إذا كنت مش طايق نفسى, فيه حد ممكن يطيقنى أو يطيق يقرأ الكلام ده ؟
ممكن يكون ده بسبب الجو الظريف ده اللى مش قادر أستوعب إن فيه أى حد عاقل له إيدين اتنين وعشر صوابع ممكن يحبه, بس -وياللدهشه - فيه ساسو بتحبه !
ماأعتقدش إن الأربعه بيحبوه .. أنا ظنى فى ساسو أحسن من كده 
ممكن يكون بسبب الإحساس بالعبث من الفساد والمفسدين
كل ماأفتح جرنال أو أتفرج على أخبار بابقى مذهول من كم الصفاقة والاستعباط اللى عند مبارك والخكومة وأعوانهم
بجد بجد ماببقاش عارف أقول إيه !
قرار زى بتاع وزير الاتصالات والتسعيرة الجديدة للدى إس إل
نكت صفوت الشريف فى اجتماعات شباب الحزب الوطنى ومطالبته إياهم بإزاحة الناس المعتقة -بتشديد التاء وكسر الميم- اللى فى الحزب وأول المعتقين طبعا هو مبارك !!!!
وللا مقال أسامة سرايا الظريف اللى اضطريت أقراه فى عدد الجمعه اللى فاتت عن الثورة
فى أول المقال بيقول إن الثورة مستمرة وفى الوسط بيقول اتطورت وفى آخره بيقول الثورة انتهت وحصل بعدها ثورتين تلاته كمان !!
مهزلة الجراكن وللا نفيخة الختان اللى فرقعت مره واحده
حدوتة الثانوية العامة وكليات القمة وللا إلغاء التكليف عن الأطباء
مؤتمر مش عارف إيه اللى مع الاسرائيليين وللا تصريحات أبو الغيط الهزلية عن غضبة المصريين !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
ومش كفاية كل علامات التعجب دى والله
ده احنا غلبنا القذافى ..
وعلى سيرة القذافى .. آل إيه بيقولك الخارجية الليبية بعتت تعترض على قرار العفو عن الممرضات والطبيب الفلسطينى !
والنبى صحيح ؟؟
أمال كنتوا فاكرين إن بعد الهيصة دى كلها كانوا هيعدموهم مثلا ؟
ماكانوا سابوكم إنتوا عدمتوهم من الأول !
وللا صورة شفتها فى الجرنال لبوش مع جنديين فقدوا سيقانهم فى العراق
الاتنين ماشيين جنبه بأطراف صناعيه وهو ماشى فى النص .. قمىء وغبى
والجنديين أغبى !
عبث فى عبث
والدنيا حر ومش طالبة ..
Quote of the Day:
If at first you don't succeed, skydiving is not for you.
--Francis Roberts
6 comments:
صديقى .... كنت حأقولها ! بس انتى سبقتنى ولخصت كل القرف اللى عندى فى تدوينتك ... الظاهر يا صديقى ان اللى اختشوا ماتوا من زمان ... ساعات باحسد الجهلة على جهلهم لأن الجاهل مريح دماغه ما بيفكرش ومديها العنب العنب و لما يزهق يغير على الحنطور او بحبك يا حمار واحنا مقضينها فيروز لما جالنا الضغط عارف علبة دوا الضغط بكام يا صديقى .... مش أحسن لو قلبنا زيهم على شعبولا و لا سعد الصغير ....ونكبر التيتة بقى
مدونة جميلة وارجو ان تعطينى رايك فى بوستى الاول
صباح الخير ياعم حازم ..
الأول باحييك إنك لسه قادر تتصفح وتقرأ وترد كمان !!
باحييك فعلا :)
أنا مش قادر أستوعب أساسا الحالة من الزهق والملل والإحباط الموجوده دى , ناهيك عن إنى أحللها أو ألاقى لها حل
كنت أتمنى طبعا أكون من عشاق سعد الصغير ومصطفى كامل .. صحيح إن العيشه كانت ساعتها هيبقى فيها مشاكل برضه بس بيتهيألى كانت المشاكل هتبقى أبسط شوية وشخصية أكتر .. يعنى أسهل فى الحل والتعايش ..
وعلى كل حال ياصديقى فات الأوان
كل واحد فينا اختار شخصيته من زمان
!!
انا اجب احيك على الكلام الجميل دا و اشكرك على فيديو الليلة الكبيرة اللي انت منزله و اقولك اني بردوا بفكر في نفس السؤال انا عندي 22 و فعلا زهقت بجد و خصوصا اني انا كمان بدرس طب و في سنة خمسة و اتخنقت بكل المقاييس الممكنة و معنديش اي رغبة في اني اكمل انا بفكر يوميا اني اسيب الكلية بس هاروح فين انا حاسة ان الحياة مبقاش فيها حاجة ليها قيمة انا مش عايزة اكئبك بس قولت اهو مكان الواحد يفضفض فيه يالا انا هاروح اكمل بقيت المواضيع اللي انت كاتبها سلام
احم احم
:$
حر حر .. بس اهون من لما باتجمد من جوه وبره
يسرا حسن أو حسان :)
الحمد لله إنى نفعت أى حد بأى حاجه حتى لو كان فيديو الليله الكبيرة :)
ردك على فكره من الردود اللى وقفت عندها شوية واتأخرت ..
وعجبتنى قوى حكاية إنك مش عايزة تكإبينى دى -تجيبى لى اكتئاب يعنى -!!
الظاهر ماكنتيش لسه قريتى حاجه فى المدونة :)
وبينى وبينك الاكتئاب مالوش دعوه بدراسة الطب ولاحتى الرسوب بصورة متوالية -زى حالاتى كده , مع إنه عامل مش بطال :) - ولاحتى بالعمر اللى بينسرق من الواحد بالذات إذا دخل طب
القرف اللى الناس كلها حاسة بيه من الظلم والفساد
سواء ظلم وفساد كبارك والحاشية الملكية وللا الناس نفسهم بينهم وبين بعضهم
لما الأخلاق تبقى نقطة ضعف فى البنى آدم وتأخر مصالحه يبقى لازم الحياة تبقى مقرفة ..
عموما سعيد بفضفضتك جدا وأتمنى لك تلاقى سكة خروج من ضيقك ده !
ساسو :
هافضل لحد ماأموت أفتكرك فى كل يوم حر وأستغرب من عجايب خلق الله !!
واحد زيى مابيطيقش الشمس أو الحر وبيبقى حاسس إنه فى جحيم ..
وإنتى بتبقى مرتاحه فى الجو ده !!
سبحان الله :)
Post a Comment