الليلة الكبيرة

رفعت الأوبريت المُصوّر على هذا الرابط لمن يريد

ولمن يريد أن يقرأ ويترحّم على صلاح جاهين وسيد مكاوى هاهى الكلمات

 

الليلة الكبيرة

 

بنات: قبة سيدنا الولى دول نوروها

محلا البيارق والناس بيزوروها

قبة سيدنا الولى فى الجو عاليه

محلا البيارق لما دوروها

بائع: حمص حمص

تل ما ينقص

ع النار يرقص

يرقص يرقص.

ويقول:

اللى شاف حمص ولا كلش

حب واتلوع ولا طالش

فتاة: يسترك هات حبة بقرش

الجميع: ها ها ها ها ها ها ها !

بائع: فريرة للعيل .. يابو العيال ميل .. خد لك سبع فرارير

آخر: زمارة شخليلة .. عصفورة يا حليلة .. طراطير ياواد طراطير

الجميع: طراطير طراطير طراطير

شحاذ: يا مسلمين يا مؤمنين لله

ده كل مين يفعل جميل يلقاه

شحاذ:بركة ولى له فى الشفاعه جاه

لله .. لله .. لله ..

المعلن: الليلة الليلة السيرك تعالوا دى فرجة تساوى جنيه قولوا هيه

بمناسبة هذا المولد يوجد برنامج سواريه قولوا هيه

فى السيرك شجيع يهجم ع السبع ويركب دغرى عليه قولوا هيه

وبنات قمرات زى الشربات حلوين مش عارف ليه قولوا هيه

الجميع: الله حى .. الله حى

المنشد: شفت ف منام صاحب المقام ده أبهه

الجميع: الله حى

المنشد: ويمامه حايمه عليه تسبح ربها

الجميع: الله حى

المنشد: ميلت فوق يده وجيت أحبها

الجميع: الله حى

المنشد: صحونى م النوم خدت بعضى وتنى جى

الجميع: الله حى .. الله حى ..

لاعب البخت: فتح عينك .. تاكل ملبن

فينك فينك .. تاكل ملبن

أوع لجيبك .. لا العيب عيبك

قرب جرب .. تاكل ملبن

نشن .. وسطن إيدك

وسطن .. إضرب ..

البندقية: طاخ ......

اللاعب: يحميك يابنى تبقى غالبنى

قرب خد لك حتة ملبن

نداءات: طعميه . أراجوز . عجميه باللوز

الجميع: ى الليلة الكبيرة يا عمى والعالم كتيره

ماليين الشوادر يابا م الريف والبنادر

دول فلاحين .. ودول صعايده

دول م الكنال .. ودول رشايده

دى الليلة الكبيرة يا عمى والعالم كتيره

عجوز: إسعى .. إسعى .. إسعى .. إسعى

مصوراتى: خدلك صورة سته ف تسعه

العجوز: إسعى .. إسعى .. إسعى .. إسعى

قهوجى: ياسى عجوره .. النار خسعه

فلاح: ناس من بلدنا هناك أهم

روح يابراهيم انده لهم

.. "يتعانقون"

سلامات سلامات سلامات

سلامات ع البلديات

فلاح: دى الحضرة والذكر انجلى

يالله بنا نذكر ياوله

المدرب: أنا شجيع السيما

أبو شنب بريمه

أول ما أقول "عالى هب"

واصرخ لى صرخة

السبع يتكهرب

ويبقى فرخة

حالا بالا سأصارع

أسد إنما إيه .. متوحش

وح اخلى وجهه شوارع

تسقيفه ياناس مايصحش

أهه جاه .. أهه جه

تسقيفه بأه

تسقيفه امال

تشجيعه امال

بائع: السمك مقلى

كل وبرق لى

صنف زى الفل

بائع:استخار واختار

فشة أو ممبار

يالله سمى وكل

نساء: يام المطاهر

رشى الملح سبع مرات

فى مقامه الطاهر

خشى وقيدى سبع شمعات

أطفال: ياعريس ياصغير

علقة تفوت ولا حد يموت

لابس ومغير

وح تشرب مرقة كتكوت

المعلم: بالذمة ده سابع عيل

مزفوف من وقت قليل

القهوجى: مولد شيللاه يامعلم

عقبال أولادك

المعلم: كلم..

نداءات: واحد مضبوط

واتنين مصرى

القهوجى: ع النار حاضر جاى لك دغرى

مسا التماسى مسا التماسى

ياورد قاعد على الكراسى

نداءات: هات شاى يا دقدق

القهوجى: عينى وراسى

"يدخل الريس حنتيرة مغنى القهوة الصعيدى"

