مش قادر أظبط الكتابة بالعربى من ساعة ماحملت الويندوز الجديد
الظاهر مكتوب علينا نتعجب دايما بالمقلوب !!!!
لن أكرر هرائى المعتاد عن التأخير والكسل وماإلى ذلك فلدى الآن حجه قوية لعدم الكتابة بانتظام ألا وهى الامتحانات بالطبع ..
بامتحن بقى لى حوالى شهرين أو أكتر ولسه لى حوالى شهر كمان –لاتتعجب إنها كلية الطب – بس مش مسألة امتحانات بس
الدنيا بقت ملخبطه جدا جدا
طبعا مش هاحاول أناقش حاجه معينه كويس أو اتكلم بنظام أو منطق لأن مصير الكلام ده هيبقى ساعتها إنه يتحفظ عندى ضمن الدرافت ومش هاكمله تانى ويزيد غيابى أكتر عن البلوج
أول حاجه عن الحركه الجديده اللى عملتها تى داتا وبقى دخول المستخدمين على الشبكة بيوزر نيم وباسوورد وعلشان تجيبهم لازم تجيبهم من الشركة ولازم –طبعا- يكون معاهم رقم تليفونك والموبايل كمان –الموبايل مش إجبارى بس أهوه بجملة بقى !- وماأظنش طبعا إن الموضوع ده علشان يرفعوا مستوى الأداء مثلا
لكن الهدف هو تسهيل الرقابة على الشبكة العنكبوتية وتحديد العناصر المشاغبة من البلوجيين والفيسبوكيين وأشباههم
وطظ طبعا !!
ماهم بيراقبوا التليفونات الأرضى والمحمول وحاشرين مناخيرهم فى كل حاجه من غير حاجه
وكده كده حتى لو مشيت جوه الحيطه هتاخد على دماغك يعنى هتاخد على دماغك
وقانون الإرهاب جاى جاى
حاجه تانيه بتزيد يوم عن يوم وملاحظها –وغالبا الكل ملاحظها – وهى اقتراب المواجهة
العنف بيزيد بصورة غير معقولة والضيق اللى الناس عايشه فيه بيقلبهم لوحوش يوم بعد يوم
أنا شخصيا –وقد كنت شخصا هادئا أقرب للخجل ولاأميل للمواجهة على الإطلاق- أصبحت أقرب للعراك فى أى موقف
صوتى بيعلى وباتعصب بمنتهى البساطة و-أحيانا- ممكن أرتكب جناية أو أتسبب فى عاهه مستديمة لشخص ما فقط لأنه كان فى المكان غير المناسب فى الوقت غير المناسب !
الأستاذ فهمى هويدى كتب مقال فى الدستور من حوالى شهر ورجع نشره تانى من كام يوم عن واحد صاحبه من المدن اللى مرتاحه شوية مع سواق تاكسى دردش معاه شوية عن الهجوم القادم على مدينتهم ومن شابههم من الفئات الشقيانه اللى ضاقت عليهم ..ولما نسى موبايله معاه سواق التاكسى قاله إنه مش هيرجعهلوله طبعا .. إذا كان ناوى يسرق بيته بعد كام شهر هيرجعله موبايله دلوقتى ؟؟
وفيه حوادث تانيه كتير كلها بتقول إننا رايحين فى داهيه
بس هنكون احنا بس لأن الساده مش هيكونوا معانا لما تقوم الهوجة
نص ساعه بس ويكونوا كلهم فى بلاد بره .. اللى بالطياره واللى باليخت ويمكن اللى بالغواصة كمان !!
