عدّى على أول بوست فى المدونة دى 365 يوم بالتمام والكمال
كان أول بوست لى فى 1 مايو وكانت قصيدة لبيرم التونسى
فالمفروض النهارده أقول حاجه يعنى , سنه مش شويه برضه
مش هاحلل وأقارن وأرغى كتير
بس .. هاقول إن المدونة دى لحد دلوقتى حاجه إيجابيه فى حياتى
وعلى سبيل الاحتفال كان فيه تاج عجبنى فى مدونة مش فاكرها دلوقتى فأخدت الأسئله علشان أبقى أتكلم عنها , لأن الأسئله كانت عن حاجات أنا ناوى أتكلم عنها من زمان وكل الأسئله تقريبا عن المدونة نفسها
ولنبدأ ..
اسم مدونتك...؟
Being Here ..
لماذا اخترته ...ماهى نيتك من اختيار هذا الاسم؟
Being There اخترته على غرار فيلم
تأثرت جدا بهذا الفيلم وبأداء بيتر سيلرز المتفرد ونفسى قوى أتكلم عنه بس بصراحه خايف لأن أى حاجه أكتبها هتبقى سخيفه جدا جنب روعة الفيلم ده وهتبقى نوع من الشخبطه على بوستر الفيلم !
وبما إنى نوعا ما حاسس إنى باتفرج على الدنيا أكتر ما بأشارك فيها لأنى سلبى وماإلى ذلك فلقيت إن عنوان العنوان ده مناسب وبالذات بعد إضافة الوصف البسيط
Like a shadow by your side
والوصف ده كان من أغنية قديمة لساندرا برضه كنت باحبها قوى
فالفكره كانت إن المدونة دى تبقى آرائى وأفكارى كواحد بيتفرج على الدنيا وأحوالنا الغريبة دى من غير مايشارك فى حاجه بالظبط زى الظل .. موجود ومش موجود
حاجات غريبة كده يعنى
هل فكرت فى إغلاق المدونه ..والسبب؟
لا, رغم أنه تنتابنى أحيانا حلات من اللى مالاهش لازمه دى وأبقى حاسس إنى مكشوف قوى فى الحاجه اللى كتبتها ومش لازم حد يقرأ الكلام ده عنى بس برضه مايجيش فى بالى إنى أقفل المدونة
طب كنت بانشرها ليه؟ ماكنت أكتب فى مذكراتى زى ماأنا وخلاص ومش لازم نشر على النت
صورتك فى المدونه ..رمزيتها؟
صورة واحد مكتئب والدنيا ضلمه كده ومش باين حاجه من ملامحه لكن مكتوب فى أعلاها بوضوح إنه سايكو !!
طبعا مافيش رمزية ولا حاجه .. الصوره بتقول بوضوح إنى راجل معقد نفسيا ومحبط وكئيب :D
طبيعة كتابتك فى المدونه بشكل عام...سياسه ...قصه...عبث...كلام فاضى؟
سكلانس ياإكسلانس ..
سمك .. لبن .. تمر هندى
لما الواحد تيجى مرارته تنفقع من حدث سياسى أو مقال متحبش باضطر أكتب هنا بدل مالمراره تروح فطيس
لو طالبه تهييس باقعد أقول أى حاجه حتى لو كانت إزاى تعمل ساندوتش بيض !
بس أغلب كتابتى نقدر نقول عليها إنها ملل وكآبة
حوارات مع نفسى كده عن أفكارى المكرره وملاحظاتى الممله
لماذا دخلت عالم التدوين من الاساس؟
علشان منتدى روايات نت قفل فتره كبيره زمان وماكانش فيه مخرج للملل اللى جوايا غير سكة المدونات اللى كانت ساعتها زى الموضه الجديده
كل الناس بقى لهم مدونات وبيكتبوا .. منهم اللى بيكتبوا كلام ممتع بجد ومنهم اللى بيكتبوا كلام فارغ بجد
إشمعنى أنا ؟
ما أكتب كده زى مالناس دى بتكتب ونشوف كده
وخصوصا إن هنا أقدر أتكلم عن أى حاجه عايز أتكلم عنها بدون رقابة من أى حد مش زى المنتديات
سيبك من الداخلية والحوارات دى
طول ماأنا مامعيش أى وثائق أو أسرار مهمة يبقى مافيش خوف علياّ من أى حاجه أكتبها
اشتم براحتك يامواطن .. الكلاب تعوى والقافلة تسير !
