Breakdown

 

 

But One Day You Will Find Out You Almost Had It All !!

 

 

تعاون

 كنت اتكلمت قبل كده عن مسلسل لحسن عابدين وتوفيق الدقن الله يرحمهم

كنت فاكر القصه طشاش كده وباسأل عن اسمه لو حد فاكره

الأخ وارف -الله يكرمه - :) جاب اسم المسلسل

" أهلا بالسكان "

وآدى الخطوه الأولى !

26

الشهر ده بإذن الله هاكمّل 26 ستة بالتمام والكمال

كتير قوى

المفروض والمنطقى إن البنى آدم يقف مع نفسه بقى شوية كده ويشوف عمل إيه بالظبط وإيه إنجازاته وإيه المصايب اللى عملها, قرارات كان أخدها وقرارات هياخدها ... إلخ

بس سيبك من الكلام الفارغ ده كله

المره دى فيه حادثة بسيطه كده حصلت لى وفرقت معايا شوية

الحادثة البسيطه هى إن صابعى اتقطع وأنا باطبخ

كان قطع عمييييييييق ومحتاج يتخيط غرزة أو اتنين علشان يلمّ بصورة سليمة لكن الدم كان كتير والألم كان كبير علشان كده ربطته جامد واكتفيت بكده

ماكانش عندى استعداد لأنى أفتح عليه علشان يتخيط

وبعد كام يوم كان الحمد لله لمّ .. لكن طبعا مع وجود تشوه بسيط لأن القطع كان فى اللحم .. فى العضلات نفسها

خاطرة بسيطة جت فى دماغى ساعتها

أنا ح أفضل طول عمرى بالإصبع المشوّه  ده

الزمن مش هيرجع تانى علشان أقدر أتفادى القطع أو أستحمل الألم والفزع علشان آخد الجرح غرزتين

ده كان اختيار نهائى

طبعا كانت نوبة يأس عارمة كالعادة

انتبهت (((فجأة))) !! إلى إن فيه حاجات كتير فى حياتى نهائية

مافيش فرصة تانية

كل السنين اللى نزلت فيها فى الكلية وضاعت من عمرى .. خلاص راحت

كل الأيام اللى كان المفروض أذاكر فيها أو أتعلم برمجة أو ألعب فيها كورة

راحت خلاص ومش هترجع تانى

صاحبى اللى مات

مش هاشوفه تانى

شجرة التوت اللى اتربيت عليها وكانت باروح آكل منها فى نص الليل علشان بتبقى الأراضى فاضيه خلاص اتقلعت واتباعت بخمسين جنيه !!! آه والله

مش هاشوف الشجرة دى تانى ومش هاتسلق فروعها وأقعد أتنطط زى القرود رغم إنى مش شايف حتى الفرع اللى أنا واقف فوقه

اللحظه اللى خفت فيها قدام عصاية الناظر وهربت من العقاب بإنى ورطت فيه واحد تانى رغم إنى ماكنتش متأكد إن هو المذنب مش هترجع تانى علشان أكون شجاع المره دى لأنى مش متأكد

والتانى اللى ضربته ممكن ماأقابلهوش تانى طول ماأنا عايش ومايسامحنيش

 

كل أخطائى وتصرفاتى واختياراتى اللى فاتت نهائية

الواحد كان فاكر إن الفرصة التانية موجودة دايما وإن الندم الحقيقى على الفرص الضايعة هيكون بعد الموت لما تتمنى إنك تكون عملت خير أكتر وشر أقل

اتضح إن حتى فى الدنيا مافيش فرصة تانية

طالما قلت تبقى قلت

اخترت يبقى خلاص

فرصتك الوحيدة هى قبل الفعل المضارع

لأنه حتى المضارع أصبح ماضيا

قبل أن تختار وقبل أن تفعل وقبل أن تفكر

دى الفرصة الوحيده علشان ماتندمش

 

فات على 26 سنة

ماأعرفش نسبة القرارات الصح من الغلط فيهم لكن واضح -بالنظر لحالى دلوقتى- إن الغلط كان أكبر

