فى المصرى اليوم النهارده خبر عن فساد المياة المعدنية المنتجة من ثلاث شركات
ويعدد الخبر الدلائل والفحوصات التى تمت بمعرفة معامل وزارة الصحة لإثبات عدم مطابقة زجاجات المياة للمواصفات ..
ويحاور المحرر الدكتور حسين صوفي أبوطالب وكيل وزارة الصحة في الفيوم الذى يحذرنا من تناول هذه المياة لتلوثها بالبكتيريا القولونية !
ويذكر لنا أن الدكتور ممدوح الباهي مدير إدارة الطب الوقائي في مديرية الصحة أصدر قراراته بمصادرة زجاجات امياه المخالفة للمواصفات ..
جميل جدا كل ده ...
....
بس مش ناقص حاجه ؟؟
مش محتاجين كقراء نعرف معلومه بسيطه عن أسماء ال3 شركات دول ؟
طالما شركات تم إثبات عدم مطابقة منتجاتها للمواصفات وكذلك مصادرة الموجود منها فى الأسواق ..إلخ
إيه الدافع بقى لحجب أسماء الثلاث شركات ؟
دفعوا للمحرر ؟ وللا الجريده خايفه لا الشركات ترفع عليها قضية تعويض ؟
ولو الكلام اللى فى الخبر صحيح وإن معامل الصحة أثبتت فساد منتجات الشركات دى يبقى الجريدة تخاف من إيه ؟ وأنا كقارىء هاعرف منين أسامى الشركات دى علشان أقاطع منتجاتها ؟
..
والمشكله إن دى مش أول مره تقابلنى نفس الحكاية ..
خبر عن فساد منتجات شركة للبسكوت مثلا أو العصير أو اللحوم أو .. أو ..
كل ده بدون ذكر اسم الشركه النصابة .. ليه ؟؟ مش فاهم بجد !!
عشان الجرايد مابتحبش تجيب فى سيرة الناس مثلا ؟؟؟
4 comments:
تلاته بالله العظيم كنت أقرأ نفس الخبر من دقائق و أسأل نفسى نفس الأسئله !!
وقلت لنفسى حين لم أجد أسماء الشركات "كسبنا صلاة النبى" !! يعنى بتحرقوا دمّنا ع الفاضى مثلا
وأمّا معندكوش الشجاعه تذكروا أسماء الشركات إيه لزمة الخبر ده !! ملى فراغ مثلا !!
بجد جريدة "المصرى اليوم" دى يوم بعد يوم تنزل من نظرى و أراها لا تختلف فى شئ عن جريدة "الدستور" !! على الأقل "الدستور" من زمان و هبوط مستواها و رداءة ما يكتب بها واضحه للكثيرين بينما حظيت "المصرى اليوم" ببرستيج لا تستحقه لدرجة كلّما استضاف برنامج "العاشره مساء" رئيس تحريرها "مجدى الجلاّد" أسأل نفسى : هو مفيش جرائد مستقلّه فى "مصر" غير بسلامتها !!
صديقى .. جيت اسيب تهنئة بالعيد لقيتك كعادتك ثائر و مشاغب .. ايه يا ريس الجديد فى كده ما هى دى مصر يا دكتور .. كل سنة و انت طيب و عيد سعيد
هو مبدأيا كدة انا ماليش علاقة بالمياه المعدنية نهائى .. العادى الحنفية فى الشتا وكبيرى ماية سقعة من الكولمن ودمتم والحمد لله ان عندنا نيل
بس بردو عندك حق جدا .. وبعدين يعنى هى جات على دى؟؟ ما كله فى البتاع يا أستاذى ومن زمان وهما كدة
حسبنا الله ونعم الوكيل
وكل سنة وحضرتك طيب
الموضوع كالاتي
الجريدة تحطل لك الخبر في الجريدة عن 3 شركات
ال3 شركات عارفين نفسهم
الجريدة احتمال كبير تحط اسامي الشركات الاسبوع اللي بعده
ال3 شركات تقلق على نفسها
تحصل اي مصلحة في الموضوع
او
في مصلحة شغالة بين الجريدة و شركة مياه ما
المصلحة اتقطعت
الجريدة خسرت سبوبة نضيفة
السبوبة ترجع تاني بالخبر الفلة دة
والله اعلم
خبير المصالح بمنطقة العمرانية الغربية
Post a Comment