ويمكرون ويمكر الله

بما إن النهارده دعوه لمقاطعة الفيسبوك قلت مابدهاش بقى , نسيب الفيسبوك ونرجع للمدونة شوية .. خصوصا إن النهارده والأيام الجايه زى حرب ظريفه كده على النت والفضائيات..
من ناحيه ناس بتتهم المجلس العسكرى بمنتهى الصراحة إنهم خونة وإن الهدف من توليهم الحكم هو إفراغ الثورة من مضمونها
ومن ناحية تانيه فى ناس بتقول لأ دول ناس كويسين وبيشتغلوا لمصلحة البلد كلها
هم بس مشكلتهم إنهم عايزين كل حاجه تمشى قانونى علشان مايبانش إن الموضوع انقلاب عسكرى
وناس تالته تايهه فى النص مش قادرة تقرر ..
عايزه البلد تمشى وتبقى كويسه وبتتأثر بالإعلام واللى بيسمعوه فيه
وناس تانيه ولا الهوا .. عمالين لسه يشتموا فى البرادعى وشويه يتكلموا عن الكوره وشوية عن الجماعه بتوع المظاهرات اللى عايزين يخربوا البلد
وناس رابعه وناس خامسه و...و...و..
المهم أقول أنا رأيى بقى وللا أنا فاتح المدونة دى تهريج يعنى ؟
رأيى إنى من يوم الجمعه اللى فاتت وأنا مرتاح شوية
والنهارده بعد ماحصلت المهازل دى امبارح ارتحت أكتر
إزاى ؟
علشان بيتهيألى إن زى ماربنا عمى مبارك والعادلى وسليمان وخلاهم يخرفوا ويواجهونا غلط
وكل قرار كانوا بياخدوه كانوا بيساهموا فى نجاح الثورة أكتر وأكتر
بدأت أشوف ده من المجلس العسكرى
رغم إن لسه فيه واحده زى نواره نجم مش عايزه تصدق عليهم الكلام ده
بتشوف بعينها وعقلها لكن قلبها مش مطاوعها وعماله تجيب الغلط على الناس الهبله والليبراليين اللى مش عارف إيه وشويه تقول إن الجيش متفق معاهم وعارف وترجع تدافع عنهم تانى !!
لكن بكره كل الناس تشوف الحقيقه بوضوح
الحقيقه إن المجلس العسكرى تولى السلطه من مبارك لأن دى كانت الوسيله الوحيده قدامهم علشان مايطيروش كلهم مع مبارك
صحيح إن دى برضه كانت الوسيله الوحيده إن مصر كلها ماتطيرش برضه وتدخل فى متاهه -مؤقته- الفتره اللى جايه
لكن عموما ماحدش يقدر يحدد نية أى بنى آدم تانى أو إيه اللى فى ضميره
اللى بيحدد هو الفعل
يعنى هدف المجلس العسكرى من تولى السلطه نقدر نكشفه من خلال أفعاله وأوامره منذ توليه السلطه خصوصا إنه أعلن بصراحة إنه متبنى لكافة مطالب الثورة المشروعه وبيتعهد بتنفيذها
والأفعال أنا شايفها نوعين
نوع بيحقق مطالب الثورة زى حل مجلسى الشعب والشورى وإلغاء الدستور القديم وإقالة حكومة شفيق .. ودول للأسف الجيش مابيعملهمش غير بعد ضغط شدييييييييييييد جدا وقوى فى الشارع
ونوع تانى زى الاستفتاء وقانون منع التظاهر والاعتصامات ولجنة الحوار الوطنى والإعلان الدستورى
ودول الجيش بيعملهم ن نفسه وعليهم ألف مليون علامة استفهام
وبالنسبه لى أنا شخصيا مفيش أى علامات استفهام
لما يكون فى إيدى سلطه مطلقه فى البلد
وبعد الثورة ولحد أسبوعين تلاته فاتوا كان معايا دعم شعبى كامل لكل قراراتى
وأخدت وقت كافى جدا وقعدت مع الناس كلها
وبعدين آخد قرارات عبثية زى بتاع الاستفتاء وأقف بكل قوتى وإعلامى الرسمى فى اتجاه معين ولما يتفضح الاتجاه ده ألحس كل كلامى وأعمل إعلان دستورى من غير حتى ماأوضح للناس أنا ليه استخفيت بيهم وعملت إعلان طويل عريض من غير ماآخد رأيهم وأقول لهم أنا كنت غلطان
لأ وكمان أماطل فى محاكمة مبارك وأولاده وأعوانه بحجج فارغة زى إن المحاكمات لازم تاخد وقتها علشان نقدر نرجع فلوسنا وعلشان التاريخ مايجيش ويقول عن مبارك إنه شهيد ؟؟؟؟ماأقدرش أرد غير ب " أحه " هوه احنا شعب عبيط قوى كده علشان يصدق الكلام الفارغ ده ؟
يعنى كل الدول الأجنبيه اللى عرضت تجميد أموال مبارك واللى معاه وإنهم يرجعوهالنا هيسحبوا كلامهم تانى وهيناموا ع الفلوس لو حاكمنا مبارك ؟
ده لحد دلوقتى ماسمعناش عن طلب رسمى اتوجه لاسترداد الفلوس دى , ولا حتى حصرها ويطلع فى الإعلام بيان واضح بثروة مبارك وأتباعه بره
وحكاية التاريخ دى أظرف حاجه والله العظيم
وكأنى لما أحط مبارك تحت الإقامة الجبرية فى القاهره هيتحول لبطل
لما أحاكمه بتهمة القتل العمد للمتظاهرين لأنه إدى أوامر للعادلى باستعمال الرصاص الحى هابقى باطلعه بطل
العادلى لحد دلوقتى بيتحاكم بتهم مالية مش جنائية
ومحاكمات الوزراء السابقين كلهم بتتأجل كل جلسه
ولسه عاملين لجنه بعد مظاهرة الجمعه فى أول إبريل علشان تفحص ثروة مبارك فى مصر ؟
ولسه فاكرين إنهم يحققوا مع الشريف وعزمى ؟
ليه كل ده ماتمش من شهر فبراير ؟
مفيش سبب غير حاجه من اتنين
ياإما المجلس العسكرى متواطىء معاهم
ياإما هم ماسكين حاجه غلط على المجلس العسكرى
وفى الحالتين ماينفعش المجلس العسكرى هو اللى ينفذ مطالب الثورة
فى الحاله الأولى هيشتغل ضدها وفى الحاله التانيه مش هيقدر ينفذها
كل الكلام ده فيه جدال حواليه وكنت أنا باحاول أسمع أكتر علشان أكون رأى صح لكن الفيصل بالنسبة لى فى تحديد مدى وطنية المجلس العسكرى وائتمانه على الثورة كان الإعلام
لو كان فيه رغبة حقيقية فى الحفاظ على الثورة وتحقيق أهدافها
أو حتى لو كان فيه رغبة حقيقية فى إدارة الفترة الانتقاليه بحياد وبعد كده الشعب يعمل اللى هو عايزه علشان مايتقالش إن الجيش عمل انقلاب عسكرى
الحاجتين دول كانوا هيبدأوا بإعلام حر وصادق
لكن اللى شفناه إن المجلس العسكرى حافظ على المناوى فى التليفزيون
ولآخر لحظة بتوع الجرائد القومية زى ماهم
والقنوات الإعلاميه الخاصة اللى ثبت لينا جميعا إنها موجهه فى أيام الثورة
يتم استخدامهم من المجلس العسكرى للتوجيه الإعلامى كما كان يحدث قبل الثورة
وطريقة كل الوسائل الإعلاميه دى هى بالظبط اللى كانت بتحصل قبل الثورة مع مبارك
ونفس الغموض المتعمد اللى كان مبارك بيمشى البلد بيه لسه موجود فى طريقة إدارة المجلس العسكرى
غموض وتضارب مقصودين لخلق حالة من التشويش المقصود علشان المواطن بعد ماكان هدفه محدد فى محاكمة مبارك ونظامه وإسقاط كل أعوانه يبقى كل يوم ملخوم فى حاجه جديده ومش عارف ياخد قرار فى حاجه
حاجات كتييييييير ممكن تتحسم فى أسبوع واحد وحلولها موجوده لكن بتتساب عايمه زى ماكان مبارك بيعمل بالظبط
ودايما رافعين شعار مبتذل هو استقرار البلد
..
بيتهيألى الأمور أوضح من اللازم لكن الناس مش عايزه تصدق اللى شايفاه بعينيها
يمكن لأن لما مبارك كان ماسك كان الموضوع أسهل
لما مبارك وكل اللى معاه يتقبض عليهم ويمشوا الجيش يمسك البلد فترة انتقالية
طيب دلوقتى بقى لما المجلس العسكرى يمشى , مين اللى هيمسك البلد فترة انتقالية ؟
حتى فكرة المجلس الرئاسى لازم تتم عن طريق المجلس العسكرى فلو شلنا المجلس العسكرى دلوقتى هنقعد فى حالة فوضى كام شهر كده على مانستقر على نظام
وده اللى الناس خايفه منه ..
علشان كده مش قادرين يصارحوا نفسهم باللى شايفينه من المجلس العسكرى
لكن زى ماقلت فى الأول
ربنا هوه اللى هيفضحهم بأعمالهم
طبعا كنت أتمنى أكون غلطان ويكون المجلس العسكرى أمين فعلا على الثورة وعلى تطهير البلد علشان ترجع تقف تانى على رجليها , لكن أنا مش هاخبى رأسى وأغمى عينى فى الوقت ده
ده مش وقت الرمادى خااااااالص
احنا عملنا ثورة علشان تبقى البلد بتاعتنا ونراقب اللى يحكمنا ونحاسبه
والمجلس العسكرى لو ماكانش هيمشى زى ماحنا عايزين يبقى مايحكمشى
!!
طبعا فيه كلام أكتر من كده عن المجلس واسرائيل والغاز والإخوان والفتنه الطائفيه والأمن الوطنى لكن مش طالبه تشتيت أكتر من كده علشان ماأزهقش وأكنسل التدوينه كالعاده
هاسيب بس رابطين مهمين للمتابعه
الأول لنوارة نجم من رافضى الاعتراف بتواطؤ المجلس العسكرى


