أول مره أسمع عنه النهارده فى مقال محمد البرغوثى فى المصرى اليوم
ولما دوّرت فى جوجل لقيت الحوار ده معاه فى المصرى اليوم برضه
ولقيت هجومه المباشر على الفساد
وهنا بيحكى عن صناعة الدواء فى مصر بالتفصيل ..
ولقيت كمان مقال مهم لد. رؤوف عباس بيستشهد فيه بكلام رؤوف حامد وغيره عن خراب مصر
والأهم من ده كله إنى لقيت
موقع حملة التضامن مع د. رؤوف حامد
بصراحة أنا مش متفائل قوى بنتيجة حملة زى دى
الفساد مش هيتحارب كده ..
أنا مؤمن بإن مافيش وسيله سلميه تخلّصنا من اللى احنا فيه ده.
لكن حمله زى دى هى أضعف الإيمان دلوقتى .
وإن ماكانش التضامن مع الدكتور رؤوف هيسحب قرار الوزير أو هيقلل الفساد أهوه على الأقل هيخفف عن د. رؤوف نفسه ولو على سبيل الدعم المعنوى.
إننا نوصّل له رساله إننا عارفين قيمتك وإننا معاك ..
على الأقل مؤقتا لحد مانلاقى وسيله تانيه فعاله نقدر نساعده ونساعد نفسنا بيها ..
3 comments:
ربنا معاه..ومع كتير غيره محترمين مش ليهم مكان في بلد عصابة الأربعين حرامي
مدونتك جميلة ومحترمة..والموسيقي جميلة..سرقتها بعد إذنك وبسمعها :)
هبقي أتواجد أكتر بعد الأمتحانات
تحياتي
ايه يا عم ليوناردو
فينك كده المدة دي كلها ؟
ظروف امتحانات و لا غيره و لا ايه ؟
مش معقول كده
ده اسمه اهمال ... فوضى ... عدم مسؤلية :)
ابقى اظهر أو فوت خبر انك لسه على قيد الحياة :)
ضياء
سعيد بتشريفك لمدونتى وآسف على التأخير فى الرد بس أنا ساعات باقفل كده من المدونة وأسيبها كتيييييييييير !
أما الموسيقى فهى من الساوند تراك بتاع فيلم Pan's Labyrinth
وباخمن طالما إنت ماعرفتش الموسيقى من أول مره إنك ماشفتش الفيلم لسه ..
واقتراحى ونصيحتى ورجائى ليك -بعنف :)- إنك تشوف الفيلم ده فورا
أتمنى إن يكون ربنا وفقك فى امتحاناتك وادعيلى أنا بقى فى امتحاناتى
شغف هانم :)
هو بخلاف إنها قلة ذوق -ويمكن أدب كمان- منى إنى أقعد الفتره دى كلها من غير ماأرد على التعليقات لكن كانت كل الأسباب مع بعض
قفله كده من نوبات الكسل بتاعتى
امتحانات شغاله بقى لها شهر ولسه لها كمان شهرين
وشوية مشاكل من اللى بتخنق لأنها بدون داعى أساسا غير إن حلها واضح ومعروف لكن ماتفهميش كده إيه اللى بيحصل يخلى الناس عايزه حرق دم ع الفاضى
مش كفاية الريس والحكومة والنكد اللى بينكدوه علينا , لازم ننكد على نفسنا كمان ؟
بس ماعلينا ...
أنا باحاول أنفّض دماغى علشان الامتحانات أهم
وبإذن الله ما أقطعش كتير كده تانى
Post a Comment