وأنا باحاول أقاوم الإفلاس اللى عندى ده فكرت ليه أنا باحاول جامد كده إنى أكتب فى البلوج هنا
ليه باحاول أكتب حاجه تستاهل ؟
ليه باعذب نفسى كل ماأحس إنى باكتب كلام مالوش لازمة ؟
التفسير كان بسيط
لأن نفسى أكون مصدر لسعادة أى حد زى مامدونات كتيييييييييييره قوى باحبها وبازورها بتكون مصدر لسعادتى وخروجى أحيانا من الإحباط أو الملل ..
صحيح إن فيه عوامل تانيه خاصه بإن البلوج ده منفذ لخروج بخار روحى بصورة شبه منظمة كبديل عن الانفجار المتوقع لكن ممكن أنفس عن روحى بدون عناية حقيقية بقيمة اللى باكتبه ..
صحيح أنا لسه لحد دلوقتى مستسلم للكسل القمىء وصحيح إنى لسه ماكتبتش أى بوست يناسب الأهداف اللى عايز أحققها دى ..
لكن على أمل !
على امل إنى فى يوم من الأيام واحد يعدى هنا فيقرأ كلام أنا كتبته ويسعده أو يريحه أو يشد انتباهه أو يخليه يفكر ..
وبشرط إن الواحد ده مايكتبش تعليق هنا زى ماأنا ماباكتبش تعليق فى العادة عند ناس كتير من اللى باتابعهم وبقى لى سنتين تقريبا عايش على كتاباتهم ..
أهو على الأقل عندى كده علامة من علامات الحياة وهى الطموح وربما أجرؤ أن أقول التفاؤل !!
Quote of the Day:
The happiest people don't necessarily have the best of everything. They just make the best of everything
--Anonymous
3 comments:
صديقى ... اولا شكراً على تعليقك على قصتى الساقية التى هى أقرب الى وصف لأحداث يوم فى حياتى منها الى القصة .. ثانياً انتى ليه يا عم كسول كده يعنى بتمر على الناس و بتقرأ لهم دون تعليق طيب الناس حتعرف منين ان فيه واحد مدون محترم زيك موجود مش لازم تكون اكثر اجتماعية شوية ده رأيى المتواضع .... عموماً انا لا انسى ابداً انك أول من علقت فى مدونتى فى بدايتها وهذا الجميل لا انساه الجميل الذى كان سبباً فى صداقة ان شاء الله تدوم ... تحياتى
بص يا ليوناردو
بلاش الأسئلة اللي لا تودي و لا تجيب دي
و وقت ما تعوز تكتب اكتب
لما قريت البوست اللي كنت كتبته قبل كده عن نفس الموضوع قريب و اللي بدأته بكسلك في القراية و التدوين و كده
سألت نفسي نفس السؤال بالنسبة لك :
" أنا ليه بعدي على مداونته ؟ و هوه مش بيكتب أدب مثلا و نادرا ما بيكتب حاجة م الحاجات اللي أنا مهتمه بيها
و حتى الأغاني اللي هوه بيحطها ، مش دايما بيكون ذوقي من ذوقه ، و مع ذلك بأنزلها و بأسمعها
"
لاقيت الاجابة عندي عجيبة شوية و مع ذلك حقيقية جدااا
انت واحد من ناس قليلة وجودهم وحده كافي بصرف النظر عن نشاطاطهم
وجودك في حد ذاته في عالم التدوين قيمة
يعني
أنا شخصيا بأحس بنوع من الراحة لما بأدخل عندك بصرف النظر أصلا عن انت كاتب ايه
لاني باحس هنا بنوع من الصفاء ، الوضوح ، المصداقية ، التلقائية
حاجة كده
بأحس اني بأثق في هذا الشخص الذي يدعى " ليوناردو " و انتقائاته - حتى لو اختلفت مع اللي بيقوله ساعات أو مش عجبني - لأنه صادق / بطريقة صادمة أحيانا زي لما كتبت قبل كده البوست اللي فيه الاعترافات عن الحاجات اللي عملتها قبل كده اللي كان من ضمنها قتل الفار ده
و ع الماشي
الكتابة فعلا دليل من دلائل الحياة
أنا أكتب ، إذن أنا لسه هنا يا ناااس
:)
حازم باشا :
إنت بدأت تنسى وللا إيه ياعم الحاج :)
ده أنا على مارديت فى مدونتك كان فيه ييجى عشره علّقوا وردّوا قبلى
راجع التواريخ ياسيدى
بس عموما دايما تحرجنى بذوقك وكلامك الجميل كده :)
لىّ عموما ملحوظه صغيره بخصوص تعليقى على المدونات التانيه ومعرفة الناس بىّ ..
أنا معاك إنى مقصّر فى حق ناس كتيييييييييييييير قوى قوى بتعجبنى مدوناتهم جدا جدا جدا .. بالأصح بانبهر -بدون مبالغة- بشخصياتهم وكلامهم ورغم كده نادرا ماباعلق أو أكتب رد عندهم
يمكن لأنى عارف إنى مش هاقدر أكتب رد على قدر جمالهم وجمال كتاباتهم, زائد الكسل المهوووووووول اللى عندى دايما
اللى بيساعدنى شوية فى تخفيف الإحساس بالتقصير ده هوه إنى أحيانا بانوّه عن الكدونات دى وإعجابى بيها فى كتابتى هنا
ولما بالاقى فرصه إنى أرد ولو حتى رد يكون تافه بس يكون له لازمه شوية بانتهزها فورا
وده كله بعيد عن حكاية إن الناس يعرفونى أو يعرفوا بوجودى
الحقيقه إن كم الناس اللى فوجئت بردودهم للمدونة هنا فاق كل توقعاتى
ناهيك إن فيه ناس بتتابع المدونة
ومش أى ناس , دول كمان ناس محترمه جدا جدا جدا
وزى ماكررت كتير إنى مش شايف فى اللى باكتبه أى حاجه تستاهل إن كل الناس دول يعدّوا على المدونة أساسا فمابالك بإنهم بيكتبوا ردود كمان
كده أكتر فعلا بكتير من اللى أنا أستاهله فالحمد لله قوى قوى على كده
بس هىّ تدوم :)
شغف هانم :)
رغم إنى ماكتبتش البوست ده علشان أقول إنى متضايق من بلوجى أو حاجه وإنما كان قصدى إنى أعتذر لكل اللى ماباقدرش أسعدهم زى ماناس تانيه بيسعدونى خصوصا فى حالات الملل والزهق
يعنى ماكنتش مكتئب ولاحاجه
ورغم كده كإنى كنت مكتئب !!!
كلامك إدانى شحنه إيجابه جميله هتنفعنى بكل تأكيد لما تهاجمنى نوبة من تعذيب النفس والسوداوية بدون داعى وكافة تلك الأحاسيس المثيرة للشفقة !
وقبل كده ساعدتنى بصراحه إنى أحدد مسارى بشكل أوضح شوية
كنت بافكر أكتب موضوعات تعبير أو أدب أو دراسات .. أو أى حاجه من الحاجات اللى تستاهل تضييع الوقت فى قراءتها دى
دلوقتى برضه ناوى إن شاء الله أحاول أعمل الحاجات دى برضه
بس قبلها ماأنساش أكون نفسى
حتى لو ممل أو مثير للشفقة أو حتى الازدراء!!!!!
المهم أكون أنا
البلوج ده بتاعى أنا زى ماباقول دايما
شكرا إنك فكّرتينى ياماما :)
و... احم.. مالها الأغانى اللى باحطّها بقى ؟؟؟؟
;)
Post a Comment