الجميع: سمعنا ياريس حنتيرة

للصبح معاك السهيرة

سمعنا … سمعنا

المغنى: يا غزال ياغزال

ده العشق حلال

دوبتنى .. دوب

خلتنى خيال

يا شفتك فص فراولة

وأنا لا قوة ولا حوله

شقلبتلى عقلى علاولة

ياغزال .. ياغزال

يا رب ياعالم بالحال

تهدى حبيبى ويصبح عال

وأغنى وأرقع بالموال

وأقول يا غزال

المعلم: وقف ياريس حنتيرة

فيه ناس هنا قاعدة كتيره

ولاحد قال هات تعميره

ولا واحد شاى

اللى ح يطلب راح يقعد

واللى ما يطلبشى يبعد

زبون: ياللا بنا نخرج يا مسعد

شارع الترماى

الآخر: أوعد يا رب أوعد

آدى كمان قهوة

الأول: ياللا بنا يامسعد

ندخل على سهوه

الغازية: طار فى الهوا شاشى

وانت ماتدراشى

طرفه شاورلى عليك

حكم الهوا ماشى

هوا العصارى ياواد

على سطح دارى .. ياواد

خدنى ورمانى عليك

ولا أنت دارى

آهين يا نارى .. آهين

منك يا جارى .. آهين

خدنى ورمانى عليك

هوا العصارى

صاحب القهوة: اللى ح يطلب راح يقعد

واللى ما يطلبشى يبعد

الزبون: ياللا بنا نخرج يامسعد

شارع الترماى

"لعبة زق الطارة"

صاحب اللعبة: ورينا القوه .. يابنى انت وهو

مين عنده مروه .. وعامللى فتوه

يقدر بقداره على زق الطاره

ويفرقع بمبه ؟

شاب: وسع .. وسع .. وسع .. وسع ..

أنا ازق الطاره واضرب ميت بمبه

دنا الاسطى عماره من درب شكمبه

صيتى من القلعة لسويقة اللالا

أنا واخد السمعه

الجميع: طب يالله تعالى

الشاب: لا ياعم سعيده .. دى البدله جديده

الجميع: هاها هأ سعيده .. يابو بدله جديده

سيده: ياولاد الحلال

بنت تايهه طول كده

رجلها الشمال

فيها خلخال زى ده

رجل: زحمه ياولداه

كام عيل تاه

بائع: فريره للعيل

الجميع: دى الليلة الكبيرة ياعمى والعالم كتيره

ماليين الشوادر يابا م الريف والبنادر..

 

القصيده منقوله من هذا الموضوع مع خالص الشكر ل عبدالله

لصّاً أو نصف نبيّ ..

لم أحب قصيده لأمل دنقل مثل هذه رغم إعجابى العنيف بمعظم قصائده ..

 

 

من أوراق ابو نواس

 

(الورقة الأولى)

 

"ملِكٌ أم كتابهْ?"

صاحَ بي صاحبي وهو يُلْقى يدرهمهِ في الهَواءْ

ثم يَلْقُفُهُ..

(خَارَجيْن من الدرسِ كُنّا.. وحبْرُ الطفْولةِ فوقَ الرداءْ

والعصافيرُ تمرقُ عبرَ البيوت,

وتهبطُ فوق النخيلِ البعيدْ!)

"ملِك أم كتابه?"

صاح بي.. فانتبهتُ, ورفَّتْ ذُبابه

حولَ عينيْنِ لامِعتيْنِ..!

فقلتْ: "الكِتابهْ"

... فَتَحَ اليدَ مبتَسِماً; كانَ وجهُ المليكِ السَّعيدْ

باسماً في مهابه!

***

"ملِكٌ أم كتابة?"

صحتُ فيهِ بدوري..

فرفرفَ في مقلتيهِ الصِّبا والنجابه

وأجابَ: "الملِكْ"

(دون أن يتلعثَمَ.. أو يرتبكْ!)

وفتحتُ يدي..

كانَ نقشُ الكتابه

بارزاً في صَلابه!

دارتِ الأرضُ دورتَها..

حَمَلَتْنا الشَّواديفُ من هدأةِ النهرِ

ألقتْ بنا في جداولِ أرضِ الغرابه

نتفرَّقُ بينَ حقولِ الأسى.. وحقولِ الصبابه.

قطرتيْنِ; التقينا على سُلَّم القَصرِ..

ذاتَ مَساءٍ وحيدْ

كنتُ فيهِ: نديمَ الرشِيد!

بينما صاحبي.. يتولى الحِجابه!!

 

(الورقة الثانية)

 

من يملكُ العملةَ

يُمسكُ بالوجهيْن!

والفقراءُ: بَيْنَ.. بيْنْ!

 

(الورقة الثالثة)

 

نائماً كنتُ جانبَه; وسمعتُ الحرسْ

يوقظون أبي!..

- خارجيٌّ?.

- أنا.. ?!

- مارقٌ?

- منْ? أنا!!

صرخَ الطفلُ في صدر أمّي..

(وأمّيَ محلولةُ الشَّعر واقفةٌ.. في ملابِسها المنزليه)

- إخرَسوا

واختبأنا وراءَ الجدارِ,

- إخرَسوا

وتسللَ في الحلقِ خيطٌ من الدمِ.

(كان أبي يُمسكُ الجرحَ,

يمسكُ قامته.. ومَهابَتَه العائليه!)

- يا أبي

- اخرسوا

وتواريتُ في ثوب أمِّيَ,

والطِّفلُ في صدرها ما نَبَسْ

ومَضوا بأبي

تاركين لنا اليُتم.. متَّشِحاً بالخرَس!!

 

(الورقة الرابعة)

 

أيها الشِعرُ.. يا أيُها الفَرحُ. المُخْتَلَسْ!!

(كلُّ ما كنتُ أكتبُ في هذهِ الصفحةِ الوَرَقيّه

صادرته العَسسْ!!)

 

(الورقة الخامسة)

 

... وأمّي خادمةٌ فارسيَّه

يَتَنَاقَلُ سادتُها قهوةَ الجِنسِ وهي تدير الحَطبْ

يتبادلُ سادتُها النظراتِ لأردافِها..

