أولا فيه محاولة ظريفة من شغف فى البلوج الجديد
أهلا وسهلا .. شرفت .. عاش من شافك ياراجل فينك من زمان .. مش تبقى تيجى .. إنت مابتجيش ليه؟
!
والهدف إنها تتناقش مع كل صاحب مشكلة وتحاول تساعده يلاقى حلول لمشاكله
مع إنى شايف إن اسم حلالة العقد كان هيبقى مختصر شوية وبيقضى الغرض بوضوح برضه :)
المهم إن شغف متفائله , ومع إنى باعتبر إن دى ظاهرة مش صحية - أقصد التفاؤل- إلا إنها متحمسه
وشكلها فاهمة كويس ومستعده :)
أتمنى إن البلوج ده بعد سنه وللا حاجه يبقى من العلامات المميزة فى عالم التدوين
******************
ثانيا كانت مفاجأة حلوه لقيتها النهارده لما دخلت البلوج
ساسو 4 فى 1 جابت أغنيه جديده لأميرة
أغنيه جميله قوى لأميره ماسمعتهاش قبل كده
ورغم إن اسم الأغنيه فكرنى بالحباك الأشهر صاحب قضية الفساد
ورغم إن الكورس ورا أميره عمال بيقول كلام غريب كده مشككنى إن الأغنيه مقتبسه من أغنيه أجنبيه وللا حاجه ولو إنى مش عارف أنهى لغة دى اللى فيها ننى هوى ننى هوى .. تمبر ليه !!
بس كنت فرحان فعلا بالأغنيه
وقلت أعلن عنها هنا علشان ماتضيعش فى الكومنتات ويقدر أى حد بيحب أميره يشوفها وينزلها
ميرسى -ولو إنها مش كفايه أبدا :) - يا ساسو
****************
ثالثا بقى موقع ظريف قابلنى النهارده اسمه
الموقع ده موجه لينا -غير الأمريكيين- من نصف الأمريكيين بيعتذروا فيه علشان ماقدروش يمنعوا إن بوش يمسك أمريكا لفترة ثانية
قدييييييييييم جدا طبعا لكن أنا لسه شايفه دلوقتى وعجبتنى الفكره ولو إنها يوزلس !!
2 comments:
هوه أولا
جذبني جدااا الموقع اللي انت حاطه ده
و أول ما شفته قلت إن أولى بينا احنا نعمل موقع نعتذر فيه للأجيال القادمة عن اننا ماقدرناش نعمل حاجة عشان مبارك مش يتولى الحكم تاني
و عشان الدستور مش يتم تغييره من سيء لأسوأ بالشكل ده
يبقى
sorry ourselves, sorry our country , sorry our children , our next generations, sorry the arab world - بالمرة -
ثانيا : لفت نظري جدااا بروز العقلية الأمريكية اللي بتستفيد من كل حاجة على قد ما تقدر حتى لو كانت الحاجة دي اعتذار
ببساطة حولوا الموضوع لكتاب و تجارة و خصم مش عارفه كام في المية
بعد الخصم يبقى ب 12,71دولار
يعني عشان نجيب مثلا اعتذار الأمريكيين لينا يبقى نشتريه بحوالي 72 جنيه تقريبا - على اعتبار ان الدولار ب ستة جنيه - علشان نطمئن نفسيا من ناحيتهم و اننا خلاص خدنا بحقوقنا - اللي احنا المتهم الأول في تضيعها
ثالثا بقى
معاك جدااا في إن تجربة زي دي مش سهل الواحد يقيمها غير بعد مدة طويلة ، سنة كأقل تقدير - ده لو حد كان عنده استعداد أصلا انه يبعت حاجة يعني - و يظهر اننا هانحو اسم المداونة فعلا ل
فينك يا راجل من زمان -- عاش من شافك --- مش تبقى تيجي ؟ :-D
و شكرا على التنوية عن المداونة
تعرفى إن معاكى حق ..
وضعنا شبيه جدا بوضع الأمريكان
الناس اللى فاهمة الكارثة اللى الشعب داخل عليها عماله تصرخ وتهاتى فى وادى
وباقى الشعب كله فى وادى تانى
نتيجة بقى جهل أو خوف أو لامبالاه أو .. أو ..
لكن النتيجة الأكيدة فى كل الأحوال إن الغبى الظالم الفاسد نجح فى الانتخابات هناك وفى التمثيلية هنا ...
أما بخصوص ال72 جنيه ففى المشمش طبعا .. آل اعتذار آل
أنا مسامحهم ياستى ومش زعلان , كفاية اللى هيجرى لهم من بوش :)
آل 72 جنيه ؟
ده أنا صعبان على أدفع 30 جنيه فى كتاب هيكل أقوم أدفع 72 فى شوية صور أمريكانى مضروبة !
كان غيرهم أشطر ياماما :)
ثالثا دى بقى أتمنى إنك تكونى قدها إن شاء الله
أهم حاجه لازم تكون عندك هى الصبر ..
الصبر
وإنك تكونى فعلا عايزه تعملى البلوج ده علشان الناس
لأن غالبا -زى أى مشروع- هيكون كم المشاكل أو الإحباطات كبير بالذات من الناس اللى زى حالاتى
وغير استعداداتك الشخصية فالموضوع عايز دعاية واسعه
شدى حيلك يابطله :)
وبعد سنه هنعيد تقييم الوضع تانى !
Post a Comment