تخريف

يأتى إلى عبده مسرعا وعلى وجهه علامات اللهفة

مش الأستاذ عزيز بتاع الفرنساوى هيسافر فرنسا -

فرنسا ؟ وهيروح فرنسا يعمل إيه ياعبده؟-
طبعا هيدرّس فرنساوى هناك -

نعم ؟؟؟ هيروح يدرس فرنساوى لبتوع فرنسا ؟ إنت عبيط يابنى ؟-

تبدو عليه الحيرة قليلا ثم ..

وإيه يعنى ماحنا بناخد عربى فى المدرسة مع إننا عرب وبنتكلم عربى-

مظبوط بس مابنجيبش مدرسين من فرنسا عشان يدرسولنا عربى ياعبده-

ويبتعد عبده وعلامات عدم الاقتناع تكسو وجهه

فزورة المصرى اليوم

من حوالى 3 أيام لقيت الأهرام عند واحد .. تصفّحتها كده ولقيت خبر ظريف ..

جهاز حماية المستهلك‏:6‏ أنواع مياه معبأة غير صالحة‏ و‏6‏ لا تطابق مواصفاتها

كشف جهاز حماية المستهلك عن عدم صلاحية ستة أنواع من المياه المعبأة المتداولة في الأسواق للاستخدام‏,‏ وذلك من بين‏21‏ نوعا جري تحليلها في المعامل المركزية لوزارة الصحة‏.‏ وأوضحت الدراسة أنه لا يوجد في مصر مياها معدنية‏,‏ وأن جميع أنواع مياه الشرب المعبأة في مصر مياه طبيعية مصدرها آبار جوفية يجب ألا يقل عمقها عن‏160‏ مترا إلي‏170‏ مترا‏.‏ وأشارت الدراسة إلي أن أنواع المياه التي ثبت عدم استيفائها الاشتراطات الصحية‏,‏ ربما لا تلتزم بعمق البئر‏,‏ أو موقعها‏,‏ أو محيط البئر‏,‏ وهو ما يتسبب في التلوث‏.‏ وبينت الدراسة ـ التي أجرتها الجمعية المصرية لحماية المستهلك واستمرت شهرين ـ أن الأنواع غير الصالحة‏,‏ وهي‏:‏ الندي‏,‏ وشويبس‏,‏ وأكواستون‏,‏ ونهل‏,‏ وأكوامينا‏,‏ وحياة هي مياه ملوثة بميكروبات دقيقة‏,‏ وأن ست شركات من بين الشركات الثلاث عشرة التي تبين صلاحيتها بالفحص تتضمن اختلافا في بعض بيانات البطاقة المرفقة بالعبوة‏,‏ وهذه الشركات هي‏:‏ بركة‏,‏ والمنار‏,‏ ودلتا‏,‏ وأكوافينا‏,‏ بالإضافة إلي العبوات الصغيرة من نهل‏,‏ وحياة‏.

‏

قلت كويس والله .. آدى الشركات اللى ماكناش عارفين أساميها لما المصرى اليوم نشرت عنها

وجه فى بالى إنى ممكن أكون ظلمت المصرى اليوم فى كلامى قبل كده

يمكن يكون كان ممنوع نشر الأسامى لحد مايتأكدوا وللا حاجه ؟؟؟ أو لازم الأهرام تنشر الأول !!

لكن لما ألاقى النهارده فى المصرى اليوم نفس الخبر تقريبا وبرضه من غير أسماء الشركات المقصوده ..

وبعدين أقرأ التفاصيل والخبر الكامل وبرضه مايبقاش فيها اسم ولاشركة من الشركات .. وحتى لما يجيبوا سيرة عفت السادات رئيس شركة منهم يقولوا رئيس إحدى الشركات بدون التصريح باسمها يبقى أكيد فيه حاجه مش سليمه !

حتى لو افترضنا إن الموضوع لسه مش أكيد 100% وإن الأهرام نشرت الخبر قبل الكلام مايبقى أكيد ..

من مصلحة المستهلك إنه يعرف الشركات والسلع اللى عليها شبهة واللى ممكن تكون مش سليمه ولو اتضح بعد كده إنها سليمه وإنها كانت مؤامرة أو حاجه فالشركات تقدر تعوّض كل الخساير وتقوم بحملات إعلانية لتصحيح الأوضاع تانى ..

لكن لو الخبر بقى سليم وإن السلع دى بايظه فالكارثة هتبقى فى صحة الناس ودى مش ممكن نعوّضها ..

يعنى فى كل الأحوال لازم ننبه الناس للخطر حتى لو مش خطر أكيد لأننا لو استنينا إنه يبقى أكيد هتبقى ساعتها كارثة مش مجرد خطر وارد ..

بصراحة أنا مش فاهم فعلا وجهة نظر محررى المصرى اليوم فى حاجه زى كده خصوصا بعد نشر الشركات بوضوح فى الصفحة الأولى بالأهرام ..

ولو حد فاهم ياريت يفهّمنى ..

ملحوظة على الهامش
يبدو أن رابط الخبر على الأهرام يؤدى دائما إلى صفحة اليوم الحالى
على كل حال تم نشر الخبر يوم 26 ديسمبر 2007
وستجدونه على الصفحة الأولى مباشرة

That's Why I Hate My Life !

1- لأننى أضعت منها الكثير بدون تحقيق شىء يذكر ..فبعد 26 عاما مازلت طالب طب متوسط المستوى يعرف الكثير عن الكمبيوتر -وهو مايجيده الآن أى طفل !!-

2- لأنه يبدو أننى سأستمر فى إضاعة الباقى من حياتى !

3- لأننى أحمّل العديد من الأفلام الرائعة والبرامج الممتازة ثم أمضى وقتى فى لعب الفيفا ويكون مصير 95% من الأفلام التى حملتها أن تحرق على ديفيديهات للتخزين على أمل مشاهدتها فى مرحلة الشيخوخة.

4- لأنى لم أعد أشعر بمذاق الطعام الذى أحبه ..

5- لم أعد أقرأ سوى الجرائد والمجلات وبعض الكتب الخفيفة ..

6- أعرف أننى مريض بالاكتئاب وأفهم الآن أنه مرض مثل أى مرض آخر -زى البرد زى الصداع على رأى جاهين- وعلى الرغم من ذلك أستسلم له ولم أفعل شيئا حتى الآن لمواجهته .. فقط أدع الأمور تسير نحو مجراها الطبيعى فإما أن أخسر كل شىء أو أصل لبر الأمان على جذع طاف بدون جهد !

7- لأننى لم أستطع طوال المده السابقة أن أضع مشاركة واحدة فى هذه المدونة.. كتبت الكثير على جهازى ثم لم أكملها أو لم أنشرها .. حتى الردود .. كتبتها لدى أيضا ثم لم أنشرها ..من العجيب أن أكترث كل هذا القدر لما لايمثل عملا أدبيا أو إبداعيا ..لاأعتقد أن الأمر يتعلق بكونى أود أن يعبر الرد عن اهتمامى الحقيقى بزوارى هنا أو بعض الأفكار المهمه بالفعل التى قد يطرحونها بدون أن أبدو متملقا أو مجاملا قدر ماقد يكون تعبيرا عن محاولتى ألا أظهر سخيفا أو تافها !!

لعن الله الملل .. أومن بأن أغلب من يأتون إلى هذه المدونة يأتون بدافع الملل .. هذه النوبات التى يتجول فيها المرء فى قوائم المدونات التى يحبها بحثا عن مدونات جديدة قد تبث فيه بعض الحماس .. أنا أفعل هذا كثيرا .. وتكون سعادتى فائقة حينما يحدث هذا بالفعل .. لكن الجزء الأكبر يكون للمدونات التى أجرى بشريط الصفحة الجانبى ملقيا نظرة سريعة ثم ملقيا بهذا الشخص وراء ظهرى .. لاأريد أن أكون هذا الشخص ..لكنى للأسف لو وجدت صفحتى كمدونة شخص آخر سألقى نفس النظرة السريعة ثم أغلقها للأبد أو على أفضل تقدير قد أحفظها لأقرأها فى مرة ثانية لاتجىء أبدا إذا ماأثار عنوان أو شكل موضوع ما اهتمامى ..

8- لأننى استسلمت لكون أخى سلفيا مهتما بظاهر الدين لابجوهره ولم أسع لأن أدرس بما يكفى لتصحيح مايلقى فى رأسه من ضلالات اكتفاءا بأنه مازال يشاهد الأفلام والمسلسلات معى على الكمبيوتر حتى وإن كان يعتقد أن هذا إثم وبالطبع لايرضى مطلقا أن أنقل فيلم من جهازه إلى أى شخص آخر حتى لو كان هذا فيلم كارتون - بسبب الموسيقى !!- ويشترط على من أورطه فى النقل له ألا ينصت للموسيقى وهو يشاهد الكارتون .. فقط أنتظر أن يتكفل الزمن بإخراجه من هذه الازدواجية داعيا الله ألا تكون النهاية أن ينسى آدميته للأبد معتقدا أن هذا هو الدين ..

9- لأننى لم أعد صريحا كما كنت .. بدأت أكذب باسم المجاملات !

10- لأننى أصبحت أهرب من المواجهات باسم الحكمة .. أصبحت أومن أنه لاأحد يقتنع بالصواب فأترك المخطىء -فى رأيى بالطبع- بدون نقاش أو بنقاش عجول لايهدف إلى إقناعه حقا قدر مايهدف إلى إبراء الذمة ..ربما بسبب الكسل وعدم تحمل النقاش الجاد أو استسلاما لسطحية الدلائل التى لدى واعتمادى غالبا على التفكير المنطقى أكثر من الأدلة واستسهالى عدم البحث عن أدلة جدية تدعم وجهة نظرى -رغم إيمانى بصحتها- فيكون إنهاء النقاش أو عدم الدخول فيه أصلا عو السبيل الأيسر دوما ..

11- لأن طبيعة الإنسان هى النسيان وأنه فى الدنيا لك أن تحب من شئت فإنك مفارقه ! ... كم من صديق فقدته حتى الآن .. وأعرف أنه مازال لدى الكثيرون لأفقدهم أيضا ..بسبب تخلفى الدراسى أحيانا أو البعد الجغرافى فى أحيان أخرى ..أو مشاق الحياة المختلفة وطبيعة الدنيا ..

12- لأننى أشفق على نفسى من اليوم الذى سأستيقظ فيه لأجد جمال مبارك رئيسا لجمهورية مصر العربية ...

13- لأننى مازلت أقرأ عمود سليمان جوده فى المصرى اليوم .. أصبح يشكل لى نوعا من إثبات الذات ! pathetic !!

14- لأننى لم أقرأ فى القرآن منذ فترة كبيرة .. ولأننى أصلا لست معتادا على هذا ..ربما ينضوى تحت هذه النقطة أيضا أننى لاأشعر بالخشوع فى صلاتى ولاأعرف كيف أستطيع هذا ..بل ولم أعد أصلى الفروض التى أفوتها وأنا نائم أحيانا ..

15- لأننى أزور مدونة بيسو بين الحين والآخر لكنى لم أقل له أنه يقع أحيانا فى خطأ الاختلاف لمجرد الاختلاف أو الخلاف لأننى خفت من لسانه السليط !! -بالمناسبة أنا أحترمه فعلا وماباقولش كده عشان خايف منه !- ..

16- لأننى بعد أن أنهى هذه التدوينه وأنشرها -سأنشرها هذه المره- سألعب المزيد من الفيفا 2008 !

17- لأننى لم أحك بعد عن زوجتى -ما أنا كتبت كتابى خلاص- خوفا من أن أجرح مشاعرها بكلمة ما دون قصد حينما تقرأ هذه المدونة وتجد أننى مازلت أتساءل عن حبى لها كما أتساءل عن كل شىء فى حياتى رغم أنها تعلم يقينا أننى لاأستطيع العيش دونها -بالمعنى المجازى بالطبع !- ..

18- لأننى توقفت عن فكرة التدوين اليومى بدافع الكسل أو الانشغال أو الاكتئاب ..

19- لأننى فى حالة مزاجية جيدة جدا الآن ورغم ذلك سأنشر هذه التدوينة لأنه إن لم أفعل الآن فغالبا لن أفعل أبدا ..

20- لأننى أفكر فى مسح هذه التدوينة الآن لسخافتها

واحنا ولاد الكلب الشعب

بترن الجمله دى فى ودنى من فترة كده كل يوم ..

من ساعة ماقريتها للأبنودى أول مره وهى معلقة معايا .. وكل يوم فى الجرايد أسمعها صرخة فى ودانى ..

النهارده حسيتها قوى فى مقال جودة باشا عن حياء سامح فهمى !! ودى مش بنت سامح فهمى .. ده مجرد تشابه أسماء ..

بداية المقال خدعتنى كالعاده وتصورت إن سليمان ناوى يتكلم بضمير عن التكية اللى ورثها الوزير المعروفة لدينا نحن العامة والدهماء بوزارة البترول ..

وبعدين اتفاجئت إن الراجل بيتكلم عن دعم الطاقة اللى المفروض يشيلوه بقى لأنه ياعينى بيروح فى جيوب الهبيشه بتوع الحزب الوطنى والحكومة .. وإن المفروض إن الفلوس دى تروح لتعليم الغلابة اللى مش لاقيين كتاب يعرفوا فيه كوز الذره وعلاقته المحورية بالأبجدية متمثلة فى حرف الألف المقارن به أبدا حتى يوم الدين ..

الأخ جوده بيتكلم عن 45 مليار دعم للطاقة فى غير مكانهم من وجهة نظره .. وأحب بس أسأل سؤال ..

هو ال45 مليار دول بعيد عن دعم السولار والبنزين ؟ يعنى هم دول دعم للمصانع بتوع الناس اللى مش محتاجينهم بس ؟

وللا دول تبع السولار اللى لما بيغلى بتزيد أجرة المواصلات على الخلق اللى رايحه شغلها ودراستها كل يوم الصبح وراجعه آخر النهار ؟

ولما زادت الأسعار آخر مره زادت تكلفة المواصلات بالنسبة للمواطن العادى بحوالى 30 أو 40 % بخلاف الزيادة فى أسعار الزيوت وباقى المواد الغذائية الأساسية زى الدقيق والرز والسمنه وحتى الخضار اللى مافيش غنى عنه زى الطماطم والبطاطس ..