والثانى لفاتيما من روح قلب ماما ودى من المؤيدين لفكرة تواطؤ المجلس العسكرى

مصر .. حرّة

حقوق الصورة محفوظة لصاحبها الذى لاأعلم للأسف من هو

!!

باحلم ياصاحبى

 

باحلم ياصاحبى وأنا ..

وأنا لسه باحبى أنا ..

بدنيا تانيه ومصر جنه يا صاحبى

وآجى أحقق الحلم ألقى موج على عالى عالى طاح بى

!!

سيد حجاب

بليغ حمدى

على الحجار

تلخيص حوار الجدار

 

فهمى هويدى فى الشروق كتب مقال مستفيض عن الموضوع ده بعنوان

الجدار حماية لأمن اسرائيل

فى آخر المقال تلخيص لكل الحجج الواهية والكلام الفارغ اللى للأسف مش الحكومة بس اللى بتردده دلوقتى ..

وهاهو الجزء الأخير

 

إذا كان هناك أى تصور للمساس بأمن مصر الوطنى، لماذا لم تلجأ مصر قبل إقامة الجدار إلى التفاهم مع حركة حماس لعلاج الأمر، وهى المسيطرة على القطاع ويتم حفر تلك الأنفاق بعلمها.. وإذا كانت مصر قد تدخلت لوقف اطلاق الصواريخ من غزة نحو المستعمرات الإسرائيلية، ألم يكن الأجدر بها أن تتدخل لدى حماس لوقف ما تتصوره مساسا بأمنها؟

إذا كان السور دفاعا عن الأمن القومى المصرى، فلماذا تنهض به الولايات المتحدة وفرنسا وغيرها من الدول الأوروبية، ولماذا تلك الحفاوة الإسرائيلية المشهودة به، ومنذ متى كانت تلك الأطراف مشغولة بالدفاع عن أمن مصر والوطن؟

منذ متى وبأى معيار موضوع يمكن أن يشكل قطاع غزة تهديدا لأمن مصر؟ وهل يعقل أن يقام الجدار الفولاذى مع القطاع، فى حين تظل منطقة الحدود المباشرة بين مصر وإسرائيل (فى طابا مثلا) بدون أية احتياطات أمنية، ويرتع فيها الإسرائيليون كيفما شاءوا؟

أليس الحصار هو المبرر الوحيد للتوسع فى حفر الأنفاق، وإذا كانت مصر حريصة حقا على أمنها الوطنى، لماذا لا تكثف جهودها وتمارس ضغوطا لرفع الحصار، بدلا من أن تتورط فى التصدى للنتائج المترتبة عليه؟

ما مدى سلامة الموقف القانونى المصرى إذا اتهمت أمام المحاكم الدولية ــ ناهيك عن محكمة التاريخ ــ بأنها انتهكت القانون الدولى الإنسانى وأحكام اتفاقية جنيف الرابعة، وأسهمت فى حرمان الشعب الفلسطينى من أسباب عيشه الخاصة، الأمر الذى يعتبر اشتراكا فى ارتكاب جريمة ضد الإنسانية.

