Wednesday, February 21, 2007

يعنى إيه تاج أصلا ؟

رغم إنى ماأعرفش معنى الكلمه إيه لحد دلوقتى بس مش مشكله

الست ساسو 4 فى 1 بعتولى - أو بعثن لى- ب4 تاجات حته واحده 

طبعا فرصه جميله جدا بالنسبه لى للهروب من هم البحث عن تدوينه جديده

رغم إن هم البحث ده قد يكون أسهل من البحث عن إجابات صادقه عن أسئلة التاجات دى !

بدون مزيد من الرغى خارج الموضوع نبدأ ....

 

ايه اللي هيحصل لايميلك لما تموت؟

بما إن الإيميل لحد دلوقتى مجانى فيبقى الياهوو والهوت ميل هيستنوا شهر ويمسحوا اللى فيه وبعدين كام شهر ويمسحوه أصلا

عموما أنا إيميلى مافيهوش حاجه مهمه أصلا

علاقاتى البريديه قليله جدا ومن الصعب جدا إنى أستمر فى مراسلة أى بنى آدم .. رغم إنى حاولت كتييييير فى موضوع المراسله ده قبل كده سواء بالخطابات العاديه أو بالإلكترونيه , لكن كنت دايما أبعت جواب والتانى والتالت لأ ..

أحيانا طبعا كان التالت بينقطع من الناحيه التانيه مش من ناحيتى وغالبا من بعد ماأبعت صورتى ! .. مش فاهم ليه  

احتمال فى المستقبل بعد مالواحد يكبر   - أكتر من كده يعنى- ويشتغل أستخدم إيميلى أكتر من كده ويبقى فيه حاجات مهمه وساعتها -برضه- هتتمسح الرسايل بعد شهر ويتقفل خالص بعد كام شهر

اديت الباس وورد لحد قبل كده؟

ماحصلش ,بس احتمال بعد الجواز أبقى أديه للمدام من باب تكبير الدماغ بدل ماتتسحب كل شويه من ورايا وأنا فاتح الإيميل وهى بتعمل إنها بتنضّف الشيش علشان تشوف مين اللى باعتينلى إيميلات بالظبط وإذا كان فيهم حد أول حرف من اسمه سوسن أو ست أبوها ..

لو اه كانت طبيعة علاقتك بيه اية؟

علاقتى بيه إنه هيبقى مراتى سعادتك .. المودام على رأى واحد

اسمك؟

محمد

اسم الدلع المشهور في وسط اصحابك؟

اممم ... غالبا ماحدش بيدلعنى قوى يعنى بس الست الوالده غالبا كانت بتدلعنى ب حمام - بفتح الميم فقط وليس تشديدها - !

طبعا فيه حماده  و حمّو  وكافة الأشكال المرتبطه باسم محمد

كان فيه واحده صاحبى واحنا فى الإعدادى بينادينى عبقرينو لأنى كنت لابس نضاره ودايما باقرأ 

عمرك؟

25

برجك؟

الديك ..

ده فى الأبراج الصينيه لأنى من مواليد 81 .. السنه اللى كانت ميمونه نوعا على حرامية البلد وأئمة الفساد واسرائيل وأمريكا وكل من يهمهم أننا كمصريين نبقى فى سابع أرض ..

السرطان فى الأبراج العاديه بقى

رغم إنه اسم مرعب نوعا فى دراستنا ومجال شغلنا كأطباء بس باحبه جدا

حتى بالإنجليزى Cancer

باحسه اسم مختلف كده وحاسم نوعا ... بس ماأعرفش كتير من صفاته يمكن لأن صفاتى أنا متوزعه فى كل الأبراج فماهتميتش أعرف صفات البرج ده بالذات

مجالك او مجال دراستك ؟

الطب -بكل أسف وندم- البشرى

فى الفرقه الرابعه ومستجد السنه دى

بس لو رجع بى الزمن تانى لتانيه ثانوى كنت هاختار إنى أدرس رياضه 2 علشان أقدر أدخل حاسبات ومعلومات

ولو رجع بى الزمن لبعد الثانويه العامه كنت هاختار تربية أو آداب علم نفس وطظ فى المجموع الكبير

 

شخصيتك نوعها اية؟

مافيش اختيارات ؟

ده سؤال عجيب قوى بصراحه

فكرت أجاوبه بإنى أقول إنها خضراء وبأستك من فوق بس لقيتها هتبقى إجابه مبتذله قوى وإفيه محروق

فكرنى بمحمد صبحى فى وجهة نظر لما كانت بتسأله عن النوع فجاوبها .. سته سلندر !