تيجى سيادتك دلوقتى عايز تشيل الدعم .. آل إيه عشان النهيبه بتوع الحزب الوطنى .. طب ماتلغى الدعم عن المصانع اللى تزيد رؤوس أموالها عن حد معين .. أو حتى عن المصانع كلها ياأخى وتوجه الدعم لصالح المواطن البسيط .. سواء بقى دعم طاقة وللا دعم لحمة زى مالناس بتتمنى عشان يتعرفوا على الكائن الخرافى ده ؟

إيه الفكره من إنى أشيل الدعم اللى رايح للمواطن فى الطاقة وأوديه فى التعليم -ده بفرض إنه هيروح للتعليم أصلا؟ - . المفروض لما نتكلم عن مبالغ مهدرة تكون محدد أكتر من كده وتتكلم عن دعم المصانع الكبيرة اللى مش محتاجاه .. أو زى ماجه فى المقال دعم المصانع اللى بتصدر منتجاتها للخارج .. ده اللى أتكلم عن إنى أغليه أو لأ .. مش دعم الطاقة بصوره مطلقة !

وبعدين فى مقالك الطويل العريض فى امتداح حياء وزير البترول الظريف اللى تنبأ بارتفاع سعر برميل البترول إلى 100 دولار مسألتوش ليه إذا كان تنبأ للغاز إنه هيرتفع سعره هوه كمان قبل مانصدره لاسرائيل وللا لأ؟

واشمعنى بتتكلم عن الفلوس المهدره فى الدعم ومابتتكلمش عن الفلوس المهدرة فى اتفاقية الغاز المصرى اللى بيتباع برخص التراب لاسرائيل عشان تضرب بيه إخواننا -وللا بلاش إخوان- .. أشقائنا الفلسطينيين ؟

وحتى سيبك من البعد القومى والإسلامى والإنسانى ..

خليها تجارة بحتة .. الفلوس اللى رايحه على مصر فى اتفاقية بيع الغاز المصرى لاسرائيل بأسعار أقل كثيرا من الأساعر العالميه وبعقود مذله لمدى طويل الأجل .. الفلوس دى كام بالظبط ؟ وسايبينها ليه لاسرائيل ؟ مش المفروض الفلوس دى تروح للتعليم والصحة برضه ؟ وللا فلوس الدعم هو اللى تاعباك قوى ؟

وللا يمكن عشان دى فى الآخر لينا احنا ..

احنا ؟..

احنا ولاد الكلب .. الشعب !

ليه بجد ؟

فى المصرى اليوم النهارده خبر عن فساد المياة المعدنية المنتجة من ثلاث شركات

ويعدد الخبر الدلائل والفحوصات التى تمت بمعرفة معامل وزارة الصحة لإثبات عدم مطابقة زجاجات المياة للمواصفات ..

ويحاور المحرر الدكتور حسين صوفي أبوطالب وكيل وزارة الصحة في الفيوم الذى يحذرنا من تناول هذه المياة لتلوثها بالبكتيريا القولونية !

ويذكر لنا أن الدكتور ممدوح الباهي مدير إدارة الطب الوقائي في مديرية الصحة أصدر قراراته بمصادرة زجاجات امياه المخالفة للمواصفات ..

جميل جدا كل ده ...

....

بس مش ناقص حاجه ؟؟

مش محتاجين كقراء نعرف معلومه بسيطه عن أسماء ال3 شركات دول ؟

طالما شركات تم إثبات عدم مطابقة منتجاتها للمواصفات وكذلك مصادرة الموجود منها فى الأسواق ..إلخ

إيه الدافع بقى لحجب أسماء الثلاث شركات ؟

دفعوا للمحرر ؟ وللا الجريده خايفه لا الشركات ترفع عليها قضية تعويض ؟

ولو الكلام اللى فى الخبر صحيح وإن معامل الصحة أثبتت فساد منتجات الشركات دى يبقى الجريدة تخاف من إيه ؟ وأنا كقارىء هاعرف منين أسامى الشركات دى علشان أقاطع منتجاتها ؟

..

والمشكله إن دى مش أول مره تقابلنى نفس الحكاية ..

خبر عن فساد منتجات شركة للبسكوت مثلا أو العصير أو اللحوم أو .. أو ..

كل ده بدون ذكر اسم الشركه النصابة .. ليه ؟؟ مش فاهم بجد !!

عشان الجرايد مابتحبش تجيب فى سيرة الناس مثلا ؟؟؟

وكم ذا بمصر

والآن نقدم لكم خبيرة التجميل الأولى فى مصر ..

 

آه والله العظيم خبيرة التجميل الأولى فى مصر !!

وطارت ملفاتى

 

كل الملفات اللى كانت على حسابى بتاع ال 4shared اتمسحت لأنى انشغلت لمدة شهر كامل عن فتح الموقع !!

وولاد الذين ماكلفوش خاطرهم حتى يبعتوا إيميل تحذيرى أو حاجه قبل مايعملوا كده ..

أمال لما بنسجل فى الموقع بنكتب إيميلنا ليه يا أولاد الفرطوس ؟؟؟

المهم ..

طبعا كده كل الروابط القديمة وكل الأغانى والملفات طارت وأنا بصراحه مش فاضى أراجع المدونة من أولها وأرفع كل الملفات تانى وأعدل الروابط من أول وجديد..

فياريت أى حد كان عاوز يحمل ملف قديم ومالقاهوش يكتبلى اسم الملف فى التعليقات وأنا أرفعهوله تانى ..

أعتذر عن اللخبطه والسهو فزيارة واحده كل شهر للموقع المذكور كانت هتشيل عناء البهدلة دى بس يللا .. هابقى آخد بالى بعد كده بإذن الله وهاحط رابط الموقع على سطح مكتبى علشان مانساهوش تانى أبدا !

ويجعلها آخر الأحزان وكده يعنى !

 

مسألة بيض

 

وتأثرا بجلوسى ساعتين حتى الآن أمام وسع خيالك .. تذكرت الأخ الظريف اللى بيدخل دايما فى وسط أى مناقشة متمتعا بحياد سرمدى ومعرفة لانهائية وحنكة لاإرادية ليوقف المتناقشين البلهاء عند حدّهم ..

مش كفاية كده بقى ؟ أنا شايف إن المناقشه مالهاش لازمه ومافيش منها فايده وكل واحد هيفضل متمسك برأيه وماحدش هيقتنع بكلام التانى !

لينخسىء طبعا كل أبله من المتناقشين ويلوى ذيله بين فخذيه ويقعى طالبا الصفح ومعتذرا عن انزلاقه لمناقشة فكرة ما يؤمن بها ..

دول بصراحة أكتر ناس باتخنق منهم وخصوصا لما يبقى النقاش ماشى بصوره عادية .. مجرد اختلاف عادى فى الرأى بين اتنين أو مجموعتين وكل جانب بيحاول يدلل على صحة رأيه وخطأ الجانب الآخر .. الحوار العادى يعنى .. حتى لو كان النقاش شكلى أو جدلى أو .. أو ..

ياسيدى أهو لو حتى اللى بيتناقشوا مش هيوصلوا لحل بينهم أهوه فيه ناس بتقرأ ويمكن تستفيد من النقاش ..

نوع من الوصاية المستفزة وادعاء الحكمة بصوره مفقوسه ..

وإنت إيه اللى مخليك ممرور كده ياعم الحاج ومحموق لدرجة إنك ياعينى مش قادر تسكت على سير المناقشه ..لو عندك كلمة فى الموضوع تثبت بيها إن الاتنين بيقولوا كلام فارغ , اكتبها واخرسهم .. ولو ماعندكش يبقى تتفضل تخرس إنت وبلاش تبيض ع الخلق !

اتحسم الأمر

بس مش من عبدالرحيم عمرو , لكن من المصرى اليوم النهارده

المقال المشبب بالعواطف الجياشة للأستاذ حمدى رزق

جمال بيفطر

وسبحان من جعل كلمات الأستاذ حمدى تنزل هذه المره ناعمه طرية وسلاما على قلب القراء الوطنيين !

منذ أن بدأت قراءة المصرى اليوم وأنا معجب بأسلوب الأستاذ حمدى ولاأنسى تعليقا لوائل الإبراشى عن أن الأستاذ حمدى يسير فى طريق خاص به وحده ويبدع أسلوبا متفردا فى كتابة العمود الصحفى ..

ثم بدأت ألاحظ أن حماسه ضد الإخوان زائد قليلا عن الحد,ليست المسألة مجرد سخرية أو أسلوب لاذع يفضّله الكاتب .. بل كراهية واضحة وعداء بيّـن

لابأس .. من حق الراجل يختلف مع الإخوان زى ماهو عايز

هوّه أنا يعنى مش عايز بلد ديمقراطى واحترام الرأى الآخر و.. و.. إلى آخر كل الكلام الفارغ اللى بنقوله دايما ونفسنا فيه ..

بس المشكله إن صوت الأستاذ حمدى رزق مابيعلاش غير على الإخوان ولما تيجى سيرة اللى فى إيدهم السلطة بينعم لسانه ويلحس العتب ..

لو كتب عبدالله كمال عشرين سنه مش هيكتب مقال فى جمال مبارك بالعاطفة المشبوبة دى والحنان والرقة دول .. مسألة مواهب برضه !

الأستاذ حمدى بيتكلم بلهجة الناصح الأمين والمرشد للسيد جمال مبارك الرئيس القادم لمصر ..

نظام بقى وزير الملك الحكيم اللى بينصح الملك بالعدل بين الرعية والتزام الصراط المستقيم ..

للأسف نفس اللى حصل من أحمد فؤاد نجم قبل كده ..

أنا باعتبر ده كده أخطر من النفاق المباشر من الصحف القومية ورؤسائها

على الأقل بتبقى عارف إن اللى بيكتب ساعتها خول ومايستاهلش لكن لما يبقى اللعب على كل الحبال ومسك العصاية من كل الأطراف مش من النص بس .. دول بيبقوا أخطر وأخبث ..

مبارك ظالم ومستبد

وكمان غبى وأنانى وطماع إنه عايز يسيبنا لابنه ميراث وتركة

وجمال مستغل وحرامى زى أبوه

ومسئول تماما عن سيناريو التوريث ده وراضى بيه علشان يسرقنا كمان ويدارى على اللى أبوه عمله

وأى كلب يتعامل على إن ده كده قدرنا والمفروض نحاول نستفيد بقى من الوضع على قد مانقدر أو إن مبارك أحسن من غيره وابنه أهوه راجل طيب وماشفناش منه حاجه وحشة وباقى الكلام المستفز ده يبقى يستاهل الحرق مع مبارك وابنه ..

دى حكاية مافيش فيها ديمقراطيه أو رأى ورأى آخر ..

دى مسألة حق وباطل .. ومافيش فيها منطقة رمادي ..

الظلم ماينفعش يتوصف غير بإنه ظلم وماينفعش يتسكت عليه مقابل بعض من العدل ..

وياخسارة الأسلوب المتفرد ياأستاذ رزق ..

 

 

اللى اختشوا ..

ماتوا من زمان سعادتك والله !!

الحاج فتحى سرور قصف الله عمر سيادته وفرّجنا عليه أسبوعين من بتوع يوليه اللى الكهرباء بتقطع فيهم فى عز الضهر بيقول النهارده فى المصرى اليوم إن أولاد سيادته وأحفاد جنابه دخلوا مدارس أجنبيه هربا من سوء المستوى التعليمى للمدارس الحكومية المصرية ..

سرور يهاجم نظام التعليم ويصفه بأنه فاشل وناقص

الباشمهندس فتحى على ماأفتكر كان وزير التعليم قبل مايكبر ويمسك القبّة

يعنى كان المسئول الأول عن التعليم فى مصر !!

وبعدها بقى رئيس مجلس الشعب المسئول عن الأداء النيابى ومحاسبة أى تقصير م جانب الحكومه سواء بقى فى التعليم أو الاقتصاد أو السياسه ...إلخ

من الآخر سيادته يعتبر ميقاتى المباراه الوحيد اللى بيعدّى استجوابات أو يركنها واللى بيشخط فى نواب المعارضه وعروقه تتنفخ ويبقى ياعينى قطّه مغمضّه مع الحزن الوطنى أو أى كلب تبع الحكومة ..

بعد ده كله ييجى سيادته يقول إنه هيفجّر قنبله !!

والله نبقى غلطانين جدا كشعب وكمعارضه لو اتعاملنا مع الناس دى على إنهم بنى آدمين أو إن عندهم أى نوع من أنواع الالتزام أو الضمير ..

دول حراميه ماعندهمش لادم ولاأخلاق ولانخوه .. دول اللى بيقتلوا القتيل ويمشوا فى جنازته -وأمامنا حادث العباره ودور المجلس الموقّر برئاسة كابتن توحه فى إهدار دم كل الشهداء فى سبيل راحة الباشمهندسين اللى ورا ممدوح باشا اسماعيل - ...

الجماعه دول حلال فيهم الدبح !

بس للأسف عندنا مابيندبحش غير نجيب محفوظ .

فرافير

زى ما يوسف إدريس الله يرحمه قال فى المسرحية

احنا فى الدنيا دى سيد وفرفور .. كل مؤهلات السيد إنه سيد مش أكتر ولا أقل

والفرفور مايعرفش غير إنه يبقى فرفور !

وكل سيد فوقه سيد وكل فرفور تحته فرفور

صدق من قال :

الناس مقامات. ومن عرف مقامه, فى الهنا بات !

المحلة .. أى الكبرى

كنت أتوقع أن تنقلب الدنيا هذه المره بعد الاعتصام الثانى لعمال المحلة الكبرى لكن التغطيه الإعلاميه كانت ضعيفة للغاية ..

لاأعلم !! ربما لانشغالى فى الدراسة وعدم متابعتى لنشرات الأخبار أو البرامج التليفزيونيه ..

وربما لأنه حتى جرائد المعارضة التى اشتريتها فى اليومين السابقين لم يزد فيها تغطية الاعتصام على نصف صفحة بالكاد ؟؟

المهم وبدون إطاله .. وجدت تغطية ممتازة جدا جدا من كريم البحيرى على مدونة عمال مصر

هناك الكثير من الصور والفيديوهات وتسجيل شبه حى للأحداث بتطوراتها

من يدرى ربما تكون هذه هى الشرارة الأولى ؟؟

 

 

مدونة عمال مصر

 

 

وهذا فيديو من على المدونة لمحاولة اقتحام الشركة ..

