Sunday, April 10, 2011

ويمكرون ويمكر الله


بما إن النهارده دعوه لمقاطعة الفيسبوك قلت مابدهاش بقى , نسيب الفيسبوك ونرجع للمدونة شوية .. خصوصا إن النهارده والأيام الجايه زى حرب ظريفه كده على النت والفضائيات..
من ناحيه ناس بتتهم المجلس العسكرى بمنتهى الصراحة إنهم خونة وإن الهدف من توليهم الحكم هو إفراغ الثورة من مضمونها
ومن ناحية تانيه فى ناس بتقول لأ دول ناس كويسين وبيشتغلوا لمصلحة البلد كلها
هم بس مشكلتهم إنهم عايزين كل حاجه تمشى قانونى علشان مايبانش إن الموضوع انقلاب عسكرى
وناس تالته تايهه فى النص مش قادرة تقرر ..
عايزه البلد تمشى وتبقى كويسه وبتتأثر بالإعلام واللى بيسمعوه فيه
وناس تانيه ولا الهوا .. عمالين لسه يشتموا فى البرادعى وشويه يتكلموا عن الكوره وشوية عن الجماعه بتوع المظاهرات اللى عايزين يخربوا البلد
وناس رابعه وناس خامسه و...و...و..
المهم أقول أنا رأيى بقى وللا أنا فاتح المدونة دى تهريج يعنى ؟
رأيى إنى من يوم الجمعه اللى فاتت وأنا مرتاح شوية
والنهارده بعد ماحصلت المهازل دى امبارح ارتحت أكتر
إزاى ؟
علشان بيتهيألى إن زى ماربنا عمى مبارك والعادلى وسليمان وخلاهم يخرفوا ويواجهونا غلط
وكل قرار كانوا بياخدوه كانوا بيساهموا فى نجاح الثورة أكتر وأكتر
بدأت أشوف ده من المجلس العسكرى
رغم إن لسه فيه واحده زى نواره نجم مش عايزه تصدق عليهم الكلام ده
بتشوف بعينها وعقلها لكن قلبها مش مطاوعها وعماله تجيب الغلط على الناس الهبله والليبراليين اللى مش عارف إيه وشويه تقول إن الجيش متفق معاهم وعارف وترجع تدافع عنهم تانى !!
لكن بكره كل الناس تشوف الحقيقه بوضوح
الحقيقه إن المجلس العسكرى تولى السلطه من مبارك لأن دى كانت الوسيله الوحيده قدامهم علشان مايطيروش كلهم مع مبارك
صحيح إن دى برضه كانت الوسيله الوحيده إن مصر كلها ماتطيرش برضه وتدخل فى متاهه -مؤقته- الفتره اللى جايه
لكن عموما ماحدش يقدر يحدد نية أى بنى آدم تانى أو إيه اللى فى ضميره
اللى بيحدد هو الفعل
يعنى هدف المجلس العسكرى من تولى السلطه نقدر نكشفه من خلال أفعاله وأوامره منذ توليه السلطه خصوصا إنه أعلن بصراحة إنه متبنى لكافة مطالب الثورة المشروعه وبيتعهد بتنفيذها
والأفعال أنا شايفها نوعين
نوع بيحقق مطالب الثورة زى حل مجلسى الشعب والشورى وإلغاء الدستور القديم وإقالة حكومة شفيق .. ودول للأسف الجيش مابيعملهمش غير بعد ضغط شدييييييييييييد جدا وقوى فى الشارع
ونوع تانى زى الاستفتاء وقانون منع التظاهر والاعتصامات ولجنة الحوار الوطنى والإعلان الدستورى
ودول الجيش بيعملهم ن نفسه وعليهم ألف مليون علامة استفهام
وبالنسبه لى أنا شخصيا مفيش أى علامات استفهام
لما يكون فى إيدى سلطه مطلقه فى البلد
وبعد الثورة ولحد أسبوعين تلاته فاتوا كان معايا دعم شعبى كامل لكل قراراتى
وأخدت وقت كافى جدا وقعدت مع الناس كلها
وبعدين آخد قرارات عبثية زى بتاع الاستفتاء وأقف بكل قوتى وإعلامى الرسمى فى اتجاه معين ولما يتفضح الاتجاه ده ألحس كل كلامى وأعمل إعلان دستورى من غير حتى ماأوضح للناس أنا ليه استخفيت بيهم وعملت إعلان طويل عريض من غير ماآخد رأيهم وأقول لهم أنا كنت غلطان
لأ وكمان أماطل فى محاكمة مبارك وأولاده وأعوانه بحجج فارغة زى إن المحاكمات لازم تاخد وقتها علشان نقدر نرجع فلوسنا وعلشان التاريخ مايجيش ويقول عن مبارك إنه شهيد ؟؟؟؟ماأقدرش أرد غير ب " أحه " هوه احنا شعب عبيط قوى كده علشان يصدق الكلام الفارغ ده ؟
يعنى كل الدول الأجنبيه اللى عرضت تجميد أموال مبارك واللى معاه وإنهم يرجعوهالنا هيسحبوا كلامهم تانى وهيناموا ع الفلوس لو حاكمنا مبارك ؟
