من زمان وأنا مقتنع إن الحكومه بتشجع تواجد التيار السلفى فى مصر لسببين مهمين :
الأول إن السلف أعداء الإخوان . ليه؟ مش مهم دلوقتى إنما الواقع إنهم تيارين متضادين فى الشارع مع إن المفروض العكس يبقى صحيح ! وللحد من نفوذ التيار الإخوانى تقوم الحكومه بتشجيع السلف.
الثانى إن المفاهيم اللى بينشرها التيار السلفى كلها مفاهيم شكليه عن الدين ! شكل اللحيه .. طول الجلباب.. الحديث باللغه العربيه الفصحى.. النقل بدون تفكير والأخذ عن الشيوخ بدون مراجعه..
ويبتعد تماما عن المفاهيم الحقيقيه للدين من معاملات ومقاصد وبالطبع من جهاد ورفع الظلم ..
ويتم استخدام "لاطاعة لمخلوق فى معصية الخالق" فقط عند عصيان الأب والأم إذا ماطالبا ابنهما بحلق لحيته أو إطالة جلبابه أما عندما يتعلق الأمر بحاكم ظالم فتجد أن المستخدم هو " وأولى الأمر منكم" وأنهم يقبلون سيادة الحاكم الظالم وطاعته على تفريق وحدة المسلمين !!!!
وسلم لى ع المسلمين !!
ولكن اليوم اتضح لى أن الأمر قد يكون به ماهو أعمق من مجرد تلاقى المصالح بعد أن قرأت هذا الخبر:
فتوى تجيز "توريث" الحكم لجمال وتطلق لقب "أمير المؤمنين" على مبارك
والفتوى حسب موقع فى البلد من الشيخ محمود لطفي عامر رئيس الجمعية المعروفة بانتسابها للتيار السلفي..
ولاحول ولاقوة إلا بالله
4 comments:
الحكومة تشجع الجميع على التواجد وتعطيهم حرية حركة تستحق عشرات علامات الاستفهام..
وللعبد لله في ذلك كلام سيفتح عليه جميع أبواب جهنم على مصاريعها..
الجميع ؟؟؟؟
تقصد التيارات الدينية المختلفة؟ أم السياسية أيضا ؟
وهل تعنى كل ماعدا الإخوان أم أن الإخوان أيضا ممن لديهم حرية الحركة ؟
هل تقصد شيئا قريبا مما فعله السادات عندما ضرب الشيوعيين بالإخوان ؟
أم تقصد شيئا أعمق؟
أقصد التيارات الدينية المختلفة ، وأقصد بالذات التيارات المذهبية بالتحديد..
بمعنى..
عدد المتعاطفين مع الإخوان كام يعني؟
عدد اللي كانوا متعاطفين مع الجماعات في عز عنفوانها كام يعني؟
قارن دول بالمتعاطفين مع السلفية أو التيار الصوفي.. مفيش نسبة..
التيارات المذهبية أعمق من حيث تأثيرها وأكثر من حيث عدد اللي بيتأثروا بيها وبيتعاطفوا معاها وبالتالي بتسيب آثار أعمق في طريقة تفكير المجتمع وسلوكه وردود أفعاله ، وحط تحت ردود أفعاله ستين ألف خط..
أتفق معك بعنف !!!
ناس كتير من أصحابى مش متدينين بشكل خاص أو منضمين لأى تيار أو جماعه بالاقيهم متأثرين بشدة بأفكار التيار السلفى ومؤمنين بأنها صح 100% وإن هم اللى مقصرين فى تنفيذها مش أكتر
سواء إن الغناء والموسيقى حرام -طبعا- واللحيه واجبة ولازم نضيق على المسيحى فى الطريق ....إلخ
أنا خايف أقول إن القاعدة الأساسية دلوقتى بقت بنسبة كبيرة للسلفيين وأفكارهم وإن كمان 10 سنين أو أكتر شوية هتبقى أفكارهم هى اللى شبه مسيطرة بنسبة أكتر من 90 % لأنهم بيركزوا على المراهقين الصغيرين فى أولى إعدادى وتانيه إعدادى ده غير أبناء السلفيين نفسهم اللى بيبدؤوا من الحضانة وتلاقى البنت بتلعب مع أصحابها الصغيرين وهى لابسه نقاب !!
لكن الأخطر فى رأيى إن حتى الناس العادية اللى مش موافقه على الكلامده مابيعترضوش لأنهم بيخافوا يكون اعتراضهم على السلوكيات دى اعتراض على الدين نفسه
شعب من البهائم الذين يسهل قيادتهم على الحكومة .. وبث الأفكار التى تريدها عبر مشايخهم
ليس هذا التصور ببعيد جدا للأسف
والمشكاة إنى مش عارف هنقاوم إزاى ؟
قليلين جدا اللى بيفكروا فىالتيارات دى واللى نيتهم صافيه بحيث لما يشوفوا الصح يقولوا ده صح
وأغلب العوام منهم بيهتموا بالتدين الشكلى ومظاهر العبادة نفسها مما يثير الجنون حينما تجد شخصا مقتنعا مائه بالمائه أن شعيرات ذقنه التى لم تنبت بعد أهم من طاعته لوالديه ويعتبر أن هذه طاعة لمخلوق فى معصية الخالق
أناس يأخذون العلم عن كتيبات مختصرة بدون أن يقرؤوا القرآن أساسا أو يتفهموه
يقرؤون من كتب للجدال وليس للفهم
مصدرهم الأساسى هى الأحاديث وحينما تحتج على مايقولون بآية واضحة من القرأن يتحدثون عن التفاسير المختلفة للأية وتوقيت نزولها .. إلخ
مما يجعلك تتساءل عن الفرق بيننا وبين الأقدمين ممن حرفوا رسالات الأنبياء حتى عبدوا أنبياءهم ثم أصنامهم
...
Post a Comment