Monday, September 10, 2007

جيمى من جديد

وأنا راجع من برّه من شويّة حوّدت على واحد صاحبى شغال فى مطعم كده أشوف حاجه علشان العشاء

كان صاحب المطعم قاعد يتفرّج على التليفزيون

لقيت جمال مبارك فى التليفزيون وهوّه لابس نص كم فى برنامج بيقدمه المناوى بتاع قطاع الأخبار ..

 ولقيت الراجل صاحب المطعم بيقولى إنه معجب بجمال مبارك وحاسس إنه صادق ؟؟؟؟؟؟؟؟؟

قلتله إن الكلام والأسئلة والشباب اللى قاعدين والردود و .. و..

كل ده بيبقى متجهز قبل كده ومحسوب بالمللى

قال لى بس الراجل بيرتجل مابيتكلمش من ورقه ولا حاجه

قلت له ماهو عمّال بيعيد ويزيد فى نفس الكلام بقى له 3 سنين وعمّال واخد مصر رايح جاى فى مؤتمرات حزن وطنى يعيد ويزيد فى كلام مكرر وكله تفاؤل بدون معنى وبدون فايده .. ده إن كان قرد -بلاش أقول حمار- كان حفظ الكلام  ومابقاش محتاج يقرأ من ورقه ..

قال لى حتى لو كده فالراجل واضح إنه شخصية جاده وبيتكلم بثقة وله مش عارف إيه ؟؟؟

قلت له حاسب شوية ياعم الحاج .. ده لسه من حوالى سنه أو أقل مستضيفينه فى برنامج مش عارف إيه على الأولى برضه وماكانش عارف يتكلم أو يرد.. ولما جابوا بنت صغيره تتصل به و ياأونكل وياعم الحاج الراجل كان وشّه أسفلت وماعرفش يتكلم رغم إن الموضوع متجهز !!

وبعدين شوف كلامه هتلاقى كلام مافيهوش حسم لأى حاجه ..

زى أبوه بالظبط

وبعدين ده لو فيه أى خير ماهو كان ساب البلد ومايبقاش هوّه وأبوه اللى رجّعوها ورا للملكية تانى

لو عايز يخدم بجد كان خدم وهوّه برّه من غير مايدخل الحزب والحكومة

لو مش حرامى كان كشف عن ثروته ومصادرها هوّه وأبوه

لو مابيصرفش من فلوسنا وشقانا كانت رحلاته ومؤتمراته ومشاريعه بانت ميزانياتها للناس وبقت ع المكشوف

لو أمين فعلا ومش كدّاب وتعلب زى أبوه كان نفى التوريث بوضوح وقال إنى مش هامسك البلد ولما أبويا يسيب هيبقى مكانى كذا كذا وشغلى فى الحزب كذا كذا

إنما "أنا لاأنوى ولاأرغب فى ترشيح نفسى" !!!

وحياة أمك سوزان ؟؟؟

وأول كام نفر يأجرهم الحزب الوطنى هتنزل طبعا عن تمسكك وتستجيب لرغبة الشعب يابن الشععععععععععععععععععب  !

 

للأسف يبدو إن الآلة الإعلامية رغم ضحالة أفكارها وتفاهة أساليبها والاستعباط البادى فى وسائلها قد حققت نجاحا برغم كل شىء ...

واحنا كفاية علينا نكتئب !

من كام يوم كنت باتكلم مع ابن خالى اللى شغال أمين شرطة فى الداخلية ..

لاخظت إنه مقتنع فعلا بإن بتوع كفاية دول كانوا هيبهدلوا البلد لو الداخلية سابتهم ؟؟

وإن السودانيين اللى بتوع الأمن المركزى ضربوهم وقتلوهم فى المهندسين كانوا هم طبعا اللى غلطانين ..

ولما حاولت أناقشه وأتكلم عن كفاية كان بيبص لى باستنكار !!!

 

بالمناسبة فيه بنت دلوقتى فى برنامج جيمى سألت شوية أسئلة محترمة

عن إهدار المال العام فى فرق الكورة فى قطاع البترول والرشاوى فى وزارة الثقافة والفساد اللى الحكومة بتقول عليه فى عمر أفندى .. إلخ

سألت فى نقط محدده .. وده ممتاز .. هاشوف كده هيرد عليها إزاى ؟

البداية باينة .. رشيد هوّه اللى بيرد مش جيمى ..

وردّه فى عمر أفندى مستفز .. الحكومة ماتقدرش تديره !!

وفى فرق الكورة .. رد إن الدولة بتدعم الرياضة ؟؟؟؟

وهىّ الفلوس اللى بيرميها الوزير دى كإنها من جيب اللى خلّفوه دى ماعليهاش رقيب ؟

لو الدولة هىّ اللى بتدعم يبقى ليه نادى زى البلدية وللا أسوان بيطلع ميتينه على ماياخد كام ألف .. ونادى زى إنبى وبتروجيت وللا الحرس الفلوس فيها زى الرز ؟؟

وماجبتش سيرة باقى الأندية الغلبانة بحق وحقيقى أو الرياضات المنسية بحق وحقيقى

لعّيب ياسى رشيد

وماجابش سيرة وزارة الثقافة والرشاوى..

وآدى جمال باشا اتكلم برضه واتقلب سؤال البنت من الرقابة على إهدار المال العام فى وزارة محدده زى وزارة البترول إلى أهمية الرياضة ودور الدولة فى دعم الرياضة والأنشطة الشبابية !!