المهم إن اللى جاى يبقى الصح فيه أكتر

مش عايز أندم بقى تانى

وأتمنى إن صابعى ده يكون آخر حاجه هتتشوّه فى حياتى 

 

عن الشباب وبتاع الحاجة الحلوة

كنت بطلت أشترى مجلة الشباب من زمااااااااااااان قوى

لكن افتكرتها مؤخرا لما قرأت مقال عن محمود عوض فى مكان ما وافتكرت إن آخر مرّه قرأت له كانت فى مجلة الشباب من زمان , قلت أشترى المجلة وأشوف مقالته هوّه وباقى الكتاب الكبار اللى فاكر مقالاتهم فى الشباب زى أحمد رجب ورجاء النقاش ... إلخ

للأسف لقيت المجله بقت عادية جدا وفقدت شكلها وطابعها المميز

يمكن الإعلانات الكتييييييييييييييييره هى الحاجه الوحيده اللى فاضله من الشباب القديمه رغم إن سعرها زاد

الموضوعات بقت أقصر من اللازم والمحتوى إنشائى أكتر منه معلومات بحق وحقيقى

حاجه كده زى مجلة حريتى أو الإذاعه والتليفزيون !

صحيح الشباب زمان ماكانتش تحقيقاتها متعمقة للدرجة اللى مش عارف إيه بس رغم كده كان بيبقى فيه مجهود واضح ومضمون إن ماكانش عميق بما يكفى فهوعلى الأقل مش سطحى

كمان كانت الأعمده التقيله بتشيل الموضوعات الترفيهيه أو السريعه دى

لما تلاقى أحمد رجب ومصطفى محمود ومحمود عوض ورجاء النقاش وكان يوسف عوف الله يرحمه وإسعاد يونس وأحمد بهجت ومحمود السعدنى و .... و... و... و

كانت وجبة دسمة

للأسف أحبطت فعلا لما اشتريت عدد الشهر ده

لأ وكمان اتغظت من الحوارات فى العدد المستفز ده بالذات حوار عماد الدين أديب

صحيح معظم الحوارات مستفزه وأغلبها سطحيه لكن عماد الدين أديب راجل له وزنه !... وكلامه دايما بيستفزنى

عماد الدين راجل ذكى بكل تأكيد, يعنى مش معقول مايكونش ملاحظ حجم الفساد اللى احنا فيه أو مش مدرك أسبابه كويس, وعلى العكس من أغلبنا احنا الشعب النصوب عليه السيرك الإعلامى سواء من ناحية الإذاعة والتليفزيون والقوميات أو من المعارضة والجزيرة فهو من صناع الإعلام

يعنى الأخبار بتوصله نيّة وطرية قبل ماتتسوى كالعاده وتتنضف قبل ماتتقدم لنا

وقريب جدا كمان من الناس الكبار اللى بيمشوا البلد سواء فى السياسة أو الاقتصاد

يعنى فاهم كويس وعارف بالوقائع والأسماء غالبا الفساد جاى منين وبرعاية مين والظلم سببه مين

ورغم كده لسه عنده من البجاحة والصفاقة -وآسف على التعبير- إنه يقول فى حواره مع الشباب إن " هناك شىء جميل جدا بداخله -يقصد مبارك- لم ينتقل بعد إلى كل الناس ولم يحسه إلا من اقتربوا منه" وهذا بعد أن يصفه بأنه إنسان طيب جدا وبسيط وحازم بدون قسوة

طب خلينى معاك .. الراجل ده طيب جدا وبسيط جدا و بتاع جدا جدا ..