استر يارب !

حكمه

 

عندما يملأ التسامح قلبك

وعندما تمتلىء رأسك بالحكمه

...

 

 

 

هتعرف إن أغلب الناس ولاد كلب مايستاهلوش إنك تحرق دمك عشانهم

!!

 

استغلاليون

بالطبع الحكومة تسعى لإيصال الدعم إلى مستحقيه وعدم إعطاء فرصة للمستغلين والطامعين كى يستفيدوا من الدعم على حساب من يحتاجونه فعلا ..

قرأت منذ قليل هذا الخبر :

إغلاق مخبز لأن صاحبه صرف ٥ أرغفة «مجانية» لكل فقير

ولاحظوا الجزء المهم ده فى آخر الخبر ..

من جانبه، أكد عبدالله بدوي، وكيل أول وزارة التضامن الاجتماعي، مدير مديرية التضامن بالجيزة، أن صرف السلع المدعمة بالبونات المجانية يعد مخالفة للقانون الذي يرفض التصرف في هذه السلع بهذا الشكل، خاصة أنها مدعومة حكومياً.

لاحظوا إن البونات المجانيه دى بونات زكاة أصلا !!

هوّه مستحق الزكاة مش فقير الأيام دى وللا إيه ؟؟

كان ممكن يبقى الموضوع بالنسبة لى بعيد عن الحكومة وممكن تبقى مجرد خناقة أو شد بين الموظف وصاحب المخبز .. أو يكون فيه حاجه مش منشورة زى محاولة تقديم رشوة أو محاولة طلبها .. أو أيا كان إنما كانت المشكلة دى هيبقى سببها  مفتش التموين أو المدير نفسه ,لكن لما وكيل أول وزارة التضامن الاجتماعى .. وزارة إيه ؟؟

التضامن الاجتماعى !! مش التموين أو المالية أو حتى الزراعة !

لما بتاع التضامن الاجتماعى يقول إن ده مخالف للقانون يبقى الموضوع مش مجرد تعنت من مفتش تموين بقى, دى سياسة حكومة ؟

الحكومة اللى مش قادرة تمنع أصحاب المخابز اللى بيسرقوا الدقيق المدعوم ويعملوا به العيش الفاخر واللى مامعهوش مايلزموش وجايه تتكلم وتفرد عضلاتها على الراجل اللى بيساعد فعلا على توصيل الدعم لمستحقيه ..

 

حسبى الله ونعم الوكيل

 

Quote of the Day:
Perhaps the best thing about the future is that it comes one day at a time.
--Dean Acheson

ويأتى رمضان

وتأبى قناة الناس إلا أن تتحفنا ببدعه جديده أعترف أننى لم أتوقعها على الإطلاق ..

نشر فى المصرى اليوم بالأمس هذا الخبر

«الناس» تنظم مزاداً يومياً لمقتنيات الشيوخ.. وتطلق مشروع زواج مجانياً

لم أصدق أن ينقلب الأمر إلى هذه الدرجة وظننت أن فى الموضوع خطأ ما ..

رأيى فى قناة الناس هى أنها تسىء إلى الإسلام بتحويله إلى سلعه جنبا إلى جنب ضمن باقى سلع الفضائيات ..

أغانى أفلام وطبخ وخطب ودين .. وكله بمنطق السوق والزبون دائما على حق ..

بالإضافة طبعا إلى نوع خبيث من الغش بتسويق السلع العادية بأضعاف ثمنها بعد إسباغ الثوب الإسلامى عليها والإيحاء بأن لها "بركة" خاصة وأن شراءها ثواب !!

أما أن يصل الأمر إلى هذا الحد فهذا لم أتوقعه أبدا

متعلقات الشيوخ ؟؟

الكرسى الذى جلس عليه محمد حسين يعقوب ؟؟

أستغفر الله العظيم .. أستغفر الله العظيم

شوية شوية هيعلنوا عن مياه وضوء الشيخ الفلانى للشفاء من الأمرض ..

مااحنا اللى بدعناها من الأول ..

التبرك بالأضرحه وقنديل أم هاشم ومقام الحسين

وآهى القناة الظريفه بتكمّل اللعبه مش أكتر .. سيبك بقى سلفى وللا مش سلفى

وإن كان دلوقتى الفلوس بيقولك لعمل الخير فبكره تبقى لعمل عماره جديده لصاحب القناة وأعوانه من المشايخ الكرام

وممكن يبقوا يخلّوا نص العماره بالتقسيط المريح للشباب المقبلين على الزواج .. وكله فى سبيل الخير يامؤمن

وياترى الكلام ده بيحصل بموافقة مشايخ القناة ومباركتهم وللا بدون علمهم

بما إنى سيىء الظن عادة فأميل إلى الظن أنه بعلمهم وإن لم يكن وكان مازال لدى هؤلاء الشيوخ بعض من الحياء فأتوقع اعتراضا صريحا ومنشورا على هذه المهزلة فمن لم يكن يعلم من قبل فقد علم الآن بعد نشر الخبر فى الجرائد ومعنى صمتهم أنهم موافقون على تحويلهم إلى أصنام جديده وأن تعود بنا قناة الناس إلى جاهلية هم أربابها ..

ورغم أننى أميل إلى السعادة بكشف غطاء جديد عن نوايا القناة الشرهه إلى أموالنا إلا أن الغيظ من هذا الاجتراء غير المسبوق يكاد يطير بصوابى ..

جيمى من ناحية وقناة الناس من التانية .. وطبعا مسلسلات رمضان من باقى النواحى الست

لنا الله يامؤمنين ..

ورمضان كريم رغم أنوفهم جميعا إن شاء الله

ومين عارف جايز على العيد كده نلاقى مبارك وجمال ومحمد حسين يعقوب وسليمان جوده والعادلى ركبوا طيارة واحدة ورايحين يحضروا مؤتمر سرى مع أسيادهم اللى مشغلينهم علشان يقرفونا ويضعفونا -نظرية المؤامرة يعنى- وتقوم الطيارة تقع بيهم وتتحرق فى البحر ورغم كده مايموتوش غير لما ييجى سمك القرش وساعتها نلاقى ممدوح اسماعيل وقع جنبهم من طياره تانيه لوحده من غير ماطيارته تقع وبعدين سمك القرش يقرف ياكلهم ويفضلوا يعوموا لحد مايتعبوا وبعدين يروحوا فى حتة فيها سمك باراكودا وللا اسمه بيرانا باين يقوم برضه يقرف ياكلهم ويشمئز ويرّجع على سمك القرش .. وبعد كده يعوموا تانى لحد مايوصلوا لجذوع أشجار فى وسط البحر ولما يتعلقوا بيها يلاقوها تماسيح رغم إن التماسيح بتبقى فى الأنهار بس وبرضه التماسيح تقرف تبص لهم أصلا .. ويفضلوا يعوموا من غير ماولا واحد فيهم يموت -ماهم ولاد كلب جتتهم منحّسه- لحد مايوصلوا للشط أخيرا فيلاقوا الشعب المصرى واقف مستنيهم بالبلغ والقلل القناوى والقباقيب وهاتك ياضرب م اللى قلبك يحبه لحد مانموّتهم بقى المره دى !!

 

كل سنه وإنتوا طيبين ياجماعه :) 

 

Quote of the Day:

There are two ways to slide easily through life; to believe everything or to doubt everything. Both ways save us from thinking.
--Alfred Korzybski

والآن دور الأطباء

وتكشف الحكومة الرشيدة عن ناب جديد أشد زرقة من أنيابها المعتاده عن طريق وزارة الصحة ..

الجبلي: إلغاء التكليف لـ ٧٥٠٠ طبيب سنوياً.. ولن أتراجع عن تخفيض أعداد الأطباء الجدد

القرار طبعا يتم تداوله منذ فترة بين جنبات الصحف المختلفة..

وشهد منذ أول تصريح للوزير اعتراضا شديدا من جانب نقابة الأطباء ممثلة فى نقيبها حمدى السيد

لكن طبعا لاحمدى السيد -بفرض أنه يستطيع فعلا أن يعترض !!- ولا ألف زيّه يقدروا يقنعوا الحكومة تغيّر رأيها وبالذات لو كانوا بيتكلموا صح !

لو حاولنا نناقش الموضوع بهدوء شوية هنلاقى إن الوزير بيقول إن أعداد الأطباء الجدد أكبر من الاحتياجات الحقيقية للوزارة ومستشفيات الوزارة ..

ولو سلمنا بصحة الفرض ده واعتبرنا إن فيه زيادة فعلا فى أعداد الخريجين من كليات الطب وإن العجز المنتشر فى المناطق النائية بالذات سببه سوء التوزيع مش أكتر يبقى الحل المناسب للمشكلة دى يكون إيه ياترى ؟

الوزير شايف إن الحل هو إلغاء التكليف أو بشكل أشيك تخفيض أعضاء الأطباء المكلفين وتحديدهم ب3500 طبيب فقط من ضمن 12000 خريج

وللى مش عارف يعنى إيه تكليف أقوله إن دراستنا فى كلية الطب بتبقى 6 سنين بعدها ناخد البكالوريوس وبعدين سنه امتياز بتبقى أول احتكاك حقيقى لينا بالشغل فى المستشفيات وبعدين بييجى بقى التكليف وفيه بنكتسب الخبرة الطبية اللازمة علشان نقدر نبقى دكاترة ونعالج الناس مش مجرد زينا زى أى واحد واقف فى أجزجانه وحافظ كام اسم دوا وده للمغص وده للصداع وده للإمساك والتانى للإسهال ... إلخ

معنى إلغاء التكليف إن فيه 7500 طبيب -حسب تصريحات الوزير هيطلعوا للناس من الكلية بشوية كلام نظرى ويادوب بيعرفوا يضربوا حقنه أو يخيطوا غرزة ..

طبعا فيه منهم اللى هيحاول يجتهد ويتعلم على حسابه الخبرات اللى ناقصاه علشان يقدر يبقى دكتور, لكن الأغلب طبعا مش هيبقى معاه أساسا فلوس علشان يتعلم على حسابه فهيتوكل على الله ويعالج فى الناس على ماتفرج والشفا من عند الله يامؤمن ..

وشوية تانيين هيشتغلوا مندوبين مبيعات بقى واللى هيشتغلوا فى مطاعم ومحطات بنزين أو اللى هيبقى حظه حلو هيلاقى صيدليه يقف فيها بنظام 2x1 كشف وعلاج .. دكتور وصيدلى !!

م الآخرهيبقى خريج الطب زى خريج التجارة والحقوق .. إلخ

بس ياعينى دول بيبقوا 4 سنين واقلب .. إنما بقى حبيبنا طالب الطب المجتهد ف 7 سنين عجاف ويرسوا على مافيش

طب مافيش حل تانى ؟؟

مش الأصح والأولى واللى صوت نقابة الأطباء اتنبح طول السنين اللى فاتت وهى بتنادى بتحديد أعداد المقبولين فى كليات الطب من البداية ..

بدل ماأدخّل 10000 طالب أو أكتر كليات الطب كل سنه أدخّل 3 آلاف أو أربعه إنشالله يارب كليات الطب تاخد من 100 %

أو حتى يبقى فيه اختبارات قدرات وللا حاجه للمتقدمين لتقليل أعدادهم أو أى حاجه شبيهه

الفكره إنى أقلل العدد من المنبع وبالشكل ده تقل أعداد الطلبه فى كليات الطب فتقدر الكليات تقدم خدمهتعليميه أفضل ويتحسن مستوى الخريجين وفى نفس الوقت يتعينوا كلهم وتتحقق الفايده للكل

للطالب اللى قدر يتعلم تعليم حقيقى مش كروتة فى الزحمة زى ماهو حاصل دلوقتى

للكليات اللى هيبقى استهلاك مواردها أقل بكتير فتتحسن خدماتها وجودة خريجيها

وللوزارة اللى مش هتضطر تعيّن أعداد أكبر من احتياجاتها وفى نفس الوقت هتستلم خريجين مستواهم عالى

وللمرضى قطعا اللى مش هيقعوا تحت إيدين بهايم أو جزارين مايعرفوش الشريان من الوريد وكله عنهم أنتى بيوتك وخلاص !!

ده المفروض الحل المنطقى لأى حد عاقل وبيفكرّ, لكن على مين ؟

دى الحكومة المصرية بجلالة قدرها .. لازم تدفع رشوة لطلبة الثانوية العامة وأولياء أمورهم اللى دفعوا دم قلبهم فى الدروس علشان يدخلوا أولادهم كلية الطب

وبعد كده تنصب على الطلبة بعد ماطلع ميتينهم فى الدراسة 7 سنين -ومع واحد زى حالاتى 10 سنين وأكتر- وبعدين تقولهم : سورى يادكاتره .. مع نفسكوا ياشباب !!

أنا ماعنديش استعداد أدفع مرتباتكم إنتوا كمان ...

 

القرار هيتطبق على الطلبة اللى دخلوا طب السنه دى يعنى أنا كده كده ماليش دعوه بالليله دى .. تكليفى زى ماهوّه

لكن محروق دمى من المنطق الرخم اللى بتتعامل بيه الحكومة واللى الوزير بيزوّق بيه كلامه وقراراته الغبية

بدل مايضغط على وزير التعليم أو التعليم العالى لتقليل أعداد المقبولين ,لأ ..ده أنا أظلم الطلبة والخريجين وأولياء أمورهم اللى مالهمش حول ولاقوة .. الناس الغلابة دول اللى ورثناهم ونلطّش فيهم براحتنا من غير ماحد يقول لنا تلت التلاته كام ..

ويجعله عامر ياسى حاتم !! 

 

 

Quote of the Day:
So long as you rob Peter to pay Paul, you'll have Paul's support.
--Anonymous

جيمى من جديد

وأنا راجع من برّه من شويّة حوّدت على واحد صاحبى شغال فى مطعم كده أشوف حاجه علشان العشاء

كان صاحب المطعم قاعد يتفرّج على التليفزيون

لقيت جمال مبارك فى التليفزيون وهوّه لابس نص كم فى برنامج بيقدمه المناوى بتاع قطاع الأخبار ..

