دفتر أحوال

الخبر ده قابلنى النهارده فى المصرى اليوم

إصابة ١٨ في مشاجرة بين قريتين بسبب اغتصاب فتاة

اللى لفت نظرى فى الخبر هو عدم وجود أى ذكر للأمن أو الشرطه غير بعد الخناقة

يعنى فتاة تم اغتصابها وبعدين أهل قريتها خطفوا واحد من قرية اللى اغتصبوها وبعدين راحوا أهل قرية الشاب علشان ينتقموا أو يرجعوه أو أى حاجه فقامت الخناقة الضخمة دى

وساعتها بس ظهر الأمن

!!!!

كنت لسه باتكلم امبارح مع ناس أصحابى عن ظهور حوادث غريبة فى قريتنا ماكانتش بتحصل قبل كده

يعنى ظهور قطاع طرق بيسرقوا الناس على الطريق وبيرموا شجر أو مواسير علشان يجبروا العربيات الملاكى أو التاكسيات إنها تقف

وشوية شباب يخطفوا بنت علشان يغتصبوها -فى قريتنا !!!- وغيرهم طلعوا على واحد وأمه وكانوا عايزين يخطفوا أمه لولا ستر ربنا كانوا قتلوه وخطفوها

ومحاولات سرقة بالإكراه حوالى الساعة 10 بالليل أو 11 فى طريق رئيسى فى البلد

دى حاجات ماكانتش بتحصل فى بلدنا الأول

يادوب كانت السرقة ودى نادر أما كانت تحصل وكانوا بيبقوا ناس من برّه البلد عادة

لكن سرقة بالإكراه ؟

خطف واغتصاب ؟؟؟

وقطاع طريق ؟

 

معظم الناس بتتهم البانجو على اعتبار إن الشباب الصايع بيشربه على القهاوى

وبما إنهم مدمنين وصيع فمابيهمهمش حاجه وممكن يضربوك مطواه أو يغتصبوا واحده أو أى حاجه من البلاوى دى لأنهم مش مقدرين عواقب الفعل ده

ماعندهمش تمييز

ماشيين بالغريزة بس

 

بس إيه اللى خلاهم يصيعوا أصلا ؟

شباب كتير من بلدنا بيدخلوا صنايع علشان مجموهم مابيجيبش ثانوى عام

ودول لما يخلصوا المدرسة غالبا مافيش غير إنهم يدوروا على سفر برّه أو يشتغلوا فى أى مصنع

أجرة المصنع بتبقى أى كلام , لو خد 250 جنيه بيبقى كده لقى فرصة نادرة وأمه داعيه له

العالب بيبقى فى حدود 150 أو 180 جنيه

لو كان صنايعى بقى فى سباكة أو كهرباء أو أى حاجه من دى بيبقى وضع تانى طبعا

لكن الصنايعيه قليلين , الأغلبية مابيبقاش قدامهم غير شغله مالهاش لازمة أو صياعه لحد ماتيجى فرصة سفر , والفرصة دى دلوقتى بقت أسعارها مهووووووولة

وكمان مش مضمونة لأنهم مش طالبين عبيد فى الخليج, جوارى بس

ناس من بلدنا كتير سافروا واتمسكوا ورجعوا قبل حتى مايدخلوا البلد اللى مسافرينها

 

المختصر إن الأحوال هباب والناس بتزيد يوم بعد يوم

والجواز طبعا بقى حلم شبه مستحيل

وكل ده معروف

 

يبقى إيه المبرر إن مايبقاش فى بلدنا غير شوية غفر لابيهشوا ولا بينشوا

طول الليل قاعدين يشربوا شاى ويتسامروا

وإيه الحل ؟

 

بيتهيألى إن الحل ممكن يكون بطريقة واحده بس

إننا نعمل مظاهرة ضد الرئيس وضد التوريث

ساعتها قوات الأمن المركزى هتملا البلد وكل شوية هتنزل حملة تفتش بقى وشغل

وبكده -ومن غير مايقصدوا طبعا- هيبعدوا الحرامية وقطاع الطرق

 أعتقد إن ده بقى الاهتمام الوحيد للداخلية دلوقتى أما سلامة المواطن فمش مشكلة دلوقتى

المصريين دول ناس كده ويقدروا يتصرفوا لوحدهم

....