عندما تَنْحني لتُضيءَ اللَّهبْ

يتندَّر سادتُها الطيِّبون بلهجتِها الأعجميَّه!

نائماً كنتُ جانبَها, ورأيتُ ملاكَ القُدُسْ

ينحني, ويُرَبِّتَ وجنَتَها

وتراخى الذراعانِ عني قليلاً

قليلا..

وسارتْ بقلبي قُشَعْريرةُ الصمتِ:

- أمِّي;

وعادَ لي الصوتُ!

- أمِّي;

وجاوبني الموتُ!

- أمِّي;

وعانقتُها.. وبكيتْ!

وغامَ بي الدَّمعُ حتى احتَبَسْ!!

 

(الورقة السادسة)

 

لا تسألْني إن كانَ القُرآنْ

مخلوقاً.. أو أزَليّ.

بل سَلْني إن كان السُّلطانْ

لِصّاً.. أو نصفَ نبيّ!!

 

(الورقة السابعة)

 

كنتُ في كَرْبلاءْ

قال لي الشيخُ إن الحُسينْ

ماتَ من أجلِ جرعةِ ماءْ!

وتساءلتُ

كيف السيوفُ استباحتْ بني الأكرمينْ

فأجابَ الذي بصَّرتْه السَّماءْ:

إنه الذَّهبُ المتلألىءُ: في كلِّ عينْ.

إن تكُن كلماتُ الحسينْ..

وسُيوفُ الحُسينْ..

وجَلالُ الحُسينْ..

سَقَطَتْ دون أن تُنقذ الحقَّ من ذهبِ الأمراءْ?

أفتقدرُ أن تنقذ الحقَّ ثرثرةُ الشُّعراء?

والفراتُ لسانٌ من الدمِ لا يجدُ الشَّفتينْ?!

***

ماتَ من أجل جرعة ماءْ!

فاسقني يا غُلام.. صباحَ مساء

اسقِني يا غُلام..

علَّني بالمُدام..

أتناسى الدّماءْ!!

 

نقلت القصيده من هذه الصفحة

وشويّة كمان

يبدو أننى بحاجه إلى العوده لتناول مضادات الاكتئاب ثانية أو الكفّ عن السهر !!

لم تمرّ على هذه الساعه طوال الفترة السابقه وأنا متيقظّ إلا وهاجمنى الشعور بالكتئاب مع استثناءات نادره ..

لماذا؟

لاأدرى ..

ابتعدت عن القراءة ثانية -أعنى قراءة الكتب طبعا فالجرائد والمجلات ليست قراءة بالمعنى المفهوم وإنما هى متابعه أو تصفّح- ولم أشاهد أفلاما منذ مدّه طويله

هناك عنكبوت جديد جوار مكتبتى ...

أراه الآن بالذات وهو ينسج بيته على بعد متر واحد فقط عن موضع نومى .. وعلى ارتفاع عشر بوصات بالضبط من صفّ الكتب الذى يجاور المكتبة

لن أهدم بيته لكنى أعرف أنه سيزول

أعرف أيضا أنه لن يجد طعاما فى مكانه هذا

فنادرا ماتفلت الذبابات إلى حجرتى والعناكب لاتأكل البعوض ,فمن أين سيأتى بالحشرات ؟

لن أقلق بصدد هذه النقطة كثيرا فالأرزاق على الله ..

لن أذهب للكلية اليوم غالبا رغم أننى لن أنام

 

 

لماذا يكتب الإنسان منا فى بلوج كهذا؟

بحثا عن الناس أم خوفا من الناس واتقاءا لهم؟

لماذا أنشر ماأعرف أنه لن يفيد؟

إن كان بغرض التنفيس فلماذا لاأفعل هذا فى مذكراتى الورقيه التى كنت أحرص عليها , أو حتى فى ملف تكست على القرص الصلب بجهازى؟

بحثا عن المشاركة المعنويه؟ عن الإعجاب ؟

ككامل الشناوى الذى أراد شراء الحب بالدموع

ولم يبع له أحد !!

لماذا أهتم بعدد زوار موقعى أصلا؟

هل أبيع هنا سلعة معيّنه ويهمنى عدد المتفرّجين أو المشترين؟

هل أعرض نفسى للتقييم؟

هل أكون نخاسا لذاتى؟ وهل يمكن هذا أصلا؟

أن أبيع روحى للشيطان , أو كيانى للفضوليين؟

 

 

لحظة هدوء ..

 

ربما تكون المسألة أبسط من هذا بكثير ..

 

بعض النوم .. الاسترخاء ..الطعام , وتنتهى -كالعادة- هذه الأفكار بدون الحاجه لمضادات الاكتئاب

" مع الأسف يابا ..الدنيا دى غابة

مالناش مكان فيها "

طب إيه بقى المشكله؟

احمد ربّنا إنك لسّه عايش وعندك نت وكتب وأفلام وفيه ناس بتحبك -مش مهم ليه أو إزاى - وعيش اليومين اللى ليك فى الدنيا وإنت مستمتع

شيل العداد اللى على جنب ده

اممم

وشيل كمان الكومنت بوكس

 

وعيش أيامك

بس طبعا بعيد عن مصطفى محرّم ونور الشريف !