عموما هاجاوب على حسب فهمى للمقصود من ورا السؤال

شخصيتى كارهه للناس وللتجمعات عموما ولضوء النهار لأنه مرتبط بكثرة الناس

ماباخرجش من البيت بالنهار إلا للضروره القصوى .. وحتى بالليل ماحبش أخرج غير متأخر جدا وبامشى فى الطرق الغير مطروقة علشان أقابل أقل عدد ممكن من الناس

مش مكتئب أغلب الوقت , بالعكس باهزر غالبا

باحاول أكون صريح على قد ماأقدر مع كل الناس  وده طبعا شىء مش سهل فمش دايما باقدر

مغرور شويه بس لسه قادر أشوف نفسى بدون تزويق أو خداع  ..

هى متناقضه شويه بس أنا كده

باحاول دايما لما أعمل حاجه غلط إنى أثبت حقيقة إنها غلط مش أسيب نفسى للتبريرات والأعذار

... مش عارف أكتب إيه تانى لن السؤال مش مدينى مفاتيح كتيره للإجابه

السفر بالنسبة لك؟

هم كبير فى الفتره اللى قبله ومتعه كبيره خلاله بالذات لو السفر ده بالليل أو فى الشتا

رغم إنى ماسافرتش كتير بكل أسف

القاهره ..الاسكندريه .. المنوفيه.. المنصوره  ..

وبس

معظمها زيارات لأصحابى أو لقرايبى

ومره واحده -بخلاف الرحلات المدرسيه- رحت المتحف المصرى والقلعه وكنت مبسوط جدا جدا يومها

دايما قبل السفر بابقى قلقان شويه أو مش مرتاح وباقعد أرتب للتفاصيل فى ذهنى أكتر من مره

بس أول ماباركب الميكروباص أو السوبرجيت أو عربية خالى وأقعد جنب الشباك باحس بالمتعه

بالذات لو السفر -وده غالبا اللى باعمله- بالليل

وياسلام لما أوصل رمسيس الساعه اتنين بالليل فى الشتا أو قبل الفجر والميدان وااااااااسع وفااااااااضى

وللا لما أركب الترام فى اسكندريه بعد الفجر والنهار لسه بيشقشق ومافيش حد فى الترام غيرى ومافيش حد فى الشوارع

دى لحظات باحب السفر فيها

نفسى أسافر أكتر من كده بس طبيعتى الكسوله والمجافيه للناس مانعانى شويه

رغم كده فأنا ناوى بإذن الله -وحاسس إنى فعلا هاعملها- أسافر الأقصر وأسوان فى رحله بالعجله  اللى هى الدراجه يعنى

ده حلم من أحلام حياتى اللى بإذن الله هاحققها فى يوم من الأيام

المود بتاعك؟

دلوقتى جميل جدا لأسباب شخصيه

غالبا بابقى هادى وبافكر دايما فى كل حاجه

ورغم إن كتاباتى فى البلوج ده أغلبها اكتئابى ممل نوعا بس أنا ماباحسش بالاكتئاب غير كل فين وفين

بس اللى باحس به كتير هو الحيره !!

وقت فراغك بتعمل فيه اية؟

أقرأ .. أقعد قصاد الكمبيوتر.. أتفرج على التليفزيون .. ألعب فيفا .. أطبخ أو آكل.. أشتغل فى نسخة ويندوز جديده .. أشوف البرامج الجديده اللى نزلت

الاكلة المفضلة؟

المخبوزات عموما ..

أى حاجه بتتكون من دقيق وسائل سواء لبن أو مياه .. سواء عليها سمن بلدى وللا لأ

طالما عجين وطالع من الفرن .. باحبه

خصوصا إذا كان بالجبنه بقى

قرص .. رقاق .. فطير .. إنشالله حتى عيش فينو

أمنية حياتى أصلا إنى أسكن فى الدور الأخير من عماره طويييييييله ويبقى الدور الأول مناه فيه مخبز أو معرض مخبوزات

باحب المشويات جدا .. سواء طيور أو خضار .. أو طبعا الاتنين :)

الصفات اللي خدتها من بابا؟

أهوه ده مش عارف إجابته بالظبط لأن والدى مات وأنا عندى سنتين فماعرفتوش قوى

بس بيقولولى إنى هادى زيّه

فتبقى الهدوء

احتمال كمان أكون أخدت منه حب القراءة

لأن ماحدش خالص من اللى حوالى كان بيقرأ أو عنده كتب .. رغم كده طلعت باحب القراءه بجنون  فغالبا أكون ورثتها عنه فى جيناتى :)

