البهجة المفقودة

 وفى سبيل كسر الملل وموجة الاعتياد ظهرت نتيجتى خلاص ..

والحمد لله نجحت !

شىء غير معتاد على الإطلاق.. وغير متوقع أيضا لو نظرنا لإجابتى فى مادتين من الأربع مواد ..

اتكلمت عن الرمد والحالة اللى كنت فيها قبل امتحانه وإنى ماقدرتش أذاكر والإحباط اللى حصل لى بعدها

قدرت أعدى إحباط الرمد لكن ماتوقعتش إنى أنجح فيه وفى الطب الشرعى اتكرر عدم المذاكرة لكن من غير إحباط المره دى بس برضه ماكنتش متوقع إنى أنجح فيه ..

المهم نجحت .. وإنها مفاجأة نسبيا !

لكن مافيش فرحة .........

مش مسألة إنى إنسان فقرى .. أمال عايز تفرح إمتى بقى؟ .. إنت وش فقر أصلا ومالكش فى البهجة ..

مش قادر أحدد سبب محدد للبهجة الضائعة ..

ممكن تكون المفاجأة .. لسه مااستوعبتش بس حكاية إن دى أول مرّه من 10 سنين تقريبا آخد أجازة من غير مايبقى عندى امتحان دور تانى .. سواء للتأجيل أو الرسوب ..

حاسس بالراحه بكل تأكيد لأنى مش مضطر أذاكر الرمد والشرعى وأمتحنهم فى الشهر الجاى ..

ممكن يكن لأنى مشغول شوية بحوار خطوبة وجواز ..

آه !! المفروض إنى ح أكتب كتابى أو على الأقل حأتكلم فى موضوع خطوبة بقى ..

التفاصيل ممكن أتكلم فيها بعدين لأنى لسه مش قادر أستوعب الموضوع ده برضه كويس ..

شىء ظريف إن دى حياتى اللى باتكلم عنها ..

إزاى ممكن أمارس حياتى من غير ماأستوعبها كويس؟؟

لكن أنا هنا فى البلوج ده باتكلم مع نفسى فى الأساس ولازم أكون أمين شوية

أعتقد إنى مرعوب من المسئولية .. علشان كده مش راضى أستوعب لامسألة النجاح ولا الارتباط ..

لسه طبعا ماعالجتش مشكلة الهروب من المواجهة دى

السنة دى كانت بروفة فى الامتحانات ونقدر نقول إنه تدريب مش بطال, لكن لسه كتير

حاسس بملل تانى وزهق وأنا باكتب الكلام ده دلوقتى لكن طبعا هانشره برضه

ممكن أحاول أتكلم بوضوح بعد ماأهدأ شوية وأستوعب اللى حاصل

المهم إنه كنوع من التسجيل .. نجحت فى سنة رابعة طب بتقدير جيد -أهوه أحسن من مقبول برضه !!- من الدور الأول لأول مره من ساعة مادخلت الطب وانتقلت رسميا لصفوف السنة الخامسة

ونصيحة لأى حد معدّى إنه لو لقانى فاتح عيادة رمد مايجيش يكشف عندى !!!

المفروض إن عندى كده أجازة شهر وشوية .. ح أسجل هنا إنى بإذن الله المفروض أتعلم فيهم الفيجوال بيزيك دوت نت

ماينفعش أبدا إنى لحد دلوقتى مااتعلمتوش وماأعرفش أى لغة برمجة

وآدينى باكتبها هنا كنوع من الإلزام والتذكير !!

وكنهاية باسجل إنه حتى لو كانت البهجة مفقودة فأهوه على الأقل هم وانزاح !

وبدل مايبقى عندى كذا مشكلة يبقوا كذا مشكلة ناقص واحد :)

 

 

ملحوظة أخيرة مش قادر أتجاهلها للأسف ..

لما واحد زيى ماذاكرش كويس ومذاكرته بس كانت فى فترة الامتحانات ينجح فى كلية المفروض إنها بتتعامل مع حياة الناس زى كلية الطب مهما كان الواحد ده دماغه نضيفه أو ذكاؤه مش عارف إيه فده يبقى مؤشر غير صحى على التعليم الجامعى فى مصر !!!!

فقرى فقرى .. أنا عارف !

 

Quote of the Day:
By and large, language is a tool for concealing the truth.
--George Carlin