 ولقيت الراجل صاحب المطعم بيقولى إنه معجب بجمال مبارك وحاسس إنه صادق ؟؟؟؟؟؟؟؟؟

قلتله إن الكلام والأسئلة والشباب اللى قاعدين والردود و .. و..

كل ده بيبقى متجهز قبل كده ومحسوب بالمللى

قال لى بس الراجل بيرتجل مابيتكلمش من ورقه ولا حاجه

قلت له ماهو عمّال بيعيد ويزيد فى نفس الكلام بقى له 3 سنين وعمّال واخد مصر رايح جاى فى مؤتمرات حزن وطنى يعيد ويزيد فى كلام مكرر وكله تفاؤل بدون معنى وبدون فايده .. ده إن كان قرد -بلاش أقول حمار- كان حفظ الكلام  ومابقاش محتاج يقرأ من ورقه ..

قال لى حتى لو كده فالراجل واضح إنه شخصية جاده وبيتكلم بثقة وله مش عارف إيه ؟؟؟

قلت له حاسب شوية ياعم الحاج .. ده لسه من حوالى سنه أو أقل مستضيفينه فى برنامج مش عارف إيه على الأولى برضه وماكانش عارف يتكلم أو يرد.. ولما جابوا بنت صغيره تتصل به و ياأونكل وياعم الحاج الراجل كان وشّه أسفلت وماعرفش يتكلم رغم إن الموضوع متجهز !!

وبعدين شوف كلامه هتلاقى كلام مافيهوش حسم لأى حاجه ..

زى أبوه بالظبط

وبعدين ده لو فيه أى خير ماهو كان ساب البلد ومايبقاش هوّه وأبوه اللى رجّعوها ورا للملكية تانى

لو عايز يخدم بجد كان خدم وهوّه برّه من غير مايدخل الحزب والحكومة

لو مش حرامى كان كشف عن ثروته ومصادرها هوّه وأبوه

لو مابيصرفش من فلوسنا وشقانا كانت رحلاته ومؤتمراته ومشاريعه بانت ميزانياتها للناس وبقت ع المكشوف

لو أمين فعلا ومش كدّاب وتعلب زى أبوه كان نفى التوريث بوضوح وقال إنى مش هامسك البلد ولما أبويا يسيب هيبقى مكانى كذا كذا وشغلى فى الحزب كذا كذا

إنما "أنا لاأنوى ولاأرغب فى ترشيح نفسى" !!!

وحياة أمك سوزان ؟؟؟

وأول كام نفر يأجرهم الحزب الوطنى هتنزل طبعا عن تمسكك وتستجيب لرغبة الشعب يابن الشععععععععععععععععععب  !

 

للأسف يبدو إن الآلة الإعلامية رغم ضحالة أفكارها وتفاهة أساليبها والاستعباط البادى فى وسائلها قد حققت نجاحا برغم كل شىء ...

واحنا كفاية علينا نكتئب !

من كام يوم كنت باتكلم مع ابن خالى اللى شغال أمين شرطة فى الداخلية ..

لاخظت إنه مقتنع فعلا بإن بتوع كفاية دول كانوا هيبهدلوا البلد لو الداخلية سابتهم ؟؟

وإن السودانيين اللى بتوع الأمن المركزى ضربوهم وقتلوهم فى المهندسين كانوا هم طبعا اللى غلطانين ..

ولما حاولت أناقشه وأتكلم عن كفاية كان بيبص لى باستنكار !!!

 

بالمناسبة فيه بنت دلوقتى فى برنامج جيمى سألت شوية أسئلة محترمة

عن إهدار المال العام فى فرق الكورة فى قطاع البترول والرشاوى فى وزارة الثقافة والفساد اللى الحكومة بتقول عليه فى عمر أفندى .. إلخ

سألت فى نقط محدده .. وده ممتاز .. هاشوف كده هيرد عليها إزاى ؟

البداية باينة .. رشيد هوّه اللى بيرد مش جيمى ..

وردّه فى عمر أفندى مستفز .. الحكومة ماتقدرش تديره !!

وفى فرق الكورة .. رد إن الدولة بتدعم الرياضة ؟؟؟؟

وهىّ الفلوس اللى بيرميها الوزير دى كإنها من جيب اللى خلّفوه دى ماعليهاش رقيب ؟

لو الدولة هىّ اللى بتدعم يبقى ليه نادى زى البلدية وللا أسوان بيطلع ميتينه على ماياخد كام ألف .. ونادى زى إنبى وبتروجيت وللا الحرس الفلوس فيها زى الرز ؟؟

وماجبتش سيرة باقى الأندية الغلبانة بحق وحقيقى أو الرياضات المنسية بحق وحقيقى

لعّيب ياسى رشيد

وماجابش سيرة وزارة الثقافة والرشاوى..

وآدى جمال باشا اتكلم برضه واتقلب سؤال البنت من الرقابة على إهدار المال العام فى وزارة محدده زى وزارة البترول إلى أهمية الرياضة ودور الدولة فى دعم الرياضة والأنشطة الشبابية !!

وكده أنا متأكد إن الأسئلة مترتبة ومتفبركة ... برافو عليهم بصراخة الطقم الإعلامى اللى مع الراجل

البنت كانت مقنعة جدا والأسئلة كانت محرجة فعلا وأسلوب كلفتتها ملعوب ياأولاد الكلب

وحتى كانت سألت عن تعيين أبوتريكة فى وزارة البترول وعن إن ده مثال صارخ للوساطه وانعدام الكفاءة

ردّ رشيد وقال أنا باتفق معاكى تماما !!

يعنى إيه ولامؤاخذه .. هتعمل إيه يعنى فى الموضوع ده واللى زيّه ؟هترفد أبوتريكة ؟ وللا هتشد ودان سامح فهمى؟

 

ودلوقتى فى نهاية البرنامج جيمى بيتكلم عن النشاط الطلابى والسياسة

بيقول إن مؤتمر زى اللى همّه عاملينه ده يعتبر توعية ومناقشة للمشاكل و .. و.. ولو المؤتمر ده فى الجامعه يبقى نشاط مطلوب وكافى جدا .. إلخ

لكن نشاط حزبى لأ !!!!!!!!!!!!!!!!!!!!!!!!!!

وهوّه إنت سعادتك جاى بصفتك إيه ؟ وبتروح الجامعة بصفتك إيه ؟

ابن رئيس الجمهورية طبعا .. مش لاسمح الله أمين لجنة السياسات بالحزن الوطنى

لأ وإيه بيقول إنه مش عايزين صراع أحزاب داخل الجامعة ...

طبعا .. كفاية الحزب الوطنى .. وهوّه فيه أحزاب أصلا غيره فى البلد ؟

 

آه ياولاد الكلب

ياولاد الكلب !!

الله يرحمك ياعاطف ياطيب .. ماعادش فى إيدنا غير إننا نصرخ زى حسن سواق الأتوبيس ونضرب بعض ونقتل بعض وإنتوا واكليننا وواكلين البلد فى كرشكم ياأولاد الكلب

ياأولاد الكلب

ياأولاد الكلب

 

 

Hear My Voice

 

 

Once upon a time
Before all this mess began
I never felt alone
All now stolen

Simple and surreal
Was it a world of make-believe
You could take by the hand
And I'd follow

Hear my voice..
Did you see me coming ?
I made the choice
Now I'm running !
Turn me round
Let me go
Take me home.

Never thought I'd see the day
When my life was not my own
I will throw it all away
Without sorrow

But it wouldn't change a thing
Wouldn't change the way I feel
For today is the price I pay
For tomorrow

Hear my voice..
Did you see me coming ?
I made the choice
Now I'm running !
Turn me round
Let me go
Take me home.

Somehow suddenly
It slipped away from me
I reach out, hopelessly
You're gone

Hear my voice..
Did you see me coming ?
I made the choice
Now I'm running !
Turn me round
Let me go
Take me home.

 

Melanie C- Home

 

 

 

Quote of the Day:
Women like silent men. They think they're listening.
--Marcel Archard

وسّعوا من وش العقلاااااااااااء

 

 

 

!! تشويق .. إثاره .. ومتعه

 

 

Quote of the Day:
The deeper that sorrow carves into your being, the more joy you can contain.
--Kahlil Gibran

حبّك جننى يااسمك إيه

 

 الحقنى يامرسى ياأبو العباس

:D

 

Quote of the Day:
Intelligence without ambition is a bird without wings.
--C. Archie Danielson

هؤلاء هزؤونى

كنت ناوى أرد على حازم وأعمل تاجين تلاته أو أشكر شغف على تعليقها اللى أفادنى فعلا -كالعاده !- أو حتى أرد على الست المجهولة اللى سابتلى تعليق جميل وصريح -من النوع اللى باحبه- , لكن جه فى دماغى إنى أكتب عن اللى شتمونى وماقدرتش أرد عليهم !

يمكن دى لعبه صغيرة بالعبها مع نفسى لمواجهة بعض الهجوم اللى فى التعليق الصريح علشان أقول لنفسى إنى مظلوم أو ضحية أو على الأقل أستحق التعاطف -طبعا باتكلم عنى مع نفسى مش قصدى حد من زوار مدونتى الكرام - ويمكن لأنه مجرد موضوع ظريف وجه على بالى فقلت أتكلم فى أى حاجه كنوع من التواصل وآهى ذكريات مسيرى هاحكيها فى يوم من الأيام ..

المهم إن أول واحد أفتكره كان واحد زميلى فى المدرسة واحنا فى تالته ثانوى

كان قاعد فى التخته اللى قدامى على طول وفى مره كنا بين حصتين والفصل مافيهوش مدرّس قال لى ياسافل !!!

قالها والمدرس التانى بيدخل الفصل

قالها وهوّه بيبتسم !!

كانت أول مره فى حياتى -وآخر مره لحد دلوقتى على الأقل - اللى حد يشتمنى باللفظ ده

اتصدمت واتغظت جدا لأنى ماقدرتش أضربه لحظتها -بسبب دخول المدرس - لكن عموما فضلت أكرهه لحد دلوقتى

الأخ ده بالذات لىّ معاه مواقف غلسه كتيره وأنا مؤمن بإن روحى وروحه تباغضوا واختلفوا من أول لحظه قابلته فيها بدون سبب مفهوم وإن كنت لاأذكر أبدا إنى شتمته أو آذيته عن عمد .. أى حاجه يعنى تبرر إنه يشتمنى أو يعمل معايا مواقف غلسه, لكن يبدو إنه من النوع الإيجابى اللى يكره بنى آدم فمايكتفيش بكده وخلاص ..

 

المره التانيه اللى اتشتمت فيها كان راجل كبير فى السن ..

كنت باتمشى أنا وأصحابى عند أطراف البلد .. وكنا متأخر بعد نُص الليل وكنا عند مبنى كده بتاع مهندس رى أو مهندس زراعه أو أى حاجه من الحاجات دى ..

المبنى ده كان له مساحه فاضيه كده وسور منخفض شوية .. فكنا بنهزر مع واحد صاحبنا واستخبيت أنا ورا السور علشان أى لعبه كنا بنلعبها .. مش فاكر بالظبط

المهم لقيت راجل طلع فى شباك الدور التانى من المبنى ده وهوّه بيزعق وبيطردنا

السور بعيد عن المبنى والمبنى نفسه له بوابه مقفوله ومافيش حاجه فى السور تتسرق وماكانش صوتنا عالى ..

وطبعا بدأ يشتم فورا بدون أى محاوله للتساؤل أو الاستفسار أو التمهيد حتى

ياكلب .. دى تحديدا اللى فاكرها .. ممكن يكون قال كمان ياوسخ أو يابن الكلب مش فاكر

المهم إنى برضه اتصدمت جدا .. مش متعوّد أبدا إن حد يشتمنى

حاولت أتكلم معاه بهدوء علشان يبطل شتيمه على الأقل لكن الظاهر إنه كان خايف وفى حالة فزع

ده المبرر الوحيد للحاله العصبيه اللى كان بيشتم بيها دى

اتغظت جدا جدا برضه بسبب الإهانات اللى من غير ذنب دى لكن ماقدرتش أعمل حاجه

 

المره التالته اللى اتشتمت فيها كانت من واحده ست كبيره

مش هاقدر أتكلم عن المره دى بالتفصيل للأسف لكن الست دى أنا باكرهها من زمان

وشتمتنى من غير ماأغلط فيها أو أعمل أى حاجه تضايقها

لكن ممكن نقول إنها خدتنى بذنب غيرى .. وحتى دى كمان أنا مش متأكد منها -إن يكون غيرى أذنب أصلا-

أعتقد إنها من النوع المفترى اللى عايز الدنيا تمشى على مزاجه وتبع إرادته ومصلحته بس وإلا يبقى الناس كلها واطيين وزبالة ويستاهلوا طبعا الشتيمه والتهزيئ لحد مايسمعوا الكلام ..

ممكن أتكلم عنها بصراحه فى يوم من الأيام لما أنضج أكتر من كده شوية وماأخافش من إنى أقول للغوله إنها غوله

هاتبسط من نفسى جدا لما أعبر عن رأيى السلبى فى الناس بصراحة .. طبعا مع الناس الوحشه بجد اللى تستاهل الكراهية فعلا ... مين عارف يمكن أقدر أعمل كده ولو مرّه قبل ماأموت

 

دى المرات اللى أفتكر إنى اتشتمت فيها -طبعا غير المرات  لما أمى كانت تزعّق لى على حاجه غلط عملتها :) - ...

كان فيه مرتين اتحطيت فى موقف مهين نسبيا من جانب الشرطه لكن كانت تحرش بس مش إهانة بالمعنى المغهوم

فرد عضلات لأنه عارف إنى مش هاقدر أعمل معاه حاجه

لكن على الأقل ماحدش غلط فىّ فى المرتين بإهانه أو سباب الحمد لله

يمكن لأنى فى كلية الطب وشكلى ابن ناس !!