إزاء الحفاوة الإسرائيلية بالموافقة المصرية على بناء الجدار، هل يمكن القول إن تطابقا حدث فى الرؤية بين الأمن الوطنى الإسرائيلى والأمن القومى المصرى؟

لا خلاف حول حق مصر فى الدفاع عن أراضيها والحفاظ على أمنها. لكن ألا يستحق المساس بالأرض أو تهديد الأمن إجماعا وطنيا، بحيث يعرض على مجلس الشعب على الأقل، بدلا من أن يُحاط الشعب المصرى علما به من إحدى الصحف الإسرائيلية؟

 

حين يفكر المرء فى إجابة تلك الأسئلة فسوف يدرك أن إقامة الجدار لا علاقة له بأمن مصر، وإنما هو فى حقيقته استجابة لدواعى أمن إسرائيل، فرضتها السياسة الأمريكية وقامت بتنفيذها تحت أعيننا، ولكننا أغمضنا وسكتنا، إلى أن قامت الصحافة الإسرائيلية بكشف المستور وفضح المسكوت عليه.

وكل يوم تزداد مساحة اللون الأسود

 

 

 

رحيل الكاتب الصحفى الكبير محمود عوض

من أجل هذا

معرض الكتاب هذا العام

لم تكن تجربة سارة بكل أسف فقد ذهبت يوم الجمعة الماضية حيث لم يتم السماح بالدخول قبل الواحده والنصف تقريبا وكان الزحام شديدا جدا

الأمن هذا العام فى المعرض هو الظاهرة الملفته أكثر من ارتفاع أسعار الكتب أو تغيير أماكن العرض أو حتى لجوء دور نشر كبيرة كالشروق لزيادة أسعار الطبعات القديمة من الكتب التى لم تنفد بعد وهو ماكان أمرا معتادا فى دار المعارف مثلا

وأود أن أتحدث عن الأمن فى إطار الموقف الذى شهدته بنفسى

وصلت المعرض أنا وأحد أصدقائى حوالى الثانية عشره ووجدت أعدادا كبيرة من الناس أمام بوابة المعرض ووجدت طابورا طويلا أمام شباك التذاكر للرجال وآخر أقصر قليلا للنساء

إلى جانب الطابورين كان هناك أعداد كبيرة من الزوار تفترش الأرض أمام البوابات وأمام السور فى انتظار فتح الأبواب

كان هناك أعداد كبيرة من عساكر الأمن وأيضا عدد من الضباط ذوى العوينات السوداء التى توحى بالأهميه

ظللنا هكذا أكثر من ساعه

أعداد الزوار فى ازدياد أمام البوابات وعساكر الأمن جالسون أو واقفون والضباط يروحون ويجيئون وربما يتناقشون مع أحد الزوار الذى يشكو من وقوفنا هكذا بدون أى سبب منطقى لأن كل العارضين متواجدين بالداخل وجاهزون لاستقبال الزوار

مع مرور الوقت استطال الطابور أكثر وأكثر وتوافد بعض القادمين الجدد إلى شباك التذاكر مباشرة متجاهلين الطابور

وفتح شباك التذاكر بعد الواحده بثلث ساعة تقريبا

بدأت أعداد غير الملتزمين بالطابور تطغى على أعداد الواقفين فيه

ولم نلبث سوى دقائق معدوده حتى كان الطابور نسيا منسيا وأصبح الزحام أمام شباك التذاكر فوضويا ومهولا

لم يكن زحاما عاديا بل تلاحم تام ورغم هذا كان هناك من يندفع من الجانب محاولا اختراق هذه الكتلة البشرية ويوشك الجميع على السقوط على طابور النساء

وأوشكت على السقوط أكثر من مرة ولم يمنعنى سوى الأجساد المحيطة بى

حاولت الصراخ وحاول غيرى بلافائدة

وحينما وجدت أحد المخترقين بجانبى حاولت الصراخ فيه بأنه يكاد أن يدهس من أمامه فأجابنى بأن “ وأنا أعمل إيه يعنى؟” ثم واصل دفعه للناس بلا اكتراث

بالطبع كان من المخترقين من يأخذ التذاكر ليبيعها خارج الزحام بسعر أغلى وكان منهم أناس عاديون ينتظرون منذ الصباح ووجدوا حقهم فجأة قد تم الاستيلاء عليه

على كل حال اقتربت من شباك التذاكر وناولت أحد القريبين من الشباك النقود وناولنى التذاكر

وكان الخروج مأساة أخرى حيث كان الجميع يتدافعون تجاه شباك التذاكر من كل منفذ ولم يكن أى شخص على استعداد للتخلى عن مكانه كى يسمح لك بالخروج

كل هذا وعساكر وضباط الأمن بعيدون لاشأن لهم بما يحدث

وعند الدخول كان هناك زحام آخر أقل قليلا ولكن بسبب الأمن هذه المره فقد صنع الأمن حواجز بعيدا عن البوابات ومنع الزوار من عبورها  إلا فى مجموعات صغيرة

وبعد الدخول كان هناك من يرتدون ملابس مدنية و يفتشون حقائب الزوار ولاتدرى عم يبحثون فى حقائب الآتين إلى معرض كتاب ؟

 

الأن نأتى للنقطة التى أريد الحديث عنها

من أضاع النظام وصنع الزحام وكاد يوقع بعض القتلى كانوا نحن

لم يأت الأمن بأفراد تندس وسط الجماهير لتصنع الفوضى ولم يكن هناك مؤامرة خارجية ومن المفترض أن جمهور معرض الكتاب على قدر ما من التحضر

نحن من صنعنا هذا بأنفسنا .. أعترف

لكنى أحب أن أسأل

مادور الأمن بالضبط؟

حينما يرى الضابط ذو العوينات السوداء التى تشى بالغموض وتوحى بالأهمية الناس تتدافع عشوائيا ويكاد يقع بينهم ضحايا ولايتحرك فما دوره بالضبط؟

هناك من انتظم فى الطابور وهناك من لم يعبأ به فمن يعاقب غير الملتزم ويفرض النظام ؟

لماذا يوجد الأمن إذا هذا العام بطريقة بارزة جدا جدا إن لم يكن لفرض النظام ومساعدة الزوار ؟

اختراع البوليس والشرطه حدث لأن هناك لصوص وقتلة وليس من باب المنظرة

وإذا لم يقم الأمن بدوره الحقيقى فإن الواقفين بالطابور لن يلتزموا بأماكنهم وسينضمون لصانعى الفوضى فى محاولة لإنقاذ حقوقهم

لهذا صنعنا الحكومة ولهذا صنعنا الشرطة

لتأمين حصول كل مواطن على حقه فى الأمن والحياة الكريمة

بيننا لصوص وبيننا مجرمين وبيننا وبيننا وبيننا

ومن أجل هذا وجدت الحكومة المركزية

كى لايتحكم المجرمون واللصوص فى عامة الشعب وكيلا تسود الفوضى

 

عند بوابات المعرض كان بعض الزوار هم سبب الفوضى

ودور الأمن المتواجد هو الحفاظ على النظام وتأمين الزوار ومنع الفوضى الناتجة عن بعض العناصر الفاسدة

إذا لم يقم الأمن بوظيفته فلا مبرر لوجوده إذن

ويصبح وجوده عند بوابات المعرض شكليا فقط

ومن يدرى

ربما كان هذا مقصودا ؟؟

موسوعة صلاح جاهين

 

أيوه .. !

