Saturday, June 03, 2006

خمسه وخميسه

High Fidelity
فى الفيلم ده كان البطل كل شويه يعمل لسته أو "قائمه" ب خمس حاجات
مرّه خمس أغانى رومانسيه
مرّه خمس نساء حبّهم وسابوه
ومرّه خمس أغانى فى فترة الصبح
حاجات زىّ كده
أنا قلت أعمل لنفسى شويّة خمسات كده , من باب الملل يعنى
وبما إنى زهقان دلوقتى فعلا فعلا فعلا فده ميعاد مناسب لفكره زى دى

وهابدأ ب 5 أفلام ماأقدرش أتفرّج عليهم أبدا مهما كنت زهقان أومتنّح

1- الإرهاب   بتاع ناديه الجندى

2- سلام ياصاحبى بتاع عادل إمام وسعيد صالح

3- امرأه هزّت عرش مصر تانى بتاع ناديه الجندى

4- الجحيم تانى عادل إمام بس المرّه دى كان مع مديحه كامل وشيرين

5- فى الصيف لازم نحب المره دى نور الشريف وماجده الخطيب وشويّة نجوم تانيين فى أسخف أدوارهم

امم فيه أفلام تانيه كتيره بدأت تيجى على دماغى بس نلتزم قاعدة الخمسه ونخلّيهم لأى بتاعه تانيه


خمس كتّاب لو لقيت لهم مقالأو أى حاجه لازم أقراه

1- أحمد رجب

2- أحمد خالد توفيق

3- سلامه أحمد سلامه

4- محمد حسنين هيكل

5- ناهد فريد


خمس روايات ممكن أقراها بدون ملل فى أى وقت

1- ملحمة الحرافيش لنجيب محفوظ

2- الزينى بركات لجمال الغيطانى

3- ثلاثية "إيجور" لأحمد خالد توفيق

4- أرض النفاق ليوسف السباعى

5- زينب والعرش لفتحى غانم


خمس أفلام بقى ممكن أتفرّج عليهم أى وقت

1- الإرهاب والكباب

2- الحب فوق هضبة الهرم

3- هنا القاهرة

4- السادة الرجال

5- الأفوكاتو


وخمسه أجنبى برضه ممكن أتفرّج عليهم أى وقت بدون ملل

1- Matrix

2- American History X

3- Gulliver's Travels

4- The Big Kahuna

5- ForrestGump


خمس مطربات بقى لازم أجيب أى شريط جديد ينزل لهن

1- سميره سعيد

2- حنان ماضى

3- ماجده الرومى

4- أمل وهبى - أيوه أمل وهبى !!-بتاع الخيّاله والشيكولاته

5- أصاله


وخمس كليبات عربى باحبّهم جدا جدا

1- لابأحلامك ل جوليا بطرس

2- حالة ملل ل سميره سعيد

3- برّه الشبابيك ل محمد منير

4- صدفه ل عايده الأيوبى

5- ليلة عشق ل حنان ماضى


وكفايه كده المرّه دى , أكمّل بعدين فى أى وقت أكون زهقان فيه برضه

8 comments:

Manora said...

ههههه
فكرة ظريفه جدا
صحيح الملل ده بيجيب اختراعات فظيعه
بس ليا تعليق
امل وهبى!!!

Leonardo said...

أيوه أمل وهبى !

المشكله مع المطربه دى إنها عادة بتنقّى أقل أغنيه فى الشريط وتصوّرها كلّيب
يعنى لو سمعتى لها شريط الخيّاله ده هتلاقى 4 أغانى أو خمسه ممتازين فعلا ومختلفين تماما عن أى حاجه من اللى فى السوق بس هى دايما بتصوّر الأغنيه اللى تحسّ إنها شعبيه أكتر أو هيصه أكتر حتى لو أقل أغنيه
يمكن معاها حقّ نوعا لأنها حتّى لما صوّرت أغنيه تانيه محترمه وممتازه من الشريط ده وهى أغنية " من بحر للتانى " ماخدتش نفس شهرة ولا فرقعة الخيّاله
رغم إنها طبعا أعلى بكتيييييييير
وتصويرها كان أجمل
بس رتمها كان هادى مش بتاع رقص

عموما أنا ناوى أكتب عنها فى بوست جاى وهاجيب شوية أغانى م اللى باتكلّم عنهم دول

Green said...