أهى فايدة للكلية الظريفه دى اللى الناس بيحسدونا عليها على رأى المجهولة صاحبة التعليق الصريح :)

 

 

Quote of the Day:
Not all chemicals are bad. Without chemicals such as hydrogen and oxygen, for example, there would be no way to make water, a vital ingredient in beer.
--Dave Barry

ع الماشى

وأنا باحاول أقاوم الإفلاس اللى عندى ده فكرت ليه أنا باحاول جامد كده إنى أكتب فى البلوج هنا

ليه باحاول أكتب حاجه تستاهل ؟

ليه باعذب نفسى كل ماأحس إنى باكتب كلام مالوش لازمة ؟

التفسير كان بسيط

لأن نفسى أكون مصدر لسعادة أى حد زى مامدونات كتيييييييييييره قوى باحبها وبازورها بتكون مصدر لسعادتى وخروجى أحيانا من الإحباط أو الملل ..

صحيح إن فيه عوامل تانيه خاصه بإن البلوج ده منفذ لخروج بخار روحى بصورة شبه منظمة كبديل عن الانفجار المتوقع لكن ممكن أنفس عن روحى بدون عناية حقيقية بقيمة اللى باكتبه ..

صحيح أنا لسه لحد دلوقتى مستسلم للكسل القمىء وصحيح إنى لسه ماكتبتش أى بوست يناسب الأهداف اللى عايز أحققها دى ..

لكن على أمل !

على امل إنى فى يوم من الأيام واحد يعدى هنا فيقرأ كلام أنا كتبته ويسعده أو يريحه أو يشد انتباهه أو يخليه يفكر ..

وبشرط إن الواحد ده مايكتبش تعليق هنا زى ماأنا ماباكتبش تعليق فى العادة عند ناس كتير من اللى باتابعهم وبقى لى سنتين تقريبا عايش على كتاباتهم  ..

 

أهو على الأقل عندى كده علامة من علامات الحياة وهى الطموح وربما أجرؤ أن أقول التفاؤل !!

 

 

Quote of the Day:
The happiest people don't necessarily have the best of everything. They just make the best of everything
--Anonymous

الست المناسبة فى المكان المناسب

خبر فى المصرى اليوم ..

 

«مروي» بعد تعرضها للتحرش في الساحل الشمالي: «كان كابوس ومش هاعملها تاني»

 

ومافيش عندى بصراحة غير تعليق واحد :

عقبال دينا !!

 

 

 

Quote of the Day:
Goodness is the only investment that never fails.
--Henry David Thoreau, 19th-century American essayist and nature writer

م الآخر

وهوّه الواحد مش ممكن بكل بساطه يقول :

1- الكسل زاد على حبتين ..

2- قريت نقطة النور من يومين -أخيرا- وعجبتنى طبعا ..

3- أكتر حاجه عجبتنى فى الرواية إن الشخصيات كلها كانت مظلومة ومهزومة منها فيها ! حاجه زى الدنيا كده .. مافيش شرير من بتوع حاجب فريد شوقى .. احنا اللى بنظلم نفسنا, وفى العادة مافيش أخطاء بتتصلح قبل فوات الأوان ..

4- مابقيتش أقرأ زى الأول ..

5- مابقيتش كمان أتفرج على أفلام .. آخرى شوية حلقات Becker أو Scrubs أو حتى Family Guy !!

6- لسه باحمّل فى الفيجوال ستديو دوت نت 2005 برو ..

7- لسه ناوى أرد على الكومنتات اللى سايبها لحد دلوقتى كعادتى الرخمة -تأخير الرد هو الرخم مش الرد نفسه !!-

8- مبسوط أنا قوى من الPlugin بتاع العربى دى :) .. تخيلوا لو كنت مضطر أكتب اللى باكتبه ده مع الذل القديم !!

9- لميت قرشين حلوين بعد النجاح D:

10- لسه باستغرب قوى لما ألاقى حد جديد وصل لمدونتى .. وقرأ شوية كلام من اللى باكتبه.. وبعد كده ساب كومنت ..

أنا لسه فعلا مؤمن 100% إنى باعيد وأزيد فى كلام فارغ مالوش قيمة ولاأهمية .. ساعات باحب اللى باكتبه أيوه وبيعجبنى , بس بابقى برضه عارف إنه كلام فارغ .. ليه بقى أى حد ممكن يهتم بشوية كلام فارغ ؟؟؟

11- سجلت فيلم اسكندرية ليه وكمان فيلم حدوتة مصرية بتوع يوسف شاهين .. وطبعا مستحيل أكملهم باسكندرية كمان وكمان !! ماأقدرش أستوعب أصلا إزاى ممكن يوسف شاهين يتخيل إن عمرو عبدالجليل ده ممكن يعوض عشر محسن محيى الدين ؟؟ , ورغم إن يسرا عملت دور لذيذ وإن مشاهد اعتصام الفنانين فى النقابة كانت جميلة بس الفيلم ده مابطيقوش علشان عمرو عبدالجليل وكمان عشان يوسف شاهين نفسه ..

12- المفروض المدونات اليومين دول تبقى حاجه مفتخره كده .. ياإما تناقش قضايا مهمة أو يكون صاحبها موهوب أو دمه شربات أو يكون حتى عنده صبر إنه يكتب مقال محترم فى أى موضوع أو يكون فنان وبينشر أعماله ...إلخ

إنما أان بقى باعمل إيه فى عالم البلوجات ؟ ياريتنى حتى بقيت أرغى !!

13- حاجه تانيه عجبتنى فى نقطة النور .. تعامل الأبطال مع الفرص الضائعة كان ممتاز .. لما الأم عرفت هى خسرت قد إيه ببعدها عن بنتها وعرفت قد إيه بتحبها ماكانش فيه حوارات مالهاش لازمة أو محاولات ساذجة للتعويض.. الفرصة ضاعت خلاص .. نتعامل مع الواقع بقى والظرف الحالى .. أشوف أقدر أحبها إزاى دلوقتى أو أقرب منها قدر الإمكان ..

14- كنت عايز أكتب عن قرايبى اللى قعدوا كام سنة بيحلفوا إنهم بتاع ربنا والرزق الحلال والتضحية وساعة الجد مسكوا فى الدنيا بإيديهم وسنانهم بس بيتهيألى إن هتطلع لى رسالة من بلوجر تقول لى الموضوع مكرر !!

15- قابلت بلوج هدوء نسبى من عند قلم جاف إمبارح وحملت منه الأغنية الجميلة دى ..

16- عجبنى جدا كلام شغف فى بوستها الأخير وممكن يفرق معايا فى الكام يوم الجايين ..

17 - عايز أعمل لى تاج وللا اتنين زى ماوعدت قبل كده وأنشط بيهم الحاجات شوية ..

18- المفروض هانزل القاهرة قريب بقى أقابل أصحابى وأشترى كتاب جلال أمين الأخير وممكن أتفسح شوية -ماأنا ناجح بقى- بس إمتى ؟

19- المشكلة مش فى التدوين أو المدونة .. المشكلة فى حياتى أنا .. الظاهر النجاح مش نهاية الخط ..

20- كفاية كده بقى ..

 

وبعدين أبعت كل الأفكار غير المترابطه دى وأبقى عملت بوست جديد !

 

 

Quote of the Day:
Reason often makes mistakes, but conscience never does.
--Josh Billings

وحشى

 

تبدو الحيرة فى عينيه بعد كل فريسة ..

عينان ملتاعتان تائهتان ..

لكن حينما ينشب مخالبه فى عنق واحد من أقرانى تنقلب الآية !

ربما تكون اللذة هى ماتبرق بها عيناه .. ربما هى الراحه

لاأعلم إن كانت الحيرة بين كل ضحية فخ آخر وأسلوب خداع أم أن الأمر أعمق؟

ربما لايعرف شيئا سوى أن يتوحش؟ أن ينشب أنيابه فى أجسادنا ..

ربما تكون لمعة عينيه هى متعة تحقيق الوجود وإثبات الذات ؟

بعد كل فريسة يكون الضياع حيث لايتحقق الهدف من وجوده .. لايجد ذاته

لايدرك لحياته معنى أو غاية ..

حتى تأتى فريسة أخرى !

 

نعم.. أنا أفهمه

لكن دورى مازال قادما !

 

 

 

Quote of the Day:
Hurry! I never hurry. I have no time to hurry.
--Igor Stravinsky

البهجة المفقودة

 وفى سبيل كسر الملل وموجة الاعتياد ظهرت نتيجتى خلاص ..

والحمد لله نجحت !

شىء غير معتاد على الإطلاق.. وغير متوقع أيضا لو نظرنا لإجابتى فى مادتين من الأربع مواد ..

اتكلمت عن الرمد والحالة اللى كنت فيها قبل امتحانه وإنى ماقدرتش أذاكر والإحباط اللى حصل لى بعدها

قدرت أعدى إحباط الرمد لكن ماتوقعتش إنى أنجح فيه وفى الطب الشرعى اتكرر عدم المذاكرة لكن من غير إحباط المره دى بس برضه ماكنتش متوقع إنى أنجح فيه ..

المهم نجحت .. وإنها مفاجأة نسبيا !

لكن مافيش فرحة .........

مش مسألة إنى إنسان فقرى .. أمال عايز تفرح إمتى بقى؟ .. إنت وش فقر أصلا ومالكش فى البهجة ..

مش قادر أحدد سبب محدد للبهجة الضائعة ..

ممكن تكون المفاجأة .. لسه مااستوعبتش بس حكاية إن دى أول مرّه من 10 سنين تقريبا آخد أجازة من غير مايبقى عندى امتحان دور تانى .. سواء للتأجيل أو الرسوب ..

حاسس بالراحه بكل تأكيد لأنى مش مضطر أذاكر الرمد والشرعى وأمتحنهم فى الشهر الجاى ..

ممكن يكن لأنى مشغول شوية بحوار خطوبة وجواز ..

آه !! المفروض إنى ح أكتب كتابى أو على الأقل حأتكلم فى موضوع خطوبة بقى ..

التفاصيل ممكن أتكلم فيها بعدين لأنى لسه مش قادر أستوعب الموضوع ده برضه كويس ..

شىء ظريف إن دى حياتى اللى باتكلم عنها ..

إزاى ممكن أمارس حياتى من غير ماأستوعبها كويس؟؟

لكن أنا هنا فى البلوج ده باتكلم مع نفسى فى الأساس ولازم أكون أمين شوية

أعتقد إنى مرعوب من المسئولية .. علشان كده مش راضى أستوعب لامسألة النجاح ولا الارتباط ..

لسه طبعا ماعالجتش مشكلة الهروب من المواجهة دى

السنة دى كانت بروفة فى الامتحانات ونقدر نقول إنه تدريب مش بطال, لكن لسه كتير

حاسس بملل تانى وزهق وأنا باكتب الكلام ده دلوقتى لكن طبعا هانشره برضه

ممكن أحاول أتكلم بوضوح بعد ماأهدأ شوية وأستوعب اللى حاصل

المهم إنه كنوع من التسجيل .. نجحت فى سنة رابعة طب بتقدير جيد -أهوه أحسن من مقبول برضه !!- من الدور الأول لأول مره من ساعة مادخلت الطب وانتقلت رسميا لصفوف السنة الخامسة

ونصيحة لأى حد معدّى إنه لو لقانى فاتح عيادة رمد مايجيش يكشف عندى !!!

المفروض إن عندى كده أجازة شهر وشوية .. ح أسجل هنا إنى بإذن الله المفروض أتعلم فيهم الفيجوال بيزيك دوت نت

ماينفعش أبدا إنى لحد دلوقتى مااتعلمتوش وماأعرفش أى لغة برمجة

وآدينى باكتبها هنا كنوع من الإلزام والتذكير !!

وكنهاية باسجل إنه حتى لو كانت البهجة مفقودة فأهوه على الأقل هم وانزاح !

وبدل مايبقى عندى كذا مشكلة يبقوا كذا مشكلة ناقص واحد :)

 

 

ملحوظة أخيرة مش قادر أتجاهلها للأسف ..

لما واحد زيى ماذاكرش كويس ومذاكرته بس كانت فى فترة الامتحانات ينجح فى كلية المفروض إنها بتتعامل مع حياة الناس زى كلية الطب مهما كان الواحد ده دماغه نضيفه أو ذكاؤه مش عارف إيه فده يبقى مؤشر غير صحى على التعليم الجامعى فى مصر !!!!

فقرى فقرى .. أنا عارف !

 

Quote of the Day:
By and large, language is a tool for concealing the truth.
--George Carlin

معضلة

 

 

 

كيف يمكن أن تستمر بعد سن العشرين بدون أن يقتلك الملل ؟

 

 

 

 

Quote of the Day:
Sincerity is the highest compliment you can pay.
--Ralph Waldo Emerson

عبث

 إذا كنت مش طايق نفسى, فيه حد ممكن يطيقنى أو يطيق يقرأ الكلام ده ؟

ممكن يكون ده بسبب الجو الظريف ده اللى مش قادر أستوعب إن فيه أى حد عاقل له إيدين اتنين وعشر صوابع ممكن يحبه, بس -وياللدهشه - فيه ساسو بتحبه !

ماأعتقدش إن الأربعه بيحبوه .. أنا ظنى فى ساسو أحسن من كده

 

ممكن يكون بسبب الإحساس بالعبث من الفساد والمفسدين

كل ماأفتح جرنال أو أتفرج على أخبار بابقى مذهول من كم الصفاقة والاستعباط اللى عند مبارك والخكومة وأعوانهم

بجد بجد ماببقاش عارف أقول إيه !

قرار زى بتاع وزير الاتصالات والتسعيرة الجديدة للدى إس إل

نكت صفوت الشريف فى اجتماعات شباب الحزب الوطنى ومطالبته إياهم بإزاحة الناس المعتقة -بتشديد التاء وكسر الميم- اللى فى الحزب وأول المعتقين طبعا هو مبارك !!!!

وللا مقال أسامة سرايا الظريف اللى اضطريت أقراه فى عدد الجمعه اللى فاتت عن الثورة

فى أول المقال بيقول إن الثورة مستمرة وفى الوسط بيقول اتطورت وفى آخره بيقول الثورة انتهت وحصل بعدها ثورتين تلاته كمان !!

