على ضوء شمعه
قريت أول جواب منه
صدّقت كل الكلام
كل الكلام.. اللى قالوه عنه
من بعد غياب ولايسألشى
وسنين وسنين ماتكلمشى
باعت بيقوللى ماأزعلشى
وبيطلب منى ماأفكرشى
فى الحب معاه ولاأحلمشى
سافر والنيه مايرجعشى
ماأعرفش إزاى أنا صدّقته
وغزلت الحلم وجمّلته
وبقلبى وروحى كمّلته
وأتارى الحلم اللى أنا عشته
كدّاب وياريت كنت رفضته
وياريتنى يومها ماقابلته
وحياة الشمع اللى أنا قيدته
والحب اللى فى قلبى كتبته
والعمر اللى معاه ضيعته
ل حأقول للقلب مايرسمشى
أحلام مع طير مابيحلمشى
وأهدّ العش اللى عشقته
الأغنيه دى من ألبوم ليلى غفران " يافرحه هلّى" .. كانت كل أغانيه متميزه
أشهرها يمكن كانت أغنية لوحتى هايرفضنى العالم لكن أنا فضلت أبدأ بأغانى
ماأخدتش نصيب كبير من الشهره مع إنها ممتازه -فى رأيى على الأقل- وبدأت ب
ولأى حد مابيحبش ليلى غفران .. هاقوله اسمع الألبوم ده الأول :)
2 comments:
الله عليك
أحلي ألبوم لليلي قبل ماتعمل ألبوم عبد الحليم اللي محبتهوش وتختفي وترجع بأغاني مختلفة ومش حلوة زي زمان
علي ضوء شمعة ولو حتي هيرفضني العالم وكان في أغنية تالتة مش فاكراها حزينة برضة كانت في اخر السايد التاني تقريبا
والالبوم اللي بعد كده روحوا اسالوا الظروف برضة كنت بحبة اوي
ميرسي علي اللينك ..اكتشفت انها مش عندي
الله يخليكى ياساسو :)
أساسا ده الألبوم الوحيد اللى سمعته كويس جدا لليلى غفران رغم إن ألبوماتهااللى قبل عبدالحليم ماكانتش بطاله أبدا وكانت خط جديد برضه بس القمه فى رأيى كانت الألبوم ده
والأغنيه التالته اللى قصدك عليها هى -غالبا- أغنية صالة الوصول اللى هارفعها أهوه..
أنا سعيد إنى رفعت أغنيه مش عندك وأتمنى إن الأغنيه الجايه بتاع صالة الوصول تكون برضه مش عندك :)
Post a Comment