كان ده عنوان برنامج جه فى أحد الرمضانات السابقة
كان المقدم عاطف كامل بيستضيف أحد النجوم ويعرض له مشهد يعتبر من مشاهده التى لاتنسى واللى المفروض إن تمثيله فيه كان فوق الرائع .. ماستر سين بقى
فعلى نفس السياق اخترت المشهد ده لأحمد ماهر من مسلسل حديث الصباح والمساء
أنا مابحبش أحمد ماهر فى الحقيقه بس ليه أدوار باحترمه فيها , منها دور يزيد المصرى فى المسلسل ده
والمشهد ده بالذات أثّر فىّ فعلا رغم إن الممثل اللى معاه واقع شوية
3 comments:
أنا كمان مش بحبه قد كه ولكن دوره في حديث الصباح والمساء كان تحفه
المسلسل كله أصلأ كان ماستر بيس
الوحيد اللي كان دوره غلط أحمد خليل!!!!!!
thanks alot for huda hadad song
لينا
i really adore it!!!1
المسلسل ده كان مفاجأة, بس للأسف بقى مرتبط دايما معايا بالأسف والغضب !
أول ماشفت المسلسل كنت مبهور فعلا
الجو بتاع نجيب محفوظ فعلا
نفس الأحاسيس والمشاعر اللى بتجيلى وأنا باقرأ أى رواية له , مع موسيقى عمار الشريعى كمان
والممثلين كان فيه كتير منهم فوق السوبر بمراحل
سوسن بدر وأحمد ماهر ومعاهم عبلة كامل كان أداءهم بالنسبة لى خرافة ..
نادر جدا لما باستمتع بأداء الممثل نفسه بعيد عن القصه والأحداث
طبعا مفتاح السر فى ده كله كان سيناريو محسن زايد
لكن بعد وفاة محسن زايد الله يرحمه جبت كتاب من الكتب اللى نزلت فى ذكراه وعرفت إن المخرج أحمد صقر غيّر فى حاجات كتيره من السيناريو اللى كتبه محسن زايد واهتم بشخصية ليلى علوى يالتحديد أكتر من المفروض ... لأنها السوبر ستار طبعا
كان فيه فى الكتاب مثال واضح جدا على كم الخسارة اللى سببها لنا أحمد صقر
فى مشهد موت عطا وليلى علوى قاعدة جنبه بقى بعد العمر والحكايات اللى بينهم .. المفروض تتكم تقول إيه ؟
محسن زايد قعد كذا يوم يفكر ويكتب ويشطب .. وفى الآخر وصل لأنها مش هتقول غير كلمتين
" كده ياعطا؟ "
منتهى العذوبة فى رأيى
كل الكلام فعلا اللى ممكن يتقال
كل المشاعر ..
ييجى بقى عمك صقر يعمل إيه ؟
فيلم بعيد عنك
ليلى علوى بفستان من الفساتين العجيبه بتاعتها دى تقعد وتشخلل وترصّ كذا صفحه
وطظ بقى فى السيناريو وفى تعب الراجل اللى اتحرق دمه وهو بيشوف التهريج اللى حصل للسيناريو بتاعه
كان فى الكتاب سيناريو لحلقة كاملة علشان تقارن بنفسك بين اللى كان كاتبه محسن الله يرحمه مع اللى حصل فعلا ..
وبعد ده كله طلع المسلسل بالصوره دى , فمابالك بقى لو كان التزم بالسيناريو اللى كتبه محسن زايد؟
علشان كده باتحسر كل ماأشوف المسلسل !
......
وبمناسبة هدى حداد ..
من كام يوم لقيت ألبوم جديد نازل باسم المطربة هدى حداد إنتاج 2006
استغربت , بس فرحت قوى :)
قلت فرصه ياواد
ولما نزلته لقيته بتاع مطربة جديده واسمها برضه هدى حداد :(
ده تحذير بس ياسابرينا علشان ماتنزليش الألبوم ده ع الفاضى لما يقابلك ^_^
:D:DD:D:D:D:D:D:
في المكتب عندنا بنوتة جديدة عملت نفس التعليق ده لما لقت هدي حداد اللي حطيناها لسابرينا علي تلعبو معانا داونلوودت الأغنية وجت تاني يوم تزعقلي"انا كنت فاكراها هدي حداد الصغيرة "تنحت شوية وقلت ماطلعش جاهلة ليكون في اتنين
ولما سمعتها فهمت بقي هيا زعقتلي ليه
:D
Post a Comment