انا جيت صدفة .. كنت بادور على مين تانى بيحب "اكار تافهة لرجل كسول" ..
و بعدين لقيت البلوج بتاعك شبهت !
و دخلت لقيت د.احمد خالد !!
و فى الكومنتس لقيت منار ..
دا احنا معارف بقه .. ليوناردو روايات ؟!
انا سبيل ^_^
المهم ..
الأفلام اللى انت بتحبها للأسف مااتفقتش معاك فيها خالص ..
حتى فيلم "محمود عبد العزيز " الوحيد فى الليست بتاعتك مش هو احلى افلامه ..
يا عم قول "الكيت كات" و لا "الكيف"و لا حتى "سيداتى آنساتي " ...
^_^
أحم ..
انا مش جاية اغلس على فكرة ..
انا هارفع لك القبعة من اجل قائمة الام اجنبي متميزة و من اجل اغنية السيدة (جوليا) آخر الجميلات المحترمات على الكوكب !

i'm watchin' .. so,keep it up

Leonardo said...

الكتاب ده فظيع فعلا !!
أول مرّه سمعت عنّه كان فى الدستور فى صفحة عرض الكتب وكان محمد الدسوقى رشدى كاتب عنّه مقال شدّنى وكان منبهر بالكتاب ..
بعد كده نسيته كالعاده لحد مارحت عند  تامر ولقيته جايب نسخه قعدت أفرّ فيها على ماينقل لى شوية أفلام ووقعت فى الفصل بتاع الخجل ...
من غير كُتر كلام بقى
أول حاجه عملتها لما نزّلت طنطا إنى رحت فرع دار الهلال وجبت النسختين اللى لقيتهم هناك :)
يمكن أكتر حاجه عجبتنى فى المؤلّف أسلوبه اللى يشبه جدا أسلوب الساخر الرائع محمد عفيفى , زى ماقال المترجم د.أحمد مستجير
على فكره أنا دوّرت على النت بعدها برضه عن أى حاجه عن الكتاب أو المؤلف لحدّ مالقيت نسخه من روايته اللى اتكلّم عنها د. أحمد مستجير برضه بتاع "ثلاثة رجال فى قارب" بس لسّه ماقريتهاش طبعا لأنها بالإنجليزى وأنا عندى امتحانات !!
...
إيه ده ؟
...
لامؤاخذه ياسبيل نسيت أسلّم عليكى الأول !!
إزيّك ياستّ سبيل ^_^
وإزّاى أميرك اللى لسّه ماتحوّلش فى الصوره ده ;) ?
نوّرتى البلوج ياأفندم :)
حتى لو ماعجبكيش كل الأفلام اللى أنا حاططها سعادتك مش العربى بس ^_^

بس خلّى بالك من إنّى كنت باختار أفلام ماباحسّش بالملل منها مهما شفتها وممكن أتفرّج عليها فى أى وقت وفى أى حاله علشان كده هتلاقى منها 4 كوميدى
بيناقشوا قضايا مهمه وأحيانا فلسفيه كمان بس بخفّة دم متناهيه وإتقان فى الكتابه والإخراج والتمثيل
عندك مثلا مشهد محمد صبحى وسعاد نصر لمّا بيحاولوا يعدّوا الشارع ويكون مشجّعين الكوره ماليين العربيات
وللا لماّ بتوع الكاميرا الخفيه بيعملوا فيهم مقلب !
ومن الإرهاب والكباب مشهد عادل إمام لمّا كان بيقول لماجده زكى إنها لو راحت جنينة الحيوانات مش هيخرّجوها فتلتفت له وعينيها بتطقّ شرار وفى إيدها السكّينه ووراها الأكياس السوداء !!
وللا لما قابل يوسف داوود فى الجامعه العربيه وهوّه بيدوّر ع الأستاذ مدحت
وفيلم الأفوكاتو كلّه من أوّل مشهد لآخر مشهد وافتكرى معالى زايد لما بتقول لهاله فؤاد إنها عايزه تتجوّزها !!!
ومحمود عبدالعزيز لما ييجى يكلّم أى حدّ عن مراته معالى زايد فالتانى يفتكر ويقولّه " آه , أم رجلين حلوه " حتى المأذون ^_^

