كنت ناوى أرد على حازم وأعمل تاجين تلاته أو أشكر شغف على تعليقها اللى أفادنى فعلا -كالعاده !- أو حتى أرد على الست المجهولة اللى سابتلى تعليق جميل وصريح -من النوع اللى باحبه- , لكن جه فى دماغى إنى أكتب عن اللى شتمونى وماقدرتش أرد عليهم !
يمكن دى لعبه صغيرة بالعبها مع نفسى لمواجهة بعض الهجوم اللى فى التعليق الصريح علشان أقول لنفسى إنى مظلوم أو ضحية أو على الأقل أستحق التعاطف -طبعا باتكلم عنى مع نفسى مش قصدى حد من زوار مدونتى الكرام - ويمكن لأنه مجرد موضوع ظريف وجه على بالى فقلت أتكلم فى أى حاجه كنوع من التواصل وآهى ذكريات مسيرى هاحكيها فى يوم من الأيام ..
المهم إن أول واحد أفتكره كان واحد زميلى فى المدرسة واحنا فى تالته ثانوى
كان قاعد فى التخته اللى قدامى على طول وفى مره كنا بين حصتين والفصل مافيهوش مدرّس قال لى ياسافل !!!
قالها والمدرس التانى بيدخل الفصل
قالها وهوّه بيبتسم !!
كانت أول مره فى حياتى -وآخر مره لحد دلوقتى على الأقل - اللى حد يشتمنى باللفظ ده
اتصدمت واتغظت جدا لأنى ماقدرتش أضربه لحظتها -بسبب دخول المدرس - لكن عموما فضلت أكرهه لحد دلوقتى
الأخ ده بالذات لىّ معاه مواقف غلسه كتيره وأنا مؤمن بإن روحى وروحه تباغضوا واختلفوا من أول لحظه قابلته فيها بدون سبب مفهوم وإن كنت لاأذكر أبدا إنى شتمته أو آذيته عن عمد .. أى حاجه يعنى تبرر إنه يشتمنى أو يعمل معايا مواقف غلسه, لكن يبدو إنه من النوع الإيجابى اللى يكره بنى آدم فمايكتفيش بكده وخلاص ..
المره التانيه اللى اتشتمت فيها كان راجل كبير فى السن ..
كنت باتمشى أنا وأصحابى عند أطراف البلد .. وكنا متأخر بعد نُص الليل وكنا عند مبنى كده بتاع مهندس رى أو مهندس زراعه أو أى حاجه من الحاجات دى ..
المبنى ده كان له مساحه فاضيه كده وسور منخفض شوية .. فكنا بنهزر مع واحد صاحبنا واستخبيت أنا ورا السور علشان أى لعبه كنا بنلعبها .. مش فاكر بالظبط
المهم لقيت راجل طلع فى شباك الدور التانى من المبنى ده وهوّه بيزعق وبيطردنا
السور بعيد عن المبنى والمبنى نفسه له بوابه مقفوله ومافيش حاجه فى السور تتسرق وماكانش صوتنا عالى ..
وطبعا بدأ يشتم فورا بدون أى محاوله للتساؤل أو الاستفسار أو التمهيد حتى
ياكلب .. دى تحديدا اللى فاكرها .. ممكن يكون قال كمان ياوسخ أو يابن الكلب مش فاكر
المهم إنى برضه اتصدمت جدا .. مش متعوّد أبدا إن حد يشتمنى
حاولت أتكلم معاه بهدوء علشان يبطل شتيمه على الأقل لكن الظاهر إنه كان خايف وفى حالة فزع
ده المبرر الوحيد للحاله العصبيه اللى كان بيشتم بيها دى
اتغظت جدا جدا برضه بسبب الإهانات اللى من غير ذنب دى لكن ماقدرتش أعمل حاجه
المره التالته اللى اتشتمت فيها كانت من واحده ست كبيره
مش هاقدر أتكلم عن المره دى بالتفصيل للأسف لكن الست دى أنا باكرهها من زمان
وشتمتنى من غير ماأغلط فيها أو أعمل أى حاجه تضايقها
لكن ممكن نقول إنها خدتنى بذنب غيرى .. وحتى دى كمان أنا مش متأكد منها -إن يكون غيرى أذنب أصلا-
أعتقد إنها من النوع المفترى اللى عايز الدنيا تمشى على مزاجه وتبع إرادته ومصلحته بس وإلا يبقى الناس كلها واطيين وزبالة ويستاهلوا طبعا الشتيمه والتهزيئ لحد مايسمعوا الكلام ..
ممكن أتكلم عنها بصراحه فى يوم من الأيام لما أنضج أكتر من كده شوية وماأخافش من إنى أقول للغوله إنها غوله
هاتبسط من نفسى جدا لما أعبر عن رأيى السلبى فى الناس بصراحة .. طبعا مع الناس الوحشه بجد اللى تستاهل الكراهية فعلا ... مين عارف يمكن أقدر أعمل كده ولو مرّه قبل ماأموت
دى المرات اللى أفتكر إنى اتشتمت فيها -طبعا غير المرات لما أمى كانت تزعّق لى على حاجه غلط عملتها :) - ...
كان فيه مرتين اتحطيت فى موقف مهين نسبيا من جانب الشرطه لكن كانت تحرش بس مش إهانة بالمعنى المغهوم
فرد عضلات لأنه عارف إنى مش هاقدر أعمل معاه حاجه
لكن على الأقل ماحدش غلط فىّ فى المرتين بإهانه أو سباب الحمد لله
يمكن لأنى فى كلية الطب وشكلى ابن ناس !!
أهى فايدة للكلية الظريفه دى اللى الناس بيحسدونا عليها على رأى المجهولة صاحبة التعليق الصريح :)
Quote of the Day:
Not all chemicals are bad. Without chemicals such as hydrogen and oxygen, for example, there would be no way to make water, a vital ingredient in beer.
--Dave Barry