أكدب عليك

 

ماأعرفش كلمات مين

ومش متأكد إن كانت ألحان بليغ وللا لأ !!

المهم , الأغنيه موجوده هنا

يومية

قاعد دلوقتى فى حاله بتتكرر معايا كتير جدا

المفروض أنام علشان ورايا كليّه الصبح ,لكن باقاوم النوم بعنف !  مش فاهم ليه؟

غالبا لما بيكون ورايا ميعاد أو سفر أو .. أو.. بلاقينى باقاوم النوم رغم إنى بابقى مُرهق ومحتاج أنام

وبتبقى دماغى شغّاله بقى فى كل حاجه ونفسى أعمل كل حاجه ودايما باكسّل أعمل حاجه ..

النهارده بقى قلت أجدّد .. أكتب هنا كل اللى فى دماغى من باب التنفيس

فيلم الكرنك شغّال دلوقتى على سينما 1 ..

على أبوشادى هاجم صُناع الفيلم بعنف لأنهم -فى نظره- هاجموا التجربه الناصريه بطريقه غير موضوعيه وركّزوا على السلبيات بعدسه مكبّره إدّتها أكتر من حجمها وفى نفس الوقت ماجابوش أى حاجه إيجابيه من اللى عملها عبدالناصر..

وسامى السلامونى اقشعّر بدنه لما شاف الفيلم لأنه عارف إن ده كان بيحصل فعلا وشايف إنه مش من التجنى على عبدالناصر ولاالتجربه الناصريه إننا نعرض الكوارث دى وخصوصا واحنا عارفين إنها كانت بتحصل فعلا وأكتر من كده كمان

وأنا مع سامى السلامونى ..

ومع إننا نعمل كمان ييجى ألف كرنك على المآسى اللى بتحصل دلوقتى واللى أبشع من اللى فى الفيلم مليون مرّه

طبيعى أبو شادى مش هايهاجم الأفلام دى ساعتها باعتبار إنها بتغض البصر عن إيجابيات عصر مبارك وبتركّز على السلبيات , لأنه إذا كان عبدالناصر عمل شوية حاجات كويّسه خلّت أبوشادى ناصرى فمبارك عمل فى الشعب كله حاجات مش كويسّّه خلّتنا نلعن سنسفيل جدود اللى جابوه

بالمناسبه ومن باب التسجيل . أبو شادى هو اللى خلانى أحب حاجه اسمها النقد السينمائى لما قريت كتابه "كلاسيكيات السينما العربيه" والسلامونى خلانى أندم إنى ماشتريتش مجلة الإذاعه والتليفزيون لما كان بيكتب فيها لأنى للأسف عرفته متأخر جدا جدا عن طريق أعماله الكامله اللى نشرتها وزارة الثقافه فى 4 أجزاء

على ال mbc2 فيلم سبايدر مان

وبالذات المشهد اللى بيواجه الشرير فيه سبايدرمان بالحقيقه المرّه وهى إن الناس يهمها تشوف البطل وهو بيتهزم أكتر مايثير اهتمامها انتصاراته المتتاليه على قوى الشر

وفى مشهد الكوبرى بتقف الناس مع سبايدر مان وبيحدّفوا الشرير بقزازات المياة والطماطم

وفى الجزء التانى من الفيلم الناس بتقف كلها ويحموا سبايدرمان بأجسادهم وحياتهم

بصراحه مش مقتنع!!

بيتهيألى إن منطق شرير الفيلم هو الأكثر واقعيه

الناس مابتبقاش نواياهم سليمه وبيقفوا فعلا جنب الخير بعنف وحتى على سبيل حياتهم غير فى الأفلام بس

الناس فى الغالب أنانيين وهمّهم مصالحهم الخاصه مهما بلغ تحضّرهم أو مستواهم

اتفرّج على الناس فى أى كارثه طبيعيه أو صناعيه-حريق مثلا أو انهيار بيت أو عماره- هتلاقى الناس بتدوس فوق بعض

وفى كام حادثه بيبقى عدد الضحايا نتيجة الحادث نفسه أقل بكتير من عدد الضحايا نتيجة التدافع والهياج

صحيح فيه ناس مابتدوّرش على مصالحها الخاصة ولسّه الخير فيهم بس دايما أقليه وأقليه جدا جدا كمان

على قناة ميلودى بقى -ماأنا مركّب كارت تليفزين فى الكمبيوتر !!- فيلم المشبوه لسعاد حسنى الله يرحمها وعادل إمام ..

كنت باحب الفيلم ده قوى وأنا صغيّر

بالذات المشهد الأخير لما فاروق الفيشاوى يقف فى صف عادل إمام ضدّ الحراميه :)

ولما كبرت بقيت أحبه أكتر وأكتر علشان سعاد حسنى

على دريم فيه أغنية صوتك أرق من النايات بتاع مُنير وللأسف فكّرتنى الأغنيه دى بأغنيته اللى عملها أيام انتخابات الرئاسه واللى بصراحه شدّتنى جامد من منير

حاجه ماقدرتش أفهمها ..

ليه منير ينافق مبارك؟

لييييييييييييييييييييييييه؟

بعد العمر ده كلّه والتراث الغنائى اللى حفر فى الصخر على مانحته بإيديه وسنانه

يرمى على ده كلّه تراب ليه؟

لسّه لنا لسّه عبور تانى يامنير؟

ياترى ممكن يكون منير مقتنع فعلا بمبارك؟

ممكن يكون الفاجومى مقتنع بجمال؟

لو كده يبقى لأ !!