لسه لاقيها قريب رغم إنها موجوده على النت من زماااااااااااان  فقلت أجيبها للناس اللى لسه ماشافوهاش

الموسوعه فيها سيرة ذاتية لجاهين وألبوم صور مش بطال وطبعا قائمه بأعماله بالإضافة –قطعا- للأعمال دى نفسها

أشعاره وقصائده ورباعياته وأغانيه وأزجاله ومسرحياته وحتى الكاريكاتير .. كله موجود

وموجود كمان الرباعيات بصوت سيد مكاوى

الاسطوانه ملف iso مضغوط على الرابيد شير ومساحته 100 ميجا تقريبا

موسوعة صلاح جاهين

وآدى شوية كاريكاتيرات من الاسطوانه

 

 

موسوعة صلاح جاهين

عجوور

عبدالرحمن عجور

مواليد 1950 ووافته المنيه عام 1998 –الله يرحمه ارتاح قبل مايشوف المهازل اللى عايشين فيها دى-

قدم الكاريكاتير فى :

مجلة كاريكاتير- روز اليوسف- الأخبار- مصر الفتاة- صوت العرب- المجد الأردنية

حصل على الجائزة الأولى فى مسابقة رسامى الكاريكاتير العرب التى نظمتها الجمعية المصرية للكاريكاتير بالاشتراك مع مجلة كاريكاتير عام 1993

وهذه كل البيانات المكتوبة على غلاف الكتيب الصغير الصادر عن الجمعية المصرية للكاريكاتير وهو كل مااستطعت أن أجده لهذا الرسام الموهوب بعنف –فى رأيى على الأقل- بالإضافة لبعض رسوم متفرقة فى بعض أعداد مجلة كاريكاتير فى عصرها الذهبى ..

بحثت على الإنترنت كثيرا بحثا عن أى معلومات إضافية أو مزيد من رسومه فلم أجد شيئا على الإطلاق :(

و .. هاكم بعض أعماله فربما يعجبكم كما أعجبنى ..

 

 

 

 

 

 

 

 

 

 

 

 

 أما هذا الكاريكاتير فأحبه بشكل خاص !!

 

 

و شكرا على الكود يا ساسو من غير مناسبة !!

من هو رؤوف حامد ؟

أول مره أسمع عنه النهارده فى مقال محمد البرغوثى فى المصرى اليوم

ولما دوّرت فى جوجل لقيت الحوار ده معاه فى المصرى اليوم برضه

ولقيت هجومه المباشر على الفساد

وهنا بيحكى عن صناعة الدواء فى مصر بالتفصيل ..

ولقيت كمان مقال مهم لد. رؤوف عباس بيستشهد فيه بكلام رؤوف حامد وغيره عن خراب مصر

والأهم من ده كله إنى لقيت

موقع حملة التضامن مع د. رؤوف حامد

 

بصراحة أنا مش متفائل قوى بنتيجة حملة زى دى

الفساد مش هيتحارب كده ..

أنا مؤمن بإن مافيش وسيله سلميه تخلّصنا من اللى احنا فيه ده.

لكن حمله زى دى هى أضعف الإيمان دلوقتى .

وإن ماكانش التضامن مع الدكتور رؤوف هيسحب قرار الوزير أو هيقلل الفساد أهوه على الأقل هيخفف عن د. رؤوف نفسه ولو على سبيل الدعم المعنوى.

إننا نوصّل له رساله إننا عارفين قيمتك وإننا معاك ..

على الأقل مؤقتا لحد مانلاقى وسيله تانيه فعاله نقدر نساعده ونساعد نفسنا بيها ..

والقطن كمان

 

بالأمس كان القمح ..

الحكومة ترفض تسلم القمح المحلي بعد انخفاض سعره عالمياً

واليوم هو القطن !

٤ آلاف مزارع في الغربية يضربون عن زراعة القطن ويستبدلونه بـ«اللب»..
وانخفاض المساحة المزروعة في أسيوط

 

والله حرب مش مجرد شوية حرامية ..

انتشار السرطان مع عدم ارتباطه بكبر السن كما كان سابقا

وعودة السل بقوة

وتوحش التهاب الكبد الوبائى

وضغط الدم

والفشل الكلوى !

والله العظيم الموضوع أكبر من مجرد كام مليون أو مليار فى جيب مبارك واللى معاه..

 

وفى الحرب ياقاتل يامقتول.

ولحد دلوقتى احنا مقتولين

ومن غير أى مقاومة ..

 

 

تحديث:

النهارده فيه الخبر ده عن القمح

استمرار الشون والمطاحن في تسلم القمح من المزارعين بأسعار تنافسية

بس المصرى اليوم مابتنشرش أخبار كاذبه ضد الحكومه -على الأقل ماقابلنيش فيها لحد دلوقتى كده- بس نشرت أخبار كاذبة قبل كده مع الحكومة !

فيه احتمالين كده دلوقتى بخصوص خبر امبارح ..

ياإما متسرب وحقيقى فعلا والنهارده بيكذبوا علشان مايحصلش قلق ..

ياإما الخبر مش حقيقى وشخص ما عايز الدنيا تولع واللى دمهم محروق زى حالاتى يشعللوا الأمور بسرعة ؟؟؟

هوّه فيه إيه؟

بكل يد مضرجة

لايصلح الكلام !!

الحكومة ترفض تسلم القمح المحلي بعد انخفاض سعره عالمياً

لايوجد فعلا مايمكن قوله ..

ليس هذا بغباء عادى أو سوء تفكير أو.. أو ..

هذه حرب مباشرة علينا لتجويعنا وقتلنا ببطء

والله العظيم لو زرعت اسرائيل جاسوس ووصلته إنه يبقى رئيس جمهورية مش هيعمل فينا زى مابيعمل مبارك !

يكونش واحد مصرى اغتصب مبارك وهوه صغير فكتمها فى صدره وقرر ينتقم من المصريين كلهم لما يكبر .. ويعمل فيهم زى ماحصل له ؟؟

مافيش غير التهييس !

أنا بقى لى كتير وأنا هانفجر من القهر يوم بعد يوم وأعصابى بقت على شعرة وعلى طول بازعق .. الأمن فى عينى وأنا رايح الكليه وأنا جاى ولجنة تفتيش علشان تترعب وتخاف وتفضل فاكر دايما إنك ممكن تتبعت ورا الشمس مايبانلكش صاحب .. وصورة الزفت قامت تانى فى وشك وإنت رايح وإنت جاى

إييييييييييييييييييييييييه ؟

أنا لو قابلت مبارك مش هاتردد لحظه إنى أقتله !

