر منطقيه - وآدميه - من إن البشر أندال
!!

كاريكاتير

 

طب لو مافيش موهبه ؟
الفكره إن الحياه مليانه كآبه لأى حدّ بيفكّر
بس مش أى حدّ بيفكّر وعنده عقل عنده كمان موهبه
فواحد زى حالاتى كده باقعد أقرأ للناس الموهوبه بيحكوا عن مشاعرهم أو أفكارهم
وبابقى عايز أصرّخ " وأنا كمان " عندى كلام يتقال
عندى مشاعر غريبه

عندى اكتئاب

بس ماباعرفش أقول أو أكتب
لاشعر
ولا أسلوب
ولا رسم حتّى

ولو جرّبت تتكلّم بلسانك عادى مع أى حدّ صاحبك
الكلام بيبقى مبتذل قوى
مش ده اللى فى دماغك
مش ده اللى إنت حاسس بيه

الحاجات دى هتخرج منك فنّ بس
مش بأى طريقه تانيه
أو هتخنقك وتموت بيها

هتلاقى دايما بعض السلوى فى أدب أو رسم صاحبه حاسس بيك
بس مش هتلاقى نفسك
حاجه كده زىّ اللى حبّ ولا طالشى

وياسلام بقى لو يجتمعوا الاتنين
تبقى صاحب عقل  واكتئاب بدون موهبه
وصاحب قلب بدون نهايه سعيده

طب الواحد يعمل إيه ؟

فكرة الانتحار مش بطّاله أبدا
حلّ جذرى بجميع المقاييس

مشكلته الوحيده إنّه حرام !!
وفى أغلب الأقوال إن ده الطريق المضمون لجهنم
والحقيقه إنى استويت فى الدنيا كفايه ومش طالبه أتحرق فى الآخره

وأنا صغيّر سمعت إن الناس على أيام سيّدنا موسى أو عيسى مش فاكر كانوا 
بيكفّروا عن ذنوبهم الكبيره بإنّهم يقتلوا نفسهم وبكده يضمنوا الغفران والجنه
!!!!
من ساعتها وأنا باحسد ولاد الإيه دول 
يعنى الواحد يخلص من الدنيا وقرفها وكمان يبقى ضامن جنّه

ولاتقولى بقى إن فلان مش عايز يجوّزنى بنته ولا الدكتور الفلانى حاططنى فى دماغه
وللا الحكومه مطفّحه أهالينا وقارفانا
ولا حتى تقول لى إن الدنيا بقت حرّ قوى والواحد مش مستحمل ياأخى
الحلّ دايما موجود
سايبهالكم مخَضّره ياولاد الكلب
اشبعوا بيها

للأسف ده كان زمااااااااااااااااااان

دلوقتى تتعذّب بس
ولو حبّيت تفضفض هتتعذّب من الملل ومن تفاهة اللى بتقوله وتعانيه

أهوه الحل الوحيد اللى ممكن يكون متاح إنّك تنعزل تماما عن الدنيا
تتقوقع داخل نفسك الأرجوانيه وتنفّض لكل الناس وأوّلهم إنت
تموّت عقلك وأفكارك وقلبك بإيدك
تبقى إنسان محايد
تافه
لحدّ ماتموت موتة ربّنا

خلفيّتى

 

هل تستخدم الحكومه فرق الكاراتيه كراهية فى الشيبسى

 لو ضغطك عالى ماتدخلش هنا

ولا هنا

وبكل تأكيد مش هنا

الوسيه

من ساعة ماقريت كلام عبدالله كمال اللى جبت الرابط بتاعه من هنا وأنا افتكرت مسلسل الوسيه
اللى البطل فيه كان شايف خير البلد بياكله الخواجات

ولما دخل الجيش لقى إن مش الخواجات بس اللى بياكلوه
ورغم تفوقه وأمانته ماكانش مسموح له بأى فرحه أو سعاده
المهم اكتأبت شويّه
وقعدت أسمع فى أغانى المسلسل

1-

مين اللى قال الدنيا دى وسيّه؟
فيها عبيد مناكيد وفيها السيد
سوّانا ربّ الناس سواسيه
لاحدّ فينا يزيد ولايخسّ إيد

جينا الحياة زىّ الندى أبرياء
لارضعنا كدب ولا اتفطمنا برياء
طب ليه رمانا السيف على الزيف؟
وكبف نواجهه غير بالصدق والكبرياء

عيش يابن آدم بِكْر .. زىّ الشجر
موت وإنت واقف زيّه, مطرحك
ولاتنحنى لمخلوق, بشر أو حجر
وشِدّ فوق مهما الزمان جرّحك