مش دول اللى حبيتهم

لأن فى الظلم مافيش رأى واقتناع وحرية اعتقاد

مافيش واحد يقف جنب الظالم ويقول لى أصل أنا مقتنع برأيه وبكلامه

لأ , ده ظالم وإنت وإن كنت مش هتساعده فهتبقى واقف جنبه ووقوفك ده بيشجّعه يظلم زياده

وللا مثلا يكونوا ماسكين على منير ذلّه ويايعمل أغنيه لمبارك يايحطّوا السيخ المحمى فى صرصور ودنه؟

ممكن برضه

نزلت إعلان سبايدرمان الجزء التالت ولسّه شايفه حالا

شكله هيبقى من النوع اللى باحبه

صراع نفسى شويه بين الخير والشر جوّاك وقوى النور والظلام والحوارات دى

صحيح إنه غالبا هيبقى سطحى بس مش مشكله , ماأنا نفسى سطحى  ^_^

قريت النهارده فى جريدة العربى صحيح مقال للكاتب ناصر أبو طاحون بيقول فيه بالنص " صدام حسين رفض أن يقايض على حياته بالعراق وبدا فى محبسه أكثر قوّة فى اتخاذ القرار من آخرين مازالوا على العروش يرتجفون. لذلك مهما كانت النهاية فسيبقى صدام حسين فى قلوب كل أبناء الأمة بطلا تاريخيا رفض الدخول من الباب الاسرائيلى"

ده كلام الراجل كلمه كلمه .. كان نفسى أقدر أحلل موقفه وموقف بكرى وموقف رجل الشارع العادى

واعتبارهم طاغيه ومجرم وسفاك دماء بطل قومى للعروبه وللإسلام زى ماقالت "شغف" بس بصراحه أنا مش فاهم العقليه دى

يعنى لو قلنا إن الصحفيين بيقبضوا تمن مواقفهم وللا كتابتهم دى -مجرد افتراض ولاأقصد ناصر أو البكرى فأنا لاأعلم عنهم شيئا سوى ماقرأته لهم- طيب رجل الشارع ده يمشى وراهم ليه؟

معلومات كاذبه؟ منين؟ ده أغلب الصحف فضحت مجازر صدام وعمايله من أيام حرب الكويت

((( عادل إمام فى فيلم المشبوه لسّه راجع حالا من الكعب الداير علشان يلاقى سعاد حسنى اشتغلت رقاصه فى غيابه :) ظريفه أوى أفلامنا دى والله ))))

طيب لمجرد إنه ضد أمريكا ولو شكليا ؟

ده أمريكا هى اللى قلبت عليه ياجماعه مش هو اللى استغنى وقال لأ

وحتى لو كان هو اتنحرر وقال لأ -وده ماحصلش- ده مايبرّرش أى حاجه

يعنى أظلم وأسرق وأقتل وأضرب بس أعارض واحد ظالم تانى بس أكبر شويه أبقى خلاص؟

مش فاهم :(

فيه فيلم تانى على دريم أول مرّه أشوفه

شايف طياره والكابتن بتاعها محمد عوض !!

ومساعد الطيار نجاح الموجى الله يرحمهم الاتنين

والمضيفه سعاد نصر :)

رغم إن الفيلم -أكيد- هيبقى مستواه مُحبط بس أنا باحب الناس دول -خصوصا الموجى وسعاد- و...

ده معاهم أحمد بدير كمان فى الفيلم ؟؟؟ وطالع فيه دكتور جرّاح !!!!!!!

ولسّه مضحّى بالجنين علشان الأم تعيش وطالع من أوضة العمليات :)

شكل الفيلم ده هيبقى نكته ...

احم ..

الأم المريضه طلعت كلبه , وهو طلع دكتور بيطرى :) :) :)

هاروح أتفرّج ع الفيلم ده وأقتل أفكارى دى بساندوتش وللا اتنين ^_^

فانتازيا

 

 

 

 

تبدأ الأولى بالزئير ..

 

أرانى أزأر فى وجوه الناس

دوىّ الزئير هائل يرجّ البيوت من حولى

صدرى يتمزّق من عنف زئيرى والناس يعدون مرتعبين

أطاردهم ممزّقا كل من تطوله يداى ..

يتناثرون من حولى

وفجأة يكفّون عن الهرب

تتعالى ضحكات الأطفال الهازئه..

أجدنى وسط ساحة واسعه ذات أسوار عاليه

ينتفض الغضب فى صدرى مممزقا حبال حنجرتى ..لكنّهم لايعبئون

تتساقط علىّ ضحكاتهم من كلّ صوب

تهوى علىّ حجارتهم

....

....

وأموت

 

 

أرى فى الثانيه حساماً ذا نصل قاطع ..

من الخصر .. بضربةٍ واحدة وبسلاسه فائقه

يشقّنى نصفين 

لا ألم

ولا دماء

يتلاشى نصفى الأسفل..

وأزحف بالنصف العلوى بهدوء وبطء

لاأعلم إلى أين ..

ولاأهتم

فقط.. أواصل الزحف

 

 

أشعر بالنشوة

أتعملق ..

