يوفو

كان فيه مسلسل زماااااااااااااااان اتفرجت عليه وأنا صغير وكان عاجبنى قوى

كان بطولة حسن عابدين وتوفيق الدقن

مش فاكر كان معاهم أبطال مين كمان ومش فاكر اسم المسلسل أصلا

يمكن كان فى اسمه كلمة عمارة.. يمكن

كل اللى أنا فاكره إن توفيق الدقن كان دايما بيتكلم عن ناس من الفضاء الخارجى جم وزاروه قبل كده

كانوا نزلوا على سطوح العمارة واتكلموا معاه بقى وكلام من ده

تقريبا كانوا قالوله إن نهاية العالم قربت كمان وإنهم هيبقوا ييجوا تانى أو حاجه زى كده وفضل هو بقى طول المسلسل يقول الكلام ده ويستناهم

طبعا أبطال المسلسل وأولهم حسن عابدين كانوا بيتعاملوا معاه على إنه مجنون

بس ده كان فى أول المسلسل بس ..

مع مرور الوقت بنتعرف على حسن عابدين الموظف المحترم اللى مش عارف لايعيش ولا يأمن حياة أولاده ويساعدهم على التمسك بالشرف والمبادىء

حكاية كل يوم يعنى

مش فاكر تفاصيل خالص بكل أسف بس على آخر المسلسل بيبدأ حسن عابدين يقتنع بكلام توفيق الدقن

وإن نهاية العالم قربت وإن الزوار اللى من الفضاء دول جايين تانى

فاكر إنى احترت قوى ساعتها

ياترى هوّه بدأ يتجنن نتيجة الضغوط اللى عليه واليأس وللا العكس تماما هوّه اللى حصل

المشكله إنه حتى فى آخر المسلسل وبعد ما شاف حسن عابدين زوار الفضاء دول بعينه وأيقن تماما إن توفيق الدقن كان معاه حق من الأول , مافيش حاجه بتظهر لنا احنا كمشاهدين

ماتقدرش تحدد لحد مالمسلسل انتهى إذا كان اتجنن خلاص زى توفيق الدقن وعلشان كده تخيل إنه شافهم

وللا إن توفيق الدقن كان معاه حق من الأول وباقى الناس كانوا جهلة مش أكتر ؟

 

طبعا أنا مدرك بعقلى دلوقتى إن المسلسل أكيد كان فيه إسقاطات كتيره ومعانى تانيه أكبر من مجرد القصة دى , وعلشان كده نفسى أقدر أشوف المسلسل تانى قبل ما أموت :)

ولو أى حد عدّى من هنا وكان فاكر اسم المسلسل فالله يخلى سيادتك ويرزقك بحاجات كتير حلوه تقولى اسم المسلسل ده كان إيه .. على الأقل علشان أبقى عارف أنا بادور على إيه !