لما الناس بعد 26 سنة حكم وسلطات شبه مطلقة تبقى مش عارفه عن سعادته كده ولسه مش شايفاه على حقيقته, تبقى دى غلطة مين ولامؤاخذه ؟

مش هوه لو كان بسيط فعلا ومش بيمثل دعاية كان اتعامل مع الشعب مباشرة بدون الحواجز ورا الحواجز ورا الحواجز اللى حاطط نفسه وراها

مش هوّه لو كان طيب فعلا ماكانش يسجن أيمن نور وطلعت السادات و قيادات الإخوان بقرارات شخصية ومحاكمات صورية غير قانونية أساسا, وكان ساب القانون والعدل يبقوا أصحاب الكلمة العليا

مش هوّه لو كان قائد عمل منجز جدا وحازم جدا ماكانش الحرامية برطعوا فى البلد جدا جدا جدا جدا وبعضهم فى مجلس الشعب أو الشورى بقرار شخصى جدا من سيادته

مش هوه لو كان محب للناس جدا كان شال العادلى بعد عجزه الشديد جدا عن حماية الناس سواء فى التفجيرات أو التحرشات ناهيك عن إنه أصلا مش سايب الناس فى حالهم .. مش مسألة إنه مش قادر يحميهم بس, لأ ده كمان بيعتدى عليهم ويمسح بكرامتهم البلاط طالما مش حزب وطنى

بقى معقول ياأستاذ عماد الدين أديب مش واخد بالك ولامؤاخذه ؟

فى مشروع حيوى ومهم زى الجسر المصرى السعودى, مين اللى وقف ضد مصلحة البلد والشعب البسيط اللى كان هيرتاح من العبارات وسمك القرش؟ وكانت أسبابه إيه ياترى؟ وكان القرار ده ديكتاتورى فردى وللا بعد نقاش ومشاورة مع الشعب ولو حتى بطريقة صورية فى مجلس الشعب الوطنى؟ وياترى كان قرار وطنى التزاما بمصالح عليا أو سفلى تخص مصر وللا بتوجيهات وتلويحات خارجية ؟

ياترى فعلا إحنا اللى مش قادرين نشوف الحاجه الحلوه اللى جوه الرئيس ومابيشوفهاش غير القريبين منه ؟ وللا أصلا الحاجه الحلوه دى ماينفعش تتوزع غير على القريبين من سيادة الرئيس, لأنها لو اتوزعت على الشعب مش هتبقى حلوه ؟ وياترى لونها أخضر الحاجه الحلوه دى ياأستاذ عماد وللا بالمصرى ؟ وللا سيادة الريس بقت مشاعره باليورو دلوقتى ؟

 

لأ وبمزيد من الصفاقة بيرد على الهجوم على التوريث وربط الناس زواج جمال مبارك وإعداده لوراثة مصر أسيرة ذليلة فيقول بالنص

نوع من العبط السياسى. ماهى علاقة زواج جمال مبارك بالمستقبل السياسى المصرى؟!! بالإضافة لشىء . أليس الآن توجد انتخابات وسيكون الاختيار فيها بين عدة مرشحين من خلال انتخابات وليس استفتاء ... والشعب يختار فيه بشكل مباشر؟

أنا لايعنينى من هو رئيس مصر المقبل.. هذه ليست قضيتى.. قضيتى هى النظام أو الآلية التى على أساسها يتم اختيار رئيس مصر المقبل .. وبعد أن نتجاوز هذه النقطة وتتحقق يعنينى الجيل أو الحالة الفكرية التى سينتمى إليها رئيس مصر المقبل وهل هو يعبر عن ماض أم حاضر أم مستقبل.. هاتان النقطتان اللتان تشغلاننى فى رئيس مصر المقبل بصرف النظر اسمه محمدين أو عبدالسلام أو جرجس.. لكن نحن منشغلون جدا بشكليات ولاندخل فى القضايا الرئيسية التى لها علاقة بالموضوع وهذا يرينا  تفاهة العقل السياسى المصرى فى هذه المرحلة

 

تفاهة العقل السياسى المصرى فى هذه المرحلة ؟؟؟؟؟

لأننا جربنا لأول مرة أن نعارض الرئيس وأن نرفض أن نكون كالأنعام من راع لآخر يذبحنا أو يعرضنا سلعة لمن يدفع أكثر ؟

لأننا لم نقبل إهانة القضاة ؟ لأننا لم نصمت عندما أطلق يد العادلى فينا يهتك عرض من يشاء ويحمى من يسرق ويقتل من يجرؤ أن يرفع رأسه ؟