مهزلة الجراكن وللا نفيخة الختان اللى فرقعت مره واحده

حدوتة الثانوية العامة وكليات القمة وللا إلغاء التكليف عن الأطباء

مؤتمر مش عارف إيه اللى مع الاسرائيليين وللا تصريحات أبو الغيط الهزلية عن غضبة المصريين !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

ومش كفاية كل علامات التعجب دى والله

ده احنا غلبنا القذافى ..

وعلى سيرة القذافى .. آل إيه بيقولك الخارجية الليبية بعتت تعترض على قرار العفو عن الممرضات والطبيب الفلسطينى !

والنبى صحيح ؟؟

أمال كنتوا فاكرين إن بعد الهيصة دى كلها كانوا هيعدموهم مثلا ؟

ماكانوا سابوكم إنتوا عدمتوهم من الأول !

وللا صورة شفتها فى الجرنال لبوش مع جنديين فقدوا سيقانهم فى العراق

الاتنين ماشيين جنبه بأطراف صناعيه وهو ماشى فى النص .. قمىء وغبى

والجنديين أغبى !

عبث فى عبث

والدنيا حر ومش طالبة ..

Quote of the Day:
If at first you don't succeed, skydiving is not for you.
--Francis Roberts

سيد بيه السيد

فى مسرحية وجهة نظركانوا جماعة من المكفوفين فى مؤسسة خيرية لصاحبها سيد بيه السيد

الإداره كانت فاسدة ومختلسة من أول المدير لحد الفراش

ولما لاقوا الورق اللى بيثبت فساد إدارة المؤسسة كان طبعا الرأى الأول إنهم يبعتوا الورق ده لصاحب المؤسسة سيد بيه السيد بما إن هو الرأس الكبيرة واللى فى إيده الحل والربط

قبل مايتصدموا طبعا بعد كده باكتشاف إن كل الفساد ده بعلمه وإرادته ومشاركته كمان

وضع مشابه للدولة المصرية حاليا

ناس كتيره قوى لسه معتقده إن الحل فى إننا نوصّل المعلومات والمشاكل للسيد رئيس الجمهورية

على اعتبار طبعا إن كل الفساد والظلم بيحصل بدون علم الرئيس

مش معقول طبعا إن اللى فى إيده كل السلطات يبقى فاسد أو راعى للفساد !

العقل مابيقبلش الحقيقة دى أصلا ..

لازم يكون فيه أمل -حتى لو كاذب- علشان نقدر نعيش

حتى أنا شخصيا رغم إيمانى التام بتورط السيد الرئيس وعائلته فى الفساد كليا وجزئيا وبالوارب كمان ماباستوعبش الفكرة دى .. عارفها آه لكن مش قادر أتقبلها ..

لو انكشف الواقع شديد السواد هنلاقى أعداد المنتحرين أكتر من بتوع السويد

مش هيبقى فيه معنى لكفاح فساد أى موظف أو مسؤول إذا كان حامى الحمى وراعى الرعاة فاسدا ..

ساعتها إنت اللى ح تتحاكم مش الموظف الفاسد

بالظبط زى اللى حاصل دلوقتى

وممكن أقول إن دى فائدة الصحافة المنافقة والإعلام الحكومى

إنهم يغطوا على الحقيقة المرعبة دى ويسيبوا الأمل واليقين بتحقيق العدل وسط الناس اللى مش فاهمة

****

بالمناسبة صحيح ..

فى المسرحية وبعد انكشاف فساد الجميع من صاحب المؤسسة للإدارة أتى الحل والمواجهة بمساعدة Mrs Box

بطريق غير مباشر طبعا هو إنها ألغت المساعدات اللى كانت المؤسسة بتاخدها على حس المكفوفين

المسرحية كانت من تأليف لينين الرملى فى قراءة سياسية ممتازة لحال كافة دول العالم الثالث تقريبا

ورغم كل ده لقيت واحد مره فى منتدى من المنتديات بيشتم لينين الرملى وبيقول عليه حرامى وتافه وحاجات كده !!

 

Quote of the Day:
An argument is the longest distance between two points of view.
--Dan Bennett

ضابط شرطة

موقف قدييييييييييييم قوى معلّق معايا بقى له كام يوم

كنت فى الابتدائى أنا وأخويا-أصغر منى بسنتين- وكنت فى الشرطه المدرسيه

كانت مهمتنا إننا نقف على البوابة لحد ماييجى ميعاد دخول المدرسة فنفتحها للتلاميذ وبعدها ننظم الطابور وماإلى ذلك من الأعمال التنظيميه

طبعا واحنا واقفين على البوابة ممنوع إننا ندخّل أى تلميذ قبل ميعاد الدخول

حتى لو كان التلميذ ده أخويا طبعا !

ابتدائى آه بس فيه مبادىء

فى يوم بقى كنا فى الشتا والدنيا طين واقف على البوابة كالعاده وأخويا ضمن التلاميذ الواقفه وناس أصحابى تانيين

أخويا كان عايز يدخل طبعا قبل باقى العيال وقبل الميعاد

كان يادوب تانية ابتدائى وأخوه فى الشرطة المدرسية بقى -تقولش المحافظ ياخىّ !!- فعادى يعنى إنه مايهتمش بحاجه اسمها مبادىء وحاجات من دى

والعيال أصحابى واقفين طبعا يلقحوا كلام على اعتبار إنى أكيد هادخّله قبل الميعاد

وقبل الجرس مايضرب بدقيقة تقريبا دخل أخويا من البوابة من غير ماآخد بالى وجرى على المدرسة جوّه

جريت أنا وراه وشديته من المريلة فوقع على الأرض فى وسط الطين

وساعتها بالظبط رنّ الجرس ودخل باقى التلاميذ يجروا حوالينا

 

موقف من أسخف المواقف اللى فعلا باندم عليها

ده ماكانش التزام منى قد ماكان مبالغة فى مثاليات عبيطه ومبادىء غير عملية

فيها إيه لو كنت سبته ؟ وكنت بعد كده آخد بالى كويس علشان مايجريش منى تانى

أنا كنت مدرك كويس إن خلاص الجرس هيضرب

وهوّه كمان كان عارف إنه خلاص علشان كده دخل يجرى

حاسس بالذنب من يومها وباتمنى لو الزمن رجع تانى

كنت هاسيبه المره دى

 

Quote of the Day:
Critics are like eunuchs in a harem. They're there every night, they see it done every night, they see how it should be done every night, but they can't do it themselves
--Brendan Behan--Quoted by Gyles Brandreth in *Theatrical Disasters*

Live Writer

ولكل من يعانى من مشكلة الكتابة باللغة العربية فى بلوجر العزيز نقدم الحل الذى وجدته مؤخرا ..

حمّل برنامج Windows Live Writer من الرابط المباشر ده

البرنامج ده ممتااااااااااااااااااااز فعلا للكتابة والتنسيق والتنظيم على جهازك براحتك -بالذات طبعا لو إنت لسه فى جحيم الديال أب- وتحفظ اللى إنت عايزه وتنشره فى الوقت اللى إنت عايزه ... إلخ

بس البرنامج لوحده مابيحلش مشكلة الكتابة بالعربى

محتاج برنامج Text direction change وده عباره عن plugin للبرنامج الأساسى

ده رابط تحميل مباشر

هتلاقى بقى فى البرنامج الرئيسى بتاعه كده على اليمين insert RTL Block

تختار دى يامحترم وبعدين تكتب براحتك بالعربى .. تلاقى بقى العلامه دى !

فى مكانها آخر السطر من غير ماتبقى مضطر تزود كلمة وللا اتنين علشان ماتلاقيهاش نطت على يمين السطر ...

والنقط كمان فى مكانها ..

ولو كتبت إنجليزى وسط العربى Like This مش هتلاقى العملية اتشقلبت والسطر انقسم نصين بدون داعى !

حلم واتحقق ياأولاد

 

طبعا فى البرنامج مزايا تانية كتيرة وفيه كمان Plugins  تانية كتيرة ممكن تضيف وظايف تانية تخلى الكتابة على البلوج متعه !

باقى الPlugins تقدروا تشوفوا تفاصيلها وتحملوها من هنا

 

Quote of the Day:
He who does not prefer exile to slavery is not free by any measure of freedom, truth and duty.
--Kahlil Gibran

سمير سمير يعنى

والله كنت ساعات باحس إنى ظلمت الأخ سليمان جوده بسوء ظنى فيه وفى كتاباته فى المصرى اليوم ..

خصوصا فى الكام يوم اللى فاتوا دول اللى كان فيهم بيتكلم بقى عن الفساد وأنواعه وأشكاله

وقبلها التعليم وأهمية التعليم ...إلخ

صحيح إن الأخ سمير رجب بجلالة قدره كان برضه بيهاجم الحكومة والفساد قبل أن يسبح بحمد الرئيس بس مش شرط يعنى تكون قراءتى لمقال أو اتنين سليمة

ممكن أكون مغرض أو غير ديمقراطى !

المهم قرأت مقال النهارده الظريف بتاع النهارده

الرئيس يتخيل !

سعادة الباشمهندس شاف الريس فى حفل تخريج مش عارف إيه وهوّه قاعد سرحان

عادى يعنى .. الراجل كبر وإن ماكانش هيقعد سرحان بحكم السن وعدم التركيز فممكن مثلا يكون مزنوق لاسمح الله وقاعد سرحان بيفكر فى عذر يقوم بيه يدخل الحمام من غير ماحد يقول حاجه !

وللا يكون عطش فجأة وهوّه قاعد فافتكر إنه قرأ فى الجرايد ... آه .. سورى .. افتكر إنه شاف فى قناة من القنوات ناس عطشانة ياعينى كده وواقفين بالجراكن وقافلين الطريق ..

المشكله إنه نسى يسأل أم علاء عن الناس دى وبلد إيه الواطيه دى اللى مش عارفه حتى تسقى الشعب ؟!

وللا سرحان مثلا فى المؤتمر الجاى للحزب وخطط التنمية اللى بتجرى على قدم وساق -بتزحف يعنى!- وإزاى نقنع الشعب بإنه رغم إنه مش لاقى يأكل ومش عارف يشتغل ومش عارف يتجوز ويلاقى سكن ومش عارف يعلم العيال ومش عارف يتعالج ومش عارف ومش عارف ومش عارف ..

إزاى نقنع المواطن الجاهل ده إن البلد فل الفل وإن الاقتصاد تمام التمام وسياسة الحكومة عشره على عشره !

طبعا المهمة صعبة لأن المواطن المذكور جاهل مابيفهمش !

وللا حتى يمكن يكون سرحان فى الفزورة الظريفة بتاع شركة الاتصالات والدى إس إل

شركة الاتصالات تقدر تقلل سعر خدمة الإنترنت السريع DSl

والعملاء اللى هم المواطنين اللى هم احنا عايزين يقللوا سعر الخدمة

والشركات نفسها اللى شغاله فى السوق عايزه تقلل سعر الخدمة

بس وزارة الاتصالات رافضه تقلل سعر الخدمة !!

ماهى فزورة برضه وتستاهل الريس يسرح فيها من غير مايعرف لها حل !

 

الأخ سليمان ساب كل الاحتمالات دى وقعد يتخيل بقى الرئيس كان سرحان فى إيه

مش هاقدر بجد أانقش احتمالاته العبقرية والإنسانية اللى ماأعتقدش إنه حتى سمير رجب قدر يتخيلها بالعمق الإنسانى الفظيييييييييييع ده

كفاية بس الجملة الختامية المذهلة فى نهاية المقال :

صورة الرئيس في حفل الكلية الجوية علي وجه التحديد، كانت حافلة بشتي المعاني، وكانت مغرية، بأكثر من قراءة. وكانت موحية للغاية!!.

 

خدتوا بالكوا من مووووووووحية للغاية دى ؟

والله إنت اللى مووووووووووووووووحى ياسى جودة

 

 

Quote of the Day:
Pessimist: One who, when he has the choice of two evils, chooses both.
--Oscar Fingall O’Flahertie Wills Wilde

أنغام الحقيقية

 

من دفاترى القديمة

بما إنى لسه فى امتحانات ومنغمس فى مشاكلى ومشاغلى الخاصة كانغماس اللقمة فى صحن البامية

قلت أنتهز الفرصة وأجيب هنا كلام كنت كتبته قبل كده فى منتدى روايات نت وشايف إنه المفروض يبقى فى مدونتى هنا

كان وليد فتح موضوع بعنوان
من منكم يقدر على فتح أبوابه المغلقة
استلهاما من فكرة فى رواية "أسطورة إيجور" لد. أحمد خالد توفيق
كان فى صيغة أسئلة زى التاج كده وإنت تجاوب
وهنا دلوقتى هانقل ردى الطوييييييييييييل كوبى وبيست !

 

المواجهه !!

هذا الموضوع يحتاج للشجاعه بكلّ تأكيد فليس من السهل أن تطرح عيوبك أو مخاوفك أو حتى ذكرياتك على الملأ هكذا بدون مواراه أو خداع ...

ولكن هناك تحفّظ صغير على مسألة الأبواب المغلقه فى أسطورة إيجور فأنا لم أقتنع بأن معرفة الإنسان المفاجىء لأسوأ عيوبه أو غرائزه يقود لمثل هذا الانهيار الكامل كما حدث فى الروايه !!

ربّما أفهم أن ينهار الشخص ويتداعى عندما يُكشف للآخرين ويرى أن عيوبه ومثالبه وانحطاطه لم يعد سرا خافيا على أحد لكن أن ينهار هو لاكتشاف هذا ؟!

إنّه يعرف حقيقته ويدرك تماما أنّه - مثلا - مجرّد وغد شره يُغلّف رغباته وشهواته بقناع زائف ليتفادى حساب الآخرين أو لومهم , القناع أو المداراه تكون بالنسبه للناس وليس لنفسه , ربّما يتناسى دوافعه الحقيقيه وشرّه لبعض الوقت ويُقنع نفسه بالغلاف الزائف فقط ليتقن التقمّص والتمثيل أمام الناس لكنّه لن ينهار أبدا عندما يتذكّر لأنّه أبدا لم يجهل حقيقته وحقيقة نفسه !

معذره للاستطراد ولنعُد للموضوع ..

