العلم لايُكيّل إنما الكتب لازم تُكيّل !!
اشتريت النهارده مجموعة كتب ممتازه دفعت فيها حوالى 50 جنيها وهو مايُعدّ مبلغا كبيرا نظرا لأنها كتب مستعمله وليست جديده , لكن مادفعنى للتضحية بهذا المبلغ أنها كتب ممتازه فعلا وحينما أتصفّحها الآن لاأندم كثيرا على شرائى لها ...
وبالطبع سأكتب أسماء الكتب من باب "التحنيس" أو إثارة الغيظ لمن لن يجد نسخة منها ^_^
- أولها كتاب "شخصيات لها تاريخ" للكاتب الكبير جلال أمين وهو الكتاب الذى أعتبره دُرّة مجموعة اليوم
- مذكرات نجيب الريحانى الصادره عن كتاب الهلال عام 1959
- أسرارالثورة المصرية..بواعثها الخفيه وأسبابها السيكولوجيه بقلم أنور السادات وتقديم الرئيس جمال عبدالناصر ...الصادره أسضا عن كتاب الهلال عام 1957
- معاويه بن أبى سفيان فى الميزان لعباس العقاد .. وصادرة -طبعا- عن كتاب الهلال عام 1956
- عن كتاب الهلال أيضا كتاب " أنــا" بقلم عباس العقاد عام 1964
- التصوير الفنى فى القرآن لسيد قطب وأعتقد أنه سيكون من أقيم الكتب التى اقتنيتها على الإطلاق
- مجرات الروح لجمال الغيطانى والتى تمثّل الجزء الخامس من يومياته المعلنه
- الناصر صلاح الدين للدكتور سعيد عبدالفتاح عاشور عن سلسلة أعلام العرب
- ثقافة وفن وحكايات ..تموت من الضحك ل محمد الرفاعى عن سلسلة مكتبة الأسره
- الولد الشقى ج2 لمحمود السعدنى
-ودُرّة أخرى هى " المقامر" لدوستويفسكى عن سلسلة روايات الهلال عام 1978
اممم ...
وبعد تسجيل هذه التفاصيل أجد أن هذا المبلغ قليل فعلا على هذه الكتب وإن كانت قديمة ..
حتى لو كانت مهترئة أيضا !!
أنا كده مبسوط :) ويابخت من بات كسبان ولاباتش مغلوب !
6 comments:
دة مش حسد ده يادوب أرررر
لقيت اسرار الثورة..مش هاقولك يابختك هاقولك برافو
نيجي بقي للرائع دوستويفسكس اللي ناقصلي رواية الشياطين الجزء التاني ابقي كملت مجموعتة
المقامر بقي عندي النسخة المترجمة في روسيا-دار رادوغا زي العادة- بس احلي مافيها التصدير26يوما من حياة دوستويفسكي لفولجين..ده ياتري موجود في نسخة دار الهلال؟
اةة ليو..الكتاب ترجمة مين؟ سامي الدروبي برضة ولا حد تاني مترجمة
أنا بقى ناقص لى كل أعماله ماعدا المقامر وأكمّل كلّ أعماله :(
للأسف ماقابلنيش أى حاجه له فى أى مكان قبل كده !
عموما النسخه دى مافيهاش غير تقديم بسيط فى صفحتين ونُص عن دوستويفسكى وأشهر رواياته ونبذه مختصره جدا عن حياته وولعه بالقمار ..
