محمد سعد

 قابلني الفيديو ده معمول على الترند اللي ماشي بقى له كام يوم، فعجبني جدا بصراحة وقلت أحتفظ بيه هنا مع -مع نفسي يعني، بس هنمثل إن فيه جمهور وكده- اكم..

هو الحقيقة معمول حلو قوي واللي عمله مختار المشاهد بالظبط يعني.. برافو

بس أنا كمان حبيته عشان خاطر محمد سعد نفسه، لأني باحبه والفيديو رغم إنه جايب من مشاهد مبالغ فيها أصلا وأداء كاريكاتوري، إلا إن تركيبتها هنا حسيت إنها منصفة بشكل ما للتنوع اللي عمله محمد سعد حتى في مبالغاته..

شخصيا مابحبش أغلب أفلام محمد سعد لأني مبحبش أسلوب المبالغة في التمثيل والأفورة قوي يعني.. رغم إني شايف فيلم اللمبي فيلم محترم جدا وحلو فعلا، بس مبحبش الكاراكتر نفسه، بس حبيت اللي بالي بالك وكمان حبيت "بوحة" جدا.. الباقي ممكن أضحك في مشاهد، لكن مابحبش الكاراكتر غالبا..

بس باحب عادي أشوفه على الشاشة -إلا في دور أطاطا، مقزز بالنسبة لي الحقيقة!- في أي دور بيعمله.. وحتى في أسوأ حاجة زي البتاع اللي عمله مع ياسمين عبدالعزيز مكنتش متضايق قوي يعني..

ولما مثل جد سيكا -أقصد أداء غير هزلي، لكن مش فيلم دراما يعني- في الدشاش، كنت مستلطفه الحقيقة..

أصلا فيه فكرة سيناريو فيلم في دماغي بقى لها كام سنة -كالعادة يعني، بس إن شاء الله أكتبها وهو لسه بيمثل!- جت لي مخصوص عشان محمد سعد.. تخيلته في دور كده، والدور ده جاب فكرة الفيلم وحاسس إنها هتبقى لايقة عليه قوي.. إن شاء الله لما -هأو- أكتبها، هاقدر أوصلها له وتعجبه ويمثلها ويبقى فيلم ناجح بره الكوميديا وبره التراجيديا المبالغ فيها وبره القوالب النمطية. بالمناسبة ماحبيتش دوره في فيلم الكنز.. يمكن لأن الفيلم نفسه حسيته مصطنع وما اندمجتش معاه قوي.. ماباقولش إن أداؤه كان وحش، بس مش واو يعني.. 

احتمال لو كان الفيلم متماسك أكتر وحلو، كان ممكن أحب دوره أكتر، but I guess we'll never know!

عموما، فرصة محمد سعد في الاعتراف بيه كممثل كبير والعودة لتصدر الإيرادات لسه موجودة وبقوة.. يصبر بس على ما أكتب السيناريو وإن شاء الله نكسر الدنيا ^_^