الخيط الأحمر واللقاء قبل الشتات

 النهارده حابب أجيب مقدمة فيلم حبيته وعجبني جدا وقت ما شفته..

مش هاتكلم كتيرعن الفيلم نفسه ومش هاحرقه.. هو قصته مش جديدة قوي يعني واتعملت في أفلام كتير قديم وجديد وعربي وأجنبي.. الاتنين اللي بيتقابلوا وبيعجبوا ويحبوا بعض وبعدين تفرق بينهم الظروف وكل واحد يرتبط بحد تاني ويكون أسرة، وبعدين يتقابلوا من جديد بالصدفة.. فياترى الحب اللي بينهم هيكون حقيقي وينتصر، وللا نداء الواجب والحفاظ على الأسرة هو اللي هيكسب؟

فزي ما قلت شفنا القصة كتير، بس يمكن الجديد هنا هو إن اللقا في المرتين كان صدفة، والفراق في المرة الأولى كان صدفة، والبطلين بينهم كيمياء وتوافق حلو قوي يخليك تحب تتفرج على الفيلم بس عشان تتفرج عليهم، حتى لو القصة أو الحبكة كان فيها بعض أجزاء مش مريحة..

لكن الأهم بالنسبة لي هو مشهد بداية الفيلم لما شافوا بعض أول مرة.. المشهد ده شفته في مكان ما على الإنترنت مش فاكر فين،تويتة وللا فيديو بظروفها على اليوتيوب وللا فين، غالبا كنت بادور على إيمي واينهاوس وللا حاجة.. المهم إنه شدني لدرجة إني فضلت أدور لحد ما عرفت هو من فيلم إيه وجبت عنوان الفيلم وحملته واتفرجت عليه على طول..

الفيلم نفسه كان حلو بالنسبة لي عشان بيطرح أسئلة كتير عن طبيعة المشاعر والارتباط والقدر والمسؤولية وأسئلة من اللي مالهاش إجابات سليمة على طول الخط دي، بس يفضل أحلى ما في الفيلم بالنسبة لي هو مشهد البداية، وأحلى حاجة فيه هي اختيار أغنية Amy Winehouse ..

مش هاتكلم عن المشهد وأحاول أشرح حاجة.. خلينا نتفرج عليه أفضل، واحتمال أبقى أتكلم عن الفيلم مرة تانية بتفصيل أكتر لأن التناول في الفيلم هنا للقصة كان مثير للجدل شوية برضه..