ح تتأسّف..
وتتندّم ..
وتتصرّف بحنّيه
وهتبالغ , وتحلف لى
مشاعرك ليّ أبديّه ..
وهمّ يومين وتتغيرّ , وترجع تانى متحيّر
ولا آسف ولا ندمان , ولا عندكش أى حنان
............
بقى لى زمــــــــان
بألفّ الدايره وأتعلّم من المحنه
بقى لى زمـــــــــــــان
وأنا بارجع وباتمسّك وأقول احنا
لكنّى خلاص ..
تعبت خلاص وفاض بىّ
وضاع آخر أمل لىّ
......
هتوعدنى ..
تعوّضنى
وتقبل أى تضحيه
وهتوافق على شروطى
ولاتسألنى إيه هىّ
وأنا هاصبر , وهاستنى
وأعيش الوعد بالجنّه
ولاتصدُق , ولا توفّى
ضياع العهد بيكفّى
وكنت غريب
بتتمادى وتتمادى
مع الأيام بقت عاده
مادام باغفر وتلقانى أهون مرّه
باهون تانى
......
أنا باعلنها
حبّيتك وحبّيتك وحبّيتك
وطول الوقت كنت معاك
لكنّى عُمرى مالقيتك
ودى كانت أول أغنيه سمعتها لأمل وهبى
بيتهيألى كده مفهوم أنا ليه باحبّ أمل وهبى برغم الخيّاله والليله عندنا !
وآدى رابط للأغنيه
جه فى بالى كده من يومين فكره غريبه شويه إن الغلاء الشنيع والمتصاعد يوم بعد يوم ممكن يكون مقصود !
أى نعم ..
مش علشان البلد اتسرقت جامد وعايزين يسرقوها كمان
مش علشان الاقتصاد العالمى بيأثرّ على الأسواق
طبعا مش علشان حرب العراق خوّفت المستثمرين
... إلخ
لكن يكون الغلاء ده كلّه علشان لما جمال يمسك ينزّل الأسعار وبكده يثبت قدراته الرئاسيه الفذّه وصواب نظرته الاقتصاديه ونجاح رؤيته للمستقبل ... إلخ
هىّ واسعه شويّه أى نعم ولعب بالنار لأن الناس هتاكل بعضها بصراحه دلوقتى بس مش بعيده على حكومتنا ولا على ريّسنا المبجّل
وباعتبار إن عامة الشعب يهمّها لقمة عيشها بس فلما تيجى إنت ياساب يامثقّف تقولّه لا للتوريث ومن الناحيه التانيه يلاقى جمال نزّل أسعار السلع تانى أو رفع المرتبات هيقولك اركن على جنب ياأستاذ ونعم لجمال مبارك ..
اللى جاب الفكره الغريبه دى فى دماغى إن العمليّه زادت قوى قوى قوى
الأسعار دلوقتى بدأت تدخل فى نطاق المستحيلات بالنسبه لميسورى الدخل مش محدودى الدخل كمان
ويمكن والله أعلم مايكونش حاجه غير غباء مزمن وتعامى عن النهاية الوشيكه للنظام والحكومه نتيجة إن ماعادش هاممهم الشعب فى حاجه ولامؤاخذه
وكنا لسّه بنجيب فى سيرة عم نجم سمعت له كلمات تتر المسلسل طبعا مع صوت مدحت صالح وألحان ياسر عبد الرحمن يبقى حاجه كده مالهاش حلّ وتخلينى أدعى وأقول ربّنا يخلّى لنا نجم ويبعده عن جمال وأبو جمال ..
المقدّمه
نازل وأنا ماشى ..ع الشوك برجليا
وإنت السبب يابا.. ياللى خليت بيا
لافرشت لى بستان.. ولاحتى بر أمان
أعيش عليه إنسان.. والدنيا فى إيديا
وأنا لمّا جيت م الغيب.. العدل كان كيفى
والحق كان مطمعى.. والحب كان سيفى
دقّيت على الأبواب ..لقيتنى فى السرداب
غابه من الأنياب.. مسنونه حواليا
مع الأسف يابا.. الدنيا دى غابه
مالناش مكان فيها
ياعينى ياوعدى ..ع المغرمين بعدى
والطيببين فيها
ع الطيبين فيها ..
النهايه
حقّك على عينى .. يابنى يانور عينى
لاجل الوفا بدينى .. لك عندى بعض كلام
أنا كنت وحدانى .. والدنيا واخدانى
عايز ونيس تانى .. يقاسمنى فى الأحلام
غريب وأنا فى بلدى .. جبتك تكون سندى
انصفنى ياولدى .. اصبر على الأيام
وآدى روابط للتحميل جبتهم من الموضوع ده اللى فتحه Alloly
بيتهيألى أى حدّ دخل البلوج ده لاحظ إن أهم صفه فىّ هى الكسل العنيف جدا جدا جدا
رغم إن غالبا بيبقى عندى كلام نفسى أكتبه هنا أو أقوله بس باكسّل أو باطنّش أو بانسى ..
احتمال الحكايه دى تكون جزء من أعراض الاكتئاب واحتمال يكون خوف من مواجهة الجماهير !!