ده لحد دلوقتى ماسمعناش عن طلب رسمى اتوجه لاسترداد الفلوس دى , ولا حتى حصرها ويطلع فى الإعلام بيان واضح بثروة مبارك وأتباعه بره
وحكاية التاريخ دى أظرف حاجه والله العظيم
وكأنى لما أحط مبارك تحت الإقامة الجبرية فى القاهره هيتحول لبطل
لما أحاكمه بتهمة القتل العمد للمتظاهرين لأنه إدى أوامر للعادلى باستعمال الرصاص الحى هابقى باطلعه بطل
العادلى لحد دلوقتى بيتحاكم بتهم مالية مش جنائية
ومحاكمات الوزراء السابقين كلهم بتتأجل كل جلسه
ولسه عاملين لجنه بعد مظاهرة الجمعه فى أول إبريل علشان تفحص ثروة مبارك فى مصر ؟
ولسه فاكرين إنهم يحققوا مع الشريف وعزمى ؟
ليه كل ده ماتمش من شهر فبراير ؟
مفيش سبب غير حاجه من اتنين
ياإما المجلس العسكرى متواطىء معاهم
ياإما هم ماسكين حاجه غلط على المجلس العسكرى
وفى الحالتين ماينفعش المجلس العسكرى هو اللى ينفذ مطالب الثورة
فى الحاله الأولى هيشتغل ضدها وفى الحاله التانيه مش هيقدر ينفذها
كل الكلام ده فيه جدال حواليه وكنت أنا باحاول أسمع أكتر علشان أكون رأى صح لكن الفيصل بالنسبة لى فى تحديد مدى وطنية المجلس العسكرى وائتمانه على الثورة كان الإعلام
لو كان فيه رغبة حقيقية فى الحفاظ على الثورة وتحقيق أهدافها
أو حتى لو كان فيه رغبة حقيقية فى إدارة الفترة الانتقاليه بحياد وبعد كده الشعب يعمل اللى هو عايزه علشان مايتقالش إن الجيش عمل انقلاب عسكرى
الحاجتين دول كانوا هيبدأوا بإعلام حر وصادق
لكن اللى شفناه إن المجلس العسكرى حافظ على المناوى فى التليفزيون
ولآخر لحظة بتوع الجرائد القومية زى ماهم
والقنوات الإعلاميه الخاصة اللى ثبت لينا جميعا إنها موجهه فى أيام الثورة
يتم استخدامهم من المجلس العسكرى للتوجيه الإعلامى كما كان يحدث قبل الثورة
وطريقة كل الوسائل الإعلاميه دى هى بالظبط اللى كانت بتحصل قبل الثورة مع مبارك
ونفس الغموض المتعمد اللى كان مبارك بيمشى البلد بيه لسه موجود فى طريقة إدارة المجلس العسكرى
غموض وتضارب مقصودين لخلق حالة من التشويش المقصود علشان المواطن بعد ماكان هدفه محدد فى محاكمة مبارك ونظامه وإسقاط كل أعوانه يبقى كل يوم ملخوم فى حاجه جديده ومش عارف ياخد قرار فى حاجه
حاجات كتييييييير ممكن تتحسم فى أسبوع واحد وحلولها موجوده لكن بتتساب عايمه زى ماكان مبارك بيعمل بالظبط
ودايما رافعين شعار مبتذل هو استقرار البلد
..
بيتهيألى الأمور أوضح من اللازم لكن الناس مش عايزه تصدق اللى شايفاه بعينيها
يمكن لأن لما مبارك كان ماسك كان الموضوع أسهل
لما مبارك وكل اللى معاه يتقبض عليهم ويمشوا الجيش يمسك البلد فترة انتقالية
طيب دلوقتى بقى لما المجلس العسكرى يمشى , مين اللى هيمسك البلد فترة انتقالية ؟
حتى فكرة المجلس الرئاسى لازم تتم عن طريق المجلس العسكرى فلو شلنا المجلس العسكرى دلوقتى هنقعد فى حالة فوضى كام شهر كده على مانستقر على نظام
وده اللى الناس خايفه منه ..
علشان كده مش قادرين يصارحوا نفسهم باللى شايفينه من المجلس العسكرى
لكن زى ماقلت فى الأول
ربنا هوه اللى هيفضحهم بأعمالهم
طبعا كنت أتمنى أكون غلطان ويكون المجلس العسكرى أمين فعلا على الثورة وعلى تطهير البلد علشان ترجع تقف تانى على رجليها , لكن أنا مش هاخبى رأسى وأغمى عينى فى الوقت ده
ده مش وقت الرمادى خااااااالص
احنا عملنا ثورة علشان تبقى البلد بتاعتنا ونراقب اللى يحكمنا ونحاسبه
والمجلس العسكرى لو ماكانش هيمشى زى ماحنا عايزين يبقى مايحكمشى
!!
طبعا فيه كلام أكتر من كده عن المجلس واسرائيل والغاز والإخوان والفتنه الطائفيه والأمن الوطنى لكن مش طالبه تشتيت أكتر من كده علشان ماأزهقش وأكنسل التدوينه كالعاده
هاسيب بس رابطين مهمين للمتابعه
الأول لنوارة نجم من رافضى الاعتراف بتواطؤ المجلس العسكرى


