لسه جاى من السفر حالا , بس لأنى عارف إنى ممكن آكل فى ساعتين وللا حاجه قلت ألحق أكتب بتاع النهارده قبل مايسرقنى الوقت - ملحوظه بين قوسين .. أنا اللى جبت ده كله لنفسى !!- ويضيع منى يوم
وطبعا بما إنى جايب شيلة كتب تانيه -مع إنى لسه مارحتش المعرض- من صاحبى اللى عنده مكتبة
فهتكون دى تدوينة النهارده ..
أولا جبت الأعداد الجديدة من روايات مصرية للجيب :)
العدد الخاص بتاع ملف بعنوان س-18
والعدد العادى بتاع ملف وقبلهم طبعا ماوراء الطبيعه وسافارى وفانتازيا
جبت كمان روز اليوسف الجريدة والمجلة , مش لأنى ماسوشى لاسمح الله وباستمتع بتعذيب نفسى لكن لأنى عايز أشوف وزير الداخليه ممكن يتكلم يقول إيه فى وقت زى ده وبعد الاتهامات دى كلها فى حواره مع المجلة , أما الجريده فلآن الجهبذ عبدالله كمال كاتب فى الصفحه الأولى يهاجم أساتذته واللى علموه الصحافه واللى كانوا فى نفس الوقت من أبرز خريجى روز اليوسف وهما عادل حموده وإبراهيم عيسى
رغم اختلافى -غالبا- مع أسلوب كل منهما و- أحيانا- مع أفكاره لكن جبت الجرية علشان أشوف البجاحه اللى على أصلها وزى ماقال الفارس الأخير فى إحدى تدويناته أشوف الفاجره وهى تجاهر بفجورها علانية ..
جبت كمان عدد الأهرام المسائى لأن مرسى عطا لله كاتب بالبنط الأحمر العريض فى الصفحة الأولى
ولنا حق العتاب ياسيادة الرئيس ..!
فطبعا لازم أشوف هايعاتبه على إيه وللاإيه وللا إيه ؟
ولعب الأمل فى قلبى وقلت جايز يسب للريس بتاعنا بالدين أو يقولله شتيمه قبيحه يعبر بها - أخيرا- عن رجل الشارع ومشاعره الفياضة تجاه رئيسنا المبجل ... بس طبعا عارف إن ده وراء حدود الخيال
نيجى للكتب بقى ...
1- الوحدة الوطنية بديلا عن الفتنة الطائفية لجمال بدوى عن مكتبة الأسرة
ورغم إن الموضوع ده غالبا بيتم تناوله بصورة رسمية غبية بس أنا باحترم جمال بدوى وعندى أمل إن ده هيكون كتاب مختلف
2- المنقذ من الضلال لحجة الإسلام الغزالى من تحقيق وتقديم د. عبدالحليم محمود
كتاب سمعت عنه كتير وجت فرصه نقرأه بقى
3- أنبياء الله لأحمد بهجت عن دار الشروق
قررت برضه إنى أجيب الكتاب ده أخيرا رغم إنه متاح قدامى من وأنا فى الإعدادى كده ..
4- سندباد مصرى .. جولات فى رحاب التاريخ لحسين فوزى عن مكتبة الأسرة
كتاب واحد بس اللى قريته لحسين فوزى قبل كده , ولما كان ممتع ومسلّى نوعا فجبت ده كمان
5- ألف ليلة وليلة.. د. سهير القلماوى عن مكتبة الأسرة
أول كتاب نقدى أو تحليلى عن ألف ليلة وليلة يقع تحت إيدى
6- مدافع آية الله ..قصة إيران والثورة لمحمد حسنين هيكل عن دار الشروق
7- الأم ل بيرل باك عن سلسلة روايات عالمية
وأخيرا عن سلسلة كتاب الشعب التى كانت تصدر فى الخمسينات - وربما الستينات- كتاب كيف نعيش اليوم
كتاب موسوعى نوعا يتناول أوجه حياتنا المختلفه والأدوات التى نستخدمها وكيف تم اختراعها أو ابتكارها لتكون فى متناولنا
وبس !
أروح آكل بقى وأرجع أقرأ الحاجات اللى جايبها دى
6 comments:
نفسى اعرف الكتاب الموسوعى ده هيكون فى ايه الى هو الأخرانى عايزه اعرف ازاى نتعامل مع الحياه دلوقتى ممكن حضرتك تبأه تحكيلى عالمضمون مقولتليش كنت مسافر فين يا عفريت؟؟؟
انت عارف رأيي في موضوع الكتب الجديدة مش هيخرج عن الحقد الطبقي.. ومحاولة حرق اي كتاب يكون عندي مع اني مبحبش الحكاية دي
اسألك بس هو لسة بيطلع س18
في خدمتك يا سيدي
!!!!