واحنا نبقى ناكل فى بعض أو تيجى اسرائيل تحتلنا –أقصد يبقى الأمر رسمى بقى بدل ماهو عملى وشفوى بس- مش فارقه
لكن أنا شايف إن فيه حل
أدهم شرقاوى جديد
روبين هود عشوائى من عشوائياتك ياقاهرة المعز
رمز يلف الناس حواليه
طبعا ماباتكلمش على زعيم سياسى أو رئيس حزب جديد لأ
أنا باتكلم عن لص ومجرم ولو حكمت كمان يكون عشماوى
بس ده كله يكون فى اتجاه واحد بس .. للناس اللى فوق
القانون مايقدرش يحاسب واحد محتكر أو واحد مزور أو واحد مقترض أو حتى صاحب عباره
لكن مجرم ممكن ينسف مخزن من مخازنه أو يضرب له شحنه فى الجمرك
ممكن يسرق ملفاته ويفضحه فى الجرايد وينزل أسهم شركاته فى السوق
تخيلوا لو ظابط بوليس من اللى غاوى تعذيب فى الناس وبيعتبرنا حشرات مش قد سيادته روّح يوم لبيته لقى اللى قاعد مستنيه فى الصالة ومعاه مسدس وخلاه يقلع هدومه وينزل فى الشارع ملط زى اللى عذبهم واتنشر الكلام ده فى الجرايد كام ظابط تانى هيفضل يعذب ويعتبر نفسه خليفة الله فى أرضه؟
لما أمين الشرطه اللى بيبلطج على سواقين التاكس والميكروباص والناس اللى على باب الله ياخد له علقه محترمه
لما مستعمره من مستعمرات الناس الهاى دى تنضرب فيها مواسير المجارى والمياه وكمان محولات الكهرباء
أو حتى كل مستعمراتهم
ويتنشر ده كله فى الجرايد
بيتهيألى دى الحاجه الوحيده اللى ممكن تخلى الناس تنفجر فى الاتجاه الصح بدل مانولع فى بعض
….
6 comments:
طيب جرب تكتب البوست
edit html من
وبعدين تحط الكلام بين الكود ده
مش كده بيكتب يمين عادي وخلاص
--
ميدان التحرير بيولع وشكل الشوارع اللي حواليه يخض
شكرا ياساسو
هابقى أجربه بإذن الله فى البوست الجاى
ولو إن الخنقة جاية من إن نفس البرنامج بنفس البلج إن بتاع الكتابه من اليمين للشمال ساعه يشتغل وساعه مايشتغلش ؟؟
ده المفروض كمبيوتر
يعنى صفر وواحد
يعنى يا آه يا لأ
وللا هو كل حاجه فى مصر لازم تشرب م النيل ؟؟
أما عن ميدان التحرير فأبشرك مش إنه بس اللى بيولع
البوكس نزل عندنا امبارح وكان بيلم بتوع التيارات الإسلاميه
إشمعنى امبارح بالذات ؟ كله بيقول علشان الحريقه اللى فى مجلس الشورى
طب ده فى القاهره على بعد 120 كيلو احنا هنا مالنا؟
ده غير إنه ماكانش بيلم إخوان بس
لأ ده سلف كمان من بتوع الخروج على الحاكم حرام والاعتراض عليه أساسا حرام وحتى لو قلت رأيك الشخصى بإنه ظالم يبقى حرام مرتين
مره لأنها غيبه ومره لأن فيها شبهة الخروج على الحاكم !!!!!!!
والله العظيم أنا كنت هاتفرس
لكن المهم إن حتى دول الأمن كان جاى علشانهم ؟؟
ربنا يستر علينا كلنا خصوصا اليومين دول شغالين ضرب ضرب من غير شتيمه
عشان تعرف ان كل شيء قسمة ونصيب
:)
الكومبيوتر بقي قدري
فينك يا صديقي السلفي - في الجيش دلوقت- كان زمانه قاللي ان الحكومة لها حق تقلق طالما مبهدلتش الابرياء
حدود البهدلة فين بالظبط عنده معرفش ،استدعاء القسم ده مش بهدلة
المهم انت قلت انهم افرجوا عنهم بسرعة
ع الاقل معلقوهاش علي شماعة التيار المرة دي
صادروا طبعة من جورنال البديل ومن حبه كان الدستور الواحد بقاله سنين مكانش سمع عن مصادرة جرايد مستقلة غير حزبية دي
:)
هيييييه دنيا
استدعاء القسم ؟؟
ده هنا قوة شرطة بحالها جت وعشره يخبطوا ع الباب الساعه اتنين بالليل والظابط يدخل يشوف المطلوب موجود وللا لأ ويفتش عليه ويشوف الكتب والبطايق ..
