مشهدين من شهرين

 في وسط الفترة اللي اتكلمت عليها من كام بوست، قابلني فيديوهين زادوا من إحساسي بالكآبة وتقريبا بكيت كتير جدا لما شفتهم..

في الفترة دي كنت حزين على نفسي وحزين على صديقة كنت فاكر إني خسرتها وحزين على إني مش قادر أتكلم مع حد من اللي حواليا - حتى بنتي، لأني إما مش قادر أشرح أو هاقول كلام يتفهم غلط أو حتى هاعذبهم بخواطر سوداوية مالهمش ذنب فيها، واعتمدت على إنها فترة وهتعدي- في أفكاري وهواجسي..

لحد دلوقتي ما اتكلمتش مع حد، وأظن إن مش هاقدر أتكلم مع حد برضه.. غالبا هاكتب هنا في يوم من الأيام - أظن قريب لو فضل إلحاح البوح ومعاناتي مع الأفكار ده لفترة كمان- على اعتبار إن محدش هيعدي على المدونة غير كل كام سنة، والله أعلم بقى إيه هيكون حصل أو هيحصل..

المهم أنا حبيت أشير الفيديوهين دول هنا.. كل فيديو منهم غالبا محتاج بوست لوحده، وإن شاء الله أعمل كده في يوم.. لكن دلوقتي، هارفعهم عشان الذكرى ماتتوهش وسط الأيام كالعادة..

ده الفيديو الأول.. ما أعرفش مصدر الفيديو.. قابلني في تويتة بنفس الشكل ده من غير كلام، لكن قلبي بيقول لي إنه حقيقي..

وده الفيديو التاني.. ما أعرفش برضه ده من فيلم إيه وللا مسلسل إيه، لكن المشهد كان بالظبط حالتي أيامها..

لو وصلت لمصدر أو معلومة بعدين - يا عزيزي زائر الصدفة الفضولي- هابقى آجي هنا وأقول في البوست أو الكومنتات.. وإن شاء الله أكتب بوست عن كل فيديو لوحده بعدين