إذا كنت فكرت إنى أقتل سواق ميكروباص حرامى مش هافكر أقتل الحرامى الكبير

بجد مافيش أى وسيله غير الدم

مش هيسيبونا نعيش .. ولانفرح ولا حتى نبقى فى حالنا كافيين خيرنا شرنا

مش هنلاقى أكل ولاشرب ولاعلاج غير لما نسرق أو نقتل فى بعض

غير كده هتعيش كلب وتموت كلب

صناعتك وزراعتك بيتهرسوا وتجارتك بقت اتجاه واحد لجوه بس ..

مواردك الطبيعيه بتتباع برخص التراب ومش لأى حد. ده للى هيضربك بيها بكره

أرضك بتتباع فى المزاد واللى عايز يشيل

كرامتك ممسوحه بجاز وسخ وأى كلب على كتفه دبوره بعشره من أمثالك

صحتك مضروبة وتعليمك واقع ..

كل مواردك الحقيقيه بتتدمر بانتظام لحد مابقى فاضل قناة السويس والسياحة

وده طبعا لحد مااسرائيل تتفسح عندنا فى سينا تانى

 

مافيش غير الدم ..

يادمنا ونرتاح م الهم

يادمهم ونرتاح من حرقة الدم !

ليست أزمة حلول

الأزمة الحقيقية أزمة فساد

وفساد السلطان قبل أن يكون فساد الرعية ..

الحاكم هو من بيده أن يأمر فيطاع وأن يعاقب من يخطىء ويثيب من يعمل لصالح البلاد حتى يعم الخير ويندحر الفساد ..

وبفساد الحاكم يعلو من هم على شاكلته ويطغوا, حتى يقضى الله أمرا كان مفعولا ..

كتب د. محمود عماره فى المصرى اليوم مقالا غاية فى الروعة ..

نبه للأزمة وعرضها ثم أشار للحلول وفصلّها وأوضحها ..

يبقى فقط قرار السلطان الذى لن يجىء ! ولن تعلم لماذا ؟

أليس من مصلحته ألا نجوع ؟ ألا يحرص على امتلاء الضرع الذى يستنزفه أولا بأول ؟

أنقل هنا من باب التأريخ فقط والتسجيل مقال د.محمود

قبل خراب مالطة

 

آخر تقرير للخبراء بمعهد بحوث المياه والأراضي المصرية يؤكد:

«إمكانية الاكتفاء الذاتي من «القمح» بسهولة، وبمنتهي البساطة، ولا يحتاج الأمر سوي «قرار» من أعلي».

بالعربي مطلوب «قرار» يصدره، ويتبناه «رئيس الجمهورية» شخصياً، بعد أن اعترفت الحكومة بلسان «نظيف» أنها «عاجزة»، و«مشلولة»، عندما قال وهو يتحدث عن «قتلي» طوابير العيش: «إن الفضل يرجع للسيد الرئيس، لأنه تدخل في الوقت المناسب».. أي أنه لولا تدخل الرئيس لحدثت كوارث!!

يقول الخبراء:

«إن فدان القمح يستهلك فقط «٢٠٠٠» متر مكعب من المياه، في حين أن فدان «الأرز» يستهلك «سبعة» آلاف متر ، وأن «البرسيم» يحتاج ٢٧٠٠ متر..».

وبناء عليه، تعالوا نعد توزيع استخداماتنا «للمياه»، وإدارتها بالشكل التالي:

١- نحن نزرع ٣ ملايين فدان «قمحاً» تنتج لنا ٧ ملايين طن - ونستورد ٦ ملايين طن سنويا.

٢- ونزرع ١.٦ مليون فدان «أرزاً» تنتج ٦.٨ مليون طن - تزيد علي حاجاتنا - فنصدر ٥.١ مليون طن.

٣- ونزرع ٢.٥ مليون فدان «برسيم»، ونصدر منها «برسيم» مجففاً للسعودية وغيرها.

والمطلوب:

١- أن نزرع فقط من «الأرز» ما يكفي استهلاكنا (ومش عايزين نصدر أرز - أقصد مياه).. وهكذا نوفر نصف مليون فدان، والأهم ٣.٥ مليار متر مكعب من المياه- تكفي لزراعة ١.٥ مليون فدان قمحاً بالدلتا، والتي ينتج فيها الفدان ٢٠ إردباً أي ٣ أطنان = ٤ ملايين طن قمح.

٢- نخلط «قش الأرز» - بدلا من حرقه - مع «التبن»، بالإضافة للمخلفات الزراعية «ولدينا منها ١.٥ مليار طن» لتتحول إلي «سيلاج» لغذاء الحيوان، وبهذا نوفر نصف مليون فدان برسيم، ليزرع بالقمح أيضا، ولينتج ١.٥ مليون طن.

إذن سيصبح لدينا ٦ ملايين طن «قمح» إضافية- هي بالضبط ما نستورده لرغيف العيش سنويا وبالتالي:

١- لن نستورد قمحاً، ونكتفي ذاتيا.

٢- سننقذ أراضي الدلتا من «التطبيل» أي ارتفاع منسوب للمياه الجوفية.

٣- سنزرع الفاكهة والخضروات بالصحراء لأنها تجود فيها أفضل بكثير من الدلتا، وبأقل تلوث.

٤- وبزراعتنا الحبوب والبقول والزيوت «كالذرة» سنعيد للأرض خصوبتها.

ولن أتحدث عن «مليون» فدان بالساحل الشمالي بعد تطهيرها من الألغام + نصف مليون فدان بشمال سيناء، ونصف مليون أخري حول بحيرة ناصر،

وستة ملايين فدان صالحة للاستزراع بقلب الصحراء الممتدة، يمكن زراعة مساحة منها كلما زاد عدد السكان ولن أتحدث عن حدودنا مع السودان والصالحة «للمراعي» التي تكفينا لحوما.. وأكرر أننا يمكننا زراعة ٢ مليون فدان زيتوناً «للزيت» علي المياه الجوفية المالحة، بعد أن وصل سعره لأرقام فلكية.

عشرات الشركات العالمية تبحث عن أي مساحات في الصحراء المصرية لزراعتها زيتوناً، ولا تجد مسؤولا واحدا في هذا البلد يلبي طلباتها، وأنا شاهد عيان أمصمص شفتي علي ما يحدث.

وأسمعك «تصرخ» متسائلا:

١- إما أن هذا الكلام للاستهلاك المحلي، وليس علميا أو حقيقيا أو عمليا؟

٢- وإما هناك «مؤامرة» علينا؟

والإجابة: إن هذا الكلام «موثق» علميا، وصحيح ١٠٠%، ولكن الصحيح أيضا أنه لا توجد مؤامرة ولا حاجة (ولا أمريكا منعانا من زراعة القمح، ولا إسرائيل بتحاربنا في الزراعة، ولا فيه مسؤول أو مجموعة مسؤولين قاعدين يخططوا، ويتآمروا علينا)!