تعلو هامتى وسط الجبال مناطحةً الغيوم

تغطّينى دروع لاتخترق

أمتشق سيفى وأمزّق به الهواء

تتمزّق الرياح من حولى

ويلٌ لمن يعادينى

وكحلم بعيد المنال أرى الأعداء فى الأفق

اجتاحتنى نشوة الأعضاء الممزّقه التى ستتناثر ..ولكن !

قدماى مثبتتان فى الصخور !!

لاأستطيع الحركه

غضبتى عاتيه

أطوّح بسيفى فى جنون محطّما كل ماتطوله يداى

تتناثر الجبال متهاوية من حولى وتبتعد السحب مهرولة

ولكن قدمى لاتتحرّك

يشق زئيرى السماء مهدّداً

...

ويمرّ الأعداء من حولى بلا اكتراث

 

تبدو الأرض بعيده كأنها العدم

أعدو إلى الحافة بلهفة..وأقفز سابحا فى الهواء

أشدّ ذراعاى ساقطاً إلى أسفل

أحلّق غائصا تجاه الأرض

لايخالجنى خوف أو رعب

لاأحاول أن أرفرف أو أطير

أواصل السقوط وعلى وجهى سلام

و شبح ابتسامه

Lost ..

عرفت حلما جميلا.. عرفت لسع الزنابق

وكان ليلى طويلا.. على سياج الحدائق

وماعرفت السبيلا..

وماعرفت السبيلا ..

وماعرفت السبيلا..

..*

 

 

*بتصرّف عن قصيدة للشاعر الكبير محمود درويش

& Still Beautiful ..

 

Beautiful !

الثمن 400 جنيه

ده سعر كيلو عسل السدر الأبيض على قناة الناس !

قناة الناس دى المفروض قناة إسلاميه سلفيه

بس -والحمد لله - يتمتع أصحابها بفكر مستنير يرى أن الدين الإسلامى يجب أن يوظّف توظيفا جيدا فى عصرنا هذا

إزاى بقى ياسيدى؟

باستخدام الدين فى الإعلانات ..

اللى عنده عقم فيه اللى يخليه يخلّف -بإذن الله !!- فى 21 يوم

ضعف جنسى ؟

أعشاب طبيعيه وعسل نحل واتحلّت مشكلتك يامحترم , وإيه ؟ بصوره إسلاميه بخمسه وسبعين جنيه

وقلنا طبعا عن كيلو العسل أبو 400 جنيه

وقبل كل إعلان فيه حديث أو آيه قرآنيه

وفى آخر كل إعلان حديث أو آيه

وفى وسط كل إعلان واحد دكتور يقول بقّين علميين حلوين ليتضافر -أخيرا - العلم والدين فى خدمة المجتمع والإنسان المسلم

طبعا مش هاتكلم عن مستوى الشيوخ اللى بييجوا فى برامج القناة بس هاقول بس إن أغلبهم من معالم التيار السلفى اللى بيتوغّل يوم بعد يوم حوالينا

وناس كتير -منهم جارنا الحلاق اللى باحلق عنده- بيعتبروا إن القناة دىقناة دينيه إسلاميه ملتزمه فى عصر الانحطاط اللى بنعيش فيه

وناس كتيييييييييييييير بيعتبروا إن التزمت والانغلاق والتعصب السلفى هو الشكل الصحيح للإسلام الذى لم يدنّس بتفكير أو اجتهاد !

وكان جارنا ده بينصحنى إنى أتابعها وأسمع من شيوخها ..

!!

يللا , آهى صوره تانيه بتعكس الانحدار الفظيع اللى احنا نازلين فيه يوم بعد يوم

كل حاجه فى المزاد وتحت أمر اللى يدفع أكتر

واحنا السلعه ودمنا هو التمن

رمز من رموز العرب والكرامه العربيه !

تم الحكم على صدام بالإعدام شنقا

شىء متوقّع ..

لكن الغريب واللى استثارنى هو المظاهرات اللى بتهتف بحياة صدام وتعبير أحد الأفراد لقناة الجزيره بأن صدام رمز من رموز العرب والكرامه العربيه

بقى لعبة صدام على إنه البطل اللى وقف للأمريكان لسّه مؤثّره للدرجه دى ؟

بقى لو مبارك جه دلوقتى وقال لبوش إنه حمار ومابيفهمش يبقى هاننسى كل التعاون والعلاقات العميقه اللى كانت بينه وبين الأمريكان وكل السرقه من دم البلد وكل الأرواح اللى بيحصدوها جزارين أمن الدوله والداخليه ونقول عليه بطل ورمز من رموز الكرامه العربيه؟

هوّه احنا فعلا كده ؟!!

أكيد .. وإلا ماكانوش الطغاة دول فضلوا يحكمونا من المحيط إلى الخليج بالعشرين والتلاتين سنه لأ وبعد كده يسلمونا تركه للأمامير أولادهم

ماأنساش أبدا العدد الخاص اللى صدر من جريدة الأسبوع بعد القبض على صدام بيتباكى على العروبه وآخر أبطال العروبه -أيوه ياأفندم يقصد صدام حسين -مشبها إياه بصلاح الدين !!!!!!!!

إيييييييييييييه؟

فيه إيه ؟

عقلنا راح فين؟

ضميرنا راح فين؟ لما آجى أقول لواحد إنه قتل وسرق فى شعبه يقوم رادد علىّ " بس كان معيّشهم فى نعيم" !! وكان المصريين فى العراق بيشيلوا الفلوس بالكوم

بقى ده هوّه المهم ..

