أيوه نستاهل ياحنان

يتصل بى من السعودية ليهنئنى بالعيد لأكتشف أن السعودية –كالعادة- ستحتفل بعيد الفطر غدا مع بعض البلاد الأخرى فى حين ستحتفل به مصر وبعض البلاد الأخرى بعد غد !

عادى طبعا ..

وأعتقد أنه من سوء الأدب أن نتحدث عن الخلاف بين المسلمين وقضايا الريادة والعلم والعقيدة … إلى آخر هذه المواضيع - المهمة طبعا وإن تم ابتذالها بكثرة الحديث فيها – ونحن نتجرع المهانة والذل من سيادة الرئيس وحرم سيادة الرئيس وبالطبع البيبى الصغير ..

فتعطف سيادة الرئيس بالتصدّق ب 700 كرتونة فيها زيت وسكر ومكرونة والحلو قمر الدين إلى أبنائنا فى الجامعة !

وبالطبع تفضلت قرينته على جزء آخر من متسولى الشعب المصرى وزادت على الكرتونه إياها خمسين جنيها إضافية !

أما بيبى فطمع فى ثواب زيادة ونزل بنفسه يوزع الصدقة على المحتاجين من شعب العجوزة

شعب من المتسولين مستحقى الصدقة وياريتها كمان صدقة تستاهل إلا دى كيس سكر وكيسين مكرونة وقزازة زيت ولفة قمر الدين ؟؟؟

يعنى مش مجرد عطف وإحسان .. ده احتقار كمان !

السيد الرئيس وصل له إن الشعب جعان ومش لاقى يأكل فاتصرف بأريحية شديدة وإداهم كيسين مكرونة للعيال والسيدة حرمه قالت جايز يحتاجوا حاجه للعيال واحنا على وش مدارس فزوّدت خمسين جنيه أما النجل فأصر إنه ينزل يوزع بنفسه بينه وبين الناس علشان يبقى الثواب أكبر ومنها يسخّ، للرئاسة قبل مايبدأ الماتش ..

محدش منهم باعتبارهم أصحاب مصر دلوقتى ولاكإنهم اشتروها بفلوس أبوهم هى الناس جعانه ليه ؟

آه سورى .. ماهم سألوا نفسهم صحيح واكتشفوا إننا شعب فجعان ومبذر وبيستهلك كميات أكل مهولة فى رمضان بمنتهى الإسراف وعلشان كده عملوا لنا إعلان يأنبونا فيه وخاطبوا الشعب المصرى على إنه “حبوب “ !!!!!

شفت الحقارة ؟؟؟

حقارتنا احنا طبعا .. السيد الرئيس يدينا كيسين مكرونة بحالهم فبدل مانعمل كل يوم 30 جرام وللا حاجه علشان نوفر ويكفونا لآخر الشهر نقوم نعمل حفله كبيييييييره ونطبخ فيها الكيسين بحالهم ومانحتفظش حتى بحبايتين للزمن وبعد الحفلة ماتخلص والناس يمشوا نكتشف إن باقى الكيسين لسه مالى الحلل فى المطبخ ونقعد ناكل فيه يومين تلاته لحد مايعفن فنرمى نعمة ربنا فى الزبالة !!

شفت الحقارة ؟؟؟

 

شوف الفرق بيننا كمصريين دلوقتى وبينهم أيام زمان ..

زمان كان الشعب بيوفر فى الأكل والمصاريف لدرجة إنه ماكانش بيرضى يجيب جزمة بالشىء الفلانى فالحكومة قررت تشترى له مراكيب

إنما احنا بإسرافنا مش مديين الحكومة فرصة لحاجة من دى

الريس هيلاحق علينا كراتين منين واحنا مبذرين كده ؟

 

..

..

والله العظيم نستاهل

والله العظيم نستاهل

وعيد مبارك باختيارنا مش غصب عنا !

عجوور

عبدالرحمن عجور

مواليد 1950 ووافته المنيه عام 1998 –الله يرحمه ارتاح قبل مايشوف المهازل اللى عايشين فيها دى-

قدم الكاريكاتير فى :

مجلة كاريكاتير- روز اليوسف- الأخبار- مصر الفتاة- صوت العرب- المجد الأردنية

حصل على الجائزة الأولى فى مسابقة رسامى الكاريكاتير العرب التى نظمتها الجمعية المصرية للكاريكاتير بالاشتراك مع مجلة كاريكاتير عام 1993

وهذه كل البيانات المكتوبة على غلاف الكتيب الصغير الصادر عن الجمعية المصرية للكاريكاتير وهو كل مااستطعت أن أجده لهذا الرسام الموهوب بعنف –فى رأيى على الأقل- بالإضافة لبعض رسوم متفرقة فى بعض أعداد مجلة كاريكاتير فى عصرها الذهبى ..

بحثت على الإنترنت كثيرا بحثا عن أى معلومات إضافية أو مزيد من رسومه فلم أجد شيئا على الإطلاق :(

و .. هاكم بعض أعماله فربما يعجبكم كما أعجبنى ..