انتهيت منذ قليل من قراءة كل الردود على الموضوع - وشاهدت ردّك ياعزيزى وليد على الأسئله العشره الأولى - وكنت بين كلّ ردّ وردّ أذكر موقفا ما من المواقف التى حدثت لى سواء أخطائى أو مواقف محرجه أو مؤلمه ....إلخ

وكلّما تذكّرت موقفا ما أكتب عنه نبذه مختصره كى لايضيع منّى حين أرُدّ وعندما انتهيت من القراءه وجدتنى قد سوّدت بقلمى حوالى ثلاث صفحات

لم أنْهَرْ بالطبع - راجع حديثى عن أسطورة إيجور - ولكنّى الآن مضطر للانتخاب والتصفيه لكل هذه المواقف و الاكتفاء بموقف - أو اثنين - لكل سؤال , ولنبدأ ...

السؤال الأول: ما أسوأ شىء فعلته فى حياتك...و تود لو لم تكن قد فعلته؟(يجب أن يكون عملا سيئا ..لا عملا عاديا ندمت عليه)

كانت هذه بالطبع أكثر المواقف فلدىّ الكثير من الأخطاء والمواقف التى تمنّيت لو يعود بى الزمن للوراء حتّى لاأفعلها , عموما سأختار موقفين أعتبرهم من أسوأ أخطائى لأنّنى آذيت فيهم غيرى بخلاف معظم أخطائى التى لم تضرّ أحد سواى!!

الأوّل : كان موقف وأنا فى تالته إعدادى , كنت رئيس الفصل وكنت الأوّل على الفصل وكنت فتوّه من فتوّات الفصل - والله العظيم مابافشُر وكل ده حقيقى - وفى مرّه من المرّات كنت داخل الفصل وأنا فى حاله غريبه . كنّا فى الفُسحه ومش فاهم كان مالى يومها ! , المهمّ دخلت الفصل لقيت واحد من زملائى قدّامى وبيبتسم لى , انهلت عليه ضربا بقبضتىّ فى بطنه !!!
كان قويا لكنّ ضرباتى كانت مفاجئه وقويّه جدا فانهار باكيا من الألم .
لم يكّن قد آذانى مطلقا من قبل ولم يضايقنى بل ولاأذكر أن أحدا غيره ضايقنى يومها , وحتى الآن لاأفهم الدافع أو السبب !
ولم أعتذر له ..
ولكنّى أتمنّى - وبإذن الله سيحدُث - أن تُتاح لى الفرصه لأقابله وأطلب منه أن يسامحنى وأعتذر له حتى يفعل

الثانى : المرّه دى كان فار- ماوس بالإنجليزى - !!!!

كُنا طلعنا على الأراضى الزراعيّه جنب القريه بتاعنا - كنت فى تانيه أو تالته ثانوى - علشان ناكُل توت - اللى دود القزّ بياكُل ورقُه ده - كان عندنا شجره كبيره زرعها جدّى الله يرحمه من زمان ودايما التوت بتاعها بيبقى جميل وبنروح كلّ سنه هناك والمرّه دى كنّا رايحين أنا ومجموعه من زملائى الصُبح بدرى حوالى الساعه سبعه أو سبعه ونص ولمّا وصلنا عند الشجره لقينا هناك فار نايم جنبها !
كان فار رمادى كبير وكان نايم لحدّ الساعه دى فى منطقه مكشوفه واللى رايح واللى جاى كلّهم بيعدّوا عليه ولا هوّه هنا , طبعا قلنا هنموّتُه وده مش غلط طبعا لأنّه من الحيوانات المؤذيه جدا لينا وللأرض بس لو ضربناه هيصحى ويجرى وغالبا مش هنعرف نمسكه ونقتله فقررت إنّى أخنُقُه !!!
قرّبت بإيدى بهدوء علشان مايصحاش ومرّه واحده مسكته من رقبته بصوابعى - الإبهام والسبابه والوسطى - علشان أخنقه , صِحِى طبعا وقعد يتلوّى فى إيدى بعُنف لكن أنا كنت ماسكُه كويّس .
فى اللحظه اللى صِحِى فيها وبدأ يقاوم اتفاجِئت !! مش بالظبط اتفاجئت لكن حسّيت بألم وصُعُب علىّ الفار جدا لكن ماقدرتش أسيبه , كنت خايف من مخالبه وأسنانه وكنت مقروف منّه ومن ملمسه , ماكنتش عايز أى جزء غير صوابعى يلمسه . طب مسكته وخنقته ليه ؟
ماكانش فى بالى إنّه هيقاوم , ماكنتش منتبه أبدا إنّى هاخُد روح كائن حىّ!!
ماأخدش كتير على مامات لأنّى لمّا لقيت إنى مش قادر أسيبه شدّيت أكتر بصوابعى علشان أ خنقه أسرع وبعد مامات رميته بعيد عن الطريق والشجره ..
وكلّ ماأفتكر منظره وهوّه بيموت فى إيدى باتخنق وأكره اللحظه دى !
الواحد صحيح بيقتل النمل والصراصير والذباب و كمان ممكن الفراخ والبط والأرانب لكن مابيحُطّش فى دماغُه أبدا إن دى كائنات حيّه فيها الروح وإنّك لمّا بتموّتها روحها دى بتطلع ..
لو فكّرت فى الموضوع من الناحيه دى بيبقى صعب علىّ إنّى أموّت النمله أو الناموسه - فاكرين فلسفة النافاراى بتاع النمر والثعبان والنار ! - رغم إنّك بتبقى مُدرك مدى الضرر اللى ممكن تسبّبه الناموسه والضيق والقرف اللى بيعمله النمل لكن علشان تموّتهم بدون تردّد أو ألم مابتعتبرهمش أبدا كائنات حيّه , بتعتبرهم حشرات - فاهمين قصدى ؟ - , فى اللحظه اللى خنقت فيها الفار دى انتبهت فجأه للحقيقه السخيفه دى .
وكلّ ماأفتكر الموقف ده أتمنّى فعلا لو كنت طردته وخلاص أو حدفته بطوبه علشان يصحى ويهرب وكنّا خِلِصنا !

السؤال الثانى: ما هو أكثر المواقف إحراجا لك فى حياتك؟

الحقيقه تاريخى مليان - برضُه !! - بالمواقف المحرجه بس هانتخب منها موقف واحد حصل فى الثانوى ,فى تالته ثانوى بالتحديد ...
كان مدرّس الفيزياء قال لنا إننا هنراجع فى يوم معيّن وأنا كان من عادتى إنّى ماباذاكرش أبدا طول السنه وأذاكر يادوب قبل الامتحانات بكام يوم وطبعا ماكنتش أعرف أى حاجه فى منهج الفيزياء اللى علينا - رغم إننا كنا فى الترم التانى - , الحقيقه كان كل اللى أعرف فيه هو الإنجليزى ومن معلوماتى العامّه كمان مش من المنهج . المهمّ إنّى برضه ماذاكرتش ليوم المراجعه ده على أمل إن الحصّه تخلص قبل الدور ماييجى علىّ فى الأسئله !!
وطبعا ده ماحصلش , ولمّا الدور جه علىّ وقفت والأستاذ سألنى و طبعا أنا مافيش و اللى زاد وغطّى إن الأستاذ ده بالذات كان بيحترمنى جدا على اعتبار إنى من الأوائل وبيعتبرنى من أنجب الطلاب على مستوى المدرسه - ماأصلى كنت جايب فى تانيه ثانوى 99.8 - بالمستوى الرفيع طبعا - ده غير إنّه كان يعرفنى معرفه شخصيّه . ده كُلُّه وأقف قُدّامُه كده !!
طبعا غششنى الواد اللى جنبى أى كلام كده وقلت أى حاجه . الأستاذ عدّاها وقال لى بإحباط وقرف " طب اقعد اقعد " وحمدت ربّنا جامد جدا إنّه ماقالّيش كلمتين فى العضل زى ماكان بيقول للى مابيجاوبش .

وبالمناسبه كان فيه موقف كان ممكن يبقى بدايه لموقف محرج جدا لكن الحمد لله ربّنا ستر , كُنّا ماشيينى فى الجنازه بتاع جدّتى وكانت فى الصيف أو كان يوم الجو فيه كان حارّ شويّه واحنا كنا بعد صلاة الضُهر .
أنا كنت ماشى جنب النعش وفجأه لقينا وزّه - اللى هىّ كانت بطّه قبل الشيطان مايوزّها !! - جت مش عارفين منين وبتتمشّى تحت النعش فى الضلّ !!
وفضلت ماشيه تتمخطر بقى وتتمرجح تحت النعش يمين وشمال والناس طبعا ماشيين فى منتهى الوقار وماينفعشى واحد منهم يجرى ورا وزّه علشان يطردها من تحت النعش ! , فيه اتنين تلاته حاولوا محاولات وقوره كده إنّهم يهشّوا الوزّه لكن الظاهر إنّها ماكانتش بتعترف بحاجه اسمها وقار أو كانت بتشجُبُه بسّ - الله أعلم - لكن النتيجه واحده وهىّ إنّها ادّتهم الطرشه وفضلت ماشيه تتمخطر !
كلّ ده وأنا ماسك نفسى من الضحك بالعافيه أو حتّى من الابتسام , شوفوا إنتوا بقى لو واحد ضحك وللا ابتسم فى جنازة جدّته , ماهو مش كل الناس شايفه الوزّه تحت النعش بقى والوزّه بنت الّذين زىّ ماتكون بتغيظنى وبتمشى بمنظر فى منتهى الكوميديا لحدّ ماربّنا ستر و سابتنا ومشيت من تحت النعش قبل ماكنت خلاص هاضحك وتبقى فضيحه !

السؤال الثالث: ما الموقف الذى جعلك تشعر بالإحباط و العجز و قلة الحيلة؟

أعتقد أنّ العجز دى كبيره شويّه . ماأعتقدش إنّى وصلت فى أىّ مرّه للشعور ده , دايما كنت بابقى عارف إنّ دى مش النهايه ولو الموقف شخصى أو مشكله خاصّه بيبقى عندى أمل دايما إن بكره أحسن حتّى لو مش عارف إزّاى !!

ممكن مثلا نقول موقف من اللى خلانى أحسّ إن سعد باشا زغلول -الله يرحمه - كان عنده حق لمّا قال " مافيش فايده " !!

كنت فى أولى ثانوى وكنت رئيس فريق من الطلائع - واحد فى نفس سنّى وتلاته أصغر بسنه - فى مسابقه ثقافيّه , كانت المسابقه عباره عن دورى من أربع أو خمس لقاءات و المجموع تراكمى - يعنى اللى بناخده كل لقاء بيتجمع على اللى قبله - وكنّا احنا لغاية قبل اللقاء الأخير فى المركز الأوّل لكن بفارق مش كبير عن الفريق اللى بعدنا . المهمّ كان من ضمن الأسئله فرع فى المعلومات العامّه وكان سؤال واحد عليه عشر درجات كاملين ..
السؤال كان " ماهى آخر حرب فى تاريخ العرب المعاصر ؟ " كده بالنصّ . الكلام ده كان فى منتصف التسعينات تقريبا , وطبعا كانت إجابتنا حرب الخليج !
لكن على مين , السيّد المُحكّم معاه ورقة إجابه بتقول إن آخر حرب فى تاريخ العرب الحديث هى حرب أكتوبر 1973 !!
تجيب يمين تجيب شمال تشرح وللا تزعّق وللا تعمل نوم العازب حتّى مافيش فايده . وأنا هاتجنن وأنا شايف مجهود شهر وزياده بيضيع كده بدون سبب غير الغباء والجهل والبيروقراطيّه - لاحظوا تمسّك السيّد المُحكّم بنموذج الإجابه اللى نازل له من الإداره ! -
وخسرنا وطلعنا ..
بدون تعليق

السؤال الرابع: ما هو أكثر المواقف إيلاما فى حياتك حتى أنك بكيت فيه كالأطفال؟

الأمر معقّد هنا قليلا فالسؤال يشترط الألم كدافع للبكاء , بالطبع سواء أكان الألم ماديا أو معنويا . نفس النتيجه !
وبالطبع أفترض أن هذا الموقف قد حدث لى وأنا ناضج وإلا لما كان السؤال " كالأطفال " وتبعا لذلك فلا أكاد أذكر موقفا ما بكيت فيه نتيجة ألم ما !
منذ فارقت الطفوله لم أعتد البكاء أبدا لألم جسدى أو عضوى و أمّا من ناحية الألم النفسى نتيجة التأثر بموقف ما أو حدث ما فلا أعتقد أن الألم كان الدافع لأنّها جميعها - حسبما أذكر - لم تكن مباشره أبدا . عموما سأذكر ثلاث أو أربع مواقف أذكر أننى بكيت فيها لمدّه طويله , وأنا لاأبكى أبدا بصوت عال أو صراخ ! فإذا كان هذا شرطا للسؤال فإجابتى ستكون بالسلب فإذا تغاضينا عن شرط علوّ الصوت هذا فسأقصّ عليكم المواقف ...

الأوّل : فيلم " الراقص مع الذئاب " فى أولى مرّات عرضه على التليفزيون المصرى - كان هذا منذ فتره طويله - كنت قد تعايشت تماما مع بطل الفيلم وصداقاته للذئب ثم للهنود الحمر وللحياه البسيطه التى وجد نفسه فيها أخيرا وفجأه أتى باقى الجيش ببنادقهم ومعدّاتهم وحضارتهم الشرسه وحينما شاهدوا الذئب يحوم حول المعسكر - بحثا عن صديقه - تسابقوا فى إطلاق النيران عليه , الذئب لايبتعد ولا يخاف رغم الإصابات المتلاحقه وهم مستمّرون فى إطلاق النار - دون أن يسبب لهم أى أذى أو تهديد - بل وجعلوا الأمر مسابقه بينهم عمّن سيقتله منهم . كدت أصرخ فى شاشة التلفيزيون " ياغبّى اهرب دول وحوش " - للذئب طبعا - . بكيت بشدّه طوال المشهد وموت الذئب .

