الحركة دى فى اليابان مابتتعملش
فى الصين مابتتعملش
فى أمريكا مابتتعملش
فى أوربا مابتتعملش
فى روسيا مابتتعملش
فى جزر القمر مابتتعملش
فى أنتراكتيكا مابتتعملش –وإن كانت لأسباب مختلفة قليلا عن باقى المناطق !-
رغم إن عندهم سيرك وبهلوانات وخفة يد م اللى على أصله
أما هنا فى مصر أم التاريخ –ويمكنك اعتبار هذا سبابا !-
فكما قال المثل “اللى يعمل ضهره مسطرة, يستحمل الدوس”
ولما نوطى ونطاطى , يبقى مالناش حق نسأل الحكومة ركبتنا ليه ؟
الكلام ده طبعا بخصوص كادر المعلمين “كيان خرافى مثل الغول والعنقاء ورد ذكره فى بدايات القرن الحادى والعشرين”
ورغم الفوله اللى احنا عارفينها من أول الكلام عن الكادر ده
ورغم إنى عارف أوله وآخره خصوصا بعد مهزلة اختبارات المعلمين
لكن الخبر بتاع النهارده ده حرق دمى زيادة
٨٥.٩% نسبة نجاح المعلمين في اختبارات «الكادر».. وصرف الزيادات المالية في ديسمبر
يعنى حتى بعد الاختبارات والاعتراضات وعبثية الموقف السخيف ده كله فلسه فى جيب الحكومة لعب كتير
حتى لو كنت مدرس ورضيت الذل ومهانة اختبار عشوائى مابيقيسش حاجه حقيقية تخدم مصلحتك أو مصلحة الطالب علشان تاخد زيادة بسيطة تساعدك تعيش ,رغم إنها من حقك أساسا إنت وكل مواطن مصرى بدون اختبارات ولاقرف..
لكن برضه مش هتاخد غير لقمة صغيرة زى اللقمة اللى فاتت
ليه ؟
لأن “الزيادة تتراوح بين ٥٠% و١٥٠%، حيث سيتم توزيع الزيادات علي خمسة مستويات، يحصل المستوي الأول علي نسبة ٥٠%، والثاني معلم أول علي ٧٥%، والمستوي الثالث معلم أول (أ) علي ١٠٠%، والمستوي الرابع معلم خبير علي ١٢٥%، والمستوي الخامس كبير معلمين علي زيادة قدرها ١٥٠%.”
حد سمع قبل كده عن حاجه اسمها معلم خبير أو كبير معلمين ؟
أو عن حاجه اسها معلم أول ومعلم أول أ ؟
يعنى باختصار كل الليله دى علشان عوام المدرسين مش هيزيدوا غير 50% برضه وطبعا على أساسى المرتب يعنى الحوار كله آخره 60 أو 70 جنيه !
واشرب يابتاع الكادر واللى رضيت بالكادر
وده طبعا بخلاف إن اللى نجحوا فى الاختبارات أساسا 85% يعنى فيه 15% –طبعا مافيهمش معلمين خبيرين – مالهمش فى الليله دى أصلا …
ده غير اللعب التانى فى حكاية 180 ألف ورقة لم تصحح بشكل إلكترونى و20 ألف ورقة لم يقرأها الماسح الضوئى ؟؟؟؟
يعنى إيه ولامؤاخذه الكلام ده ؟
يعنى اشرب م البحر يامواطن
و اللى يعمل ضهره مسطرة يستحمل الدوس
2 comments:
الزاوية العكسية:
1-فكرة أن يدخل الموظف العام في مصر امتحاناً أو دورة تدريبية لتحسين المستوى صارت سُبَّة في جبينه (بعد أربعتاشر سنة خدمة في ثانوي بتقول لي أقف).. فبعض المدرسين على سبيل المثال يعتبرها إهانة لكرامته خصوصاً إن كان حوتاً للدروس الخصوصية أن يدخل اختباراً للكادر أو لغير الكادر..