وكده أنا متأكد إن الأسئلة مترتبة ومتفبركة ... برافو عليهم بصراخة الطقم الإعلامى اللى مع الراجل

البنت كانت مقنعة جدا والأسئلة كانت محرجة فعلا وأسلوب كلفتتها ملعوب ياأولاد الكلب

وحتى كانت سألت عن تعيين أبوتريكة فى وزارة البترول وعن إن ده مثال صارخ للوساطه وانعدام الكفاءة

ردّ رشيد وقال أنا باتفق معاكى تماما !!

يعنى إيه ولامؤاخذه .. هتعمل إيه يعنى فى الموضوع ده واللى زيّه ؟هترفد أبوتريكة ؟ وللا هتشد ودان سامح فهمى؟

 

ودلوقتى فى نهاية البرنامج جيمى بيتكلم عن النشاط الطلابى والسياسة

بيقول إن مؤتمر زى اللى همّه عاملينه ده يعتبر توعية ومناقشة للمشاكل و .. و.. ولو المؤتمر ده فى الجامعه يبقى نشاط مطلوب وكافى جدا .. إلخ

لكن نشاط حزبى لأ !!!!!!!!!!!!!!!!!!!!!!!!!!

وهوّه إنت سعادتك جاى بصفتك إيه ؟ وبتروح الجامعة بصفتك إيه ؟

ابن رئيس الجمهورية طبعا .. مش لاسمح الله أمين لجنة السياسات بالحزن الوطنى

لأ وإيه بيقول إنه مش عايزين صراع أحزاب داخل الجامعة ...

طبعا .. كفاية الحزب الوطنى .. وهوّه فيه أحزاب أصلا غيره فى البلد ؟

 

آه ياولاد الكلب

ياولاد الكلب !!

الله يرحمك ياعاطف ياطيب .. ماعادش فى إيدنا غير إننا نصرخ زى حسن سواق الأتوبيس ونضرب بعض ونقتل بعض وإنتوا واكليننا وواكلين البلد فى كرشكم ياأولاد الكلب

ياأولاد الكلب

ياأولاد الكلب

 

 

2 comments:

شغف said...

أعصابك يا ليوناردو

جيمي مش هاينفعك بحاجة لما تروح فيها يا ولداه !!

الآلة الاعلامية عندها تأثير جامد جدااا طبعا بعبقرية ----- ( الزن ع الودان ) اللي أمر م السحر

اذا كان أيام تمثيلية الترشيحات للرئاسة دي و الانتخابات الرئاسية ، واحدة زميلتي كانت بتقول بكل اقتناع عن الأب المبجل اننا مش هنلاقي زيه ، و انه راجل طيب و قلبه ع الشعب ، و انه خبرة في ادارة شؤنها و احنا هانضيع من غيره ، و كلامه كله عنده حق فيه ،و كان عمل فينا ايه عشان نجيب غيره


فما بالك بالابن بقى

أكيد تشرب أصول المهنة مبكرا برضة و بيعرف يمثل كويس على ناس مش عارفه أصلا هيه عاوزة ايه و لا مستوعبه ايه اللي ناقصها و ايه حقوقها المنهوبة منها

Leonardo said...

المشكلة إنه كمان مابيمثلش كويس !!!
مابيعرفش فعلا يرد أو يتناقش مناقشه جدية
مابيعرفش غير إنه يسمّع كلام حافظه صم وخلاص .. من غير حتى مهارات التمثيل اللى ممكن تقنعك إنه بيتكلّم مش بيسمّع

كل ده وألاقى الراجل بيقول إنه معجب بيه وحاسس إنه صادق !!!!!!!!!!!!
ده أنا كنت هاتشلّ ياشيخه ساعتها

وللا ردّ جمال بيه على سؤال الخصخصه
شفتى لما بيقول إن الهدف أعمق من كده بكتييييييييييييير !!!
لآ شديد ياض .. حلوه أعمق دى
وطبعا يقول إن الهدف من الخصخصه هو خلق فرص عمل جديده
وحبّة استعراض كده - اللى موافق على إن خلق فرص عمل جديده هدف مهم يرفع إيده - .....
وحياة أمّك ... احنا فى مدرسة هنا
وبعدين يعنى بغباء أهلك ده .. فيه حد هيعترض مثلا ؟؟؟
وبعد كده مايشرحش مثلا الكيفية اللى بيع مؤسسات ناجحه وحيوية للبلد هيخلق بيها فرص عمل جديده
وإزاى لما هاشيل نص العمال معاش مبكر هاخلق فرص عمل جديده ؟
غبى غبى غبى
ومش عايز أشتم بصراحه أكتر من كده

يعنى احنا ضد التوريث كمبدأ أصلا حتى لو الوريث هيبقى راجل محترم وخبير والبلد محتاجاه وهيحقق نهضة وكل الحاجات دى لأننا لو قبلنا إن الكويس يورثنا فهييجى بكره الخايب يورثنا ومش هنقدر نعترض
فمابالك بقى والوريث حرامى وخايب وضعيف وتافه ومالوش فى الليله أصلا

ربنا يستر ياشغف
ولاد الكلب دول فعلا عارفين إزاى يوصلوا للناس البسيطه
ربنا يستر