الليلة الكبيرة

رفعت الأوبريت المُصوّر على هذا الرابط لمن يريد

ولمن يريد أن يقرأ ويترحّم على صلاح جاهين وسيد مكاوى هاهى الكلمات

 

الليلة الكبيرة

 

بنات: قبة سيدنا الولى دول نوروها

محلا البيارق والناس بيزوروها

قبة سيدنا الولى فى الجو عاليه

محلا البيارق لما دوروها

بائع: حمص حمص

تل ما ينقص

ع النار يرقص

يرقص يرقص.

ويقول:

اللى شاف حمص ولا كلش

حب واتلوع ولا طالش

فتاة: يسترك هات حبة بقرش

الجميع: ها ها ها ها ها ها ها !

بائع: فريرة للعيل .. يابو العيال ميل .. خد لك سبع فرارير

آخر: زمارة شخليلة .. عصفورة يا حليلة .. طراطير ياواد طراطير

الجميع: طراطير طراطير طراطير

شحاذ: يا مسلمين يا مؤمنين لله

ده كل مين يفعل جميل يلقاه

شحاذ:بركة ولى له فى الشفاعه جاه

لله .. لله .. لله ..

المعلن: الليلة الليلة السيرك تعالوا دى فرجة تساوى جنيه قولوا هيه

بمناسبة هذا المولد يوجد برنامج سواريه قولوا هيه

فى السيرك شجيع يهجم ع السبع ويركب دغرى عليه قولوا هيه

وبنات قمرات زى الشربات حلوين مش عارف ليه قولوا هيه

الجميع: الله حى .. الله حى

المنشد: شفت ف منام صاحب المقام ده أبهه

الجميع: الله حى

المنشد: ويمامه حايمه عليه تسبح ربها

الجميع: الله حى

المنشد: ميلت فوق يده وجيت أحبها

الجميع: الله حى

المنشد: صحونى م النوم خدت بعضى وتنى جى

الجميع: الله حى .. الله حى ..

لاعب البخت: فتح عينك .. تاكل ملبن

فينك فينك .. تاكل ملبن

أوع لجيبك .. لا العيب عيبك

قرب جرب .. تاكل ملبن

نشن .. وسطن إيدك

وسطن .. إضرب ..

البندقية: طاخ ......

اللاعب: يحميك يابنى تبقى غالبنى

قرب خد لك حتة ملبن

نداءات: طعميه . أراجوز . عجميه باللوز

الجميع: ى الليلة الكبيرة يا عمى والعالم كتيره

ماليين الشوادر يابا م الريف والبنادر

دول فلاحين .. ودول صعايده

دول م الكنال .. ودول رشايده

دى الليلة الكبيرة يا عمى والعالم كتيره

عجوز: إسعى .. إسعى .. إسعى .. إسعى

مصوراتى: خدلك صورة سته ف تسعه

العجوز: إسعى .. إسعى .. إسعى .. إسعى

قهوجى: ياسى عجوره .. النار خسعه

فلاح: ناس من بلدنا هناك أهم

روح يابراهيم انده لهم

.. "يتعانقون"

سلامات سلامات سلامات

سلامات ع البلديات

فلاح: دى الحضرة والذكر انجلى

يالله بنا نذكر ياوله

المدرب: أنا شجيع السيما

أبو شنب بريمه

أول ما أقول "عالى هب"

واصرخ لى صرخة

السبع يتكهرب

ويبقى فرخة

حالا بالا سأصارع

أسد إنما إيه .. متوحش

وح اخلى وجهه شوارع

تسقيفه ياناس مايصحش

أهه جاه .. أهه جه

تسقيفه بأه

تسقيفه امال

تشجيعه امال

بائع: السمك مقلى

كل وبرق لى

صنف زى الفل

بائع:استخار واختار

فشة أو ممبار

يالله سمى وكل

نساء: يام المطاهر

رشى الملح سبع مرات

فى مقامه الطاهر

خشى وقيدى سبع شمعات

أطفال: ياعريس ياصغير

علقة تفوت ولا حد يموت

لابس ومغير

وح تشرب مرقة كتكوت

المعلم: بالذمة ده سابع عيل

مزفوف من وقت قليل

القهوجى: مولد شيللاه يامعلم

عقبال أولادك

المعلم: كلم..

نداءات: واحد مضبوط

واتنين مصرى

القهوجى: ع النار حاضر جاى لك دغرى

مسا التماسى مسا التماسى

ياورد قاعد على الكراسى

نداءات: هات شاى يا دقدق

القهوجى: عينى وراسى

"يدخل الريس حنتيرة مغنى القهوة الصعيدى"

الجميع: سمعنا ياريس حنتيرة

للصبح معاك السهيرة

سمعنا … سمعنا

المغنى: يا غزال ياغزال

ده العشق حلال

دوبتنى .. دوب

خلتنى خيال

يا شفتك فص فراولة

وأنا لا قوة ولا حوله

شقلبتلى عقلى علاولة

ياغزال .. ياغزال

يا رب ياعالم بالحال

تهدى حبيبى ويصبح عال

وأغنى وأرقع بالموال

وأقول يا غزال

المعلم: وقف ياريس حنتيرة

فيه ناس هنا قاعدة كتيره

ولاحد قال هات تعميره

ولا واحد شاى

اللى ح يطلب راح يقعد

واللى ما يطلبشى يبعد

زبون: ياللا بنا نخرج يا مسعد

شارع الترماى

الآخر: أوعد يا رب أوعد

آدى كمان قهوة

الأول: ياللا بنا يامسعد

ندخل على سهوه

الغازية: طار فى الهوا شاشى

وانت ماتدراشى

طرفه شاورلى عليك

حكم الهوا ماشى

هوا العصارى ياواد

على سطح دارى .. ياواد

خدنى ورمانى عليك

ولا أنت دارى

آهين يا نارى .. آهين

منك يا جارى .. آهين

خدنى ورمانى عليك

هوا العصارى

صاحب القهوة: اللى ح يطلب راح يقعد

واللى ما يطلبشى يبعد

الزبون: ياللا بنا نخرج يامسعد

شارع الترماى

"لعبة زق الطارة"

صاحب اللعبة: ورينا القوه .. يابنى انت وهو

مين عنده مروه .. وعامللى فتوه

يقدر بقداره على زق الطاره

ويفرقع بمبه ؟

شاب: وسع .. وسع .. وسع .. وسع ..

أنا ازق الطاره واضرب ميت بمبه

دنا الاسطى عماره من درب شكمبه

صيتى من القلعة لسويقة اللالا

أنا واخد السمعه

الجميع: طب يالله تعالى

الشاب: لا ياعم سعيده .. دى البدله جديده

الجميع: هاها هأ سعيده .. يابو بدله جديده

سيده: ياولاد الحلال

بنت تايهه طول كده

رجلها الشمال

فيها خلخال زى ده

رجل: زحمه ياولداه

كام عيل تاه

بائع: فريره للعيل

الجميع: دى الليلة الكبيرة ياعمى والعالم كتيره

ماليين الشوادر يابا م الريف والبنادر..

 

القصيده منقوله من هذا الموضوع مع خالص الشكر ل عبدالله