يبقى تستاهلوا إن جيمى يمسككوا بعد أبوه ويسرقكوا بعد أبوه ولما هيتنطّط ويقول بُقّين حلوين فى حق الأمريكان هتهتفوا له وتقولوا عليه راجل من ضهر راجل - ماهو مبارك كان بيعمل كده وكنا بنصدّقه - وبعد كده نتسمم ونتبطّل ونتحرّش ونتسرطن ونستنى بقى صدام حسين بطل العروبه ورمز الكرامه العربيه

ماهو هيقتلنا ويسرقنا صحيح بس هيديلنا لقمه مش هيلهط الأكل كلّه لوحده

ولاحول ولاقوّة إلا بالله

الموت على الأسفلت

القصيده الشهيره للأبنودى عن ناجى العلى هنا بصوته

ولمن لم يقرأها بعد هاهى

الموت على الإسفلت

أماية ... وأنتي بترمي بالرّحي ..

على مفارق ضحى

وحدك وبتعدّدي

على كل حاجة حلوة مفقودة

ما تنسينيش يا أمة في عدُّودة

عدّودة من أقدم خيوط سودا في توب

الحزن

لا تولولي فيها ولا تهللي

.. وحطي فبها اسم واحد مات:

كان صاحبي يا أمه ..

واسمه:

ناجي العلي

يا قبر ناجي العلي.. وينك يا قبر

يا قبر معجون بشوط مطلي بصبر

الموت بقرّب عليك .. يرتد خوف

وإذا ما خافشي الموت .. يرتد جبر

.................

يا قبر ناجي العلي.. يا دي الضريح

كان ميِّتك للأسف وطني صريح

تحتك فتى ناضر القلب .. غض

كان قلبه .. أرض مخيّمات الصفيح

الأرض متغربة .. والحلم ملْكْ

خريطة شبه الوطن محاصرها سلك

واقف وراها شريد عاقد إيديه

حنّ الوطن ذلك .. للأرض .. تلك

غشيم في حب الوطن .. طبعا غشيم

ياللي تحب الوطن .. من الصميم

على طريقة العرب في الحب ..

عيش وَليْ.. نقي.. متي.. لكن لئيم

الأغنية :

ناجي العلي في الأغنية

هلّ عليْه

زي الغزالة البرية

ماسك رسمة

...........

والرسمة فيها دمع وضحك

وأرض مِلك

وابن واقف خلف السلك

قصاد رسمه

................

والرسمة فيها يهود.. . بحاخام

والأنكل سام ..

وعرب لطاف عايشين في سلام

جوه الرسمه

.............

رسم الكفوف زي الصبّار

حنظل بمرار

صبي قصير واقف محتار

قدامه رسمه

............

رسما لا نعرف تتحادق

ولا بتنافق

نايب ماجي إنُّه عاش صادق

عاش للرسمة

...............

كان زييّ.. يائس يأس مميت

لكن عفريت

دخل لأعدائه في البيت

شايل اسمه

..................

والرسمة ما فيهاش سما وبيوت

ولكن لها صوت

يا ناجي.. كان لا بد تموت

برّه الرسمة

..................

قتلت ناجي العلي لما رسم صورة

يواجه الحزن فيها براية مكسورة

لما فضحني ورسمني صورة طبق

الأصل

ما عرفشي يكذب ولا يطلع قليل

الأصل

الناس بترسم بريشة وهوه ريشته

نصل

فضح رموز الرواية وهيّه عَ المسرح

قتلته بأيدي وإيد غيري في آ خر

الفصل

يا بلادي . . ما تزعجيش نفسك

عشان صورة !

أهلي لا أهلك . ولا أهلك ساعات

أهلك

ما تحكليش ع اللي قتلك .. مش

حاخد لك تار

ما ملكش غير أحسدك خالص على

قتلك

قتيل في غربة .. بيفرق عن قتيل

الدار

يا ماشي للنور.. ومش ماشي على

مهلك

واحنا خطاوينا يمّ الموت .. تجيب

العار

أنا الموساد .. والفساد.. قاتل كتير

قبلك

كمال .. وغسان .. واسأل ماجد أبو

شرار

وحاموت .. لاشفتك .. ولا حا عرف في

يوم قبرك

لا حاحُط زهرة عليه ولا حأغرس

الصبّار

حاولت قتل الجهل طلع الجهل

متعلّم

وأهه قتلك

وحولك وأنت واضح . . سر من

الأسرار

أمايه . .

وأنتي بترمي بالرحى

على مفارق ضحى

وحدك .. وبتعددّي

على كل حاجة حلوة مفقودة

ما تنسنيش يا أمّه في عدوُّدة ...

عدوّدة .

من أقدم خيوط سودا في توب

الحزن

لا تهّللي فيها ولا تولولي

وحطّي فيها اسم واحد .. مات

كان صاحبي يا أمه ..

واسمه ناجي العلي..

........................

أطفالك البؤسا . قاموا هناك ورا

الشباك

بيفتحوا بالضوافر.. فكرة الشباك

مين أول اللي رسمهم في الصحف

إلاّكَ؟

قلعوا الهدوم القدام .. وطلعوا

بهدومك

إصحي يا ناجي العلي.. قامت

القيامة هناك

....................