2-

وتستمر الحياة
بين ابتسامه وآه
فيها اللى تاه فى دجاه
واللى ضميره هداه

وكل دى أبعادها وِسعه
وآهى دى الحقيقه بس منسيّه
وكلنا ولاد تسعه وبنسعى
ودى مش وسيّه, الناس سواسيّه

لملم جروحك ياحزين وامشى
خطوه كمان وتخف آلامك
واحلم بعين صاحيه ولا تنامشى
غير لما تقطف زهر أحلامك


3-



الفرق بيننا وبين ولاد المدينه
همّ ولادها واحنا غُرب فى دروبها
الجوع قصادنا, الخوف مكلبش إيدينا
والخوف يذلّ النفس ويزيد كروبها

ياقوّة الله حِلّى فى عروقى حِلّى
خلّينى أتبّت فيكى وأثبت محلّى
وحِلّى عنّى يارعشة الرعب حِلّى
لأجل إنى أصدّ الجوع إذا جِه و حلِّ



4-


ورجعنا تانى نعانى نفس الأسيّه
هيّاها , مافرقتش فى أى حاجه
وكأنى باهرب من وسيّه لوسيّه
بس الخواجه هنا ماهوّاش خواجه
نفس الوسيّه فى كلّ حتّه ورانا
مطرح مانهرب نلقى نفس العتامه
ممرمَرانا, برجلها مجرجَرانا
وكأن ده المكتوب ليوم القيامه




5-


يافرحتى البكريه وماكانش يومك
ليه موتتى ؟ ليه بتفرفرى من بين إيديا؟
ورجعنا تانى يادنيا نمضغ همومك
آه ياحنا يامقاتيل ومالناش ديّه
الفقر كافر!
أيوه والظلم كافر
طاغوته فارد على البيوت طيلسانه
لحدّ إمتى ياليل هنفضل نعافر؟
والحقّ سافر ..
بس مقطوع لسانه !


6-


دنيا جديده تنفتح وبتاخدنى
بافتح لها عينى وقلبى وروحى
وأفتح لها دراعينى آخدها فى حضنى
ألاقى حزنى داب وطابت جروحى
دنيا جديده تنفتح لى دروبها
بالاقى نفسى فيها وأحضن خيالى
هامدّ خُطَوى فيها من شروقها لغروبها
وإن ليّلّت؟ أحلامى شمس الليالى



7-


دنيا جديده بتنفتح وبتاخدنا
نفتح لها الأحضان ونجرى عليها
هنا آخرة الحزن وبداية وجودنا
سما مفتوحه لنا
لابد نوصل عاليها


8-


أيوه يادنيا حنّى واتبسّمى لى
بعد الضلام الفجر طالع يلالى
آه يانسايم الجنّه على قلبى ميلى
شيلى جناحاتى لفوق..لفوق.. لفوق
لفوق للعلالى




الكلمات -أعتقد- للرهيب سيّد حجاب
ألحان ياسر عبدالرحمن
والغناء ل الحلو فى أيام عزّه
اللى شافوا المسلسل عارفين إن ترتيب الأغانى الداخليه مش بنفس التفاؤل ده
بس عموما نهاية المسلسل كان فيها بصيص من أمل
إحنا إن شاء الله أملنا أكبر
أنا جبت كل الأغانى من الرابط ده بالمناسبه ومحتاج تسجيل الأول

حوار !!

دى كانت آخر محادثه بينى وبيني فى وجود جهبذ
 

فارماكولوجى

 

Those Eyes

 

Sorrow

 

الهروب

من تحف السينما المصريه القليله
ومن علامات عاطف الطيب وأحمد زكى

الحمد لله نزّلته النهارده عندى على الكمبيوتر
لأ وكمان نزّلت الموسيقى التصويريه بتاعه من موقع دى فى دى
قلت أحطّ هنا روابط الموسيقى على الأقل لأنها بجدّ فوق الممتازه
جو الطوارق بقى والصحراء والحاجت اللى أنا محروم منها دى !!

