يتصل بى من السعودية ليهنئنى بالعيد لأكتشف أن السعودية –كالعادة- ستحتفل بعيد الفطر غدا مع بعض البلاد الأخرى فى حين ستحتفل به مصر وبعض البلاد الأخرى بعد غد !
عادى طبعا ..
وأعتقد أنه من سوء الأدب أن نتحدث عن الخلاف بين المسلمين وقضايا الريادة والعلم والعقيدة … إلى آخر هذه المواضيع - المهمة طبعا وإن تم ابتذالها بكثرة الحديث فيها – ونحن نتجرع المهانة والذل من سيادة الرئيس وحرم سيادة الرئيس وبالطبع البيبى الصغير ..
فتعطف سيادة الرئيس بالتصدّق ب 700 كرتونة فيها زيت وسكر ومكرونة والحلو قمر الدين إلى أبنائنا فى الجامعة !
وبالطبع تفضلت قرينته على جزء آخر من متسولى الشعب المصرى وزادت على الكرتونه إياها خمسين جنيها إضافية !
أما بيبى فطمع فى ثواب زيادة ونزل بنفسه يوزع الصدقة على المحتاجين من شعب العجوزة
شعب من المتسولين مستحقى الصدقة وياريتها كمان صدقة تستاهل إلا دى كيس سكر وكيسين مكرونة وقزازة زيت ولفة قمر الدين ؟؟؟
يعنى مش مجرد عطف وإحسان .. ده احتقار كمان !
السيد الرئيس وصل له إن الشعب جعان ومش لاقى يأكل فاتصرف بأريحية شديدة وإداهم كيسين مكرونة للعيال والسيدة حرمه قالت جايز يحتاجوا حاجه للعيال واحنا على وش مدارس فزوّدت خمسين جنيه أما النجل فأصر إنه ينزل يوزع بنفسه بينه وبين الناس علشان يبقى الثواب أكبر ومنها يسخّ، للرئاسة قبل مايبدأ الماتش ..
محدش منهم باعتبارهم أصحاب مصر دلوقتى ولاكإنهم اشتروها بفلوس أبوهم هى الناس جعانه ليه ؟
آه سورى .. ماهم سألوا نفسهم صحيح واكتشفوا إننا شعب فجعان ومبذر وبيستهلك كميات أكل مهولة فى رمضان بمنتهى الإسراف وعلشان كده عملوا لنا إعلان يأنبونا فيه وخاطبوا الشعب المصرى على إنه “حبوب “ !!!!!
شفت الحقارة ؟؟؟
حقارتنا احنا طبعا .. السيد الرئيس يدينا كيسين مكرونة بحالهم فبدل مانعمل كل يوم 30 جرام وللا حاجه علشان نوفر ويكفونا لآخر الشهر نقوم نعمل حفله كبيييييييره ونطبخ فيها الكيسين بحالهم ومانحتفظش حتى بحبايتين للزمن وبعد الحفلة ماتخلص والناس يمشوا نكتشف إن باقى الكيسين لسه مالى الحلل فى المطبخ ونقعد ناكل فيه يومين تلاته لحد مايعفن فنرمى نعمة ربنا فى الزبالة !!
شفت الحقارة ؟؟؟
شوف الفرق بيننا كمصريين دلوقتى وبينهم أيام زمان ..
زمان كان الشعب بيوفر فى الأكل والمصاريف لدرجة إنه ماكانش بيرضى يجيب جزمة بالشىء الفلانى فالحكومة قررت تشترى له مراكيب
إنما احنا بإسرافنا مش مديين الحكومة فرصة لحاجة من دى
الريس هيلاحق علينا كراتين منين واحنا مبذرين كده ؟
..
..
والله العظيم نستاهل
والله العظيم نستاهل
2 comments:
احنا السبب فى كل ده
ده بجد مش هزار
والمفروض إننا نحلها برضه مادمنا احنا السبب ..
يعنى رضينا برغيف العيش والمياه والكهرباء وسبنالهم السياسه يلعبوا فيها براحتهم مارضيوش
يبقى الحل إننا نشيلهم ونجيب غيرهم
بس مش هنقدر نشيلهم بالكلام والإقناع والمحايله "اللى اسمها انتخابات وشرعية القانون والكلام ده" يبقى مافيش غير الغصب
بس الأمن المركزى موجود والداخليه مافيش فى دماغها لاحراميه ولا مجرمين لكن فى دماغها بتوع السياسه
وغير الداخليه الجيش ممكن ينزل لو الأمور زادت عن الحد شوية وبقى شكل الأمن المركزى مش قادر يلم الموضوع
يبقى الحل إيه ؟
مافيش غير عصابات بقى
نعمل زى مافيا شعبيه على قدنا كده يعنى
وأهوه على الأقل هنشمت فى اللى حاكميننا دلوقتى شوية لما المافيا تبهدلهم ومين عارف جايز نشوف شوية عدل صغيرين ويومين راحة بين الفتوة القديم والفتوة الجديد !
Post a Comment