الحقيقة المفجعة والطامة الكبري هي عاداتنا في التسويف والتهرب من المسؤولية:

والحكاية: أن وزارة الري «بترمي» بالمسؤولية علي وزارة الزراعة.. ووزارة الزراعة «بتحدف» القضية علي «المشرع» بحجة عدم وجود قوانين تستخدمها كآليات لتنفيذ سياساتها الزراعية.. و«المشرع» بيقول: هناك قوانين تزيد علي حاجتنا، ويتهم الحزب الحاكم بأنه يعطل تنفيذ القوانين والقرارات في كل انتخابات كرشوة للمخالفين.. و«الحزب» يقولك: يا عم ده شعب غير منضبط وهكذا «دواليك» نعم «دواليك»!!

والخلاصة: أن الرئيس هو المسؤول عن اتخاذ مثل هذه القرارات، فعليه اختيار وتفويض إحدي الشخصيات المحترمة ويوكل إليه بهذا الملف، وإذا كانت ثقته في الآخرين معدومة أو مهزوزة، فعليه أن يكلف ابنه «جمال» وفورا.. ولماذا فورا؟

لأن أسعار المواد الغذائية سترتفع مرة أخري عما هي عليه الآن بنسبة ١٠٠% خلال العامين القادمين لتصبح زجاجة الزيت بعشرين وثلاثين جنيها.. وكيلو اللحم بثمانين ومائة جنيه «١٢ يورو - والزيت ٣ يوروهات عالميا».. ورغيف العيش أبوشلن هيبقي بربع جنيه ثم نصف جنيه،

وأبو نصف هيبقي بجنيه.. باختصار: المواطن المصري سيدفع في غذائه بعد عامين نفس السعر الذي سيدفعه الأمريكي أو الأوروبي

وربما أكثر بسبب تكلفة الشحن والنقل والسمسرة والرشاوي وبعد أن وصلت قيمة ما نستورده من منتجات زراعية ٥.٥ مليار دولار الآن، وغدا ١٠.٨ مليارات، فمن أين سنجد النقد الأجنبي؟ وكيف سيستمر «الدعم» علي حساب التعليم والصحة والخدمات المتدنية أصلا؟

يا عالم: الحقوا البلد.. اتحركوا.. فوقوا، والحلول مازالت ممكنة وفي أيدينا فهل نحن نؤذن في مالطة؟ قبل خرابها؟

كتب كتب كتب

وفى أثناء بحث جديد عن مذكرات المشير الجمسى وجدت مجلدين مليئين بكل مالذ وطاب من الكتب

ووجدت فيهم أعمال محمد عفيفى شبه كامله لاينقصها -فيما أعلم- سوى درته الأخيره "ترانيم فى ظل تمارا" ..

وهاهى أعمال محمد عفيفى التى وجدتها :

ابتسم من فضلك

ابتسم للدنيا

التفاحة والجمجمة -ودى اتعملت فيلم من بطولة حسن يوسف وإيمان بالمناسبة-

حكاية بنت اسمها مرمر

سكة سفر

ضحكات صارخة

فانتازيا فرعونية

للكبار فقط

 

وآدى مذكرات الجمسى بالمناسبة, وبالمره كمان مذكرات سعد الدين الشاذلى 

وطبعا آدى المجلد الأول .. والمجلد الثانى ..

ومش هاقدر مهما قلت أشكر صاحب المجلدين دول على كل الكتب دى !

كتب هيكل

كنت قد بحثت من قبل عن كتب لهيكل على الشبكة ولم أوفق سوى فى الحصول على كتاب أو كتابين أما اليوم فقد وجدت كنزا جديدا :)

فى مدونة أكبر مكتبة أدبية عربية وهى تنظيم وتصنيف وإعادة رفع لروائع نشرت فى منتدى الديفيدى وجدت كتب هيكل بالإضافة لكتب أخرى كنت أبحث عنها ..

ويمكننى الآن توفير بعض النقود التى كنت سأشترى بها كتب هيكل باهظة الثمن عظيمة القيمة لأشترى طابعة وبعض الرزم من الورق وهكذا أمتلك الكتب -وإن كانت فى شكل ملازم !- بالإضافة إلى طابعة ;)

ولمن يبحث عن كتب هيكل حتى الآن, تفضّل :

كتب محمد حسنين هيكل

 

وعقبال روايات محمد المنسى قنديل !

الخلطه الجهنميه

فى جريدة البديل عدد الخميس 14 فبراير وجدت هذه الرساله فى بريد القراء :

الإيدز أو الخلطة الجهنمية

تعليقا على احتجاج Human Rights Watch لمعاملة المصابين بالإيدز.

فهذه الحالة المرضية ليست إلا خلطة من أمراض تناسلية (1) السيلان; أى خروج صديد من الفتحات التناسلية (2) جراثيم وميكروبات تصيب الشاذ جنسيا بالالتهابات الرئوية والإسهال والتهاب الكبد الوبائى (3) عفونة بالفم والجهاز الهضمى. هذا بالإضافة إلى سرطان الدم والغدد الليمفاوية.

وهذه الحالة لاتصيب إلا الشواذ جنسيا, وهى لم تظهر إلا فى نوادى أمريكا للمثليين ولايوجد فيروس يستطيع أن يطبخ هذه الخلطة. إنها خلطة أمريكية 100% وغير معديه.

أ.د. عمران البشلاوى

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

واخدين بالكوا .. أستاذ دكتور ؟؟

مش مهم دكتور فى الطب أو لأ -وإن كانت الكارثة هتبقى أشنع بكل تأكيد لو كان طبيب-, لكن لما تبقى دى عقلية واحد أستاذ دكتور هنتوقع من طلبته أو من عامة الناس إيه بالظبط؟

والأشنع من الرسالة ونشرها إن محرر الصفحه رد عليها حيث قال لافض فوه :

ملحوظة: إن الإيدز مفروض على وزارة الصحة من هيئة المعونة الأمريكية فإما الاعتراف بهذه الأكذوبة وإلا فالثبور وعظائم الأمور.

نوّرت المحكمة ياعم المحرر !!!

الحق أن لسانى ليعجز عن الرد أمام مثل هذه الحقائق التى أثارها الأستاذ الدكتور والمحرر اللذيذ وتتضاءل دراستى الطبية وكافة الحقائق التى دأبت المراجع والأبحاث العلمية على اكتشافها وتمحيصها أمام سعة علم هذين الجهبذين وحنكتهما !

ربما يكون الرد الأنسب فى رأيى أن نحقنهما بدم ملوث من طفل مريض بالإيدز الذى انتقل إليه من أمه التى انتقل إليها من عملية نقل دم لم يتم فحصه جيدا ..