والثانى لفاتيما من روح قلب ماما ودى من المؤيدين لفكرة تواطؤ المجلس العسكرى


4 comments:

alreda&alnoor said...

مدونتك جميلة ولكن رجاء المشاركة الجيدة بدون سباب لأنها تسيئ للمدونة

شغف said...

ليو :

السؤال اللطيف اللذيذ اللي ما حدش بيدي له أهمية : طب و الحل ؟ ايه البديل ؟ ايه اللي ممكن يتعمل عشان يبقى فيه إعلام نزيه و حر ، و عشان المجلس العسكري يهتم بمطالب الثورة مش بمصالحه ؟

Leonardo said...

ده إنتى طيبه قوى ياشغف :)
هوه بعد ده كله لسه مستنيه المجلس العسكرى يهتم بمصالح الثورة أو بمصالح مصر ؟
هاحاول أقرب لك الصورة علشان ماتسأليش السؤال ده تانى ..
تفتكرى لو كانت موقعة الجمل والحمير ماحصلتش .. وإن بعد خطاب حسنى المؤثر اشتغل الإعلام زى ماهو شغال دلوقتى
كان إيه اللى هيحصل ؟
غالبا كان الميدان هيصمد شويه لكن مع الشغل الإعلامى هتلاقى مواطنين خايفين على مصلحة البلد هيروحوا بنفسهم الميدان علشان يفضوه بدون تدخل الشرطه أو الجيش وكان حسنى هيحييهم على وطنيتهم زى مالجيش حيى نفس المواطنين اللى راحوا يفضوا الميدان من البلطجيه المصرين على الاعتصام
بعدها كانت هتبدأ بعض الإجراءات الثوريه شكلا مع تفريغها من مضمونها قدر الإمكان لضمان إما استمرار حسنى أو ضمان تولى نجله أو أحد رجاله الحكم من بعده مع بقاء الوضع فى مجمله كما هو عليه
كان هيبقى فيه محاولات انتقاميه من صناع الثورة ورجالها سواء عن طريق أمن الدوله أو -السلاح الأقوى- الإعلام المضلل
و .. و... و...
دلوقتى بقى شوفى كل اللى حصل لحد دلوقتى بس حطى المجلس العسكرى بدل مبارك
تفتكرى كان ممكن مبارك فى يوم من الأيام مهما ضغطنا عليه هيتخلى عن مصالحه ويهتم بمصلحة مصر أو نجاح الثورة والتغيير؟
تفتكرى كان هيسمح فى يوم من الأيام بإعلام نزيه أو حر أو عدالة اجتامعيه حقيقه ؟

أنا شايف طريق واحد لإصلاح البلد بجد واستكمال الثورة وهو مواجهة المجلس العسكرى ..
مش شرط مواجهة دموية أو انقلاب أو أى حاجه من دى
لكن مواجهته بحقيقة إننا فاهمين كويس هم مين وبيعملوا إيه
وممكن بقى نتكلم فى حوار الخروج الآمن اللى كان مبارك بيتكلم عليه قبل الثورة

saso said...

hi
just wanted to say thanks for the comment you left at sheref abd elaziz blog that was all what i wanted to say:)