قامت قيامة ثمانية وأربعين .. غارقة

في طريقها ذل السنين العاقر

الناشفة

إصحى يا ناجي العلي.. أهي

صحيت الضفة

يقشعروا الأرض .. إصحى جاوب

الهزة

سنّ القلم من جديد وارسم بنات

غزة

عزة اللي حضنت سلوكها وعشقت

الحزة

ما ما تتش .. طب ما أنت مت ....

عرفت تتوفى؟!

 

وهتلاقوها على الصفحة دى مع رسوم هايله

لو قاعد لوحدك ..

حاجه ع الماشى كده لأى حدّ قاعد لوحده وبيضطر يجهّز أكله بنفسه

حاجه بسيطه كده بس طعمها لذيذ قوى !

هاعلّمكوا طريقه جديده لعمل البيض , أى نعم البيض دلوقتى بقى من ضمن الوجبات الطبقيه اللى بتتقدّم فى مطاعم الخمس نجوم وبتيجى بالحجز من عند البقال بس أهوه حتى من باب العلم بالشىء :)

المطلوب :

- رغيف عيش بلدى

- بيضة أو اتنين على حسب قدراتك الماليه

- معلقة زبده

- قليل من الملح والبهارات حسب المزاج

- كوب وملعقه لضرب البيضه أو البيضتين زى ماقلنا

- طاسه أو صينيه أو أى شىء يصلح لتسخين العيش عليه

- عين بوتاجاز مشتعله ولايشترط بوتاجاز كامل

الطريقه :

تضرب البيض مع الملح والبهارات باستخدام الملعقه - ملحوظه : يتم كسر غلاف البيضه الجامد واستخدام المحتوى شبه السائل ويراعى التخلّص من قشر البيضه فى سلة المهملات - حتى يتم مزج الصفار والبياض بصوره معقوله .

- يتم الفصل -برقه !!- بين جانبى الرغيف زى مابتيجى تعمله ساندوتش يعنى مع مراعاة عدم تمزق الرغيف أو فتحه - أنا عارف إنها صعبه بس كلّه فى سبيل البيض يهون- وبعدين تفتح شق متوسط كده فى حرف الرغيف.

-دلوقتى تاخد معلقة الزبده وتفردها -بهدوء- داخل الرغيف

-توضع الطاسه أو الصينيه على النار

-نصب البيض المخفوق داخل الرغيف من الشق الذى أحدثناه قبل ذلك مع مراعاة أن يكون الرغيف فى وضع أفقى على طاسة التسخين وأن تكون عملية الصب برفق لئلا يتجمع البيض كله فى جانب واحد من الرغيف وتضطر لأكل نصف ساندوتش وباقى الرغيف حاف !

- ننتظر قليلا ثم نقلب الرغيف على الوجه الآخر

-ونواصل تقليب الرغيف على الوجهين مع مراعاة ألا تكون النيران شديده حتى لايمتزج طعم البيض برائحة الخبز المحروق !

- ...

- تقريبا كده خلاص , بالهنا والشفا بقى :)

- آه صحيح , ماتنساش تطفى عين البوتاجاز !

ولو عجبكوا الساندوتش اللطيف ده ممكن أقولكوا على وصفات تانيه للطبيخ باعتبار إنكم من الغلابه اللى بتطبخوا لنفسكوا زى حالاتى ^_^

استعاره

كنت قاعد بارتّب أغانى عبدالحليم حافظ اللى عندى. وأول ماوصلت للأغنيه دى ماقدرتش أعدّيها

كنت لسّه هارفعها وأكتب كلماتها بس افتكرت إنى قريتها قبل كده فى الأغانى

وأنا باستعيرها هنا بعد إذن صاحب الأغانى

وربنا يكرمنا بأكتوبر تانى يخلّصنا من الاحتلال اللى احنا فيه بس مايكونش فيه قائد ضربه جوّيه !

 

عدّى النهار

عدّى النهار .. و المغربية جايّة

تتخفّى ورا ضهر الشجر

و عشان نتوه في السكة

شالِت من ليالينا القمر

و بلدنا ع الترعة بتغسل شعرها

جانا نهار مقدرش يدفع مهرها

يا هل ترى الليل الحزين

أبو النجوم الدبلانين

أبو الغناوي المجروحين

يقدر ينسّيها الصباح

أبو شمس بترش الحنين؟

أبداً .. بلدنا ليل نهار

بتحب موّال النهار

لما يعدّي في الدروب

و يغنّي قدّام كل دار

و الليل يلف ورا السواقي

زي ما يلف الزمان .. و على النغم

تحلم بلدنا بالسنابل و الكيزان

تحلم ببكرة .. و اللي حيجيبه معاه

تنده عليه في الضلمة و بتسمع نداه

تصحى له من قبل الأدان

تروح تقابله في الغيطان

في المصانع .. و المعامل .. و المدارس .. و الساحات

طالعة له صحبة .. جنود

طالعة له رجال .. أطفال .. بنات

كل الدروب واخدة بلدنا للنهار

و احنا بلدنا ليل نهار

بتحب موال النهار

لما يعدي في الدروب

و يغني قدّام كل دار

 

كلمات : عبدالرحمن الأبنودى
ألحان : بليغ حمدى

وللى ماسمعهاش لسّه هنا رابط لتحميلها من بلوج الأغانى برضه