حاسس بكراهية كده ناحية البلوج ده دلوقتى !
مش مسألة اكتئاب أو حاجه من حاجاتى الممله دى , بس مش عارف ... مش حابب لاالبلوج ولاالتدوين عموما دلوقتى ..
رغم إن المفروض إن كل شىء عادى نسبيا
أول امبارح حمّلت ويندوز فيستا من على النت وامبارح صطّبته على جهازى واشتغل بصوره مش بطاله أبدا مع مشكلة بسيطه بس فى التسجيل من كارت التليفزيون
خدت دور برد يوم السبت اللى فات وخفيت منه امبارح .. دورة التلات أيام المعتاده
يوم عطس ويوم رشح ويوم انسداد فى الأنف بدون رشح
قريت كمّ كتب معقوله من الشيله بتاع معرض السنه دى
جبت كتابين ممتازين من المعرض لمحمد عفيفى
واحد اسمه سكة سفر عن رحلاته الداخليه فى مصر والخارجيه إلى لندن
والتانى عن رحلة الموت نفسها , كتاب فى منتهى العذوبة اسمه ترانيم فى ظل تمارا
كان عندى منه طبعة دار الشروق برسوم حلمى التونى وورق لونه أخضر , بس لقيت طبعه تانيه فى الهلال مرفق معاها عدد من قصصه القصيرة فجبتها ولو إنها مش بروعة الطبعه الأولى المصحوبة بالرسوم دى بس آهى تنفع فى القراءة والاستهلاك ونحافظ على بتاع الشروق دى
جبت كمان حوالى 4 كتب لمحمد مستجاب الله يرحمه منهم نعمان عبدالحافظ وديروط الشريف أشهر مجموعاته تقريبا مع كتابه الأخير -فيما أعتقد- الحزن يميل للممازحة
وكنت جبت أعمال خيرى شلبى الكامله من الهيئة
ونسخة من انكسار الروح لمحمد المنسى قنديل بعد ماكنت قريتها من عند تامر وكنت باتقطع والله وأنا بارجّعهاله :)
الحمد لله لقيتها فى المعرض برضه .. فاشتريت نسختين !!
و ... و... و...
إن شاء الله هاكتب بالتفصيل عن كل الحاجات دى علشان اللى مايعرفهاش
بس ده لما أرجع عن كراهيتى غير المفهومه للتدوين حاليا
6 comments:
انا كمان مش طايقة افتحة اصلا باحس انه واجب تقيييييل مع اني سايبة نقاش حلو وانا بحب الحاجات دي
يمكن يكون الشتا..ويمكن يكون دور البرد برضة
المهم ميكونش فكرة التدوين عندنا استنفذت للأبد
كتب المعرض تخيل اني لسه في اول كتاب وفي صفحة 152 بس
اول مرة اعمل كده، يلا هو اكيد الشتا
مستنية التفاصيل علشان عمري ماقريت انكسار الروح وانت بتقول انها هايلة
بس الدنيا كانت حر من يومين كده وبرضه ماكنتش حابب البلوج :)
بيتهيألى إنها زهق أو لأنه اتقلب لواجب فعلا مش مجرد تنفيس أو تفريغ لطاقة زائده ..
مش عارف :(
بس يللا , لو كان الواحد فاهم كل حاجه بتحصل له أو بتحصل حواليه ماكانش زماننا بنتكلم أصلا !
ممكن تكون حالة الزهق دى برضه صابت الكتب والقراءه عندك ..
أو تكون الكتب اللى جبتيها من المعرض من عينة الأخ هيجل ده :)
شكلها كده بما إنك بتوصفى صفحة 152 بأنها "بس" !! يبقى الكتاب فيه كام صفحه على كده ؟
سيبك من الكتب المهمه دلوقتى , اقرى الكتب الممتعه ..
ولو فاضيه اخطفى رجلك لأقرب مركز لدار الهلال وهاتى انكسار الروح وأى حاجه تلاقيها لمحمد المنسى قنديل
الراجل ده ممتع بطريقه ماتتوصفش , رغم الأسى والشجن اللى مش هايسيبك طول ماإنتى بتقرأى له بس هتكونى مستمتعه
أسلوبه ومفرداته .. هو ومحمد المخزنجى قريبين -بالنسبه لى- فى النقطه دى
كإنى باقرأ لغه تانيه عمرى ماسمعتها ولا قابلتها
كإنى ..
كإنى باشعر وأحس مش مجرد باقرأ
وده مش كتاب فيه كلام مطبوع ,لأ ..
دى أحاسيس مجرده اصطادها الكاتب من شخصيات خياله وقدّمهالى
وكل ده من خلال سرد مشوق وجذاب للأحداث بحيث ماتقدريش تسيبى الروايه قبل ماتكمليها ...
ممكن أقول لك فى انكسار الروح -تحديدا- كلام كتير قوى بس هابقى حاسس بالذنب من إنى حرقتلك المتعه اللذيذه فى اكتشافها لأول مره
باتكلم جد بالمناسبه وأقصد اللى باقوله ده فعلا بدون مبالغة
دى وجهة نظرى على الأقل فى الرواية والمؤلف
لكن لو مصممه تخسرى المتعه دى , ممكن أحرقلك الرواية :)
تم تم تم
انا جنبي دار الهلال طبعا رحت وجبتها.. حاليا معايا الفرافير اللي مبحبهاش اوي مش شايفة انها خارقة بس بحب مقدمتها جدا
اخلصها ان شاء الله واروح علي انكسار الروح
ليو ..فاكر الكومينت
ده
دي الأغنية اللي كنت باحكيلك عنها اول مالقيتها افتكرت اجيبهالك
enjoy it
أيوه فاكر الكومنت وفاكر الأغنيه .. ونزلت ألبومات علاء عبدالخالق كلها أصلا علشان لما جيت أدور على الأغنيه دى ساعتها مالقيتش عندى حاجه له :)
بس ماسمعتهاش غير من الرابط اللى إنتى حطيتيه ده دلوقتى !!
ميرسى :)
الأغنيه اللى كنت حريص إنى أسمعهاله أول مانزلتها كانت مكتوب
مرتبطه عندى جدا بمرحلة مهمة من حياتى وأنا فى الإعدادى
أما عن الفرافير فمسرحية لذيذة جدا حتى فى قراءتها .. مش خارقه أيوه بس بتلعب فى منطقة جديدة نوعا فى فن المسرح
أنا فاكر إنى لما قريتها أول مره من زماااااااان حبيتها جدا
ولما اتفرجت عليها فى برنامج كنوز مسرحية برضه فضلت حاببها !
أداء عبدالسلام محمد -بتاع البلهارسيا- فى شخصية فرفور كان جميل فعلا :)
أرجو إنك تستمتعى بانكسار الروح .. احم !!
أقصد أرجو إنك تستمتعى بقراءة رواية انكسار الروح وماتكتئبيش بعدها زيى ...
مكتوب عندي برضة كانت مرحلة، زي أميرة وزي سميرة بعد كده
:)
بس سميرة كانت ماسكة ثانوي كله
الفرافير كنت بحبها زمان جدا ومش عارفة ايه اللي شاددني ليها كده، يمكن صح علشان شفتها في كنوز مني هلال بس فاكرة اني اول مرة اشتريت الرواية محبيتهاش
!!!!
المهم دخل في النص اسخيلوس اخلص عليه وبعدين نتجة للانكسار
:)
Post a Comment