ده انا سايباة من كتييير اوي وهوا اتكسر وانفجر واتنقل عوالم موازية واتعمل فيه كل حاجة ..لا بجد هو كل ما يتزنق بيطلع س18
ahhhhh
امتي ييجي يوم الجمعة ..هابقي اقولك الكتب اللي جبتها ان شاء الله طبعا ..مع ان اليومين دول معايا كتاب قرب يكرهني في فكرة القراية نفسها
كاميرا_جيرل
الكتاب ده ياستى موجه أساسا للأطفال والنشء .. فيه تفاصيل عن أغلب مظاهر حياتنا المعاصره من أول القوه والطاقه بما فيهم الموجات والأشعة وغذائنا وبعدها وسائل الاتصال .. المواصلات بأنواعها بريه وبحريه وجويه
المساكن .. الكبارى .. التعليم نفسه
الشرطه .. المرافق ... إلخ .. إلخ
وكل ده طبعا بأسلوب مبسط يناسب الفتره السنيه دى .. هتسألينى جايبه ليه ؟
هاقولك علشان عيالى لما أخلّف بإذن الله :)
وكنت مسافر المنصوره ولو إنى مش فاهم إيه اللى يعفرت فى كده ^_^
......
ساسو
55555
:)
أما عن س-18 فاتضح إنها اشتغاله أخرى من د. نبيل والمؤسسه
روايه كان كاتبها الدكتور علشان تتنشر فى موقع على الإنترنت على جزئين
وبعد مااتصالح مع المؤسسه راح جايب الجزئين وطبعهم فى كتاب واحد فى سلسلة الأعداد الخاصة
سبوبه .. لاأكتر ولا أقل
والروايه نفسها كالعده فيها مناطق عاليه قليله جدا , وأغلبها تطويل ومط ممل فى مواقف غبيه
والنهايه فى منتهى الاستفزاز
نصيحه طبعا .. ماتشتريش حاجه لد. نبيل فى المعرض !
وماأعتقدش إن الكتاب اللى معاكى مهما كان هيبقى مستفز بدرجة قصتين ملف المستقبل اللى قريتهم على خوانة دول :(
اسمه إيه الكتاب ده صحيح ؟
كتاب يكرّهك في الوجودية كلها عن هيجل مش فاكرة اسم المترجم علشان انا في المكتب..بس بجد لو قابلت اسمة صدفة في المعرض-هالحق احفظة لما اروح-هاروح واسيب المعرض كله ..نبيل فاروق لا خلاص اتعلمت الدرس من اول فارس المستقبل اللي هوا خليط من رجل المستحيل بتاع اللحم المفري مفهمتش سر عداء نبيل للحم المفري وبين ملف المستقبل ونور الدين المثالي لدرجة القتل
من يومها عرفت قيمة احمد خالد توفيق علي الاقل مبيعليش الضغط
مع الكتاب بقي بما انه ممل جدا قاعدة اقرا ايه
كنز بالنسبة لي ..مجلد ميكي لسنة 1968..لقيتة صدفة عند نعمان صديقي من سور أبو الريش للكتب القديمة
اممممم ..
لأ , كده الوجوديه تكسب !
نبيل فاروق مش مستفز للدرجه دى ^_^
مش عارف ليه ماباحبش أقرأ كتب فلسفه..
وأنا صغير قريت كتب كتيره جدا لمصطفى محمود.. عرفت بعد ماكبرت إن ده ضرّنى جدا بصورة ما لأن تبسيط د. مصطفى للمسائل الفلسفيه والعلميه كان أحيانا بيبقى أكثر من اللازم فيتهيألى أنا كقارىء إنى مش محتاج أقرأ زيادة عن المواضيع دى , وأستغرب بقى عن العالم التافهه اللى عمّاله تفكر وتعصر مخها فى تحليل بديهيات واضحه !
رغم كده باشكره جدا إنه إدانى حصانه من نوع ما تجاه الفلسفة الزيادة أو اللى مالهاش لازمه
حاول تستمتع بالحياة قبل ماتحاول تفهمها , أو ماتنساش على الأقل تستمتع بيها على ماتفهمها :)
ورغم إن ابن عمى الأكبر منى مرّه قال لى إنى باتفلسف لما كان بيناقشنى عن مستقبلى وأهدافى فى الحياة ... إلخ , بس برضه لسّ÷ باحس بنفور من أى كتاب بيتكلم فى الفلسفه
يمكن لأن الكتب اللى وقعت فى إيدى لحد دلوقتى أكاديميه نوعا ما ؟ جايز ..
إنما الأكيد إن لو معايا مجلد ميكى عمرى ماهاسيبه وأبص فى أى كتاب تانى مهما كان :)
أساسا الفلسفة التاريخية عند هيجل
ترجمة -الله يسامحة - ابراهيم فتحي
تصدق اول مرة اخد بالي ان المصيبة ده من اصدارات هيئة الكتاب سنة 90
حقيقي الفلسفة فن الحديث عن البرتقالة لحد ماتفسد ..مصطفي محمود باتوة منه كتير يمكن زي ماقلت علشان الامور بسيطة بتسرح انت وتكمل السطور في عقلك
حاول تستمتع بالحياة قبل ماتحاول تفهمها , أو ماتنساش على الأقل تستمتع بيها على ماتفهمها
:D
سيبك هيتقري يعني هيتقري علشان ابدا في كتب المعرض ..فاضلة فصلين هانشئ فوقية عمود من الكتب علشا ملقيهوش تاني
:)
اةة دار الهلال ...قال نهضة مصر قال ..فاكر شهيرة خليل وصفحات الحكايات في ميكي ..دلوقتي في سمسم وسمسمة ساكني كتاب الاضواء وتيتة هدية وحاجات رخمة
Post a Comment