المقطوعه الأولى

والثانيه

والثالثه

مين اللى طفى النور

امبارح الفجر كبس علىّ النوم
كنت لسّه واكل والتخمه عامله عمايلها وسهران بقى وبتاع
بس علشان كنت عايز أصلّى الفجر قلت أنا هاغمّض عينى ساعه كده وأسيب نور الأوضه مولّع
وظبطت الموبايل علشان أصحى بعد ساعه
ظابط الموبايل وسايب النور مولّع , كويّس ؟
صحيت الساعه 9 الصبح النهارده لقيت النور مطفى
قلت عادى جايز الكهرباء قطعت
لقيت الكمبيوتر شغّال زى ماأنا سبته امبارح
وكذلك الفيديو
واللمبه بتاع الأوضه فلورسنت عاديه مش لمبه يابانى م اللى بيطفوا لوحدهم لما النهار يطلع
يبقى فيه إيييييييييييييييه ؟!!
كون إنى ماصحيتش بعد ساعه لما الموبايل رنّ ده شىء عادى
ممكن يكون قعد يرّن لحد ماسكت لوحده لأنى نسيت أعلّى صوته على الآخر
دى مافيهاش مشكله
إنما إن النور ينطفى لوحده؟؟

الاحتمال الأول إن أى حد م البيت دخل ولقانى نايم ف راح طافى النور
ماحصلش لأنى باقفل أوضتى بمفتاح من جوّه لأنى قاعد فوق لوحدى وكنت كمان سايب المفتاح فى الباب
يعنى ماحدّش يقدر يفتحه من برّه إلا إذا شلت المفتاح بتاعى من جوّه

الاحتمال التانى إنى بامشى وأنا نايم
يعنى أنا أكون قمت وطفيت النور وأنا نايم ورجعت تانى زى ماكنت تحت البطانيه
وده عايز وعى كامل منى وأنا نايم لأن بينى وبين مفتاح النورمكتب وكرسى وترابيزة الكمبيوتر
ده غير إنى ماعملتهاش قبل كده
ولو أنا متعوّد على المشى وأنا نايم كان زمان أى حدّ من أصحابى أو قرايبى اللى نمت عندهم قبل كده خد باله
وقال لى أو كنت أصحى ألاقينى مثلا واقف فى الشارع
أو أى حاجه من الحاجات اللى بجد دى
مش أمشى وأنا نايم وأحتاج علاج نفسى بقى وحركات بس علشان أطفى النور !!

الاحتمال التالت طبعا هو حبايبنا العفاريت :)
وخصوصا إنها مش المرّه الأولى اللى يحصل فيها كده
أيوه
حصلت بنفس الطريقه من حوالى كام شهر بس أنا ساعتها قلت جايز نمت بعد ماطفيته
لكن المرّه دى أنا متأكد


عموما هاحاول أعمل تجربه كده تانى وأكرّر حكاية النوم والنور مولّع ونشوف

كما فقدت قوى مكافحة الشغب عددا من عناصرها في حادث مروري أدى إلى انقلاب حافلة، كانت تقل عددا من الجنود في منطقة العباسية، وسط القاهرة اليوم.

وأدى الحادث إلى مقتل سبعة أفراد من الشرطة وجرح 20 على الأقل.

وأشارت الأنباء ان الجنود كانوا في طريقهم لتعزيز التواجد الأمني حول المحكمة التي تشهد محاكمة بسطويسي ومكي.

وأعلنت الشرطة مقتل 10 تم عادت وخفضت الرقم إلى 5 بعد ذلك.


ده جزء من الخبر اللى على البى بى سى تعليقا على اللى حصل النهارده أمام نادى القضاه
محاكمة القاضيين اتأجلت للأسبوع الجاى
والضرب فى المتظاهرين شغّال على ودنه
أول ماقريت الخبر لقيت نفسى باقول أحسن !!
وبعدين -فجأة- انتبهت لأننا فى مصر مش فى فلسطين المرّه دى
وإن قوات الشرطه دى ممكن يكون فيهم ابن خالى اللى شغال أمين شرطه
وإن اللى بتضربهم قوات الشرطه مصريين برضه وممكن يكون بينهم ابن خالى التانى  أو بنت خالى الطلبه فى الجامعه
الوضع قاتم لدرجة إنى مش قادر ألاقى كلام فعلا
فيلم البرىء مش قادر يسيب دماغى
" ضحكوا عليك ياسبع الليل " وفى النهايه الاتنين بيموتوا
الشعب بيموت
والجنود اللى بتفهم بتموت
وفضلت الحكومه
وكلاب الحكومه

بس أنا عارف إننا مش هنموت
المره دى مش فيلم
وبيننا وبينكم الزمن يا آل مبارك

 

 

مسألة يأس مش أكتر

وقالت مورلا السلحفاة العجوز لأتريو الفارس الأخضر الذى يسألها عن الطريق لكى يجد العلاج للأميره