وبرضه مش معتبرينها بهدلة
الجماعه اللى باتوا ليله فى الحجز مش معتبرينها بهدلة
احنا المصريين شعب لذيذ فعلا على رأى محمد صبحى :)
ناخد على قفانا ونضحك !
والشىء اللى فارسنى إنى قعدت أتناقش مع اتنين منهم بعد ما أمن الدوله مشى بالجماعه اللى خدهم ساعتين بحالهم عن الحاكم الظالم ويعنى إيه الخروج على الحاكم
وكانت آراءهم لذيذه فعلا
إن الاعتراض على الحاكم أساسا حرام لأن فيه شبهة الخروج عليه
حتى لو كان حاكم ظالم
وإن مبارك -كمثال- مش مسئول عن غرق الناس اللى فى العبارة وعلى حد تعبير واحد منهم
يعنى هو اللى غرق السفينه بإيده ؟
ولو أنا صاحب عربيه والسواق عمل حادثة يبقى دى مسئوليتى أنا ؟
بينى وبينك أنا شاكك فى إن الكلام ده يبقى مجرد رأى شخصى
ومين عاف جايز يكون شيخ من مشايخ السلفيه دول نزل خطبة عن العبارة وإن الكلام عن صاحب العباره والتعويضات ده نوع من الاعتراض على قضاء الله وإن المفروض نصبر ونحتسب
ولاحول ولاقوة إلا بالله !!
والله العظيم شعب لذيذ :D
1-أنا ضد فكرة الروبن هود..
ضد فكرة السوبر مان .. عصر السوبر مان انتهى في كل المجالات .. في السياسة وكرة القدم والفنون والاقتصاد وحتى في الفكر .. حتى وإن ادعى البعض أنه سوبر مان زمانه وعصره وأوانه..
وضد فكرة الروبن هود لأن عصر السوبر مان انتهى.. ولأن العصابة مش ناقصة حرامية..
كثير من الناس يلتفون حول ميديا المال السياسي ، وهم -الناس يعني- فتحت عيونهم على الدنيا تعلموا الدرس اليساري الاشتراكي بأن كل صاحب مال حرامي.. والمشكلة أن المال السياسي المصري المعارض منه والموالي ليس فوق مستوى الشبهات فعلاً.. مختصر الكلام: كثير من الناس يلتفون حول حرامية - بإعمال مبدأ سوء الظن- في مواجهة حرامية..
حرامية ضد حرامية .. واللي حيكسب طبعاً حرامي .. وحيسرقنا بالتأكيد.. والحرامي المنتظر زيه زي غيره ما جاش على ظهر طبق طائر.. دة ابن الشمس السمرا والأرض السمرا والحبة السمرا.. واحد مننا .. شئنا أم أبينا..
2-مشكلة الكود دي مسودة حياتي في الدين والديناميت والتعليم أهه.. حاولت بكل الطرق أحلها مش قادر.. أتمنى إن كود ساسو ينسف المشكلة من أساسها ويخلي الناس تقرا الكلام بلا إجهاد.. قول يا رب..
يمكن يكون معاك حق ياعزيزى قلم جاف لكن اللى أقصده مش واحد يحقق العداله الاجتماعيه بالسرقه أو تحقيق بعض العدالة بطرق غير مشروعه اسما لكنها تحقق العدالة الحقيقية
مش ده بس اللى باتكلم عليه ..
أان باتكلم عن بداية تلم الناس حوالين رمز ..