الصفات اللي خدتها من ماما؟

التجريب فى المطبخ  :)

القدره على عمل أكثر من شىء فى نفس الوقت

امممم

القدره على الأعمال اليدويه فى أى مجال سواء كان تنظيف أو تصليح و طبيخ

بتاع كله يعنى

اكتر 6 حاجات بتكرهها؟

اللون الأحمر .. وكل الألوان اللى شبهه أو قريبه منه زى البنى أو الأصفر الغامق أو البرتقانى الغامق

الكذب .. والنفاق .. بالذات فى العلاقات الاجتماعيه

الحرّ .. شمس الصيف دى بالنسبة لى بتبقى كابوس

إذلال الناس أو معاملتهم بتعالى .. وبالذات من الدكاتره تجاه المرضى .. مجرد تجاهل كون المريض إنسان زيه زيك مش مجرد حاله بيبقى شىء قمىء

المعامله بمكيالين .. أفترى على الأضعف أو اللى مايلزمنيش وأتلطف مع الأقوى وصاحب المصلحه

الإحساس بالعجز ..

اكتر 6 حاجات بتحبها؟

القراءة .. بالذات الروايات الحلوه زى أولاد حارتنا وقمر على سمرقند وكذلك الكتابات الساخرة من نوعية كتابات محمد عفيفى

اللون الأزرق .. والألوان الفاتحه

لما أقعد فى بلكونه والجو نسيم وفى إيدى كتاب باحبه وكوباية عصير

 ميدان رمسيس والقاهره عموما قبل الفجر والشوارع فاضيه والنور أصفر غريب

الكوره .. ولو إنى بطلت ألعب من زمان بس كنت باحب ألعبها .. دلوقتى يادوب بالعب فيفا

أغانى سميره سعيد وساندرا

الشغل بالنسبة لك؟

شبح مرعب هيخلينى أتعامل مع الناس وأخرج بمواعيد ثابته

بس لازم علشان أقدر أعيش وأصرف على نفسى وبيتى

ماباحولشى أفكر فيه من دلوقتى باعتبار إنه شر لابد منه ومش طالبه أحمل همه من دلوقتى

كفايه على المذاكره

اية الكومبيوتر والانترنت بالنسبة لك؟

جزء أساسى من حياتى

من وأنا فى الثانوى وأنا باشترى مجلات الكمبيوتر رغم إن ماكانش عندى ولاعند أى حد أعرفه ساعتها كمبيوتر

وكنت باروح المدرسه فى الأيام اللى ماكانش فيها دراسه علشان أدخل معمل الكمبيوتر وأشتغل عليهم رغم إنها كانت أجهزة عتيقة مافيهاش هارد ديسك أساسا وكل اللى كنت باشتغله عليها شوية بيزيك ولوجو وبرنامج معالجة الكلمات راحيمكو !

كان نوع من المعجزه إنى أجيب كمبيوتر وأنا فى تانيه كليه

ومعجزه تانيه إنى أدخل دى إس إل من حوالى سنه ونص

....

مهما اتكلمت مش هاقدر أعبر عن حبى المجرد غير المفهوم للكمبيوتر

كفايه بس أقول إنى باحس إنى جزء من العالم ده

عالم تخيلى آه بس قريب جدا منى

 

 

 

 

وكده خلص التاج الأول بعد حوالى ساعتين من الكتابه والتفكير

والساعه داخله على 12 آهى ولازم أجرى بقى قبل الميعاد

أيوه .. زى سندريللا كده :)

5 comments:

saso said...

اربعة في واحد
:D

الحمد لله انك ماقلتش خضرا وباستك من فوق علشان في حوالي ستة جاوبوا نفس الإجابة

بعد الفجر والنهار لسة بيشقشق اتبسطت انا وقلت هييية بيحب الصبح ..فجأة تصدمني كده مبتحبش الشمس والنهار والصيف وكل الحاجات

فكرتني بكومبيوتر صخر العجيب..قعدت ازن علي بابا علشان يجيبة مع اني كنت باتخنق من السلحفاة الخضرا بتاعة لوجو

حلو اخد منك ساعتين انا قعدت 3ايام افتحة واقفلة.. شفت بقي اربع ايام تعمل التاج اي خدمة
:P

Leonardo said...

