26

الشهر ده بإذن الله هاكمّل 26 ستة بالتمام والكمال

كتير قوى

المفروض والمنطقى إن البنى آدم يقف مع نفسه بقى شوية كده ويشوف عمل إيه بالظبط وإيه إنجازاته وإيه المصايب اللى عملها, قرارات كان أخدها وقرارات هياخدها ... إلخ

بس سيبك من الكلام الفارغ ده كله

المره دى فيه حادثة بسيطه كده حصلت لى وفرقت معايا شوية

الحادثة البسيطه هى إن صابعى اتقطع وأنا باطبخ

كان قطع عمييييييييق ومحتاج يتخيط غرزة أو اتنين علشان يلمّ بصورة سليمة لكن الدم كان كتير والألم كان كبير علشان كده ربطته جامد واكتفيت بكده

ماكانش عندى استعداد لأنى أفتح عليه علشان يتخيط

وبعد كام يوم كان الحمد لله لمّ .. لكن طبعا مع وجود تشوه بسيط لأن القطع كان فى اللحم .. فى العضلات نفسها

خاطرة بسيطة جت فى دماغى ساعتها

أنا ح أفضل طول عمرى بالإصبع المشوّه  ده

الزمن مش هيرجع تانى علشان أقدر أتفادى القطع أو أستحمل الألم والفزع علشان آخد الجرح غرزتين

ده كان اختيار نهائى

طبعا كانت نوبة يأس عارمة كالعادة

انتبهت (((فجأة))) !! إلى إن فيه حاجات كتير فى حياتى نهائية

مافيش فرصة تانية

كل السنين اللى نزلت فيها فى الكلية وضاعت من عمرى .. خلاص راحت

كل الأيام اللى كان المفروض أذاكر فيها أو أتعلم برمجة أو ألعب فيها كورة

راحت خلاص ومش هترجع تانى

صاحبى اللى مات

مش هاشوفه تانى

شجرة التوت اللى اتربيت عليها وكانت باروح آكل منها فى نص الليل علشان بتبقى الأراضى فاضيه خلاص اتقلعت واتباعت بخمسين جنيه !!! آه والله

مش هاشوف الشجرة دى تانى ومش هاتسلق فروعها وأقعد أتنطط زى القرود رغم إنى مش شايف حتى الفرع اللى أنا واقف فوقه

اللحظه اللى خفت فيها قدام عصاية الناظر وهربت من العقاب بإنى ورطت فيه واحد تانى رغم إنى ماكنتش متأكد إن هو المذنب مش هترجع تانى علشان أكون شجاع المره دى لأنى مش متأكد

والتانى اللى ضربته ممكن ماأقابلهوش تانى طول ماأنا عايش ومايسامحنيش

 

كل أخطائى وتصرفاتى واختياراتى اللى فاتت نهائية

الواحد كان فاكر إن الفرصة التانية موجودة دايما وإن الندم الحقيقى على الفرص الضايعة هيكون بعد الموت لما تتمنى إنك تكون عملت خير أكتر وشر أقل

اتضح إن حتى فى الدنيا مافيش فرصة تانية

طالما قلت تبقى قلت

اخترت يبقى خلاص

فرصتك الوحيدة هى قبل الفعل المضارع

لأنه حتى المضارع أصبح ماضيا

قبل أن تختار وقبل أن تفعل وقبل أن تفكر

دى الفرصة الوحيده علشان ماتندمش

 

فات على 26 سنة

ماأعرفش نسبة القرارات الصح من الغلط فيهم لكن واضح -بالنظر لحالى دلوقتى- إن الغلط كان أكبر

المهم إن اللى جاى يبقى الصح فيه أكتر

مش عايز أندم بقى تانى

وأتمنى إن صابعى ده يكون آخر حاجه هتتشوّه فى حياتى