مرشد لباقى الناس يوجه انفجارهم بدل ماينفجروا فى بعض
مفيش حد بيتحرك واللى بيحاول يتحرك بيطلع له ألاضيش النظام بقوانين ملفقة واتهامات سخيفه وحتجوريه بأنه ضد الاستقرار وضد النظام
ومره أخرى بأنه يعترض فقط لحب الاعتراض وأن الورطه كبيره واللى عنده حل يتفضل يقوله
بيتهموا اللى بيعمل مظاهرة بأنه بيعطل مصالح الناس وإنهم شوية شباب عايشين الدور ومش فاهمين حاجه
بيتهموا كل المعارضه بأن أهدافها سياسية ومابيكتبوش لوجه الله
بيتهموا الشعب كله بأنه بيشمت وحشعب حقود !
دايما بيتوهوا فى الكلام ولما يتزنقوا فى مصيبة ما يسكتوا وخلاص على مالمصيبة الجاية تنسى الناس المصيبة الأولانية
باختصار وزى ماإنت عارف .. دول ناس مش هنعرف ناخد معاهم حق ولا باطل
مافيش معاهم أى مبدأ أو قانون ولا ليهم كبير نخليه يحكم عليهم فيرجعوا عن الغلط
ومافيش طريقة واضحة للتغيير قدام الناس
كل الناس أو أغلبهم مش مبسوطين ومليانين غضب وإحباط
لازم حد يفتح السكة .. مشكلة المصريين الأزلية إنهم محتاجين حد يتلموا حواليه
لو عشرين واحد قاعدين فى مكان شغل مثلا وحصلت حاجه غلط هتلاقى العشرين بيقولوا لك وأنا مالى وحتى اللى بيفكر يعمل حاجه بيبص للى حواليه ويلاقيهم ساكتين فيسكت هو كمان والحاجه الغلط بتستمر من غير مالعشرين حد منهم يتحرك
لكن لو واحد منهم اعترض بجد أو حتى واحد من بره هتلاقىهم كلهم أو أغلبهم ظهرت عليه الشجاعة فجأة واعترضوا على الغلط
لازم حد دايما يفتح لهم الباب
وبما إن مافيش أى فرصة لظهور رمز سياسى نزيه ولازم اللى هيظهر يكون وراه قوة خارجية علشان يقدر يصمد قدام العصابة دى فيبقى ده حل مستبعد جدا
لكن تشكيل عصابى ؟
أو حتى شخص مفرد يلم الناس حواليه
ده الأمل الوحيد فى رأيى
أان مش باتكلم على باتمان
أنا أقصد الجوكر !
بس جوكر معدّل شوية بحيث تكون أهدافه بعيد عن الناس العادية
والهدف مش إنه يمسك رئاسة الجمهورية أو مصير البلد
الهدف إنه يوجه الانفجار فى الطريق الصح أو على الأقل يدى أمل للناس لأن اليأس أخطر علينا من ألف حزبوطنى ومبارك
وبصراحه أنا باتكلم عن قاتل أكتر ماباتكلم عن حرامى !
أما عن الكود فقد تم حل المشكلة مع خلص الشكر لساسو :)
البرنامج بتاع live writer
وال plugin
بتاع الكتابة بالعربى كانوا بيستخدموا نفس الكود زى مااكتشفت بعد ماساسو بعتته
لكن كان فيه مشكله صغيره فى البرنامج إن الكود بيتحط وبعدين الكلام فيبقى الكلام من الشمال زى ماهو والكود محطوط فى الأول بفراغ فى النص !!
وكنت أنا أضرب دماغى فى الحيط :)
دلوقتى بقيت أفتح البرنامج وأستخدم الplugin
وبعدين أروح على ال source code
أبدأ كتابة فى وسط الكود
وبعدين أرجع لصفحة الكتابة العادية وأكمل كتابة عادى من غير مشاكل
!!
يعنى الموضوع لازم فيه جزء يدوى برضه ولا عزاء للذكاء الإلكترونى :)
Post a Comment