الثمن 400 جنيه
ده سعر كيلو عسل السدر الأبيض على قناة الناس !
قناة الناس دى المفروض قناة إسلاميه سلفيه
بس -والحمد لله - يتمتع أصحابها بفكر مستنير يرى أن الدين الإسلامى يجب أن يوظّف توظيفا جيدا فى عصرنا هذا
إزاى بقى ياسيدى؟
باستخدام الدين فى الإعلانات ..
اللى عنده عقم فيه اللى يخليه يخلّف -بإذن الله !!- فى 21 يوم
ضعف جنسى ؟
أعشاب طبيعيه وعسل نحل واتحلّت مشكلتك يامحترم , وإيه ؟ بصوره إسلاميه بخمسه وسبعين جنيه
وقلنا طبعا عن كيلو العسل أبو 400 جنيه
وقبل كل إعلان فيه حديث أو آيه قرآنيه
وفى آخر كل إعلان حديث أو آيه
وفى وسط كل إعلان واحد دكتور يقول بقّين علميين حلوين ليتضافر -أخيرا - العلم والدين فى خدمة المجتمع والإنسان المسلم
طبعا مش هاتكلم عن مستوى الشيوخ اللى بييجوا فى برامج القناة بس هاقول بس إن أغلبهم من معالم التيار السلفى اللى بيتوغّل يوم بعد يوم حوالينا
وناس كتير -منهم جارنا الحلاق اللى باحلق عنده- بيعتبروا إن القناة دىقناة دينيه إسلاميه ملتزمه فى عصر الانحطاط اللى بنعيش فيه
وناس كتيييييييييييييير بيعتبروا إن التزمت والانغلاق والتعصب السلفى هو الشكل الصحيح للإسلام الذى لم يدنّس بتفكير أو اجتهاد !
وكان جارنا ده بينصحنى إنى أتابعها وأسمع من شيوخها ..
!!
يللا , آهى صوره تانيه بتعكس الانحدار الفظيع اللى احنا نازلين فيه يوم بعد يوم
كل حاجه فى المزاد وتحت أمر اللى يدفع أكتر
واحنا السلعه ودمنا هو التمن
11 comments:
البوست نزل فوق دماغي وانا باكتب
:)
ما علينا صاحب القناة هوا هوا صاحب قناة الخليجية .. بنفس فكر الاي ار تي مع مكفرة الذنوب اقرأ
!!!
بس الايام دي مدي حق البث لصاحب الفكر العالي بتاع العسل اياة
مرة وانا مفروسة من الحكاية دي قريت البوست ده عند قلم جاف
عن سياسة القناة ومثيلاتها الحلوين.. من ميلودي وروتانااللي بيجيبوا اذان الفجر من مكة واية ار تي الهلامية ..والباقي
اةة قبل ما اقفل بقي
:)
آدي الجواب الثالث لحراجي
آسف على تأخير الشكر :)
بس كان عندى شوية مشاكل فى النت
عجبنى جدا البوست اللى عند قلم جاف على فكره, أثبت لى الشويّة حاجات اللى كنت باستنتجها !!
بس للأسف ماطفّاش نارى من القناة دى ومثيلاتها , خصوصا مع تزايد انتشار التيار السلفى شيئا فشيئا
مش عارف ليه حاسس إن التزايد ده مش طبيعى بالمرّه
وإن الحكومه وراه بقوه وبعنف يمكن لضرب الإخوان فالعداء بينهم وبين السلفيين معروف أو يمكن لأنهم ملهيين فى حاجات شكليه وبيعوّدوا أتباعهم على غلق مايسمى بالعقل أو التفكير وطاعة الشيخ فى كل مايقول دون نقاش - فالنقاش يلزمه تفكير !!- الفكره هنا إن مبارك -الله يحرقه هو وابنه وكل اللى معاهم - بيضرب كل شىء فى البلد فعلا
مش مجرّد إنهم بيسرقوا البلد , لأ
دى حرب فى كل شىء كإن اسرائيل اتفقت مع السادات إنه علشان السلام هات لنا مبارك وراك ومالكش دعوه !!
صحتنا انضربت , مثقفينا انضربوا , إعلامنا انضرب , نفسيتنا اتدمرت , اقتصادنا اتغلغل - من بطرس غالى يعنى - وديننا كمان بيتدمّر ..
هوّه فيه إيه ؟
مافاضلّناش غير الأبنودى نسمعه ومين عارف بكره هوّه كمان جايز يلفّقوله تهمة !
شكرا تانى على الجوابات ياساسو
حمد لله علي السلامة
للنت يعني
:)
قلم جاف ما شاء الله عليه مدون جميل اوي
متفقة معاك في الفكر السلفي.. التمسك بالشكليات مرييييييح بيخدم جميع الاغراض
اغراض التيار ذاتة لضمان عدم التفكير والطاعة العمياء
وطرف حكومي هيسعد جدا بتغييب عقول اللي ممكن يفكروا قبل مايفكروا
يلفقوا تهمة للابنودي ليه
اذا كان هوا نفسة كان طرف في التغييب عن علم أو جهل، ايام الله يسامحة بقي ناصر وكارثة اعلام احمد سعيد
لحد مانكسر وكتب موال النهار
ومن يومها فكر في اللي يليقله ويليق لعبد الحليم مابعد النكسة
ومنها للنهاردة.. بيحوم حوالين اي موضوع فمتقلقش علية مادام مش بيقولها صريحة مش هيجراله حاجة
وآدي بقيالجواب الرابع بس من غير ميرسي والحاجات دي اتفقنا؟
لما اتكلّمت عن تلفيق تهمة للأبنودى ماكنتش أقصد إنه تهديد للنظام قد ماكنت أقصد إن النظام الحاكم بيلغى أى حاجه حلوه فى مصر فى أى مجال ..