"
انظر, نحن عجائز, أيها الصغير, عجائز جداً جداً وقد عشنا بما فيه الكفاية.وشاهدنا الكثير جدا
ومن يعرف الكثير مثلنا, لايكون لشىء آخر أهمية عنده. فكل شىء يعيد نفسه إلى الأبد
النهار والليل, الصيف والشتاء, والدنيا فارغه وبدون شمس. وكل شىء يدور فى حلقة
وماينشأ لابد أن ينقضى مرة أخرى, ومايولد لابد أن يموت.وكل شىء يبطل الآخر
الخير والشر, الغباء والحكمه, الجمال والقبح. كل شىء خاوٍ. لاشىء حقيقى
لاشىء مهم !!
"
الجزء ده من رواية "قصّه بلا نهاية" والكلام على لسان سلحفاه ضخمه تصل لحجم الجبل وعاشت منذ الأزل
الغريب إنى حاسس بطعم كلامها رغم إن بقى لى فى الدنيا ربع قرن بس
ماعلينا
الرواية دى من أروع الروايات الفانتازيه اللى قرأتها لحدّ دلوقتى وترجمتها لقيتها من إصدار الهيئه المصريه العامه للكتاب 1988
واتعملت فيلم شهير جدا لدى عشاق السينما باسم
The Never Ending Story
طبعا بانصح أى حدّ لقى البلوج ده بالصدفه وقرأ الكلمتين دول يدوّر على الروايه ويلاقيها بأى شكل لأنها كنز فعلا