 

 

 

 

 

 

 

 

 

 

 

 

 أما هذا الكاريكاتير فأحبه بشكل خاص !!

 

 

و شكرا على الكود يا ساسو من غير مناسبة !!

ترنيمة

 

ذات يوم وأنا طفل كنت أرى النملة سائرة فأضربها بقدمى وأقتلها عامدا متعمداً, شاعرا بأننى أمارس حقا وأؤدى واجبا وأنا أقتل هذا الكائن المهين الذى يعترض بهذه الجرأة طريق كائن عظيم مثلى.

ورأتنى أمى أفعل ذلك فوبختنى أشد التوبيخ, وحدثتنى بما ينتظر القساة أمثالى من البهدلة يوم القيامة, ومن عذاب الحريق بعد ذلك فى جهنم خالدين فيها أبدا. فملأنى هذا الحديث رعبا وأقلعت تماما عن قتل النمل, بل وصرت أمشى مطأطىء الرأس نحو مواقع قدمى مخافة أن أقتل –حيث لاأدرى- نملة مسكينة شاردة.

وذات يوم رأيت أمى تحمل زجاجة كبيرة تفوح منها رائحة الجاز وتتجه بها نحو ركن فى المطبخ حيث جلست القرفصاء لكى تفرغ محتوياتها فى أحد الجحور هناك.

- بتعملى إيه يانينه ؟

هكذا سألتها فى براءة فلم تجبنى. إذ كانت كما تبينت بعد ذلك تصب الجاز فى أحد أوكار النمل بقصد إبادته وتطهير المطبخ منه. فعجبت أشد العجب من هذا التناقض الصارخ أمامى, إذ تستبيح أمى لنفسها قتل آلاف النمل بضربة واحدة ساحقة فى حين تحاسبنى أنا على استمتاعى البرىء بين حين وآخر بقتل نملة واحدة يتيمة فهل هى لاتكترث بما ينتظرها يوم القيامة من عذاب أليم, أم تراها تعرف –دون أن تقول لى- أن قتل النمل بالجملة حلال فى حين أن قتله بالقطاعى هو وحده الحرام؟ أم أن المسألة أخطر من ذلك, وأن الله جل جلاله يكيل للناس بكيلين, فيبيح للأمهات الكبيرات القويات من الجرائم مايحرّمه على أطفالهن الصغار الغلابة المستضعفين؟

وأسئلة كثيرة من هذا النوع شرعت فى توجيهها إلى أمى التى استمعت إليها حينا فى صمت لتستوعبها, فلما تم لها الاستيعاب قالت فى إيجاز صارم:

- اجرى العب برّه !

 

 

ترانيم فى ظل تمارا

محمد عفيفى

عزازيل

رواية عزازيل ليوسف زيدان

موجوده هنا

 

عن الجحيم الأرضى

مش قادر أظبط الكتابة بالعربى من ساعة ماحملت الويندوز الجديد

الظاهر مكتوب علينا نتعجب دايما بالمقلوب !!!!

لن أكرر هرائى المعتاد عن التأخير والكسل وماإلى ذلك فلدى الآن حجه قوية لعدم الكتابة بانتظام ألا وهى الامتحانات بالطبع ..

بامتحن بقى لى حوالى شهرين أو أكتر ولسه لى حوالى شهر كمان –لاتتعجب إنها كلية الطب – بس مش مسألة امتحانات بس

الدنيا بقت ملخبطه جدا جدا

طبعا مش هاحاول أناقش حاجه معينه كويس أو اتكلم بنظام أو منطق لأن مصير الكلام ده هيبقى ساعتها إنه يتحفظ عندى ضمن الدرافت ومش هاكمله تانى ويزيد غيابى أكتر عن البلوج

أول حاجه عن الحركه الجديده اللى عملتها تى داتا وبقى دخول المستخدمين على الشبكة بيوزر نيم وباسوورد وعلشان تجيبهم لازم تجيبهم من الشركة ولازم –طبعا- يكون معاهم رقم تليفونك والموبايل كمان –الموبايل مش إجبارى بس أهوه بجملة بقى !- وماأظنش طبعا إن الموضوع ده علشان يرفعوا مستوى الأداء مثلا

لكن الهدف هو تسهيل الرقابة على الشبكة العنكبوتية وتحديد العناصر المشاغبة من البلوجيين والفيسبوكيين وأشباههم

وطظ طبعا !!

ماهم بيراقبوا التليفونات الأرضى والمحمول وحاشرين مناخيرهم فى كل حاجه من غير حاجه

وكده كده حتى لو مشيت جوه الحيطه هتاخد على دماغك يعنى هتاخد على دماغك

وقانون الإرهاب جاى جاى

 

حاجه تانيه بتزيد يوم عن يوم وملاحظها –وغالبا الكل ملاحظها – وهى اقتراب المواجهة

العنف بيزيد بصورة غير معقولة والضيق اللى الناس عايشه فيه بيقلبهم لوحوش يوم بعد يوم

أنا شخصيا –وقد كنت شخصا هادئا أقرب للخجل ولاأميل للمواجهة على الإطلاق- أصبحت أقرب للعراك فى أى موقف

صوتى بيعلى وباتعصب بمنتهى البساطة و-أحيانا- ممكن أرتكب جناية أو أتسبب فى عاهه مستديمة لشخص ما فقط لأنه كان فى المكان غير المناسب فى الوقت غير المناسب !

