من يومين كده قعدت أفكّر فى الحيرة اللى أنا فيها وكونى مش عارف حاجه فى أى حاجه عن أى حاجه بخصوص كل حاجه ...
سألت نفسى عن المصير
بمنتهى الأمانة ماأعتقدش إنى ممكن أوصل لحاجه فى حياتى
ممكن أتخرج من الكليه بتقدير كويس
أحب وأتجوز
هاجيب كل الكتب اللى نفسى فيها
وأشوف كل الأفلام اللى باحبها
ومين عارف ممكن أكتب لى رواية قبل ماأموت زى مؤلف مش فاكره فضل طول عمره مالوش فى الكتابة وبعدين لما كبر كتب رواية واحده ومات
نظام بيضة الديك يعنى.. ماأنا برضه من برج الديك فى الأبراج الصينية
ممكن أطوّر المدونة دى وأبنى لى موقعين تلاته كمان ويكونوا بحرفيه عاليه
ممكن أتعلم البرمجة ولو حتى بالفيجوال بيزيك
وممكن وممكن وممكن
....
بس فى الآخر برضه مش هاوصل لحاجه
....
يمكن علشان كده حبيت نجيب محفوظ قوى
شخصياته دايما ضايعه بيقين !!
مش مسألة المسير والمخير
لأ , لكن إحساس دائم بالسعى وراء المستحيل
بل السعى وراء المجهول أدق .. فالمستحيل معروف وإن كان غير ممكن
لكن متاهات الحيرة فى السعى -بعنف- خلف مالاتدرك حقا
تأمل فى أن يكون ماتظن
أن تجد ماتصبو إليه
بس ابقى قابلنى !!
....
الراحة دايما متعلقة بالدين
من بداية التفكير والفكرة المحفوظة أن سبب الشقاء فى الدنيا هو البعد عن الله
والراحة فى القرب منه -سبحانه وتعالى- واتباع تعاليمه وفروضه
جميل جدا , بس إزاى؟
أنا الحمد لله محافظ على الفروض على قد ماأقدر
وباحاول دايما ماأضرش حد أو أرتكب معصية
وباحاول أقرأ وأتعلم صحيح الدين
إيه تانى بقى ؟
...
احتمال يكون فيه ذنب كبير وأنا مش واخد بالى منه ؟
جايز ..
.....
طب وهو أنا أصلا المفروض بادوّر على إيه؟
السعادة ؟
ماأنا بافرح فى أوقات كتيرة وباحس بالسعادة والنشوة
وأحيانا -فعلا- باضحك من قلبى
الفلوس؟
معايا -غالبا- اللى يكفينى ويخلينى أجيب الحاجه اللى أنا عايزها حتى لو مش فورا وعارف إنى مش هيختلف حالى لو معايا أكتر
الأمور هتبقى أسهل شوية بس مش مختلف
.......
هارتاح إمتى؟
......
جمال الغيطانى كتب فى بداية الزينى بركات :
لكل أول آخر .. ولكل بداية نهاية
الجمله دى محورية فى حياتى
دايما شايف النهاية وعلى يقين بانعدام الاستمرارية
.....
لمّا حكوا لى عن طفولتى قالوا إنى دايما كنت باقعد ساكت
لاباضحك ولاباعيط ولاحتى بالعب
باقعد ساكت خالص بدون أى انفعال
ماكنتش باتكلم غير لما أبويا ييجى من الشغل
أنا مش عايز أستجيب للتفسير السهل بإنى ولد كئيب -أو مكتئب- من صغرى
الأقرب هو إنى -لأنى الأكبروماكانش لسّه أعمامى اتجوزوا علشان يخلفواويبقى لى أولاد عم- لقيت نفسى لوحدى
مافيش أطفال تانيه ألعب معاها
حتى فى الشارع وعند الجيران نفس الشىء
وبما إن أبويا هوّه الوحيد اللى كان بيلاعبنى فكنت باستناه لما ييجى من الشغل وأتكلم وألعب معاه
وعلشان كده كنت باقعد ساكت
مش مقنع 100% لكن منطقى
........
ماعلينا
كفاية رغى
المهم إنى من يومين جه فى بالى احتمال ظريف لسبب وجودى فى الدنيا دى
وممكن ينفع هدف برضه
إنى أربّى عيّل بصحّة وعقل ونفسيّه حلوة
أعلّمه كويس وأربيه من غير كلاكيع
وأخليه يلعب رياضه من وهو صغير
وأحاول أنمى مواهبه
وأطلّعه شخصية مسئولة ومستقلة
إلخ .. إلخ
تبقى فايدة كل الوش اللى أنا فيه ده إنى ماأخلّيش ابنى يتوه زيىّ
إنّى أفاديه من كل الحاجت الرذلة اللى بتحصل أو على الأقل أخليه يعرف يتعامل معاها صح إزاى من غير مايتهز أو يتلخبط
....
يبقى الهدف من دلوقتى إنى أحاول أربّى نفسى علشان ماأكونش أب متسلّط أو مثالى أكتر من اللازم أو مصنوع !!
No comments:
Post a Comment