الثانى : فيلم " الأسد الملك " . مشهد قتل سكار ل موفازا , كنت باتفرّج على النُسخه المدبلجه وعبدالرحمن أبو زهره كان شرس فى دور سكار - عمّ سيمبا - كان دبّر مؤامره استدرج فيها سيمبا لممر مقفر ومنخفض بين الجبال وقاد قطيعا من الجاموس الوحشى إلى هذا الممر بواسطة أعوانه الضباع .
كان قطيع الجاموس مندفعا كالقدر ! , سيل عارم لايقف أمامه كائن من كان , وأتى موفازا لينقذ سيمبا الذّى تعلّق بشجره ذابله فى منتصف الممرّ متحدّيا هذا الرعب الهائج وبالفعل ينجح فى الخروج به إلى جانب الممر بمعجزه لكن سيل الجاموس يجذبه بعيدا عنه فلا يراه سيمبا , يحاول ببساله وينجح فى التعلق بجانب الممر فى منطقه أخرى ويحاول الصعود والنجاه . وهنا يظهر سكار فيهتف به " سكار , أخويا .. ساعدنى " وهنا تكون الصدمه . أخوه , من لحمه ودمّه يغرس فجأه مخالبه فى يديه المتشبثتين بالجدار ليلقى به وسط القطيع الهائج وعلى وجه سكار نجد كل مايمكنك تخيّله من شر وجشع وطمع ونذاله , وفى المقابل لانرى على وجه موفازا سوى الصدمه والمفاجأه .. ربّما عدم الفهم كذلك !!
هذا أخوه !
أخوه!
أن تأتى الطعنه من درعك الذى تحتمى به !
الخيانه أشدّ وطأه على النفس من أى شىء سواها ..
أكثر مايؤلم أن تجد الغدر ممّن تعتبره صديقا أو مواليا فما بالك لو كان أخوك هو من يخون ولم يخن فى موقف أو حرب بل تراه يقتلك !!
يقتلك بيده التى انتظرتها ممدوده لتساعدك ..
لم أستطع مقاومة الدموع التى انهارت بغزاره طوال هذا المشهد والمشهد الذى يليه حينما يجد سيمبا جثّة أبوه موفازا ويهتف به ليستيقظ ويردّ عليه !

الثالث : هذه المرّه أغنيه أو هو أوبريت " الحلم العربى " وأقصد بالطبع النُسخه الأصليه وليست تلك المبتسره التى أذاعها التليفزيون فى بدء الانتفاضه الثانيه ..
الأغنيه ملأى بالمشاهد التى ملأتنى بالحزن والقنوط لكن ثلاث لقطات لاتفارقنى و لم أستطع مقاومة البكاء فيها , أولها مشهد لدبابه اسرائيليه فى اجتياح لبنان وأحد الاسرائيليين يظهر من برجها رافعا بيده علامة النصر . بكيت كمدا وغيظا وعجزا !!
ثانيها أيضا فى لبنان والطيران الاسرائيلى يقصف البيوت والقرى , كان أبٌ يعدو حاملا طفله الصغير وخلفه ابنته - الأكبر قليلا تعدو وتصرخ فى فزع قاتل . مشهد الطفله وهى تجرى بهذا الذعر والفزع . إنّها طفله . طفله !!
طفله وخلفها الموت ..
ثالثها كان فى العراق أثناء الحصار ولافته على قبر تحمل جمله واحده
" وداعا أولادى الأربعه "
!
تبًا !

لكن يجب أن أكمل الموقف الرابع الآن ...

الرابع : هذا الموقف حدث قريبا - منذ عام تقريبا - ولى وليس فى التلفاز هذه المرّه , كانت جنازة جارنا وهو رجل كبير السنّ تزوّج ثلاثه من أولاده وتخرّج الرابع من كليّة الطبّ فى حياته أى أنّه فى هذه السنّ التى لايكون الموت فيها مفاجأه أو صدمه وخاصة وقد كان مريضا ..
سارت الجنازه حتى وصلنا لقبره ووقف أحد الشيوخ يعظ الواقفين ويدعو للميت بالرحمه . كان للميت أخّين والاتنين أولادهم متجوّزين ومخلّفين , اشتعل منهم الرأس شيبا كما يقال ورغم ذلك وجدتهم يبكون بحرقه شديده جدا .
كانت وجوههم وعيونهم قد احمرّت من شدّة البكاء . وصوت بكائهم عال , لايستطيعون التماسك .. ذُهلت ووجدتنى أبكى بحرقه خاصة حينما شاهدت ابن جارنا الأصغر - لايزال طالبا - وهو ينهار هو الآخر باكيا .. لم أستطع كتم الدموع ووجدتنى أقاوم الانهيار بصعوبه !

السؤال الخامس : ما هو التصرف أو العمل الذى وددت لو كانت لديك الشجاعة الكافية للقيام به؟

إنّى أحوّل من كليّة الطبّ وأروح آداب اسكندريه أو المنصوره !!!

بسّ للأسف مش هاقدر أعمل كده .

السؤال السادس: ما هو أسوأ عيوبك؟

طيب أختاره ده إزّاى ؟!
أنا فعلا مليان عيوب - مش من ضمنها الطيبه على فكره - لأنّى مش طيّب !!
عموما نقول منهم شويّه كده ..
كنت هاقول الغرور لكنّى ماأعتقدش إنّى حقيقى مغرور .
الغرور إنّك تفتكر إنّك أذكى وأحسن من كلّ الناس ..
أنا باعتبر نفسى أذكى وأعقل من معظم الناس !!
هناك فرق
لمّا باأسمع رأى أصحّ باعترف بده ولمّا أقابل شخص أذكى - وده نادر لمّا بيحصل - مابتبقاش مشكله إنّى أعترف لنفسى إنّه أذكى!

يمكن من أقوى عيوبى فعلا الكسل وعدم الطموح ..
بالإضافه لإنى شخص مُحبط - بكسر الباء - وغالبا مُملّ !!
وعيوب تانيه إنتوا أدرى بيها منّى ...

السؤال السابع: ما الأمنية التى تتمناها , مع علمك بأنك لا تستطيع تحقيقها؟

هافترض هنا إنّها من ضمن الحاجات الممكنه ورغم كده مش هاقدر أحقّقها
يعنى مثلا مش هاقول إنّى أكون على جزيره كامله وكبيره لوحدى بدون أى بشر أو رائد فضاء أو ضابط مخابرات أو حاجه من دى ..
الحاجه اللى ممكن أسعى لها وأحقّقها بظروفى وإمكانيّاتتى الحاليّه ورغم كده عارف إنّى مش هاحقّقها هىّ إنّى أقوم برحله حول العالم ولكل الدول على درّاجه أو حتّى ماشى !!!
ربّما أيضا أن أجلس ذات يوم فى الشرفه وبجوارى شريكة حياتى التى أحببتها واخترتها مستمتعين بالهدوء والسكينه وأضمّها إلى صدرى بحبّ وتستكين هى فى دعه - طبعا باتكلّم عن واحده ستّ مش قطّه !! - . لاأعتقد أن هذا سيحدث أبدا , لأ مش علشان بيتنا مافيهوش بلكونه !!
أنا بإذن الله هابقى أبنى أو أشترى بيت فيه بلكونه . لكن علشان أغلب ظنّى إنى هاعيش حياتى وحيد إلى النهايه وهذه ليست نظره سوداويه أو متشائمه بل نظره واقعيّه تماما بالنظر إلى طباعى وعاداتى .

السؤال الثامن: ما هى أسوأ لحظة فشل فى حياتك؟

امم !!
هذا بالذات أصعب الأسئله بالنسبه لى رغم أن لحظات فشلى كثيره جدا بطريقه مذهله ! , سواء دراسيا أو عاطفيا !!
من الممكن أن نقول أن أسوأ لحظات فشلى لم تأت بعد لأننى حتى الآن نجحت فى احتمال كافة اللحظات السابقه وأسوأ لحظات فشلى بكل تأكيد ستكون تلك التى لن أستطيع تحمّلها أو تخطّيها .

السؤال التاسع: متى رغبت فى الموت؟

لاأعتقد أننى رغبت قطّ فى الموت , ربّما تمنّيت يوما لو لم أولد قطّ لكنّى أبدا - حسبما أذكر - لم أتمنّ الموت مهما كان الألم أو كانت المعاناه التّى أمرّ بها

السؤال العاشر: ما رأيك فى هذه الأسئلة و واضعها؟
رأيى فى الأسئله واضح فى ردّى السابق أمّا عن صاحبها فلا أعتقد أنّ الكلام يُفيد فى مثل هذه الحالات

 

 

آاااااه أنا تعبت من العشره الأولانيين دول جامد !!

علشان كده هاختصر شويّه فى العشره التانيين - وخصوصا إنّ الأسئله نفسها تشجّع على الإجابات المختصره بخلاف العشره الأولانيين -

-1- متى ندمت على عمل خيّر قمت به ؟

لاأذكر أننى ندمت على عمل خيّر قمت به أبدا !

ربّما لندرة تلك الأعمال الخيّره
إلى جانب أننى أعلم بالطبع أن عمل الخير لايجوز الندم عليه أبدا مهما حدث ومهما كانت عواقبه لأنّك أساسا لاتفعله لغرض معيّن بل تفعله لأنّك لابدّ أن تفعله ! , مسأله ليس فيها اختيار ليكون هناك ندم .

-2- ما هو اكثر عمل سىء كدت ان تفعله ثم تراجعت بإختيارك رغم ان السُبُل كانت ميسرة لك لتقوم به ؟

لم تُتح لى فُرص كثيره فى الواقع لأقوم بأعمال سيّئه

-3- ما هو أكثر شىء تخشاه ؟

ممكن نقول إنّها صوره فى خيالى باخاف منها بعنف!
إنى أبقى متكتّف ومحطوط فى مكان ضيّق جدا - صندوق مثلا - بحيث ماأبقاش قادر أتحرّك أبدا أو أحرّك أىّ طرف من أطرافى - , ده أكتر وضع مُفزع بالنسبه لى .

-4- ما هى الصفات المتناقضة الموجودة بك ؟

مش فاهم إزاى يعنى صفات متناقضه ..
يعنى صموت ورغّاى مثلا ؟ أو متواضع و مغرور ؟
إنت فيك دايما كل الرغبات والصفات المتضاده ودايما فى حالة صراع بين الخير والشرّ ومش دايما صفه واحده اللى بتكسب , دايما ممكن أكون صادق جدا فى كلّ حاجه لكن فى موقف معيّن تلاقينى كذبت سواء نتيجة ضغط معيّن أو نتيجة حساب خاطىء !
وبكده ممكن تعتبر إن عندى كلّ الصفات المتناقضه

-5- هل وُضِعَ مبدأ أو أكثر مما تؤمن به موضع اختبار عملى ؟ ( اى انك تعرضت لموقف مثلا يظهر فيه مدى ايمانك بالمبدأ او التزامك له من عدمه )

كان هناك موقف ما وتكرر مرتين ..
فى امتحان ماده من المواد التى رسبت فيها كثيرا وكانت إجابتى ضعيفه ولست متأكدا إن كانت ستكفى لنجاحى وجاءت المراقبه علينا وأخبرتنى أن أنتقل من مكانى إلى جانب طالبين آخرين لأنقل ماينقصنى من إجابات ..
كنّا احنا التلاته فى اللجنه وكان مكانى أنا فى آخر اللجنه لوحدى وكانوا همّ بيغشّوا من أوّل الامتحان لكنّى رفضت أتنقل وأغشّ
ونجحت الحمد لله بدون غشّ فى الماده دى وكنت مبسوط من نفسى

لكن للأسف فى الدور التانى كان عندى مادّه تانيه كنت سقطت فيها كتير برضُه وكانت دى آخر فُرصه بالنسبه لى ياإما أنجح يا إمّا أسيب الكليّه نهائيا - طبعا لو علىّ أنا أسيبها فورا لكنّهم فى البيت هنا هينصدموا جامد - ..
وبرضُه كنت قاعد لوحدى فى آخر اللجنه وجت ورقة الأسئله وكانت الأسئله صدمه بالنسبه لى , وحتّى الأسئله السهله اللى جت فى الأجزاء اللى كنت مذاكرها كويّس لقيتها اتبخّرت من دماغى ولقيت فجأه إن كلّ المجهود اللى بذلته والقرف والتعب .. كلّه هيضيع فجأه , ساعتها كان عندى استعداد للغشّ وحاولت أقول للمراقب لكنّه رفض وقال لى بسّ اكتب اللى إنت عارفه وربّنا يوفّقك !!
كنت منهار طول التلات ساعات بتوع الامتحان وباحاول أكتب أى حاجه أفتكرها وروّحت يومها وأنا فى منتهى اليأس والقنوط لكن بعها الحمد لله جاوبت كويّس جدا فى العملى ولقيتنى نجحت فى الماده دى وعدّيت السنه وفضلت فى الكلّيه
صحيح ماغشّيتش يومها فى الامتحان لكن أنا كنت عايز أغشّ والمراقب هوّه اللى منعنى !

-6- هل تشعر بالرضا عن حالك و عالمك المحيط و ظروفك عامة ؟ و لماذا ؟

بالطبع لا , لماذا ؟ راجع كلّ ماكتبته !!

-7- هل تملك ان تقول و انت تتذكر تجاربك العاطفية : هذا كان حب مراهقة , و هذا كان حبا ناضجا ؟

نعم أستطيع هذا بوضوح !

-8- هل تشعر أنك تملك كنوزا لا تراها ؟

لا , أعتقد أننى أعلم جميع إمكانيّاتى جيدا , فقط لاأستخدمها .

-9- هل تبكى أحيانا دون أية اسباب مفهومة ؟

لا . ربّما تصيبنى حاله ما من الاكتئاب أو الضيق لأسباب غير مفهومه أمّا البكاء فلابدّ من سبب وسبب قوى كذلك .

-10- هل تعرضت احيانا لإنفعالات عكسية ؟ بمعنى ان تكون فى موقف يستحق البكاء فتضحك او العكس ...

لا . لم يحدث هذا أبدا حسبما أذكر

وبهذا أنتهى أخيرا من هذه التجربه الشاقّه ..

الحمد لله

 

 

معلومة أخيرة إن الكلام ده اتكتب فى سبتمبر 2004

ومعلومة بعد الأخيرة إنى كنت عايز أعمل الأسئلة دى تاج وأبعتها لحبايبى وأنكّد عليهم شوية  :)

 بس قلت حرام عليك ياواد .. إنت داخل على امتحانات وعايز ربنا يكرمك

ابعد عن الشر دلوقتى !!

 وعلى هذا الأساس ..هابعته بعد الامتحانات إن شاء الله :)