Thursday, September 13, 2007

ويأتى رمضان

وتأبى قناة الناس إلا أن تتحفنا ببدعه جديده أعترف أننى لم أتوقعها على الإطلاق ..

نشر فى المصرى اليوم بالأمس هذا الخبر

«الناس» تنظم مزاداً يومياً لمقتنيات الشيوخ.. وتطلق مشروع زواج مجانياً

لم أصدق أن ينقلب الأمر إلى هذه الدرجة وظننت أن فى الموضوع خطأ ما ..

رأيى فى قناة الناس هى أنها تسىء إلى الإسلام بتحويله إلى سلعه جنبا إلى جنب ضمن باقى سلع الفضائيات ..

أغانى أفلام وطبخ وخطب ودين .. وكله بمنطق السوق والزبون دائما على حق ..

بالإضافة طبعا إلى نوع خبيث من الغش بتسويق السلع العادية بأضعاف ثمنها بعد إسباغ الثوب الإسلامى عليها والإيحاء بأن لها "بركة" خاصة وأن شراءها ثواب !!

أما أن يصل الأمر إلى هذا الحد فهذا لم أتوقعه أبدا

متعلقات الشيوخ ؟؟

الكرسى الذى جلس عليه محمد حسين يعقوب ؟؟

أستغفر الله العظيم .. أستغفر الله العظيم

شوية شوية هيعلنوا عن مياه وضوء الشيخ الفلانى للشفاء من الأمرض ..

مااحنا اللى بدعناها من الأول ..

التبرك بالأضرحه وقنديل أم هاشم ومقام الحسين

وآهى القناة الظريفه بتكمّل اللعبه مش أكتر .. سيبك بقى سلفى وللا مش سلفى

وإن كان دلوقتى الفلوس بيقولك لعمل الخير فبكره تبقى لعمل عماره جديده لصاحب القناة وأعوانه من المشايخ الكرام

وممكن يبقوا يخلّوا نص العماره بالتقسيط المريح للشباب المقبلين على الزواج .. وكله فى سبيل الخير يامؤمن

وياترى الكلام ده بيحصل بموافقة مشايخ القناة ومباركتهم وللا بدون علمهم

بما إنى سيىء الظن عادة فأميل إلى الظن أنه بعلمهم وإن لم يكن وكان مازال لدى هؤلاء الشيوخ بعض من الحياء فأتوقع اعتراضا صريحا ومنشورا على هذه المهزلة فمن لم يكن يعلم من قبل فقد علم الآن بعد نشر الخبر فى الجرائد ومعنى صمتهم أنهم موافقون على تحويلهم إلى أصنام جديده وأن تعود بنا قناة الناس إلى جاهلية هم أربابها ..

ورغم أننى أميل إلى السعادة بكشف غطاء جديد عن نوايا القناة الشرهه إلى أموالنا إلا أن الغيظ من هذا الاجتراء غير المسبوق يكاد يطير بصوابى ..

جيمى من ناحية وقناة الناس من التانية .. وطبعا مسلسلات رمضان من باقى النواحى الست

لنا الله يامؤمنين ..

ورمضان كريم رغم أنوفهم جميعا إن شاء الله

ومين عارف جايز على العيد كده نلاقى مبارك وجمال ومحمد حسين يعقوب وسليمان جوده والعادلى ركبوا طيارة واحدة ورايحين يحضروا مؤتمر سرى مع أسيادهم اللى مشغلينهم علشان يقرفونا ويضعفونا -نظرية المؤامرة يعنى- وتقوم الطيارة تقع بيهم وتتحرق فى البحر ورغم كده مايموتوش غير لما ييجى سمك القرش وساعتها نلاقى ممدوح اسماعيل وقع جنبهم من طياره تانيه لوحده من غير ماطيارته تقع وبعدين سمك القرش يقرف ياكلهم ويفضلوا يعوموا لحد مايتعبوا وبعدين يروحوا فى حتة فيها سمك باراكودا وللا اسمه بيرانا باين يقوم برضه يقرف ياكلهم ويشمئز ويرّجع على سمك القرش .. وبعد كده يعوموا تانى لحد مايوصلوا لجذوع أشجار فى وسط البحر ولما يتعلقوا بيها يلاقوها تماسيح رغم إن التماسيح بتبقى فى الأنهار بس وبرضه التماسيح تقرف تبص لهم أصلا .. ويفضلوا يعوموا من غير ماولا واحد فيهم يموت -ماهم ولاد كلب جتتهم منحّسه- لحد مايوصلوا للشط أخيرا فيلاقوا الشعب المصرى واقف مستنيهم بالبلغ والقلل القناوى والقباقيب وهاتك ياضرب م اللى قلبك يحبه لحد مانموّتهم بقى المره دى !!

 

كل سنه وإنتوا طيبين ياجماعه :) 

 


Quote of the Day:

There are two ways to slide easily through life; to believe everything or to doubt everything. Both ways save us from thinking.
--Alfred Korzybski

5 comments:

hazem shalaby said...

كل سنة و انت طيب يا صديقى الدكتور المطرقع ورمضان كريم حلو قوى الموضوع ومعاك فى كل كلمة فيه لان القناة بصراحة مش بالعها ومش عارف الشيخ محمد حسان متورط فيها ازاى بس كله كوم والنهاية كوم نهايو جميلة وحلم كل المواطنين .. خيالك واسع جدا بس ما اعتقدش انها حتحصل لان لسه فيه فى شعبنا الهمام من يطبل و يزمر لهؤلاء الفاسدين ... صديقى ان اللله لا يغير ما بقوم حتى يغيروا ما بأنفسهم واحنا لسه ما اتغيرناش .. تحياتى

شغف said...