أيوه , ماهو من الأشياء العجيبه إن فيه ناس بتيجى هنا وبتقرا البلوج - ودى ظاهره عجيبه مش قادر أستوعبها بصراحه بس آهى بقت موجوده - وطالما فيه حدّ بيقرا يبقى لازم أكتب حاجه تستاهل تتقرى أو على الأقل أحاول ....
المهم إن سواء خوف وللا اكتئاب فالمحصّله النهائيه إن بوستاتى فى البلوج قليّله جدا جدا
ومن النهارده هاحاول أغير ده إن شاء الله
على الأقل من باب محاربة الاكتئاب ومكافحة زحفه الدؤوب على حياتى
أولا نصيحه لكل اللى داخل هنا يدخل ع الموقع ده
ويحمّل برنامج Live Writer
البرنامج ممتاز فعلا وبيسهّل كتير على الكسالى من أمثالى فى كتابة البلوج
نيجى بقى لعنوان البوست ده
نجمه وقعت من السما ...
اللى أقصده هو " أحمد فؤاد نجم " شاعر العاميه الذى لايكفينى هذا البلوج لأوفيه حقّه من المديح
تاريخه ونضاله وبالطبع موهبته ...إلخ
بس فى عدد الدستور الأخير بتاريخ 27 سبتمبر كتب مقال غريب شويه
أنا اتصدمت منّه بعنف , وعلشان أوضّح آدى جزء من كلامه
" وصلنا إلى بيت القصيد الذى هو موضوع جمال مبارك والتوريث فى مصر المحروسه وقصيدتى الأخيره عريس الدوله وبقدر ماكان عتاب منى الحسينى رقيقا بقدر ماأوجعنى وآذى مشاعرى فقلت لها إن هذه القصيده لم تكن إلا مداعبه خفيفه لاأعتقد أنها تؤلم أو تثير الغضب وعلى العموم إذا كانت المداعبه لم تصل فأنا أعتذر لجمال مبارك.. أولا لأننى لاأقصد إيلامه لأننى لاأعرفه معرفه شخصيه بل بالعكس فأنا مُشفق عليه من تحمّل تبعة نظام أبيه الذى أهلك الحرث والنسل ..لماذا يتحمّل هذا الشاب تبعات أفاعيل يوسف والى وزكريا عزمى وكمال الشاذلى وفتحى سرور وباقى قائمة زبانية الحزب الوطنى . أقول لجمال مبارك اخرج من هذا الجب المعتم وتعالى بمفردك وقدّم لنا نفسك وبرنامجك فنحن أهلك وأنت ابننا , انزل إلى الناس ياولدى فالناس لن يأكلوك "
يعنى إيه الكلام ده ياعمّ نجم ؟
هوّه خلاص بقى قدرنا إن جمال مبارك جاى وقاعد بتنصحه ؟
لأ وكمان بقى شاب برىء ومالوش ذنب وبعدين فيه فقره تانيه فى المقال بيتكلم فيها نجم عن الملك فاروق والشعب كان بيحبّه إزاى لما مسك برضه وهوّه صغير ..
هوّه مش احنا خلاص بقينا جمهوريه وللا ساعتك رجعت أخّرت يابو النجوم !!
هوّه جمال مبارك ده ياعينى نُغّه , عيّل صغيّر أبوه جابه من المدرسه وقاله تعالى امسك البلد شويّه على ماأريّح ضهرى ساعتين
ده كلب زى أبوه , وعايز ينهبنا زى أبوه وعايز يركبنا زى أبوه
بتنصحه ليه ؟
إنت فكرك إنه أساسا يهمّه أى حدّ فيكم وللا فينا ؟
وللا فاكره بيقرا الجرايد أصلا ؟
لما الكلام ده ييجى منّك إنت وفى الدستور عايزهم فى روز اليوسف يكتبوا إيه ؟
وبعدين فيه جمله تانيه فى المقال
" ياأستاذ جمال إنت فلاح منوفى ماإنتاش خواجه " !!!!!!!!!!
بأمارة إيه ياعمّ فاجومى ؟
لاعُمره مسك فاس ولا حتّى ركب حمار , وللا يمكن قصدك فلاح علشان عنده ييجى كام ألف فدان من أرضنا اللى سرقها هوّه وأبوه , ماهو اسمه عنده طين برضه ...
صدمتى الأساسيه من المقال ده إن المفروض إن الإعلام الرسمى كلّه بيأهلنا خلاص لقبول فكرة جمال مبارك والمفروض إننا أساسا رافضين المبدأ حتى لو كان جمال مبارك ده فرخه بكشك
حتى لو كان هيخلّى مصر جنّه - وده مش هيحصل - لأنه لو خلاها جنّه هييجى ابنه أو ابن ابنه يخربها وشاعتها هنعمل ثوره تانى علشان الشعب يحكم نفسه بنفسه !!
هوّه احنا فاضيين قوى كده علشان نراجع تاريخنا كلّ شويّه ونعيده م الأول ؟
وبعدين فيها إيه لما جمال مبارك يزعل وللا ينفلق من قصيدتك ؟
ياأخى طب ياريت يحسّ على دمه ويعرف إننا كارهينه مش بس مش عايزينه
وكفايه كده قبل ماأكسّر لوحة المفاتيح وللا أولّع فى الشاشه