لأننا نقول كفاية كده قوى على مبارك وابنه ويسيبوها لحد تانى ؟ مش كفاية اللى سرقوه واغتصبوه وباعوه ؟

تفاهة العقل السياسى؟؟؟؟

بل وتجد الجرأة على الادعاء بأن الرئيس فى مصر أصبح الآن بالانتخاب الحر المباشر؟

بل وأيضا بين عدة مرشحين؟

ألم تشاهد الانتخابات السابقة؟ ألم تر من هم المرشحون ؟ ألم تتابع ماحدث لمن جرؤ أن يزاحم ولو من بعيييييييييد؟ ألم تشاهد انتخابات مجلس الشعب بعدها ثم الشورى؟ ألم تتابع الشهادات المختلفة لمن رفضوا أن يصمتوا على التزوير؟ ألم تشاهد الفيديوهات التى سجلت كيف يتم التزوير بأوامر العادلى ومبارك وحمايتهما ؟ألم تلاحظ أن استثناء مرشحى الأحزاب الورقية من شروط الترشيح لانتخابات الرئاسة استمر للجولة القادمة كى لايغرد جيمى وحيدا ويأخذها بالتزكية ويكون شكلها مش ولابد ؟

تتجاهل كل هذا اللغط وتلعب فى منطقة أخرى على اعتبار أن النظام أو الآلية هى مايهمك وليس شخص الرئيس ؟

والنبى صحيح ؟ !!!! كلام زى اللى بجد

ومين اللى بيحدد فى مصر النظام والآلية ؟ وياترى لو الشعب أراد تغيير النظام والآلية يعمل إيه ؟

يروح لنواب الوطنى اللى جايين بالتزوير فى مجلس الشعب الوطنى ؟

وللا ينضم لأحزاب ورقية ماتقدرش تمارس أى نشاط حقيقى إلا إذا سمح العادلى ومبارك وفى حدود مرسومة من يتخطاها يجد مايسره ؟

وللا ينظم مؤتمرات أهلية ومعارضه شعبيه ممنوعه تبعا لقانون الطوارىء اللى بيحكمنا بيه سيادة الرئيس بتاع الحاجه الحلوه من ساعة مامسك الحكم لحد دلوقتى ؟

وللا يطلع مظاهرة يتسحل فيها وتتهان كرامته وينضرب ويتسجن ؟

وللا حتى يعبر عن أفكاره فى مدونة أو جرنال أو أى وسيلة تانية فيلاقى نفسه معتقل ويطلع ميتين اللى خلفوه بقانون الإرهاب وتهمة إهانة الرئيس أو تهييج الرأى العام أو تهديد المصلحة الوطنية أو حتى بدون أى سبب؟ وبعدين يتحاكم قدام قضاء عسكرى بقرار من الرئيس وبدون قدرة على الاستئناف أو رد الظلم؟

 

آلية إيه ونظام إيه اللى بتتكلم عنهم ؟ وبعدين إنت عارف كويس إن اللى جاى مش محمدين ولاعبدالسلام ولا جرجس , اسمه جمال ياسى عماد

وللا جمال كمان عنده الحاجه الحلوه اللى مابيشوفهاش غير القريبين ؟

الحقيقة مش لاقى غير إنى أقول إنك إنسان منافق ومش محترم مهما كان شكلك محترم أو كلامك شكله سليم

 

الله يحرقك إنت وأمثالك والحاجة الحلوة فى ساعة واحدة

 

 

كنز

 

لقيتها هنا وفرحت بيها قوى

 

مدونة محمد خان

 

 

تغيير

كنت غيرت شكل المدونة وألوانها من فترة

خلفية سوداء وخط أكبر وعناوين بنفسجى

وماعلقتش ساعتها على الموضوع ده

وعادى أصلا !! من المفروض إن كل واحد ومزاجه .. دى مدونتى وأنا حر

لكن اللى خلانى أتكلم عن الموضوع ده إن كان فيه سبب قوى دفعنى للتغيير ده رغم إنى كنت حابب التصميم القديم

كانت حالة أشبه بالفزع !!