لنفرض أن مصر رزقت بـ"رابسو" قرر ألا يكون "رابسو" وأن يتصرف بشكل محترم ويحاول تطوير أداء المدرس وجعله أكثر ابتكارية واحترافية.. حيطلع عينه وعين منطقته مع الناس دي.. وسيكون هؤلاء أكبر مطب صناعي في أي حركة جادة للتطوير (مش حنحس بالمثال دة لإن تطوير التعليم في مصر بدعة وضلالة)..
لدى موظفي الدرجات الوسطى وفوق الوسطى أنا متضخمة للغاية رأيناها في صراعاتهم مع "الرابسو".. بل إن هذا العام أثبت أن مديري المناطق التعليمية والمدرسين أقوى من رابسو وإيريال وبرسيل مجتمعين..
2-هل تعلم أنه كانت هناك مذكرات تباع في المحلات لإجابة أسئلة اختبارات الكادر الخاص، والسحب عليها كان "نار" قبل الامتحانات؟.. زي المذكرات اللي ناس كتيرة بتنقلها من الكتب ، أو بتاخدها من محافظات ومناطق بعينها وتلطع عليها التوقيع الكريم وتتباع للطلبة بالشيء الفلاني.. وهو أمر يذكرني بالعبارة التاريخية لـ"سعيد صالح": هوة اللي بنعمله في الناس حيطلع علينا ولا إيه؟
3-مع احترامي للفصيل المحترم من المدرسين إلا أن نسبة كبيرة من الباقين (نظام لا نقابة تلم ولا حكومة تهم) يريدون التعامل مع فكرة "الخاص" أكثر من فكرة "الكادر" وأن الموضوع لديهم شعور بالأفضلية التي يحصلون عليها على حساب باقي الموظفين في مجالات أخرى هم بحاجة إلى كادر خاص..
كل القصة أن الحزبوطني قرر بطريقة أو بأخرى عن قصد أو عن غير قصد جعل صغار ومتوسطي الموظفين "يتسلوا شوية".. وأديك عارف إن الأطباء حديثي التخرج طالبوا النقيب بتاعهم والوزارة بكادر خاص .. وحنفضل عايشين في الفيلم دة كتيييييييييييييييير..
ليست عكسية تماما ياعزيزى قلم جاف :)
1- أتفق معك فى هذه الجزئية فنحن المصريين أعداء التغيير بصورة أو بأخرى حتى وإن كان التغيير يعنى التطوير ..
إلى جانب الأنا المتضخمة التى أشرت إليها والتى لاتقف -للأسف- عند فئة بعينها بل نجدها عند كل موظف تجاه كل الناس عدا رؤسائه !
وهو مايمثل فى أى مؤسسة أو مصلحة حكومية عائقا أمام كل من يريد تطويرا حقيقيا ..
لكن موضوع اختبارات الكادر هذه لم يكن من باب التطوير بل من باب المط والتطويل فى إعطاء المدرسين حقهم الذى انتزعوا به وعدا من الرئيس
وبالتأكيد كان الرأىالعام سيختلف لو لم يكن الكادر مرتبطا بهذه الاختبارات
ولو سبقتها دورات تدريبية حقيقية
ولو تم الأمر بصورة حضارية ومعد لاه إعدادا جيدا وليس سلق البيض الذى رأيناه ..
2- وللا الغش فى اللجان وانهيار أعصاب بعض المدرسين وحالات الإغماء :D
وده يرجع بينا لنقطة إن الموضوع لاتطوير ولايحزنون
يعنى أسئلة بتتسرب وملازم إجابة ومذكرات وغش !
مال ده كله ومال تطوير مستوى المعلم ؟
وبعدين مستوى المعلم الحقيقى بيظهر فى طريقة تعامله مع الطلبة وكيفية توصيل المعلومة وده مايتقاسش بالطريقة دى ..
أما عن الأفلام فهى كثيرة سواء كادر المدرسين الأزهريين أو كادر الإداريين فى التربية والتعليم أو كادر الأطباء أو أطباء الأسنان أو كادر التمريض أو .. أو . أو ..
على ماربنا يكرمنا وأمريكا تصرف لنا كادر المصريين !!
Post a Comment