والترجمة كانت ل صوفى عبدالله
وواضح من افتتانها بدوستويفسكى فى المقدمه إنها مترجمة بتفهم وإن شاء الله هتبقى ترجمتها حلوه :)
طيب انت حظك فعلا حلو
انا اول رواية وقعت في ايدي كانت الشياطين اللي لحد النهاردة مكملتهاش
بعدها الأبلة خلتني احبة جدا..بعدها المقامر -أو مذكرات شاب زي ماكان هوا مسميها-خلتني احبه بطريقة ماتتوصفش بجد اكتر حد قريب لحياتناونظامنا السياسي والاجتماعي هنا في مصر..غير ان الروايات كلامها كلة بيدور جوة النفس يمكن الاحداث قليلة خارجيا بس داخل الشخصية كتييير اوي
بعدها-لما تحبة مش قبلها-ابقي هات جزئين الجريمة والعقاب
اة صحيح انت مش عندك امتحانات؟ هتاجل القراية لحد ماتخلص؟
أنت اشتريتها سنة كام يا ليوناردو ؟
لو اليومين دول يبقى أكيد طبعا مش كتير وبالفعل هذه القائمة ستغيظ الآخرين نظرا لقيمة أغلبها ، والقائمة تعكس أيضا تنوع اهتمامتك وقراءاتك ، تحياتي
film69
اشتريتها يوم الخميس اللى فات , بس الفكره إنى ماكنتش رايح أشترى كتب أصلا إنما كنت رايح بس علشان أسلّم على أصحابى فى المكتبه وماكنتش عامل حسابى فى فلوس علشان الكتب ,لكت الله يجازيه صاحبى ده بقى :)
عشان كده كنت حاسس إن 50 جنيه مش شويّه-58 إذا أضفنا مجلّد سوبر ميكى بتاع الهلال مش نهضة مصر - بس لما شفت الكتب وأنا فى أوضتى واحده واحده لقيت إنهم مش كتير خالص حتى ولو كان أغلب الكتب دى قديم جدا لدرجة اصفرار أوراقه ,ببساطه لأنهم فعلا يستاهلوا أكتر من كده سواء لأن محتواهم قيّم أو حتى بسبب ندرتهم وكونى مش هالاقيهم تانى غالبا , أمال أنا كتبتهم هنا وباغيظكم بيهم ليه :)
ومانتحرمش من تعليقاتك ياأفندم ^_^
ساسو
فيه حاجات هتتأجل وتنضم لباقى الصفوففى انتظار خروجى على المعاش لقراءتها مش بسبب الدراسه وإنمما لأنى مابقيتش -من حوالى 3 سنين - أقرأ بكثافة زى الأول ماعدا -طبعا- فى أيام الامتحانات اللى باقرأ فيها أى حاجه خارج المنهج بغزارة فظيعه !
وأنا ماعنديش امتحانات دلوقتى , امتحاناتى كانت فى أغسطس والنتيجة ظهرت فى منتصف سبتمبر وبدأت الدراسه فى آخر أكتوبر ومازلت ...
عموما فيه أكتر من كتابلازم أقراهم ومش هيتأجلوا أولهم كتاب جلال أمين لأنى باحب الراجل ده جدا وباحترم أى حاجه بيقولها وثانيها كتاب الغيطانى لأنه يوميات مش روايه فهيبقى سهل شويه والثالث كتاب ثقافة وفن لأن محمد الرفاعى ده شكله هوّه كمان راجل محترم وبيفهم مش كاتب أى كلام والسلام علشان ينزل فى مكتبةالأسرة وخلاص
المقامر نفسى أقرأها بس مش عارف هاألاقى مود مناسب وللا لأ , لن الكتب الثلاثة اللى فوق كتب سهلة القراءة اتنين مقالات وواحد مذكّرات
باقى الكتب بقى ممكن أرأقها برضه فى اليومين الجايين دول وممكن أقرأهم فى امتحانات آخر السنه وممكن أقرأهم بعد المعاش !
وإن كان الاحتمال الأخير ده مستبعد لأن الرجاله فى عيلتنا بيموتوا قبل الستين غالبا , فهاحاول أقرأ كل حاجه عندى من دلوقتى :)
مبروك عليك المجموعه الحلوه دى
وجدت مدوّنتك خلال بحثى عن مقالات تناقش مذكرات جلال امين التى نشرت مؤخراو التى انهيت قراءتها من اسبوع
شخصيات لها تاريخ من اكثر كتبه التى احبها و كذلك عصر الجماهير الغفيره
بتشترى الكتب منين بقى؟
:)
Post a Comment