والفيلم الخامس رغم إنه مش كوميدى إلا إنى برضه مابازهقش أو أملّ منّه يمكن علشان الفيلم قريّب مننا قوى فى المرحله السنيّه دى
أو علشان آثار الحكيم كانت أمّوره زياده عن اللزوم فى الفيلم ده :)

ماباقولش إن دى أحسن أفلام فى السينما المصريه أو أفضل أفلامى رغم إنهم بكل تأكيد من أفضل الأفلام فى الحالتين بس الأساس إنهم مش مملّين إطلاقا
وطبعا أساس 5 اختيارات هوّ اللى منعنى من إنى أزوّد أفلام تانيه كتيره ممتعه زى غزل البنات , سى عمر أو سلامه فى خير لنجيب الريحانى
و معظم أفلام اسماعيل يس خصوصا المليونير والكيف طبعا ومعاه فيلم خرج ولم يعد بتاع يحيى الفخرانى
عندك كمان فيلم ثقافى و الأبواب المغلقه -بداية أحمد عزمى فى السينما- و معاهم السلم والتعبان ...و....و...و...

وخلّى بالك أنا ماباقولش أفضل أفلامى أو أحسن أفلام ده كلّ ده فى باب الأفلام الممتعه غير الممله ^_^
على فكره عاجبانى البتاعه دى ^_^ قوى :)

وطبعامش عايز أقعد أرصّ لك فى الأجنبى وإلا مش هانخلص النهارده , الحمد لله إنهم عجبوكى على طول ^_^

هاكون سعيد إنك تتابعى البلوج ياأفندم وتشرفّينا فى أى وقت

تمنيّاتى لأميرك إنه يتفكّ عنه السحر ويرجع بنى آدم من تانى ^_^

Anonymous said...

أسف على اقتحامى البلوج بتاعك ..

فكرة حلوة قوى على فكرة ..
انا كنت بعمل سيرش عن حنان ماضى
ولقيتك حاتطها من ضمن اختياراتك من المطربين المهمين بالنسبة ليك .. فعلا حنان ماضى صوتها لوحدة يخليها ملكة على عرش غناء مصر ..ومش اى حد يسمعها .. تعالى احنا عاملين فترة عن حنان ماضى عندنا فى الموقع لو تحب تقولنا رايك فيها http://www.ournormandy.com/forum/showthread.php?t=8033

سلامى ..

Leonardo said...

ياعم ده بلوج
يعنى كده كده ع النت ومفتوح ع البحرى
اتفضّل سعادتك فى أى وقت واقتحم براحتك :)

أنا اللى آسف لأنى ماشفتش البوست بتاعك غير متأخر جدا

ودخلت الموقع اللى إنت كاتبه وفعلا موضوع جميل جدا جدا عن حنان ماضى
واشتركت فى الموقع خلاص لأنى لقيت فيه حاجات تانيه ممتازه زى فرقة المصريين اللى كنت بادوّر على أغانيهم من زمان ^_^

باشكرك فعلا على الموقع الجميل ده وعلى تشريفك لمدونتى :)

Anonymous said...

هاى
سلامو عليكم
احب اعرفك بنفسى انا اشرف
ممكن اطلب منك طلب
انا كنت عاوز اسمع اغنية من بحر للتانى اللى بتتكلم عنها
ايميلى :a_radw155@yahoo
وشكرا

Anonymous said...

سلامو عليكم
ممكن اطلب طلب
انا كنت عاوز اسمع اغنية امل وهبى من بحر للتانى
بس مش لاقيها فى السوق
استأذن سيادتك ترسلهالى
وشكرا
a_radw155@yahoo