ابقى اتغطى كويس يا ليوناردو

لأن غالبا اللي هايحصل إن كل أنواع السمك هأتقرف و تبص باشمئزاز ليهم
و في الآخر
يعوموا لحد ما يوصلوا للشط ، يلاقوا الشعب المصري واقف مستني يتمسح في بركتهم ، لأنهم اتحطوا وسط المخاطر دي كلها ، و نجيوا في الآخر عشان مكشوف عنهم الحجاب


و الحكاية مش ناقصة

في الأول و الآخر

دور على الناس

ناس كتيرة قوي لما بتجي تتكلم بتقول بفخر عن كونها مش بتشوف غير قناة الناس المفروض دلالة على التدين يعني و تقوى الله - و بتتقبل مغالطات كتيرة بصدر رحب ، و مش واخدين بالهم أصلا من مسألة تسليع الدين

بيتهيألي
احنا مش محتاجين نعبر عن السخط بالكتابة في الجرايد أو الفضفضة ع البلوج أو عمل مظاهرات أو باقي الاختيارات / الشر برة و بعيد / ، أعتقد إن النواة الأساسية هيه محاولة نشر الوعي بين اللي حوالينا ، محاولة المناقشة ، و ايضاح المغالطات اللي الناس عايشة فيها ليهم -

زمان الوصل said...

تخيّل إنّى أمّا قلت لواحده زميلتى فى الشغل على موضوع كرسى الشيخ يعقوب ده ماصدّقتش و افتكرت إنّى بافشر من كتر ما بتحبه !!

لدرجة إنّى قلت لها اقرى المصرى اليوم و انتى تشوفى الخبر قالت لى لا مش معقول مش ممكن أصدّق !! حاجه مخيفه فعلا
:(

زمان الوصل said...

على فكره
متابعة البرامج المسائيه فى قناة الناس صعبه جدا
ستجد عينك تترك مقدّم البرنامج و ما يقول و تسرح مع الرسائل المتبادله !!
و أستغرب أن تترك القناه الحبل على الغارب لمحاولات التعارف بين الرجال و النساء و تبادل كلمات تصل لحد الغزل ثم حين يحاول أى طرف إرسال بياناته الشخصيه لإتمام التعارف تتدخّل القناه بتعديل البيانات و حذفها آل يعنى بتحافظ على الأخلاقيات !! طيب و لماذا لا تغلقوا هذا الباب من بدايته ولاّ السبّوبه حلوه و صعب مقاومتها !!

قلم جاف said...

من سوء حظي إني رديت متأخر قوي على البوست دة..

1-فيه حالة من "القداسة" المزعومة بدأ إضفاءها على القناة دي أو غيرها ، فيه ناس أقرب للهووليجانز بيدخلوا على أي واحد يتكلم في المواضيع دي وينزلوا فيه شتيمة وقلة أدب من هنا للصبح ويقولولك إزاي تغلط في القناة اللي أحسن من قنوات العري و....

أ-شيوخ القناة دي في عيونهم زي شيوخ الطرق في عيون الصوفيين .. لا يأتيهم الباطل من بين أيديهم ولا من خلفهم .. والناس دي مبتقتنعش إنهم بيغلطوا سواء في آراءهم أو تصرفاتهم.. فطريقة الشيخ محمد حسنين يعقوب في الدعوة طريقة منتقدة من كل الوجوه ، لكن اللي يحاول يناقشها حيتهزأ .. الراجل مبيغلطش في وجهة نظرهم..

ب-وطبعاً بالتبعية عبد الرشيد اللي دخل شيوخ الجمعية الشرعية لقناة مغمورة في بداية حياتها على طريقة دخول المغول للصين مبيغلطش ، والاف اكس والمؤثرات اللي بيعملها وليد أبو زياد في الهمسات والقبسات والمش عارف إيه إسلامية إسلامية

http://eldeenweldenameet.blogspot.com/2007/11/blog-post_19.html

ج-والاس ام اس مبرر .. (القناة عايزة تكسب .. حتموت م الجوع)..

د-وتيجي تتكلم حيقولولك روتانا وأو تي في .. مالنا بروتانا وميلودي وأو تي في؟ وهل اللي ضج بإتجار الناس وأخواتها بالدين وأكلها لحقوق اللي شغالين فيها وبيع البضائع المضروبة لازم بالضرورة بيتفرج على روطينا وميلوضي وإكس أو تي في..

والله لو الحال كدة نفسي القنوات دي كلها تتقفل بالضبة والمفتاح ، وأنا شخصياً مبيعجبنيش من القنوات دي إلا قناة المجد للقرآن الكريم ، لا حتلاقي فيها يعقوب ولا هووليجانزه ولا جودة المهدي داعية الصوفية على قناة المحور والدائري ولا أي سخام تنظيري مذهبي حنجرجي منفصل عن الناس وسنينهم..

2-على جنب : للدرجة دي سليمان جودة مضايقك؟ أمال لو تسمع عن حمودة اللي قيل عنه إنه بيهاجم إعمار علشان ياخد إعلاناتها؟ أو عن وائل الإبراشي اللي بيتعامل بكل صفاقة مهنية مع محرريه زي ما حصل مع زميلتنا سهير أباظة صاحبة مدونة "كبر دماغك"؟

المنافق مش بس بكلمته ..

وعذراً للإطالة عزيزي ليو..