أى حاجه ليها قيمه لازم تموت وتنتهى
لازم التفاهة والهيافه والقيم السلبيه هى اللى تنتشر علشان النظام الفاسد ينمو ويزداد صلابه
وغالبا مبارك -بحكم السن وتخاريف الشيخوخه- هيوصل لدرجة الجنون المطلق ويبقى زى صدام
أى واحد مايسبّحش بحمده مصيره الموت أو السجن
وساعتها قصيده زى كريم العنصرين
هتودّيه السجن بحكم إهانة الرئيس أو التلسين على أداء الحكومه أو أى تهمة من التهم الظريفه دى !
أما عن الجوابات فبلاش ميرسى خالص ياستى , تحت أمرك :)
هنكتفى بشكرا جزيلا ومانتحرمش ^_^
ممكن برضة.. بس في ناس الناس بتحبهم لدرجة ان النظام بيتحاشي اللعب معاهم.. من ناحية اتقاء لوجع الدماغ-مش الشر لاننا مبقيناش نقدر عليه-ومن ناحية من باب الفضفضة. يعني لعبة التمانينات الشهيرة انهم يقولون.. ماذا يقولون ..دعهم يقولون
وبعدين(أنا متباع!!!)طيب مانت ايام اللي (وكان يخطب تصيب الدنيا ربكة)كنت مؤمم.. ميجيش يفوق دلوقتي خلية في الجنب اللي بحبة فية علشان اعرف احترمة
واديالجواب الخامس
تم تحميل الجواب الخامس ياأفندم :)
وفيه اقتراح بإنك ترفعى الجوابات على موقع 4shared بدلا من موقع savefile
لأنه هيحتفظ بالملفات حتى لو ماحدّش نزّلها وكل المطلوب منك تعملى حساب على الموقع بإيميلك بس وهتاخدى مساحه جيجا بحالها ترفعى فيها أى ملفات إنتى عايزاها ..
4sharedميرسي علي
انا لسه هانقل كل البروجيكتس عليه
:(((
save file دول باقي الجوابات اللي علي
لكن ماخلص نقل وعزال
الجواب السادسوآديالجواب السابعوهناالجواب الثامن
أنا اللي لازم أقول شكرا ع الجوابات، بس يا جماعة حرام تخلوا الوصلات مستخبية هنا.. يا ريت لو حد فيكم يحط الوصلات دي في مكان واضح في البلوج بتاعه
أما بالنسبة للأبنودي فالراجل ابتدى يتكلم بصريح العبارة و ع المكشوف، و أحيانا الكلام الغير مباشر بيكون أقوى من إنك تقول للأعور إنت أعور في عينه، و المثل في ده قصائد فاروق جويده السياسية
أما موضوع موضة المحطات الإسلامية (أو المتأسلمة - الله أعلم)، فللأسف، أو يمكن لحسن الحظ، المحطات دي مابتوصلش أميريكا و كندا فلغاية دلوقت ما حصليش شرف مشاهدة الحاجات دي. على أي حال الفضائيات أصبحت مجتمع متكامل و مفتوح، فظهور المحطات دي انعكاس طبيعي للتغيرات الاجتماعية اللي شغالة اليومين دول
المفروض إن ساسو بدأت تلم الجوابات وترتّبها فى البلوج ده
صحيح المجهود هيبقى كبيييييييييير قوى فى ترتيب ورفع الجوابات وكتابتها على البلوج بس ساسو قدّها وقدود :)
للأسف أنا مافتكرتش حكاية 4shared دى غير بعد الجواب الخامس :(
لكن ماعلينا , برضه ساسو قدّها وقدود ^_^
أما عن المحطات -المتأسلمه قطعا- فالحمد لله إنها مابتوصلكش , مش طالبه دمّك يتحرق فى الغربه , وللا أى حدّ هناك يناقشك فى الكلام اللى بيتقال فى القنوات دى ومش هتعرف تدارى وشّك من الكسوف إنك مُسلم والمفروض إن القنوات دى بتتكلم بلسان الإسلام !
على فكره كيلو عسل السدر الأبيض اللى كان ب 400 جنيه بقى فى نفس الإعلان وعلى نفس القناة ب 250 جنيه بس , بدون أى إعلان عن خصم خاص أو عرض معيّن وده معناه إن ماحدّش اشترى ..
أتمنى إن ده يكون بسبب وعى الناس للنصب اللى فى الموضوع مش لأنه -بس- أغلى من اللازم ..
وطبعا شكرا على الجوابات ياساسو ;)
Post a Comment