ماهو برضه كانت دى من الحاجات اللى استغربتها جدا لما قريتها عندك ..
إنك بتحبى الصيف والشمس والحرّ !!
لما قريت إجابتك دى حسيت إنى بنى آدم طبيعى رغم كل شىء وإنى مش سايكو بالدرجه اللى كنت فاكرها :)
ده مايمنعش طبعا إنى باحب الشمس فى الشتا , بالذات لو فى أرض وشجر .. فى أى غيط وياسلام لو كانت شجرة توت ولو إنه مابيطرحش فى الشتا بس الشجره نفسها كبيره
ممكن أغير رأيى على فكره لو الناس فى الصيف ماتخرجش بالكثافة دى وتبقى ماليه الشوارع بالفظاعه دى
يابنتى ده الناس بتفضل صاحيه طووووووووول الليل
أعيش أنا إمتى بقى ؟

وبعدين مش فاهم برضه كنتى بتتخنقى من السلحفاه دى إزاى؟
ده أنا كنت باعمل بيها عمايل
أرسم بها دواير وبيوت وعربيات
مره عملنا مشروع فيلم متحرك أنا وواحد صاحبى .. أنا رسمت عربيه وهوّه كان صاحب فكرة إننا نتقدم خطوتين كل مره ونعيد رسم العربيه
ولما نكرر العمليه دى هتبان كأنها بتتحرك ...
كانت أيام والله :)
وكنت باحب البيزيك برضه وبالذات لما تبقى المدخلات والمعادلات المطلوبه متداخله شويه وكتيره
لما كنت أنجح كان بيبقى الشعور بطعم الإنجاز جميل قوى .. وكنت باحس إنى بافهم !

على فكره اللى خلى التاج أخد منى الساعتين دول سببين
الأول إنى ماحاولتش أفكر كتير فى الإجابات
باكتب اللى أفتكره وييجى على بالى
بدليل إنى ماذكرتش العنصريه من ضمن أكتر 6 حاجات باكرههم لأنى مافتكرتهاش ساعتها
التانى إن الساعه كانت خلاص داخله على 12 والوقت هيفوت :)

وماتبقيش تطولي الغيبه فى البلوج بتاعك قوى كده تانى ^_^

saso said...

حاضر مش هاطول ..اصلا الكلمة دي مفرحاني اوي
يلا اهي ايام كانت مش حلوة بس عدت الحمد لله
البيزك كان حلو
if "y"= 5
والله كان مسلي تقعد ساعة ونص تعمل حاجة بس بتحس انك فرحان بيها
اللوجو كان بينرفزني يمكن علشان مكنتش باحب حد يقف علي راسي ويعلمني وهما كانوا مركزين معايا في الكومبيوتر كاني هاولع فيه مثلا لما يتلفتوا ويسيبوني
:D
اللي يشوفهم كده مايشوفنيش وانا باصلح المكواة الابدية

عن الصيف يا ليو ابقي اطلع البلكونة بلاش تنزل الشارع مادام الناس كتير..انزل الفجر بيبقي صبح ونور ودفا ومفيش ناس
الساعة 6 الصبح احلي ساعات اليوم.. هتلاقيني في مكان ما بامشي وباعد البيوت او باخبط طوبة بطرف رجلي من غير ماحد ياخد بالة
وهتلقي كلام كتير تقولة لنفسك وحاجات كتير عاوز تتكلم فيها مع نفسك وناسيها

فبراير خلص وهااانت ..الصيف جاي

Leonardo said...

أنا مبسوط جدا علشان النت معدول النهارده علشان أغيظك شويه

آل الصيف جاى آل
امبارح أنا كنت مسافر والدنيا كانت عاديه .. شوية سحاب بس الشمس طالعه
فجأه واحنا فى الميكروباص .. قلبت بشتا محترم .. والناس كلها قعدت تقفل فى الشبابيك وتتكلم .. وأنا بقى مبتسم :)
ولما نزلنا شتيت على وأنا ماشى كذا مره بس خفيف خفيف

لولا الطين كان ممكن أقول إنه كان جو مثالى !

معلش ياساسو .. أهم يومين أفرح أنا بيهم قبل ماتعيشى إنتى بقى كام شهر جايين وسط الشمس والعرق والخنقه !!

وبعدين مش 6 الصبح بس
أنا فى الصيف ماباخرجش غير فى ميعادين
بعد الفجر بساعه أو اتنين -لأن بيبقى فيه شباب لسه بيتمشوا بعد الفجر- أو من الساعه 12 كده للساعه 2 أو 3
بيبقى الحر عنيف لدرجة إن ماحدش تقريبا بيبقى ماشى فى الشارع :)

Leonardo said...

بالمناسبه فى أكتر 6 حاجات باحبها كنت أقصد رواية الحرافيش لنجيب محفوظ
لأنى لسه ماقرأتش أولاد حارتنا أصلا بس لأنى كنت شاريها قريب وناوى أقراها كانت مسيطره على دماغى شويه