بافرّ فى المدونات عادى فى وقت ملل كده ولقيت مدونة بنفس تصميم مدونتى الأولانى

عادى .. بدأت أقرأ كده ع السريع ..اتصدمت

نفس الزهق والملل والضياع اللى باشتكى منهم فى بوستات كتيره

لكن بصورة متباكية ومتهافته أكتر .. ممكن كمان أقول مبتذلة وتثير الرثاء

!!!!!!!!!!!

يمكن أكون قاسى فى حكمى على صاحبها -اللى مش فاكره ولافاكر اسم مدونته حتى- لأنى كنت مرعوب من إنى ممكن فى يوم من الأيام إنى أوصل للحاله دى

ماهو الكلام قريب من كلامى والأفكار كمان قريبه ونفس تصميم المدونة ونفس عمرى تقريبا

يبقى ليه أستبعد قوى احتمال إنى ممكن أبقى زيه فى يوم من الأيام ؟

 

يمكن دى إحدى فوائد المدونات بالنسبة لى .. إنها فوّقتنى !! .. خد بالك

لو استمريت بنفس التواكل والانهزامية والاستسلام , هتبقى كده

ماقدرتش أصبر ساعه واحده بعدها على إن ممكن يكون فيه نقاط مشتركة مع الشخصية دى أو الصورة دى بمعنى أصح

غيرت تصميم المدونة بعدها على طول

كنت أتمنى لو أقدر أغير حياتى أو صفاتى بنفس السرعة والسهولة ! .. لكن عموما الصورة دى مش هتسيب دماغى أبدا علشان عمرى ماأوصل للحالة دى

 

صحيح إن فيه احتمال مش بطال إنى أكون اديت نفس الانطباع عنى فى بعض الأوقات لناس تانيه وكنت فى نظرهم صورة مثيرة للرثاء !! لكن  أتمنى إن يكون رد فعلهم ساعتها كان زى رد فعلى لما شفت المدونة دى

 

دعاية وإعلان

كتبت قبل كده عن حلالة العقد فى مدونتها الجميلة
مساء الخير ياأفندم .. شغف معاك ع النت .. اتفضل سعادتك ارتاح ع الشيزلونج وفضفض عن اللى مضايق جنابك .. ولو مش متضايق عادى يعنى تقدر تدردش بس ياأخى .. احنا إخوات برضه وإن ماكناش نقف جنب بعضينا يبقى الدنيا دى مالهاش لازمة .. اتفضل بقى ياسيدى .. فضفض براحتك وأنا كلى آذان مصغية لجنابك .. قول ياسيدى

المهم إن ست شغف ناوية تنزل بتقلها بقى فى السوق وناوية تغرّق النت إعلانات وحركات
وأنا -بما إنى فى أيام امتحانات ومش فاضى خاااااااااااالص- قلت أحاول أعمل حاجه كده استفتاح يعنى على ما المصممين اللى بجد يفضوا ويشوفوا شغلهم
:)

 

وبالمناسبة ده كود البانر

 

<a href="http://maramelnoor.blogspot.com"><img border="0" width="150" src="http://1.bp.blogspot.com/_LMuEUHptZKQ/RmdytBofCzI/AAAAAAAAABc/CgZs_v_BZ7U/s320/Banner150.png" height="150"/></a>

ويبقى السؤال ..؟

 

 

لست أدرى
نفسى أدرى
بدّى أدرى
بكره أدرى
بعده أدرى
لسه بدرىىىىىى
لست أدرى

لست أدرى كيف ضيعت نصيبى
واتلهى قلبى على عينُ حبيبى
كان هذا اليوم كاللبن الحليب
ولماذا صار طرشى ؟
لست أدرى

لست أدرى أهو حلم أم خيال؟
ورجال نحن أم نحن عيال؟
كيف سابتنى كده مثل الشوال؟
وتركتنىىىىى حزينا
لست أدرى

يضرب الحب فؤادى بالحذاء
فى الصباح وعندماااا يأتى المساااااااااااء
ياحبيبى ذهب الحب هباء
بس إيه معنى هبااااااء؟
لست أدرى