الأستاذ فهمى هويدى كتب مقال فى الدستور من حوالى شهر ورجع نشره تانى من كام يوم عن واحد صاحبه من المدن اللى مرتاحه شوية مع سواق تاكسى دردش معاه شوية عن الهجوم القادم على مدينتهم ومن شابههم من الفئات الشقيانه اللى ضاقت عليهم ..ولما نسى موبايله معاه سواق التاكسى قاله إنه مش هيرجعهلوله طبعا .. إذا كان ناوى يسرق بيته بعد كام شهر هيرجعله موبايله دلوقتى ؟؟

وفيه حوادث تانيه كتير كلها بتقول إننا رايحين فى داهيه

بس هنكون احنا بس لأن الساده مش هيكونوا معانا لما تقوم الهوجة

نص ساعه بس ويكونوا كلهم فى بلاد بره .. اللى بالطياره واللى باليخت ويمكن اللى بالغواصة كمان !!

واحنا نبقى ناكل فى بعض أو تيجى اسرائيل تحتلنا –أقصد يبقى الأمر رسمى بقى بدل ماهو عملى وشفوى بس- مش فارقه

لكن أنا شايف إن فيه حل

أدهم شرقاوى جديد

روبين هود عشوائى من عشوائياتك ياقاهرة المعز

رمز يلف الناس حواليه

طبعا ماباتكلمش على زعيم سياسى أو رئيس حزب جديد لأ

أنا باتكلم عن لص ومجرم ولو حكمت كمان يكون عشماوى

بس ده كله يكون فى اتجاه واحد بس .. للناس اللى فوق

القانون مايقدرش يحاسب واحد محتكر أو واحد مزور أو واحد مقترض أو حتى صاحب عباره

لكن مجرم ممكن ينسف مخزن من مخازنه أو يضرب له شحنه فى الجمرك

ممكن يسرق ملفاته ويفضحه فى الجرايد وينزل أسهم شركاته فى السوق

تخيلوا لو ظابط بوليس من اللى غاوى تعذيب فى الناس وبيعتبرنا حشرات مش قد سيادته روّح يوم لبيته لقى اللى قاعد مستنيه فى الصالة ومعاه مسدس وخلاه يقلع هدومه وينزل فى الشارع ملط زى اللى عذبهم واتنشر الكلام ده فى الجرايد كام ظابط تانى هيفضل يعذب ويعتبر نفسه خليفة الله فى أرضه؟

لما أمين الشرطه اللى بيبلطج على سواقين التاكس والميكروباص والناس اللى على باب الله ياخد له علقه محترمه

لما مستعمره من مستعمرات الناس الهاى دى تنضرب فيها مواسير المجارى والمياه وكمان محولات الكهرباء

أو حتى كل مستعمراتهم

ويتنشر ده كله فى الجرايد

بيتهيألى دى الحاجه الوحيده اللى ممكن تخلى الناس تنفجر فى الاتجاه الصح بدل مانولع فى بعض

 

….

فارس متمرد ع الجوانين

 

 

قبل أما تدب خطاكي بأدوب .. و أتحرق م الشوق الملهوب

و أتوجع كالفهد المجروح

وما إن يتبدى لي محياكي .. و أدوق الرحمة بنبع هواكي

بساتين الفردوس تلوح

روحي فيكي تروح

دوح .. جميل الروح

حسبك شتيتي العقل أشتات .. و جنيتي نجوم السماوات

و عديتي الحسن المسموح

إن قلت وداع أنقسم اتنين .. فارس متمرد ع القوانين

و كسير مسلم ما بيبوح

روحي فيكي تروح

دوح .. جميل الروح

ولهان في موجاتك سبحان .. محاوطني المي و ظمآن

رويني للشوق ينوح

روحينا من بين الأرواح .. بيتلاقوا صافيين ملاح

بفردوس العشق المفتوح

 

روحى فيكى

من ألبوم فى قلب الليل

تقدروا تلاقوا أشهر أغانى على الحجار وتحملوها سواء صوت أو كليبات على موقعه

www.alielhaggar.com

كلمات الأغنية جبتها من نورماندى

وفى محل اللعب هتلاقوا عم بطاطا

دنيا مسعود

 

بتنادينى تانى ليه ؟

 

 

وكمان

دنيا يادنيا ماكفايه اللى جرى ؟

 

 

صورة الفيديو مش قد كده خالص بس أهوه أحسن من مافيش

:)

وهنا على اسم مصر بيتكلم عن حفلتها وجايب ألبوم من أشهر أغنياتها

وأدى رابط الألبوم للناس الكسولة