ثم نرى ماذا سيحدث فإن لم يصابا بالمرض فهما على حق والموضوع مجرد دجل وشعوذة أمريكية لاستهبالنا نحن المصريين وجميع شعوب العالم أيضا !

وإن أصيبا بالإيدز فسنكون أمام احتمالين أولهما أنهما مخطئان والإيدز ليس مؤامرة. والاحتمال الثانى أنهما مصيبان فى رأيهما وكونهما أصيبا بالإيدز يرجع إلى أنهما من الشواذ جنسيا !

وعجبى !

عن الحدود المصرية

يتحدث الكاتب د. حسن نافعه فى المصرى اليوم فى مقال دفاعا عن السيادة المصرية ..

وبما أنه كتب مايعبر عن رأيى فى هذه المسأله رأيت أن أنسخه هنا لمن لم يقرأه ..

"

وأظن أن الجدل الذي ثار في مصر، عقب اقتحام الجوعي الفلسطينيين المحاصرين في قطاع غزة معبر رفح، يستحق أن نتوقف عنده بتأمل عميق، نظراً لتأثيراته الهائلة علي أمن مصر الوطني والقومي، وهو موضوع لا يبتعد كثيراً علي أي حال عن بعض ما أثاره هيكل في مقالاته، خاصة ما يتعلق منه بإدارة مصر صراعاتها مع إسرائيل منذ حرب أكتوبر وحتي الآن، فالكثير مما قيل في سياق هذا الجدل قلب الحقائق رأساً علي عقب، وتعمد إظهار الفلسطينيين في قطاع غزة، بدعوي سيطرة حماس عليه، وكأنهم باتوا يشكلون الخطر الأكبر علي سيناء، وبالتالي علي أمن مصر الوطني، وهو ادعاء غير صحيح فضلاً عن كونه بالغ الخطورة.

من البديهي أنه يصعب علي أي وطني أن يقبل أن تستباح حدود بلاده تحت أي ذريعة، ومن أي طرف كان، حتي ولو كان جاراً يرتبط مع بلاده بأعمق وأوثق صلات المودة والرحمة، فعبور الحدود بين الدول يخضع لضوابط يؤدي تجاهلها إلي تعريض أمنها للخطر، وفي هذا السياق يتعين النظر لعملية الاجتياح الجماعي الذي جري علي الحدود المصرية الفلسطينية باعتباره أمراً غير طبيعي يعود إلي ظرف استثنائي، وبالتالي يستحيل قبوله أو التعامل معه باعتباره تصرفاً عادياً قابلاً للتكرار.

لذا يتعين علي مصر أن تركز كل جهدها في معالجة الأسباب التي أدت إليه، ويدرك أي مراقب موضوعي للأوضاع في المنطقة أن هذه الأسباب تنحصر في استمرار حصار إسرائيل للشعب الفلسطيني وتجويعه، وليس سلوك حماس المتهور، كما يحاول البعض أن يدعي في محاولة خبيثة لدق إسفين بين الشعبين.

وفي تقديري أنه لا توجد هناك معضلة تحول دون إيجاد مخرج قانوني لمشكلة المعابر، رغم الانقسام القائم بين فتح وحماس، ووجود حكومتين، إحداهما في الضفة برئاسة فياض، والأخري في غزة برئاسة هنية، وغياب ممثلين عن الاتحاد الأوروبي علي الجانب الفلسطيني لمعبر رفح، ولأن أهم ما يتعين أن تنشغل به مصر هو أن تتمكن من ممارسة سيادتها علي أرضها وحماية أمنها، وهو ما يفرض عليها أن تطبق قوانينها هي، وليس قوانين أي طرف آخر، علي كامل أراضيها دون تمييز، دونما إخلال بالقانون الدولي بطبيعة الحال.

وهنا يتعين لفت الأنظار إلي مسألة علي جانب كبير جداً من الأهمية، وهي أن التزامات مصر الدولية لا تفرض عليها غلق معبر رفح في وجه الفلسطينيين القادمين من قطاع غزة حتي لو كانت حماس هي التي تسيطر عليه، وفي العرف والقانون الدولي أمثلة كثيرة تشير إلي أن الاعتراف الدبلوماسي ليس شرطاً مسبقاً للسماح لرعايا وبضائع الدول غير المعترف بها بالمرور عبر حدودها، وربما يكون في الأوضاع التي عرفتها الصين الشعبية خلال الفترة ٤٩ ـ ٧١ خير دليل علي ذلك.

فمن المعروف أن الولايات المتحدة لم تعترف بحكومة الصين الشعبية بعد استيلاء الحزب الشيوعي علي السلطة عام ١٩٤٩، الذي ترتب عليه انسحاب حكومة الصين الوطنية واستقرارها في جزيرة فورموزا (تايوان حالياً)، وهي جزء لا يتجزأ من دولة الصين، ولأن الولايات المتحدة قررت تقديم العون لحكومة تايوان وحمايتها أمنياً واعتبرتها ممثلة لعموم الصين، فإن العديد من الدول لم يجرؤ علي الاعتراف بحكومة الصين الشعبية حتي عام ١٩٧١، بل وصل الأمر إلي حد تمكين حكومة فورموزا من احتلال مقعد الصين الدائم في مجلس الأمن!.

غير أن ذلك لم يمنع الدول التي لم تعترف بحكومة الصين الشعبية دبلوماسياً من السماح لرعاياها وبضائعها بعبور أراضيها، فالعبرة في القانون الدولي بالممارسة الفعلية للسلطة، وبالقياس، ليس علي مصر أن تشغل نفسها بهوية السلطة التي تشرف علي إدارة الجانب الآخر من معبر رفح، وما إذا كانت سلطة معترفاً بها دبلوماسياً أم لا، فما يهمها هو تطبيق قوانينها ومتطلبات أمنها علي حدودها، خصوصاً أنها سلطة منتخبة.

أدرك أن قراراً كهذا ليس سهلاً، وربما يؤدي إلي تعقيد العلاقة بإسرائيل والولايات المتحدة والسلطة الفلسطينية، وربما بالاتحاد الأوروبي أيضاً، لكنني مع ذلك علي يقين من أن ترك إسرائيل تتحكم في قطاع غزة، وتحكم عليه حصاراً لا إنسانياً يشكل تهديداً لأمن مصر الوطني علي المدي البعيد، ومن الأفضل لمصر أن تقوم بخطوة جريئة حتي لو انطوت علي مخاطرة محسوبة من هذا النوع، لعلها تمكنها من الإمساك بخيط تستعيد به زمام المبادرة علي طريق البحث عن تسوية حقيقية، بدلاً من الركون إلي وضع لا يساعد إلا علي تآكل قدراتها وإرادتها باستمرار، وهذا ظرف مناسب في وقت تتجه فيه الأوضاع نحو تصعيد قد يفضي بالمنطقة إلي حرب إقليمية شاملة، خصوصاً بعد تأزم الوضع في لبنان واغتيال مغنية.