التعليقات بالنسبه لك ..اهميتها؟
اممم .. التعليقات دى بالنسبه لى دايما زى الفزورة
عايزهم ومش عايزهم
عايزهم علشان أحيانا بيبقوا دليل متابعة و-نادرا- دليل اهتمام بما يكتب
رغم إن فيه تعليقات بتثبتنى كده وباتمنى لو ماكنتش اتكتبت خالص زى التعليق اللى كتبته شغف هنا
بس برضه عايزهم لأنى عارف إن فى يوم من الأيام هارد عليهم دول كمان
ومش عايزهم لأنهم دايما بيحطونى تحت ضغط إنى ممكن أكون باكتب علشان اللى هييجى يعلق أو علشان حد ييجى يعلق ..
أنا عايز أكتب لنفسى أولا
لسه مش قد مسئولية إنى أكتب للناس دى
ومش عايز يبقى رأى الناس هو المحرك الأساسى لكتابتى
أفكار غريبة شويه بس أنا سايكو بقى فده الطبيعى بتاعى
احلى بوست كتبته ...ضع اللينك ..ثم اذكر لماذا؟
بما إنى ماباكتبش هنا بالمعنى المفهوم وإنما بافضفض وأرغى فهتكون الإجابة مختلفة شويه وهاجيب أحب بوست كتبته وليس أحلى ..
أنا باحب البوست ده جدا
باحبه ليه ؟
يمكن علشان الصوره !!
فيه كلام تانى عايز أقوله بس مكسّل كالعادة
أبقى أقوله فى عيد ميلاد المدونة التانى بقى إن شاء الله :)
12 comments:
كل سنة وانت طيب
انا كان احتفالي رخم في مارس اللي فات
سبت المدونة شهر من غير مادخلها
:D
عقبال السنة اللي جايه
p.s من ساعة ماكتبتلك التعليق اللي اشرتله وانا باتابع اللي انكتب كله
طب ماتعتبرى إن فيه نوع من الانتقال الزمنى حصل وإن الشهر اللى مادخلتيش فيه المدونة ده اتنقل من مارس اللى فات للشهر ده وتحتفلى بقى بالسنه الأولى لمدونتك :)
شكلك زهقانة من الكتابة أصلا فاقلبيها تفاريح شوية
دردشى شوية ياماما وارغى وفرقعى البلالين
نجاتى مش أحسن مننا فى حاجه علشان يفرقع البلالين دى كلها لوحده :)
وبعدين مين عارف , ممكن السنه الجايه تكون الداخليه وللا مجلس الوزراء قفلوا على موقع بلوجر وورد برس أصلا ومايبقاش فيه سنه تانيه !
الحقى نفسك ياماما واحتفلى ^_^
hahah
تقريبا ده اللي هيحصل
وميبقاش في بلوجز ولا فورمز حتي
مممم
تفاريح؟
مش عارفة بس انا يااما بقيت عاقلة يااما بقيت نكديه.. في حاجة عندي غلط
مطلعش اكتئاب شتا
:P
مش ممكن تكون لعبة البلوجز طولت معايا وبقت ممله
ماتلعبيهاش بلوجز ياماما
العبيها تفاريييييييييييح
شوية مذكرات
شوية تفلسف وتنطيق مخ !
شوية مقالات
العبى ياماما العبى
اعملى مثلا كامبوست كده من غير ماتردى عليهم
وكام بوست تانيين ردى إنتى فيهم وكلمى نفسك :)
عايزه تكتبى بوست نكت أو اكتئاب براحتك
اللحظه اللى باحس فيها بقيمة المدونة بتاعتى دى هى اللحظه اللى باسيب نفسى فيها أكتب أى حاجه مهما كانت تافهه
باحس إن كده المواضيع ماشية سليمه
أنا عامل البلوج ده علشانى مش باهدف منه لأى حاجه تخص حد غيرى
مش عايز شغل أو فلوس من وراه
مش عايز دعاية أو حشد آراء
مش عايز غير إنى أبقى مبسوط فيه وبيه على قد ماأقدر
هى صعبه قوى على إنى أقولك اكتبى حاجه أى كلام لأن بوستاتك قيمة فعلا وشكلها جامد كده بس أهوه
جربى كده شويه ولو ماعجبتكيش البوستات اللى أى كلام ابقى الغيها أى وقت ..
