عسى أن تكون بداية

فى إطار المعركة المستمرة بينى وبين عوارض الاكتئاب قررت اليوم أن أواظب على الكتابة هنا بشكل يومى مهما حدث -فيما عدا انقطاع الكهرباء أو النت بالطبع- حتى وإن لم يكن هناك ماأكتبه ..

من الطبيعى أن هذا الإجراء لن يضفى على المدونة الكثير من االثراء نظرا لأن عدد البوستات سيكون فى الليمون على حساب المضمون , لكن هذه ليست مشكلة فلاأعتقد أن هناك مضمونا لهذه المدوّنة أصلا :)

دى بس بتاعه كده بافضفض فيها لأن الكسل بيمنعنى إنى أفضفض بالورقة والقلم زى زمان , وظروف الدنيا منعتنى من الفضفضة باللسان ... ده من الآخر دور البتاعه دى

صحيح إن فيه ناس بتيجى وبتطل على اللى أنا باكتبه وصحيح إن أغلب الناس دول بييجوا المدوّنة علشان أغنية أميرة بتاع ياشمس غيبى :) بس فيه ناس -ماأعرفش ليه الحقيقة- بتيجى هنا علشان تقرأ

لما لفيت النهاردة كده فى شوية مدونات من اللى ساسو حاطّاهم فى المدونة بتاعتها زى مدونات قلم جاف أو مدونة عايزة تتجوز اتبسطت فعلا وكنت فى منتهى النشوة

قلم جاف فى مدوناته الثلاثة بيناقش قضايا مهمة جدا جدا وبأسلوب ممتاز وروح الدعابة عنده بتخفف من قسوة القضايا اللى بيناقشها , وبرايد دمها شربات .. ماتقدرش تمسك نفسك من الضحك من خفة دمها

الاتنين دول بالذات كنت معاهم فى ساعة الاكتئاب التى تسبق الفجر

تخيّلت نفسى وأنا باتصفّح مدونتى دى بقى لو كان بيكتبها حد تانى غيرى , كنت هادخلها ؟

أيوه , هادخل أنزل الأغنيتين وممكن قصيدة تشدنى , أما الفضفضة دى فكلام مالوش لازمة ومايهمش غير صاحبه !

انبسطت من النتيجة دى جدا ^_^

عز الطلب , صحيح أنا نفسى أكتب زى الناس دى ويبقى دمى خفيف وأسلوبى متماسك زيّهم بس فى المرحلة الحالية أنا راضى بإن المدونة دى تبقى سمك لبن تمر هندى كده

أنا كده دلوقتى

اكتئاب على سياسه على تفاهة على سخط على كتب على أفلام وأغانى على طب على حالة من معاناة الزحام والخنقة اللى فى كل حاجه دلوقتى وطبعا على شوية صور !

ويهمنى إن المدونة دى تبقى صورة طبق الأصل منى , ده هدفى

أحاول أندمج بيها مع ناس تانية , أعالج بيها أمراضى النفسيه ,أسجل بيها حياتى أو فترة منها وطبعا حاجه أفضفض فيها كل ماأبقى زهقان

..........

مش عارف بصراحه إيه كل اللى أنا كتبته فوق ده وإذا كان الكلام متماسك وللا لأ ,لأنى مانمتش بقى لى يومين بس المهم إنى قلت أهم نقطة وهى قرارى بالتدوين يوميا لأى حاجه فى أى حاجه بدافع العلاج ومقاومة الاكتئاب مع شويّة طراطيش كلام مالهمش لازمه كالعادة

غالبا هابقى أتكلم فى كل اللى اتكلّمت فيه ده تانى , بس هاسيب اللخبطة اللى فوق دى برضه ومش هاحذفها - غالبا برضه كنوع من العلاج والمواجهة-

ولنبدأ ...