Tuesday, October 03, 2006
حضرة المتهم
وكنا لسّه بنجيب فى سيرة عم نجم سمعت له كلمات تتر المسلسل طبعا مع صوت مدحت صالح وألحان ياسر عبد الرحمن يبقى حاجه كده مالهاش حلّ وتخلينى أدعى وأقول ربّنا يخلّى لنا نجم ويبعده عن جمال وأبو جمال ..
المقدّمه
نازل وأنا ماشى ..ع الشوك برجليا
وإنت السبب يابا.. ياللى خليت بيا
لافرشت لى بستان.. ولاحتى بر أمان
أعيش عليه إنسان.. والدنيا فى إيديا
وأنا لمّا جيت م الغيب.. العدل كان كيفى
والحق كان مطمعى.. والحب كان سيفى
دقّيت على الأبواب ..لقيتنى فى السرداب
غابه من الأنياب.. مسنونه حواليا
مع الأسف يابا.. الدنيا دى غابه
مالناش مكان فيها
ياعينى ياوعدى ..ع المغرمين بعدى
والطيببين فيها
ع الطيبين فيها ..
النهايه
حقّك على عينى .. يابنى يانور عينى
لاجل الوفا بدينى .. لك عندى بعض كلام
أنا كنت وحدانى .. والدنيا واخدانى
عايز ونيس تانى .. يقاسمنى فى الأحلام
غريب وأنا فى بلدى .. جبتك تكون سندى
انصفنى ياولدى .. اصبر على الأيام
وآدى روابط للتحميل جبتهم من الموضوع ده اللى فتحه Alloly
آدى المقدّمه
وآدى النهايه
Sunday, October 01, 2006
وآدى نجمه واقعه من السما
بيتهيألى أى حدّ دخل البلوج ده لاحظ إن أهم صفه فىّ هى الكسل العنيف جدا جدا جدا
رغم إن غالبا بيبقى عندى كلام نفسى أكتبه هنا أو أقوله بس باكسّل أو باطنّش أو بانسى ..
احتمال الحكايه دى تكون جزء من أعراض الاكتئاب واحتمال يكون خوف من مواجهة الجماهير !!
أيوه , ماهو من الأشياء العجيبه إن فيه ناس بتيجى هنا وبتقرا البلوج - ودى ظاهره عجيبه مش قادر أستوعبها بصراحه بس آهى بقت موجوده - وطالما فيه حدّ بيقرا يبقى لازم أكتب حاجه تستاهل تتقرى أو على الأقل أحاول ....
المهم إن سواء خوف وللا اكتئاب فالمحصّله النهائيه إن بوستاتى فى البلوج قليّله جدا جدا
ومن النهارده هاحاول أغير ده إن شاء الله
على الأقل من باب محاربة الاكتئاب ومكافحة زحفه الدؤوب على حياتى
أولا نصيحه لكل اللى داخل هنا يدخل ع الموقع ده
ويحمّل برنامج Live Writer
البرنامج ممتاز فعلا وبيسهّل كتير على الكسالى من أمثالى فى كتابة البلوج
نيجى بقى لعنوان البوست ده
نجمه وقعت من السما ...
اللى أقصده هو " أحمد فؤاد نجم " شاعر العاميه الذى لايكفينى هذا البلوج لأوفيه حقّه من المديح
تاريخه ونضاله وبالطبع موهبته ...إلخ
بس فى عدد الدستور الأخير بتاريخ 27 سبتمبر كتب مقال غريب شويه
أنا اتصدمت منّه بعنف , وعلشان أوضّح آدى جزء من كلامه
" وصلنا إلى بيت القصيد الذى هو موضوع جمال مبارك والتوريث فى مصر المحروسه وقصيدتى الأخيره عريس الدوله وبقدر ماكان عتاب منى الحسينى رقيقا بقدر ماأوجعنى وآذى مشاعرى فقلت لها إن هذه القصيده لم تكن إلا مداعبه خفيفه لاأعتقد أنها تؤلم أو تثير الغضب وعلى العموم إذا كانت المداعبه لم تصل فأنا أعتذر لجمال مبارك.. أولا لأننى لاأقصد إيلامه لأننى لاأعرفه معرفه شخصيه بل بالعكس فأنا مُشفق عليه من تحمّل تبعة نظام أبيه الذى أهلك الحرث والنسل ..لماذا يتحمّل هذا الشاب تبعات أفاعيل يوسف والى وزكريا عزمى وكمال الشاذلى وفتحى سرور وباقى قائمة زبانية الحزب الوطنى . أقول لجمال مبارك اخرج من هذا الجب المعتم وتعالى بمفردك وقدّم لنا نفسك وبرنامجك فنحن أهلك وأنت ابننا , انزل إلى الناس ياولدى فالناس لن يأكلوك "
يعنى إيه الكلام ده ياعمّ نجم ؟
هوّه خلاص بقى قدرنا إن جمال مبارك جاى وقاعد بتنصحه ؟
لأ وكمان بقى شاب برىء ومالوش ذنب وبعدين فيه فقره تانيه فى المقال بيتكلم فيها نجم عن الملك فاروق والشعب كان بيحبّه إزاى لما مسك برضه وهوّه صغير ..
هوّه مش احنا خلاص بقينا جمهوريه وللا ساعتك رجعت أخّرت يابو النجوم !!