 ومن الأكرم لمصر ألا تقف في تلك الحرب، إن قامت لا قدر الله، في نفس الخندق الذي تقف فيه إسرائيل، ولن يكون بالإمكان إقناع الشعب المصري بأن صراعه مع إسرائيل قد انتهي بالتوقيع علي اتفاقيات كامب ديفيد، وأن غزة أصبحت الآن هي الخطر علي أمن مصر، فمثل هذا الكلام عار وعيب أن يقال.

"

 

يقينى بالطبع أن كلام حسن نافعه وأمثاله لن يجدى شيئا مع مبارك أو زبانيته وسيستمر الغباء بحثا عن مصالحهم الضيقة من تهليب وتوريث ضاربا عرض الحائط بأى منطق أو دين أو صالح قومى أو حتى دينى أو أخلاقى

..

فمن فاز حقا ؟؟

 

يحدثنا صاحب البلوجه عن

أصعب أربع دقائق عاشها الشعب المصرى

!!

هوّه إنتى ليه بعيده كده؟

 

 

ياأيها الوطن المرصّع بالنجوم

اهبط

ياأيها الوطن المرصّع بالنجوم اهبط قليلا

كى نراك

من ذا يسبّح باسمك المنسيّ غير العاكفين على ثراك ؟

فاهبط قليلا كى نراك    

 

 

 

 

* شعر محمد دراز

الصوره من هذا الموضوع لdardeird  

العنوان من أغنية فيلم هى فوضى

ليس نظيفا

تناول الكثيرون من الكتاب حديث رئيس الوزراء الأخير فى مجلس الشعب وكيف كروت كل القضايا والاتهامات التى جاء يدافع فيها عن الحكومة مثل الغلاء والدعم ...إلخ

وأيضا كيف استند إلى أرقام وهمية بدون أى دليل رسمى أو إحصائيات موثقة -كلام فى الهوا يعنى- كى يثبت لنا جميعا أننا مخطئون وعلى حد تعبيره "مابنقراش فنسمع عشان نفهم ونتعلم !!" يبدو أنه مازال مصرا أننا شعب غير ناضج بما يكفى ليس لممارسة الديمقراطية فحسب بل لمجرد القراءة .. شعب أمىّ !

وقرأنا مقالات مهمة مثل مقال مجدى مهنا فى المصرى اليوم الذى كشف فيه أسلوب فتحى سرور والحزب الوطنى فى إجهاض كافة الجهود التى ترمى إلى مساءلة الحكومة جديا وتقييم أداءها عن طريق الاستجوابات الجدية من نواب المعارضة بالتعمية على هذه الاستجوابات بالأسئلة وطلبات الإحاطه الوهمية التى تهدف إلى قطع الطريق على المعارضة الحقيقية واللغوشة عليها كى يتسنى للصحف والنشرات القومية أن تنشر بعناوين كبيرة أن المعارضه فشلت فى عرقلة الحكومة !

بل وأيضا يتأتى لفتحى سرور أن يصف بعد ذلك المعارضة والمعارضين بأنهم أصحاب صوت عال بلا أى دليل وهدفهم هو الجعجعة والشهرة لاأكثر ...

لكن أكثر مالفت انتباهى واستفزنى فى حديث رئيس الوزراء الذى بليت بمشاهدته مباشرة وقت إذاعته على القناة الأولى هو حديثه عن الشباب الغارق على شواطىء إيطاليا واليونان ..

حديث نظيف لم يشر لى الشباب الغرقى بل أشار إليهم بمحاولات الهجرة الفاشلة أو غير الناجحة !!

وكان ردّه أضاء الله قبره بنيران جهنم أننا نركّز على محاولات فاشلة لمئات أو بضعة آلاف من الشباب المهاجرين ونتجاهل مئات الألوف غيرهم من المهاجرين الناجحين !!

حقا لم أعرف ماذا أفعل وتسمّرت أمام الشاشة غير مصدّق ...

حاولت استيعاب مايقوله نقطة بنقطة ..

1- الشباب المصرى يهاجر إلى الخارج بمئات الألوف ورئيس الوزراء يعرف ذلك.

2- لايذهب الشباب للسياحه طبعا بل لأنه لايجد هنا سبيلا لبدء حياته وأكل عيشه بطريقه كريمه لكن هذه النقطه لايبدو أنها تهم رئيس الوزراء أو حكومته كثيرا فلم يشر إليها ولو بنصف كلمة !

3- إكمالا للنقطة الثانية يجد رئيس الوزراء وحكومته فى هجرة الشباب إلى الخارج -ولو بطرق غير شرعية- وسيله ناجحه ويجب تشجيعها فهى تساهم فى حل مشكلة الشباب نفسهم -سواء بالموت أو الوصول والعمل- وحل مشاكل ذويهم هنا بما يحولونه من أموال .. حتى لو اتخذ شكل خروج الشباب شكل الهروب الجماعى من جو مقرف ومستقبل ضائع بين أنياب أمانة السياسات لأصحابها عز ومبارك وأعوانهما

4- لايجد السيد الذى لم يعد نظيفا أى مشكلة فى موت وغرق العديد من شبابنا على شواطىء يرطن أصحابها بلغة لايفهمونها وربما لم ير بعضهم البحر قبل موته سوى فى هذه المرة ! بل يجد المشكله فينا نحن الذين نقلق على موت بعض الشباب الذى فشل فى تعلم السباحه قبل أن يلقى بنفسه فى البحر ولانلتفت إلى الشباب الذى عام ! بل ونجح فى العمل أيضا .. يالنا من حمقى متصيدى أخطاء !!

نحن لانساوى فى نظر السيد رئيس الوزراء حتى مجرد الذكر أو الإشارة إلينا فإذا مات بعضنا فهناك منا الكثير .. ولسان حاله وحال سادته يقول بأن " جتكوا نيله مليتوا البلد" !! وأنه كلما مات منا الكثير قلت مشاكلهم وأعباءهم الكثير أيضا ..

ربما كان يفضل السيد رئيس الوزراء أن نخرج جميعا إلى أرض الله الواسعه .. يموت منا من يموت ويضيع من يضيع .. سيبقى بعضنا على أى حال وسنعمل فى الخارج فإن لم نبعث بالأموال غلى الوطن ونزيد من ثروته فإننا على الأقل سنكفيه مؤونتنا ودعمنا الذى يقلق سادته ...

هل هناك أمل فى تغيير سلمى أو ديمقراطية مع من لايعتبروننا بشرا من الأساس !

من ينظرون إلينا كالذباب الذى لايكف عن الإزعاج والطنين ولايساوى موت الألف منا أن يشغل أحدهم خاطره !

حسبى الله ونعم الوكيل ..

وكم ذا بمصر

والآن نقدم لكم خبيرة التجميل الأولى فى مصر ..

 

آه والله العظيم خبيرة التجميل الأولى فى مصر !!