دى مدونتك برضه وإنتى حرّه :)
العبى ياساسو العبى ..
بالمناسبة
البلوج بتاعك مش راضى يفتح معايا
المشكله عندك وللا عندى ؟
لا يا ليو
كنت لغيتة
بس رجع صعب عليا
:)
أحييك على أفكارك
فأنا أحتاج لقراءتها من حين لآخر
وإذا كان يزعجك ردي فسأمتنع دون غضاضة، ولكني شعرت فقط أنك بـحاجة إلى من يشاركك بعض أفكارك (وأنا أيضاً!)ـ
متابع من بعيد
والسلام
حمزة نـمرة
حمزة
واضح إنى -كالعاده- ماباقدرش خالص أوصل أفكارى بصورة سليمه !
أنا أقصد عكس اللى فهمته تماما ..
ردّك بالذات من الردود اللى أسعدتنى خصوصا على البوست ده بالتحديد
لكن من ساعة ماقريته مش قادر أرد عليه لأنى مش عايز أقول أى كلام وخلاص
مسألة الاختلاف والبطولة وجدوى الطموح من المسائل اللى دايما فى دماغى وبتزن على , علشان كده أنا عارف إنى مسيرى هارد فى البوست ده
وكنت باتمنى إنك ماتكتبوش لأنه هيفضل يزن على دماغى لحد ماأقدر أرد
فاهمنى طبعا :)
أنا آسف إن كلامى فى النقطة دى ماكانش واضح من الأول و-طبعا- هابقى سعيد جدا بمتابعتك وبردودك لو اتكرمت على بيها
ساسو
ماكنتش عايز أعلق على الكلمتين دول وأطنشهم ولا كإنك قلتى حاجه على اعتبار إن دى لحظة غريبة كده ومش هتكرر فمافيش داعى إننا نناقشها
وخصوصا إنى كنت ناوى أعايرك شوية باعتبارك متفائلة وكده :)
الظاهر إنى مش مكتئب ولاحاجه وكله استعباط منى
إذا كان المتفائلين اللى زى حالاتك واللى بيصحوا الصبح يبتسموا وشايفين نص الكوباية المليان , لأ وإيه بيحبوا الصيف والشمس !!
كل ده وقفلتى البلوج أو جت الفكره دى على بالك
ده أنا كده ماعنديش دم لما أجيب سيرة الاكتئاب على لسانى :D
أنا لسه برضه مش هاناقش الموضوع معاكى لكن أتمنى إنك تكونى رجعتى البلوج علشانك إنتى
السلام عليكم
:) طبعاً فهمت قصدك من أول مرة، ولكن خشيت أن تكون ردودي من النوع الزنّان، يكفي مافي عقولنا من وش وزن :)
عموماً لا تقلق، سأظل متابعاً ومشاركاً
ولكن استحلفك بالله:
كن كما أنت
كن دائماً ذاك الطفل القابع بين ضلوعك.
لا تدع الدنيا تقتله.
أخيراً أرسل لك هدية مني:
http://www.amrkhaled.net/multimedia/multimedia761.html
أتابع من بعيد
والسلام
حمزة نـمرة
www.amrkhaled.net/multimedia/multimedia761.html
آسف
هديتك أسعدتنى ياحمزة
تانى هدية أفرح بيها فعلا :)
شكرا كتير قوى :)
haha
لا الغاء البلوج مكنش تشاؤم ولا زهق حتي هي بس فكرة ان حاجة خدت وقتها وخلصت
بعد كده صعب عليا ان يبقي لي مكان واسيبة
غير اني مش خسرانة حاجة من وجودة
مش تفاؤل ولا تشاؤم انا في اسعد حالاتي في الصيف بقي والشمس مانت عارف
:)
ولسه بتابع اللي بتكتبة كل يوم قبل مانزل المكتب
اللي اتغير عادة واحده هيا اني اكتب ..واحيانا اني اعلق
بس
لحد مالقي الجديد
Post a Comment