العنكبوته

 
وجدت بعض القصائد الممتازه على هذا الرابط أثناء بحثى عن هذه القصيده

ياعنكبوتة كملي عشك

لاحد حيزيحك ولا يهشك

لمي مهاجرينك

وثبتي دينك

اتمطعي وخدينا في وشك

بلاد بلا عزه

ممكن تجيبي أجلها من هزة

بلا ضفه بلا غزه

بلا مصر بلا أردن

بالدم رشي اللي بماء رشك

وكملي عشك

لمي مهاجرينك ولو ملايين

يا عنكبوتة احنا مش فاضيين

مدي الخيوط خيط خيط

واكسي كل الحيط

نامي ف أمان واتمطعي ف فرشك

من وشنا

ما بنسمعوش وشك

لمي مهاجرينك وتعاليلي

لا تهم تباريري وتعاليلي

أنا في الخلا بانفخ شعاليلي

انظم قوافيا وتفاعيلي

وما تلقينيش ساعة يعوزني الفعل

أغش نفسي وعمري ما اغشك

واحش روس أهلي ولا احشك

حتعيشي أبد الدهر

حتوحديها انتي نهر ونهر

نشي اللي ما قدروش علي نشك

أنا زى ما بعت السنين الخرس

ورضيت بربع الربع وخمس الخمس

مجاني حاوهب لك عيون القدس

مين اللي سألك تتركي عرشك

طب ده احنا خدامك

في النوم بنوحي لك بأحلامك

واحنا اللي بنحققها قدامك

آسف سكوتي ربما داوشك

فاتربصي بينا ولا يهمك

دمانا فدا دمك

وتبعترينا واحنا بنلمك

ولو تحاصرك الأمم

ويكتفوكي بالتهم

احنا سبيلك للخلاص في الكون

لما يضيق الحال

دايما بيطلع مننا مجنون

يهتف يعيش صهيون

ونغش بعضينا ولا نغشك

بالعكس بندلع وبنهشك

ناكل في بعض فيتملي كرشك

وقرشنا ف ثانية يصير قرشك

يا عنكبوتة انسي أصواتنا

وزعيقنا وصواتنا

ودم أحياءنا وأمواتنا

هدي عشوشنا وكملي عشك

لاحد حيزيحك ولا يهشك

القصيده طبعا ل عبدالرحمن الأبنودى 1992

Speaking Of Beauty

�

خالتى صفيّه فى إمبابه

اشتريت اليوم كتابا جميلا للدكتور جلال أمين اسمه "كتب لها تاريخ " يتناول فيها مجموعه من الكتب المؤثّره والجميله
وكان من ضمنها رواية خالتى صفيّه والدير ..
الروايه شهيره جدا وبالذات بعد تمثيلها فى مسلسل حقق نجاحا لابأس به من بطولة ممدوح عبدالعليم وبوسى
يحدّثنا دكتور جلال عن أسلوب بهاء طاهر وتماسكه ثم يتناول خيوط الروايه الأساسيه ويحكى لنا عن شخصيات الروايه التى يبرز من بينها شخصية المقدّس بشاى الذى يحترمه كل أهل القريه ويحبونه ويشاركهم حياتهم من داخل الدير بدون حساسيات أو مشكلات
بل وعلى العكس يرفض زعيم عصابه طلب أحد اللصوص بالهجوم على الدير للحصول عن الذهب الذى يشاع تواجده فيه بل ويعاقب اللص بضربه فى رجله بالرصاص !
ثم يقارن بين رأى بهاء طاهر وسماحة والده الذى أنشأه عليها ولم يسمع منه أبدا كلمه تفرّق بين هذا مسلم وهذا مسيحى وأيضا سماحة والد د. جلال الكاتب أحمد أمين مع الأحداث الداميه - أيضا!! - التى جرت فى إمبابه منذ عدّة سنوات
كنت أظن أن أحداث الاسكندريه الأخيره هى أولى صور المواجهة العنيفه لكن اتضح أننى كنت مخطئا
ماحدث فى إمبابه لم يكن يقل فظاعه مع استثناء دور الأمن المحرّض فى أحداث الاسكندريه
مايهمنى فى حديث د. جلال والذى أردت تدوينه هنا هو مايلى

"
ومالذى تنتظر أن يحدث فى حى سكنى وصفه الصحفيون الذين ذهبوا لتغطية الأحداث بالصورة الآتية : عدد كبير من الفقراء النازحين من الصعيد وبعض المحافظات الأخرى, يسكنون مساكن عشوائيه مكدّسه بالبشر, عديمة الخدمات, وتضم أعدادا غفيره من العاطلين, ويستعمل جزء كبير منها كمقالب زباله للقاهرة والجيزة, ولايخلو شارع من المجارى الطافحة, وشوارعها محفورة من الوسط تمهيدا لعمل مجارى جديدة, وأكوام الأتربة تسد أبواب البيوت على الجانبين فى شارع الاعتماد, وهو الشارع الذى وقعت به معظم الأحداث, فلما جاء رجال الشرطه كان عليهم أن يخوضوا فى برك من مياه المجارى التى تعوم فيها جبال القمامه. فى هذه البيئة يتحرّك السكان بين المقاهى ومحلات بيع الأشرطه التى تذيع ليل نهار وبصوت عال أغانى من نوع "إنت ياخيشه كداب قوى" ثم يأتى خطباء المساجد الأهليه التى لاتراقبها وزارة الأوقاف يقولون كلاما يحرّض هذا على ذاك
هل يستغرب فى مثل هذه الظروف أن يظن شاب عاطل أن إجبار قبطي على خلع صليبه يعتبر عملاً محموداً يرفع من قدره أمام نفسه وأمام أقرانه؟
أو أن يقوم آخر مثله بإجبار امرأة قبطية على القفز من ارتفاع عشرة أمتار؟
بل أن تقدم امرأة قبطية أو مسلمة بإلقاء نفسها من ارتفاع عشرة أمتار بمحض اختيارها لأن الحياة فى منطقة امبابه لم تعد ممكنة للآدميين؟
قلت لنفسى أيضا أنه حتى لو قرّرت وزارة التعليم أن يقرأ تلاميذ المدارس رواية بهاء طاهر, على أمل أن يفطنوا إلى أن المقدس بشاى يمكن أن يكون رجلاً طيباً, وأن ابن آدم كرمه الله ومن ثمّ لايجوز أن يُعامل كالحمار, بدلاً مما تحتويه الكتب المقررة من سخافات لاهى بالفن ولا بالدين.
حتى لو فعلت وزارة التعليم ذلك فإن حل المشكلة يحتاج أيضاً إلى ردم المجارى وجمع القمامة وكنس التراب وإسكات الميكروفونات وإيجاد عمل للمتبطلين.
"

الأوله آه

الأوله آه
والتانيه آه
والتالته آه

الأوله عايرونى إن أنا فلاح
والتانيه أزرع وأقلع للى نام وارتاح
والتالته آه اللى أحبه شطّ منى وراح

الأوله عايرونى إن أنا فلاح بدفيـّه

والتانيه أزرع وأقلع للى نام وارتاح فى دهبيـّه
والتالته آه اللى باحبّه شط منى وراح فى صبحيـّه

الأوله عايرونى إن أنا فلاح بدفيـّه وعيشى حاف
والتانيه أزرع وأقلع للى نام وارتاح فى دهبيـّه بميت مقـداف
والتالته آه اللى باحبّه شط منى وراح فى صبحيـّه ماقال لى عواف

الأوله مش بإيدى ده قضا محتوم
والتانيه ومسيرها ناس تغرق وناس هتعوم
والتالته ميت هم يرحل ألف همّ يدوم

الأوله آه

والتانيه آه

والتالته آه

بيرم التونسى

والدفيّه عباءه من الصوف الخشن