هوّه جمال مبارك ده ياعينى نُغّه , عيّل صغيّر أبوه جابه من المدرسه وقاله تعالى امسك البلد شويّه على ماأريّح ضهرى ساعتين
ده كلب زى أبوه , وعايز ينهبنا زى أبوه وعايز يركبنا زى أبوه
بتنصحه ليه ؟
إنت فكرك إنه أساسا يهمّه أى حدّ فيكم وللا فينا ؟
وللا فاكره بيقرا الجرايد أصلا ؟
لما الكلام ده ييجى منّك إنت وفى الدستور عايزهم فى روز اليوسف يكتبوا إيه ؟
وبعدين فيه جمله تانيه فى المقال
" ياأستاذ جمال إنت فلاح منوفى ماإنتاش خواجه " !!!!!!!!!!
بأمارة إيه ياعمّ فاجومى ؟
لاعُمره مسك فاس ولا حتّى ركب حمار , وللا يمكن قصدك فلاح علشان عنده ييجى كام ألف فدان من أرضنا اللى سرقها هوّه وأبوه , ماهو اسمه عنده طين برضه ...
صدمتى الأساسيه من المقال ده إن المفروض إن الإعلام الرسمى كلّه بيأهلنا خلاص لقبول فكرة جمال مبارك والمفروض إننا أساسا رافضين المبدأ حتى لو كان جمال مبارك ده فرخه بكشك
حتى لو كان هيخلّى مصر جنّه - وده مش هيحصل - لأنه لو خلاها جنّه هييجى ابنه أو ابن ابنه يخربها وشاعتها هنعمل ثوره تانى علشان الشعب يحكم نفسه بنفسه !!
هوّه احنا فاضيين قوى كده علشان نراجع تاريخنا كلّ شويّه ونعيده م الأول ؟
وبعدين فيها إيه لما جمال مبارك يزعل وللا ينفلق من قصيدتك ؟
ياأخى طب ياريت يحسّ على دمه ويعرف إننا كارهينه مش بس مش عايزينه
وكفايه كده قبل ماأكسّر لوحة المفاتيح وللا أولّع فى الشاشه
Friday, September 15, 2006
Friday, September 01, 2006
وسط النجوم !
وسط النجوم ..قاعد يانوم
ياعجوز كتومفارد كتاب الخلق
الحزن جنب العشق !!
جزء من أغنيه تقريبا كانت لفريد الأطرش .. مش متأكد
Monday, August 28, 2006
مزيد من ال بلا .. بلا .. بلا
صاحبى الوحيد اللى ممكن أتكلّم معاه مسافر بقى له 3 سنين
أساسا كل أصحابى ياإما سافروا برّه مصر يشتغلوا
أو اشتغلوا بس برضه فى أماكن بعيده
أو اتجوّزوا !!
شكلى كبرت قوى وأنا مش واخد بالى
تخيّل إن يبقى صاحبك اللى بتفكّ نفسك معاه بكلمتين وتفضفض يبقى شوية حديد وبلاستيك
حتّة شاشه ولوحة مفاتيح
حقيقه مؤسفه بالنسبه لى
مُرعبه فعلا لدرجة إنى مش قادر أكتب أى حاجه تانى بعد ما انتبهت - فجأة !!! - للحقيقه دى
Thursday, August 24, 2006
Bla .. Bla ... Bla ...
" أنا فعلا مش عايز حاجه غير إنى أبقى مع كتبى والكمبيوتر بتاعى "
يبقى مش هتاخد حاجه من الدنيا أكتر من كده !!
....
ده كان جزء من حوارى مع طبيبى النفسى اللى رُحت له علشان أشوف حلّ
بس اتضّح إنى كنت رايح له علشان أرمى عليه مسئولية فشلى -زى ماقال لى برضه -فى معالجة مشاكلى بنفسى
كجزء من كسلى وتواكلى المستمر وعدم رغبتى فى تحمّل المسئولية - خصوصا طبعا مسئولية الفشل - وإلقائى اللوم دوما على الآخرين
مع تبريرى المستمرّ لكل شىء بمبررات وإن كانت مُقنعه ومنطقيه إلا أنها غير حقيقيه تهدف فقط إلى الهروب من مواجهة الواقع أو الحقيقه
الحقيقه أنا مًُقتنع بتحليله لىّ
بس مش قادر أعرف هوّ هيساعدنى إزاى ؟
كتب لى على مضاد للاكتئاب
مافرقش معايا كتير بدليل إن حالة الاكتئاب والتوتر لسّه ملازمانى !
باقول يمكن العيب يكون فىّ أنا ؟
لأن القهوه مثلا بتخلّينى أنام - بجد فعلا - فمن المنطقى إن مضادات الاكتئاب تجيب لى اكتئاب :)
أو يكون نومى واكتئابى محاوله أخرى للهروب من المواجهه
يعنى أنا ماببقاش محتاج أنام فعلا ولا كمان باكون حقيقى مكتئب
لكن باخدع نفسى وأخلق الوهم ده لإعطاء نفسى مبرّر جاهز للفشل ...
غالبا هىّ دى ..
ياترى هاقدر أتخلّص من أوهامى دى ؟
ياترى هاقدر أواجه مشاكلى بدون محاولات أخرى للهروب ؟
ياترى هاكمّل علاج عند نفس الدكتور ؟
وهل لو نجحت فى ذلك سيتغيّر الواقع وتُصبح الدنيا " بمبى" ؟
تابعوا معنا وقاتل بعقلك وقلبك مع رجل المستحـ... احم مع العبد لله
وربّنا يستر
Subscribe to:
Posts (Atom)