ربنا يسامحنى بقى ..
من فتره كده كنت قرأت مقاله فى المصرى اليوم عن زواج جمال مبارك وكان الكاتب بيطالب بإننا نتعامل مع الموضوع بذوق شويه ومانضايقش جيمى ..
الراجل عايز يكمّل نص دينه ويخش دنيا, نوجع دماغه ليه وننهش لحمه ونقعد نقول توريث ومش توريث؟
ساعتها فكرت فى حكاية إنه يفضل لحد 40 سنه من غير جواز دى
وبعدين قلت لنفسى إنها مش طالبه أزود فى الكلام وممكن آخد سيئات على حساب الأخ جمال
مش مستاهله برضه
النهارده قرأت الخبر ده عن بدء تنفيذ عملية التوريث بعد اكتمال الجانب الاجتماعى فى شخصية جيمى اللى على حسب الخبر بيحضروه علشان يبقى زعيم عربى !!
آه والله زعيم عربى ...
المهم الشيطان وزّنى تانى فقلت أكتب هنا شوية الأسئله اللى فى بالى وربنا يسامحنى إن غلطت
دلوقتى أى شاب طبيعى بتبدأ رغباته الجنسيه مع بداية فترة المراهقة
وعلى مايوصل 20 وللا 25 سنه بيبقى خلاص , عايز يتجوز علشان رغباته دى تتصرف بالطريق الطبيعى
لو مافيش إمكانيات ماديه -كمعظم شباب مصر- بيصبر الواحد ويصوم فإنه له وجاء أى وقاية
ولو مش ملتزم شويه بيقضيها أفلام ثقافيه وأهوه يتفرج ع الدنيا من بعيد
ولو مش ملتزم خالص بيقضيها تحرشات وحركات
ولما ينحرف بيزنى أو يقضيها عرفى -اللى هو حرام برضه وبكده يبقى زنا برضه- لحد مايشوف سكه
ولو بقى والده عنده قرشين وهيساعده من الأول أو لو واد شاطر واشتغل أو سافر برّه وبقى عنده إمكانيات بيجيب م الآخر ويتجوز ويمشى طبيعى وفى الحلال ..
لكن بقى لما يبقى عنده الإمكانيات المادية والمفروض إنه شاب طبيعى ويقعد من غير جواز لحد بعد الأربعين, يبقى ده ليييييه؟
وياترى كان طول الفترة دى بيصوم علشان يحافظ على نفسه وربنا يساعده على تجنب الفتنه خصوصا إنه بيسافر بلاد بره وكان شغال هناك كام سنه وإنتوا عارفين نسوان بلاد بره !
وللا اتجوز عرفى ياترى؟ أو زنى ؟
يمكن اتجوز شرعى بس فى السر بعلم أهل العروسه بس علشان تبقى المسأله حلال ؟
بس لو اتجوز , يتجوز فى السر ليه؟
وللا ده راجل مابيهتمش بحكاية دخول الدنيا دى من أصله, أو مالوش فيها ؟
طب ليه بقى عايز يدخل دلوقتى بالذات ؟
غصب عنى مابيجيش فى دماغى غير الظنون السيئة , أعمل إيه ؟
مش لاقى أى حل يكون فيه شاب وصل لسن 40 سنه من غير جواز رغم توافر الإمكانيات الماديه بسهولة من غير مايكون ارتكب فعل حرام أو يكون مش طبيعى ..
عموما أنا مريض نفسيا أصلا , فماحدش ياخد كلامى على محمل الجد
دى أفكار واحد مريض فطنشوا , حتى علشان ماآخدش سيئات علشان ظنونكم السيئة إنتوا كمان !
3 comments:
انا وجهة نظري انه كان بيقضيها تحرشات وحركات
بغض النظر أن عندى رغبة شريرة فى تصديق كل هذا الكلام
وبأعتبار أنى مابحبهوش لا هو ولا أبوه ولا اللى جابوه
ممكن أصدق
بس للحق والأمانه فهناك العديدون من الأشخاص المقتدريين ماديا تأخروا فى الأرتباط لظروف الطموح الشخصى والرغبة فى تحقيق أحلام أو أوهام أهم من وجهة نظرهم
يعنى هو حر يتجوز ما يتجوزش بس المهم أنه يبعد عنا ويحل عن سمانا
مش كنت تقول إنك جاى ياعم كنا فرشنا الأرض أى حاجه ياسى ياسر(:
هوّه صحيح علاقاتنا بأمريكا كانت متميزه طوال فترة التسعينات لما كان كلينتون ماسك الحكم ومقضّيها واحتمال برضه يكون جيمى أخد باله منه باعتبار إن ده قدوه واللى ماسك العالم كله ويتاع , بس ماأعتقدش
التحرش عايز زحمه وجماهير !!
يعنى انتخابات .. أتوبيس .. طوابير
وجيمى مالوش فى الكلام ده كله
ده راجل كان من الطياره للبنك ومن البنك للطياره .. وكله علشان خاطر ديون مصر ;)
وجع دماغ:
ماهى الرغبة الشريرة دى هى برضه اللى خلتنى أكتب البوست ده !
وإن كان قصدى مختلف شويه
اللى أقصده من البوست زى ماقلت فى آخره إنه حتى بالنسبه للناس الكتير المقتدرين اللى اتأخروا لظروف الطموح الشخصى ..إلخ
مش لاقى حل يكونوا وصلوا فيه للسن ده من غير مايكونوا ارتكبوا فعل حرام أو يكونوا مش طبيعيين
مش بس إنهم مش طبيعيين , فاهمنى ؟
واللى خلانى أفكر فى الحاجات دى أصلا إنه مش عايز يبعد عن سمانا ابن مبارك !!
بما إن الراجل ده عايز يبقى رئيسنا القادم -لأ وزعيم عربى !!!!- ماقدرتش أمنع نفسى من التساؤل ..
Post a Comment